ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តំណាង​រាស្ត្រ​បារម្ភ​អំពី​កង្វះ​ច្បាប់​គ្រប់គ្រង​អាជីវ​កម្ម​រ៉ែ​ប្រេង​ និង​ឧស្ម័ន


រដ្ឋសភានៃប្រទេសកម្ពុជា។
រដ្ឋសភានៃប្រទេសកម្ពុជា។

ភ្នំពេញ៖ក្រុម​តំណាងរាស្ត្រ​បាន​សម្តែង​ការ​ព្រួយ​បារម្ភ​អំពី​កង្វះ​ច្បាប់​មួយ​ចំនួន​សម្រាប់​ការ​គ្រប់គ្រង​ការធ្វើ​អាជីវ​កម្ម​រ៉ែ​ប្រេង​ និង​ឧស្ម័ន​ នៅពេល​ដែល​ប្រទេស​នេះ​គ្រោង​នឹង​ចាប់ផ្តើម​ធ្វើ​អាជីវ​កម្ម​រ៉ែ​ប្រេង​ និង​ឧស្ម័ន ​នៅ​ក្នុង​ឆ្នាំ២០១២។​ ក្រុម​តំណាង​រាស្ត្រ​ទាមទារ​ឱ្យ​រដ្ឋាភិបាលបង្កើត​ច្បាប់​ឱ្យ​បាន​ច្បាស់​លាស់​ និង​ត្រឹមត្រូវ​ ដើម្បី​គ្រប់គ្រង​ធនធាន​រ៉ែ​ប្រកប​ដោយ​តម្លាភាព​ ការ​ទទួល​ខុសត្រូវ​ និង​ប្រសិទ្ធិ​ភាព​ ដើម្បី​ជៀសវាង​បណ្តាសា​ប្រេង។​ ​មន្ត្រី​ជាន់​ខ្ពស់​រដ្ឋាភិបាលបាន​និយាយថា​ ​រដ្ឋាភិបាល​កំពុង​តាក់តែង​សេចក្តី​ព្រាង​ច្បាប់​មួយ​ចំនួន​សម្រាប់​គ្រប់គ្រង​ការធ្វើ​អាជីវ​កម្ម​ធនធាន​រ៉ែ​នៅ​កម្ពុជា។

នៅ​ថ្ងៃ​សុក្រ​នេះ​ ​ក្រុម​តំណាង​រាស្ត្រ​នៃ​ប្រទេស​កម្ពុជា​បាន​ទទូច​ឱ្យ​រដ្ឋាភិបាល​បង្កើត​យន្តការ​សម្រាប់​ គ្រប់គ្រង​ការ​ធ្វើ​អាជីវ​កម្ម​រ៉ែ​ប្រេង​និង​ឧស្ម័ន​ឱ្យ​បាន​គ្រប់គ្រាន់​ និង​ត្រឹមត្រូវ​មុន​នឹង​ចាប់ផ្តើម​បូម​យក​រ៉ែ​ប្រេង​ និង​ឧស្ម័ន​នៅ​ក្នុង​ឆ្នាំ​២០១២​ខាងមុខ​នេះ។

ប្រទេស​កម្ពុជា​គ្រោង​នឹង​ចាប់ផ្តើម​ធ្វើ​អាជីវ​កម្ម​រ៉ែ​ប្រេង​ និង​ឧស្ម័ន​នៅក្នុង​ឆ្នាំ២០១២​ខាងមុខ​នេះ​ ខណៈ ​ដែល​ប្រទេស​នេះ​កំពុង​ប្រឈម​នឹង​កង្វះ​ច្បាប់​សម្រាប់​គ្រប់គ្រង​ការធ្វើ​អាជីវ​កម្ម​រ៉ែ​ប្រេង​និង​ឧស្ម័ន​ ប្រកប​ដោយ​តម្លាភាព​ និង​ប្រសិទ្ធិ​ភាព​ ដើម្បី​ជៀសវាង​បណ្តា​សា​ប្រេង។

លោក​ជាម យៀប ​ប្រធាន​គណៈកម្មការ​សេដ្ឋកិច្ច​ និង​ហិរញ្ញវត្ថុ​នៃ​រដ្ឋសភា​ បាន​ជម្រាប​លោក​គាត ឈន់​ រដ្ឋមន្ត្រី​ក្រសួង​សេដ្ឋកិច្ច​ និង​ហិរញ្ញវត្ថុ​នៅក្នុង​កិច្ច​ប្រជុំ​ជាមួយ​ប្រធាន​គណៈកម្មការ​រដ្ឋសភា​ថា​ តំណាង​រាស្ត្រ​តែងតែ​មាន​ការ​ត្អូញត្អែរ​អំពី​កង្វះ​យន្តការ​គ្រប់គ្រង​ការធ្វើ​អាជីវ​កម្ម​រ៉ែប្រេង ​និង​ឧស្ម័ន​ ខណៈ​ដែល​ប្រទេស​កម្ពុជា​កំពុង​ត្រៀម​ខ្លួន​បូម​យក​រ៉ែ​ប្រេង ​និង​ឧស្ម័ន​នៅ​ក្នុង​ឆ្នាំ​២០១២​នោះ។

«គណបក្ស​នយោបាយ​ទាំង៥​ នៅក្នុង​រដ្ឋសភា​ច្រើន​ត្អូញត្អែរ​ថា​ ​តំណក់​ប្រេង​ទីមួយ​ដែល​ត្រូវ​បាន​បូម ​យក​មក​ប្រើប្រាស់​ដំបូង​នៅ​ម៉ោង​១២យប់​ថ្ងៃទី១២​ ខែ១២ ​ឆ្នាំ២០១២​ ត្រូវ​មាន​ច្បាប់​គ្រប់គ្រាន់​ដើម្បី​ប្រើប្រាស់​ឱ្យ​ចំទិស។ បើ​យើង​មិន​មាន​ច្បាប់​គ្រប់គ្រាន់​ និង​ត្រឹមត្រូវ​ទេ​ ​យើង​នឹង​មាន​កំហុស​ ឬ​ទទួល​រង​នូវ​បណ្តា​សា​ប្រេង»។

លោក​ជាម យៀបបាន​រំឭក​ថា​ ​ដោយសារ​កង្វះ​ច្បាប់​គ្រប់គ្រង​ការ​ធ្វើ​អាជីវកម្ម​ធនធាន​រ៉ែ​ និង​អំពើ​ពុករលួយ​ ប្រទេស​នីហ្សេរីយ៉ា​ ប្រទេស​អ៊ូហ្គាន់ដា​ ប្រទេស​ម៉ូហ្សាំមប៊ិក ​និង​ប្រទេស​សូម៉ាលី​ នៅតែ​ប្រឈម​នឹង​ភាព​ក្រីក្រ​កាន់​តែ​ខ្លាំង​ឡើង​ ​ខណៈ​ដែល​ប្រទេស​ទាំង​នេះ​បាន​ទទួល​ប្រាក់​ចំណូល​ពី​ការ​ធ្វើ​អាជីវ​កម្ម​រ៉ែ​ប្រេង ​និង​ឧស្ម័ន​នោះ។

លោក​ជាម យៀប​បាន​បន្តថា​ ​យើង​ត្រូវ​យក​គំរូ​តាម​ប្រទេស​រុស្ស៊ី ​ប្រទេស​ចិន​និងប្រទេស​ឥណ្ឌូនេស៊ី ​ដែល​គ្រប់គ្រង​ការធ្វើ​អាជីវ​កម្ម​រ៉ែ​ប្រេង ​និង​ឧស្ម័ន​របស់គេ​បាន​ទទួល​ពរជ័យ​ប្រេង​ ​ដោយសារ​ប្រទេស​ទាំងនេះមាន​ច្បាប់​បី​សំខាន់​៖ ទីមួយ​ ច្បាប់​ស្តីពី​ការគ្រប់គ្រង​ប្រេង​ និង​ឧស្ម័ន​ ទីពីរ ​ច្បាប់​ស្តីពី​ការ​យក​ពន្ធ​លើ​ការ​ធ្វើ​អាជីវ​កម្ម​ប្រេង​ និង​ឧស្ម័ន​ និង​ទីបី​ ច្បាប់​ស្តីពី​ការ​យក​ពន្ធ​លើ​ប្រាក់​ចំណេញ​នៃ​ការធ្វើ​អាជីវ​កម្ម​រ៉ែ​ប្រេង​ និង​ឧស្ម័ន។

លោក​គាត ឈន់ ​រដ្ឋមន្ត្រី​ក្រសួង​សេដ្ឋកិច្ច​ និង​ហិរញ្ញវត្ថុ​ បាន​ថ្លែង​ថា​ ​រដ្ឋាភិបាល​កំពុង​តែ​ដំណើរ​ការ ​តាក់​តែង​សេចក្តី​ព្រាង​ច្បាប់​មួយ​ចំនួន​សម្រាប់​គ្រប់គ្រង​ការធ្វើ​អាជីវ​កម្ម​រ៉ែ​ប្រេង ​និង​ឧស្ម័ននេះ។​ ​រដ្ឋា ភិបាល​ត្រូវ​មាន​គណនេយ្យ​ភាព​ក្នុង​ការធ្វើ​អាជីវ​កម្ម​រ៉ែ​ប្រេង​ និង​ឧស្ម័ន​នេះ ​ចំពោះ​រដ្ឋសភា។

ក្រុម​ហ៊ុន​បរទេស​ចំនួន​២៣​ត្រូវ​បាន​ផ្តល់​សិទ្ធិ​ឱ្យ​រុករក​រ៉ែ​ប្រេង​ និង​ឧស្ម័ន​នៅក្នុង​សមុទ្រ​កម្ពុជា​ ​ ប៉ុន្តែ​ មិន​មែន​ក្រុមហ៊ុន​ទាំងអស់​នោះ​កំពុង​ប្រតិបត្តិការ​រុករក​ធនធាន​រ៉ែ​នោះទេ។

លោក​សុខ អាន ​រដ្ឋមន្ត្រី​ប្រចាំ​ទីស្តីការ​គណៈ​រដ្ឋមន្ត្រី​ បាន​បញ្ជាក់​ប្រាប់​សមាជិក​សភា​គណបក្ស​ ប្រឆាំង​ថ្មីៗ​នេះ​ថា​ ​ក្រុម​ប្រេង​ Total ​របស់​ប្រទេស​បារាំង​បាន​ចំណាយ​២៨​លាន​ដុល្លារ​អាមេរិក​ឱ្យ​រដ្ឋា ភិបាល​កម្ពុជា​ដោយ​និយាយ​ថា​ ​២០​លាន​ដុល្លារ​អាមេរិក​ត្រូវ​បាន​ចំណាយ​ជា​ប្រាក់​រង្វាន់​ចុះ​ហត្ថលេខា​ ​៦លាន​ដុល្លារ​សហ​រដ្ឋ​អាមេរិក​បាន​ដាក់​ចូល​ទៅ​ក្នុង​មូល​និធិ​សង្គម​ និង​២លាន​ដុល្លារ​សហ​រដ្ឋ​អាមេរិក​គឺ​សម្រាប់​ដំណើរ​ការ​រដ្ឋបាល៕

XS
SM
MD
LG