តទៅនេះជាបទសម្ភាសន៍រវាងលោកវីអូអេជាមួយលោកម៉ុង ឫទ្ធី ដែលបដិសេធការចោទប្រកាន់អំពីការបូមខ្សាច់។
លោកសុខ ខេមរា៖ ការដែលជីកខ្សាច់អញ្ចឹងទៅធ្វើឱ្យប៉ះពាល់បរិដ្ឋាន។ នេះជាការដែលធ្វើមុខជំនួញធម្មតាឬក៏ជាការមួយដែលរដ្ឋាភិបាលផ្តល់អាជ្ញាបណ្ណគ្នាទៅវិញទៅ មកធ្វើជំនួញហ្នឹងឬក៏យ៉ាងម៉េចបាទ?
លោកម៉ុង ឫទ្ធី៖ដំបូងខ្ញុំសូមអរគុណ ហើយខ្ញុំសុំប្រាប់ថា ខ្មែរត្រូវតែមានសិទ្ធិដឹកនាំប្រទេស ខ្លួនដោយខ្លួនឯង។ ចាត់ចែងវាសនាប្រទេសដោយខ្លួនឯងទី១។ ទី២ទៀត ការដែលខ្ញុំធ្វើកំពង់ផែ ហើយខ្ញុំបូមខ្សាច់ស្តារប្រឡាយឆ្លូងនេះតាំងពី២០០៣មករហូតដល់ថ្ងៃហ្នឹង តែអត់ដែលបាននាំចេញទេ មកពីខ្សាច់ហ្នឹងអត់ជាប់ ត្រួតពិនិត្យ? ហើយដល់ពេលផ្សាយថា ខ្ញុំហ្នឹងនាំចេញរាប់លានតោនអញ្ចឹងទៅ អាហ្នឹងមានភ្នែកអត់ប្រស្រី ចុះកិច្ចសន្យាមែន តែវាអត់ គេអត់យកដោយសារគុណភាពវាអត់ជាប់ គុណភាពវាអត់ជាប់។
លោកសុខ ខេមរា៖ អញ្ចឹងប្រទេសសិង្ហបូរីហ្នឹងមិនមានការទិញខ្សាច់ពី(កម្ពុជា)យើងទេ ដោយរបាយការណ៍ហ្នឹងចេញមិនត្រឹមត្រូវទេ មិនមានការស៊ើបអង្កេតទេ?
លោក ម៉ុង ឫទ្ធី៖ អត់យើងទេ ខ្ញុំអត់ដឹងទេ។ ខ្ញុំនិយាយតែខ្លួនខ្ញុំ មិនបានដឹកខ្សាច់ទៅឱ្យសិង្ហបូរីទេ ដោយសារខ្សាច់ហ្នឹងគេអត់យក ដោយសារគុណភាពវាអត់ជាប់ ត្រួតពិនិត្យ របស់គេហ្នឹង។ កុំអីក៏គេយកដែរ។ ខ្សាច់អត់គុណភាពនោះ បាទ?
លោកសុខ ខេមរា៖ ខ្សាច់ដែលលោកឧកញ៉ាថា អត់មានគុណភាពហ្នឹងនៅត្រង់កន្លែងណា ប៉ូមនៅត្រង់ណាបាទ?
លោក ម៉ុង ឫទ្ធី៖ ខ្ញុំមានសិទ្ធិបូមតែស្តារប្រឡាយឱ្យកប៉ាល់ចូលផែតែប៉ុណ្ណឹង។ លើសពីហ្នឹង ខ្ញុំ អត់មានបូមផង។ ក្នុងសមុទ្រអត់មានគឺខ្ញុំបូមតែឱ្យកប៉ាល់ចូលផែ។ អាប្រឡាយ ហៅថា ព្រែកឆ្កែព្រូសហ្នឹង។ប៉ុន្តែបូមហ្នឹងតាំងពីឆ្នាំ២០០៣ មិនមែនទើបឥឡូវទេ។ តែគ្រាន់តែស្តារធ្វើម៉េចឱ្យកប៉ាល់ចេញចូលបាន។ តែស្តារតែ១ម៉ែតកន្លះទេ ហើយគេថា ខ្ញុំនាំខ្សាច់ចេញហ្នឹង អានេះគេចេះតែថា អញ្ចឹងទៅ។
លោកសុខ ខេមរា៖ មានការចោទប្រកាន់ថា អាជ្ញាបណ្ណប៉ូមខ្សាច់ហ្នឹងត្រូវបិទដោយលោកនាយករដ្ឋមន្ត្រី ប៉ុន្តែលោកឧកញ៉ា និងលោកឧកញ៉ា លី យ៉ុងផាត់នៅតែមានអាជ្ញាបណ្ណហ្នឹង ដោយ សារតែមូលហេតុអីបាទ?
ម៉ុង ឫទ្ធី៖ មូលហេតុខ្ញុំគឺរដ្ឋាភិបាលឱ្យខ្ញុំសាងសង់ផែសមុទ្រ ដល់ទឹករាក់រដ្ឋាភិបាលបានឱ្យបូមចេញ ដល់បូមខ្សាច់ហ្នឹងឱ្យកប៉ាល់ចូលខ្ញុំសុំនាំខ្សាច់ហ្នឹងទៅលក់ ហើយបង់ពន្ធជូនរដ្ឋ។ ប៉ុន្តែតាំងពីរដ្ឋអនុញ្ញាតមក វាអត់បាននាំចេញទេ។ អាហ្នឹងឱ្យច្បាស់អញ្ចេះ។ ហើយខ្ញុំសូមជម្រាបថា រដ្ឋាភិបាលកម្ពុជាមានគយ មានកាំកុងត្រូល មានអីទាំងអស់ ហើយបើនាំចេញមិនអាចគេចភ្នែកសមត្ថកិច្ច បានទេ។ ត្រូវតែបង់ពន្ធជូនរដ្ឋទើបនាំចេញបាន។ រឿងគេ ខ្ញុំអត់ដឹងទេ តែរឿងខ្ញុំ ខ្ញុំអត់បាននាំចេញទេ។
លោកសុខ ខេមរា៖ លោកឧកញ៉ាគិតយ៉ាងម៉េចជាមួយអង្គការ Global Witness?
ម៉ុង ឫទ្ធី៖ មិនបាច់អង្គការ Global Witness ទេ អាVOA ក៏ដោយ អាស៊ីសេរីក៏ដោយ។ ថ្ងៃមុនផ្សាយថា ខ្ញុំឈូសស្រែប្រជាជននៅដុំក្រឡនោះ គឺវាអត់ពិតទាល់តែសោះ។ ខ្ញុំមិនទាំងមាត់ផងមាត់អី បើខ្ញុំអត់មាន(ស្ថានីយ៍)វិទ្យុ។ មានស្រែឯណានៅដុំក្រឡ? ខ្ញុំឈូសរៀបចំផ្ទះសម្បែងឱ្យប្រជាជននៅ មិនមកជួយផ្សាយ ទៅជាផ្សាយថា ខ្ញុំទៅឈូសស្រែប្រជាជនទៅវិញទៅ។ បាទខ្ញុំហ្នឹងសើរើរបាយការណ៍ហ្នឹងឡើងវិញ។ មិនដឹងថា ខាងខ្ញុំមិនសូវមាន(ធ្វើ) ធ្វើខ្លួនឯងទៅកុំអាងមានវិទ្យុចេះតែផ្សាយនោះ។ មើលអ្នកណាជួយជាតិខ្លួនឯង? ក្រែងកើតមកខ្មែរដែរហ្អី? បើខ្មែរដែរមើលៗ? វាពិតដែរអត់? ខ្ញុំឈូសយកស្រែប្រជាជនដែរឬអត់? គ្មានអ្នកណាទៅរៀបចំប្រជាជនដូចខ្ញុំទេ។ ខ្ញុំសង់ផ្ទះរាប់រយខ្នងមិនជួយផ្សាយផង ហើយអាការរៀបចំដីហ្នឹងគឺខ្ញុំរៀបចំឱ្យប្រជាជនម្នាក់៥០ម៉ែត្រ៤ជ្រុង គ្មានទៅឈូសស្រែអីណាទេ។ ស្រុកហ្នឹងអាណាគេធ្វើស្រែ? អត់មានផងហ្នឹង។
លោកសុខ ខេមរា៖ ខ្ញុំមិនដឹងថា លោកឧកញ៉ានិយាយនេះគឺជា VOAឬយ៉ាងណាទេ?
លោក ម៉ុង ឫទ្ធី៖ ថា មិនគួរណាផ្សាយមិនពិតទេ។ ផ្សាយរឿងអីដែលពិតទៅ ហើយកន្លែងណាដែលខ្មែរ ជួយខ្មែរ ផ្សាយផង។ កុំផ្សាយតែបរទេសជួយខ្មែរនោះ។ វាអត់ត្រឹមត្រូវទេ។
លោកសុខ ខេមរា៖ អរគុណច្រើនលោកឧកញ៉ា។ ខ្ញុំនឹងស្រាវជ្រាវមើលឡើងវិញ។
លោក ម៉ុង ឫទ្ធី៖ បាទ! ខ្ញុំអរគុណដែរ។ ប៉ុន្តែតាមសង្កេតមើលទៅ រឿងខ្សាច់ហ្នឹងវាឆ្កួតណាស់។
លោកសុខ ខេមរា៖ ប៉ុន្តែអត់មានការប្តឹងផ្តល់ Global Witness ដែលចេញរបាយការណ៍ទេ?
លោក ម៉ុង ឫទ្ធី៖ អ្ហែ! ប្តឹងជាមួយកាសែត ទៅប្តឹងជាមួយ VOA ដែលឈ្នះទេ? មើលខ្ញុំសួរវិញ?
លោកសុខ ខេមរា៖ រឿង Global Witness ចេញរបាយការណ៍រឿងហ្នឹងមិនមែន (VOA)ទេ!
លោកម៉ុង ឫទ្ធី៖ Global Witness ក៏ដោយ អ្នកណាក៏ដោយ ក៏ខ្ញុំអត់ប្តឹងគេដែរ។ សិទ្ធិគេផ្សាយ ហើយសិទ្ធិខ្ញុំអត់តមាត់។
លោកសុខ ខេមរា៖ លោកឧកញ៉ា អញ្ចឹង មាន ន័យថា ខ្សាច់ ហ្នឹងមិនមាននៅខាងកន្លែងប៉ែកណាផ្សេងទៀតទេដែលបូមហ្នឹងគឺថា មានតែកន្លែងកំពុងផែ(ឧកញ៉ាម៉ុងកែវផុស ក្នុងស្រុកស្រែអំបិល ខេត្តកោះកុង)ហ្នឹងមួយទេ។ ខ្ញុំចង់បញ្ជាក់ថា កន្លែងផ្សេងទៀតអត់មានទេឬ?
លោក ម៉ុង ឫទ្ធី៖ ខ្ញុំអត់មានបូមខ្សាច់ក្រៅពីហ្នឹងទេ ហើយគេថាខ្ញុំ។ ចេះតែថាទៅ។ ការណ៍ពិតខ្ញុំស្តារតែប្រឡាយឱ្យកប៉ាល់ចេញចូលសម្រួលផ្លូវទឹក ធ្វើម៉េចកុំឱ្យកឿងកប៉ាល់ តែនៅព្រែកឆ្កែព្រូសហ្នឹង រដ្ឋអនុញ្ញាតតែប៉ុណ្ណឹង។ តែដល់ពេលពីមុខហ្នឹង ខ្ញុំគ្រាន់តែប្រាប់ថា កុំឱ្យច្រឡំ គ្មានខ្សាច់ទេ គឺមានតែភក់ទេក្នុងសមុទ្រហ្នឹងនោះ។ ខ្ញុំសិក្សាអស់ហើយ គេអត់ទិញទេ។ សិង្ហបូរីអត់ទិញទេ។ និយាយអាមុខផែខ្ញុំទៅរហូតទៅ១០គីឡូហ្នឹង សិង្ហបូរីមិនទិញទេ។ មកពីអាហ្នឹងភក់។ កុំនាំគ្នាឈ្លោះគ្នាអត់ប្រយោជន៍នោះ និយាយឱ្យច្បាស់អញ្ចេះទៅ។
លោកសុខ ខេមរា៖ លោកឧកញ៉ាសូមអរគុណច្រើនដែលបានចំណាយពេលសម្ភាស។
លោកម៉ុង ឫទ្ធី៖ បាទអរគុណ អាយុ១០០!
លោកសុខ ខេមរា៖ បាទសូមអរគុណ សូមជម្រាបលា!