ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អដ្ឋិធាតុ​អ្នក​ថត​រូប​ជាតិ​អាមេរិកាំង​​ នា​សម័យ​សង្គ្រាម​ត្រូវ​គេ​ជីក​កកាយ


កាល​ពី​ខែ​មុន ​ក្រុម​អ្នក​ជីក​អណ្ដៅ​មិន​សម្រាប់​វិជ្ជា​ជីវ:​ បាន​រក​ឃើញ​អដ្ឋិ​ធាតុ​ ដែល​ពួក​គេ​អះ​អាង​ថា ​ជា​អដ្ឋិ​ធាតុ​លោក​ Sean​ Flynn​ អ្នក​ថត​រូប​ពេល​សង្គ្រាម​ ជាតិ​Americain​ ដែល​បាត់​ខ្លួន​នៅ​ប្រទេស​កម្ពុជា​៤០​ឆ្នាំ​មុន។​ ក៏​ប៉ុន្ដែ​ស្ថាន​ទូត​សរអា​នៅ​រាជ​ធានី​ភ្នំពេញ​ ឲ្យ​ដឹង​ថា​ អដ្ឋិ​ធាតុ​នោះ​មិន​មែន​របស់​លោក​ Flynn ​ទេ។​ លោក​ Robert​ Carmichael​ មាន​សេចក្ដី​រាយ​ការ​លម្អិត​អំពី​រឿង​នេះ​ពី​រាជ​ធានី​នៃ​ប្រទេស​កម្ពុជា។

អ្នកស្រីកង ស៊ីវន ប្រែសំរួលជូន៖

នៅ​ឆ្នាំ​១៩៧០​ លោក ​Sean ​Flynn​ អ្នក​ថត​រូប​ពេល​សង្គ្រាម​ ដែល​ជា​កូន​របស់​តារា​ភាព​យន្ដ​ ដ៏​ល្បី​ឈ្មោះ​លើស​លប់​ នៅ ​Hollywood​ គឺ​លោក ​Errol ​Flynn​ ស្ថិត​នៅ​ក្នុង​ប្រទេស​កម្ពុជា​ ដើម្បី​យក​ព័ត៌មាន​អំពី​ការ​ដែល​ប្រទេស​នេះ​ ធ្លាក់​ចូល​ទៅ​ក្នុង​សង្គ្រាម​ក្នុង​ស្រុក។

នៅ​ថ្ងៃ​ទី​៦​ខែ​មេសា​នៅ​ឆ្នាំ​នោះ​ លោក​បើក​រថយន្ដ​ចេញ​ពី​រាជ​ធានី​ភ្នំពេញ​ជា​មួយ​ អ្នក​កាសែត​ជាតិ ​Americain​ម្នាក់ ​គឺ​លោក​ស្រី ​Dana​ Stone។​ គេ​មិន​បាន​ឃើញ​ អ្នក​ទាំង​ពីរ​នាក់​នេះ​ទៀត​ទេ​ ហើយ​គេ​សន្និ​ដ្ឋាន​ថា ​ពួក​គេ​ត្រូវ​ពួក​ខ្មែរ​ក្រហម​ចាប់​បាន​ ហើយ​សម្លាប់។

ក៏​ប៉ុន្ដែ​កាល​ពី​ខែ​មុន​ អ្នក​ជីក​អណ្ដៅ​មិន​មែន​ជា​វិជ្ជា​ជីវ:​ពីរ​នាក់​ និយាយ​ថា​ ពួក​គេ​បាន​រក​ឃើញ​អដ្ឋិ​ធាតុ​លោក​ Flynn​ នៅ​ភាគ​អាគ្នេយ៍​ប្រទេស​កម្ពុជា។

នៅ​ថ្ងៃ​ច័ន្ទ​ ស្ថានទូត​សរអា​នៅ​ទី​ក្រុង​ភ្នំពេញ​ឲ្យ​ដឹង​ថា ​ក្រុម​អ្នក​វិទ្យា​សាស្ដ្រ​យោធា​ធ្វើតែស្ត​ អដ្ឋិ​ធាតុ​នោះ​ ហើយ​រក​ឃើញ​ថា ​មិន​មែន​ជា​អដ្ឋិ​ធាតុ​ជន​ជាតិ​ស្បែក​ស​ទេ​ ហេតុ​ដូច្នេះ​ហើយ​ គឺ​មិន​អាច​ជា​អដ្ឋិ​ធាតុ​លោក​ Flynn​ ឬ​លោក​ស្រី ​Stone​ទេ។

លោក​ John​ Johnson​ ជា​អ្នក​នាំ​ពាក្យ​ស្ថាន​ទូត។

«ហើយ​ការ​ធ្វើ​វិភាគ​មាន​កម្រិត​តិច​តួច​បង្ហាញ​ឲ្យ​ឃើញ​ថា ​អដ្ឋិ​ធាតុ​នោះ​អាច​ជា​របស់​ជន​ជាតិ​ក្នុង​ប្រទេស​កម្ពុជា។​ គេ​កំពុង​តែ​ធ្វើ​តែស្ត​ថែម​ទៀត»។

ការ​ជីក​អណ្ដៅ​រក​អដ្ឋិ​ធាតុ​នោះ​ធ្វើ​ឲ្យ​មាន​រឿង​ចម្រូង​ចម្រាស់។​ ការ​ជីក​នេះ​ធ្វើ​ឡើង​ប៉ុន្មាន​អាទិត្យ​ប៉ុណ្ណោះ ​មុន​នឹង​ក្រុម​អ្នក​កាសែត​និង​អ្នក​ថត​រូប​២៧​នាក់​ ដែល​បាន​យក​ព័ត៌មាន​នៅ​ប្រទេស​កម្ពុជា​ នៅ​ក្នុង​ទស​វត្សរ៍​១៩៧០​ ធ្វើ​ដំណើរ​ទៅ​ដល់​ប្រទេស​នេះ​ដើម្បី​ជួប​ជុំ​គ្នា​ ជា​ការ​ជួប​ជុំ​លើក​ទី​មួយ​ចាប់​តាំង​ពី​រាជ​ធានី​ភ្នំពេញ​ធ្លាក់​ក្នុង​អំណាច​របស់​ពួក​ខ្មែរ​ក្រហម​ នៅ​ខែ​មេសា​ ឆ្នាំ​១៩៧៥។

អ្នក​កាសែត​ខ្លះ​ដែល​ជា​ច្រើន​នាក់​ បាន​ស្គាល់​លោក​Flynn​ ហើយ​និង​លោក​ស្រី ​Stone​ ខឹង​អំពី​របៀប​ដែល​ពួក​អ្នក​ជីក​អណ្ដៅ​យក​អដ្ឋិ​ធាតុ​ចេញ​មក​ ជា​ពិសេស​ការ​ដែល​ពួក​គេ​ប្រើ​គ្រឿង​ឧបករណ៍​ធ្ងន់ៗ​ កកាយ​ដី​ចេញ។

លោក ​Johnson​ នៃ​ស្ថាន​ទូត​សរអា​ និយាយ​ថា​ ការ​ប្រើ​ម៉ាស៊ីន​ត្រាក់​ទ័រ​មាន​ផាល​ ជីក​ដី​ ដែល​ជា​គ្រឿង​យន្ដ​សម្រាប់​ជីក ​បណ្ដាល​ឲ្យ​មាន​បញ្ហា។

«អដ្ឋិ​ធាតុ​នោះ​បាក់​ជា​កំណាត់ៗ​អស់​ហើយ​ ដោយ​មក​ពី​របៀប​គេ​ជីក​យក​ អដ្ឋិ​ធាតុ​នោះ​ចេញ​មក»។

ពេល​គេ​ធ្វើ​ទស្សន​កិច្ច​នៅ​រាជ​ធានី​ភ្នំពេញ​កាល​ពី​អាទិត្យ​មុន ​ក្រុម​អ្នក​កាសែត​ដែល​វិល​ត្រឡប់​ទៅ​ប្រទេស​កម្ពុជា​វិញ ​បាន​លាត​ត្រដាង​សម្ពោធ​ វិមាន​មួយ​ឧទិ្ទស​រំឭក​ដល់​សហ​ការី​ខ្មែរ​ និង​បរទេស​៣៧​នាក់​ ដែល​បាត់​បង់​ជីវិត​ក្នុង​ពេល​សង្គ្រាម។

ពី​ក្នុង​ចំណោម​ឈ្មោះ​ដែល​គេ​អាន​ខ្លាំងៗ​ នៅ​ពិធី​នោះ​ មាន​ឈ្មោះ​លោក ​Sean​ Flynn​ ហើយ​និង​លោក​ស្រី ​Dana ​Stone​ ផង​ដែរ​ ដែល​គេ​នៅ​តែ​មិន​ដឹង​អំពី​ជោគ​ជតា​របស់​អ្នក​ទាំង​ពីរ​នោះ​នៅ​ឡើយ​ទេ៕

XS
SM
MD
LG