ចៅក្រមតុលាការក្រុងភ្នំពេញបានឲ្យដឹងនៅថ្ងៃពុធនេះថា ខ្លួនកំពុងតែពិចារណាលើការបង្កើតគណៈកម្មការ មួយដើម្បីត្រួតពិនិត្យបង្គោលតម្រុយព្រំដែននៅខេត្តស្វាយរៀង ដែលជាសំណើរបស់គណបក្សសម រង្ស៊ី។
កាលពីសប្តាហ៍មុន លោកជូង ជូងី មេធាវីមេដឹកនាំគណបក្សជំទាស់ បានស្នើឲ្យតុលាការក្រុងភ្នំពេញបង្កើតគណៈកម្មការចម្រុះមួយដើម្បីត្រួតពិនិត្យទីតំាងបោះបង្គោលតម្រុយព្រំដែននៅស្រុកចន្ទ្រា ខេត្តស្វាយរៀងដែលជាមូលហេតុនាំឲ្យលោកសម រង្ស៊ីត្រូវចោទប្រកាន់ដោយតុលាការ។
លោក អឿង ស៊ាង ចៅក្រមតុលាការក្រុងភ្នំពេញមានប្រសាសន៍ថា លោកកំពុងតែពិចារណាលើការបង្កើតគណៈកម្មការនេះ ប៉ុន្តែលោកបដិសេធមិនផ្តល់ព័ត៌មានលម្អិត ត្បិតវាស្ថិតក្នុងដំណាក់កាលនៃការសម្រេចចិត្តនៅឡើយ។
«ខ្ញុំកំពុងពិចារណា តែនៅក្នុងនីតិវិធីគិតគូរខ្ញុំមិនអាចជម្រាបជូនបានទេ»។
កាលពីខែមករា លោកសម រង្ស៊ីត្រូវបានកាត់ទោសដោយតុលាការខេត្តស្វាយរៀង ឲ្យជាប់ពន្ធធនាគារពីរឆ្នាំចំពោះការដកបង្គោលតម្រុយព្រំដែន នៅស្រុកចន្ទ្រា នៃខេត្តស្វាយរៀងដែលជាប់ព្រំដែនប្រទេសវៀតណាម ហើយកាលពីពាក់កណ្តាលខែមីនា មេដឹកនាំគណបក្សប្រឆំាងរូបនេះ ត្រូវចោទបន្ថែមទៀតដោយតុលាការក្រុងភ្នំពេញពីបទក្លែងបន្លំផែនទីព្រំដែនកម្ពុជាជាប់វៀតណាម។ ផែនទីនេះដែលលោកសម រង្ស៊ី បញ្ជាក់បានបង្ហាញអំពីបង្គោលតម្រុយព្រំដែនបានទន្ទ្រានចូលទឹកដីរបស់ប្រទេសកម្ពុជា។ លោកសម រង្ស៊ីអាចប្រឈមទៅនឹងការជាប់ពន្ធនាគាររហូតដល់១៨ឆ្នាំ បើសិនលោកត្រូវគេរកឃើញថា មានកំហុស។
លោកមេធាវី ជូង ជូងី បានឲ្យដឹងថា ប្រសិនបើគណៈកម្មការនេះត្រូវបានបង្កើត គណៈកមា្មធិការនេះនឹងមានតួនាទី ចុះវាស់វែងទីតាំងដាំបង្គោលតម្រុយព្រំដែននៅខេត្តស្វាយរៀងជាប់ព្រំដែនវៀតណាម ដើម្បីស្វែងរកការណ៍ពិតថា តើ បង្គោលតម្រុយព្រំដែននេះពិតជាបានទន្ទ្រានចូលទឹកដីកម្ពុជាឬយ៉ាងណា។
លោកជូង ជូងីជឿថា គណៈកម្មការចម្រុះនេះអាចជួយផ្តល់ភាពយុត្តិធម៌ដល់លោក សម រង្ស៊ី។
«ការបង្កើតគណៈកម្មការនេះគឺបកស្រាយឲ្យឃើញការណ៍ពិតថា តើការចោទប្រកាន់ទៅលើកូនក្តីខ្ញុំនេះត្រឹមត្រូវដែរ ឬទេ?»
គួរកត់សម្គាល់ផងដែរថា រយៈពេលជាច្រើនឆ្នាំមកនេះ ការប្រឈមមុខទៅនឹងតុលាការបានក្លាយជារឿងសាមញ្ញទៅហើយរបស់មន្ត្រីជាន់ខ្ពស់គណបក្សសម រង្ស៊ី។ លោកស្រី មួរ សុខហួរ ដែលបានវិលត្រឡប់ពីសហរដ្ឋអាមេរិកចូលប្រទេសកម្ពុជាវិញកាលពីសប្តាហ៍មុនកំពុងរង់ចាំសវនាការនៅតុលាការកំពូលបន្ទាប់ពីលោកស្រីត្រូវតុលាការក្រុងភ្នំពេញផ្តន្ទាទោស កាលពីខែសីហាដោយពិន័យជាប្រាក់៤០០០ដុល្លារ ពីបទបរិហារកេរ្តិ៍លោកនាយករដ្ឋមន្ត្រី ហ៊ុន សែន។ ដោយឡែកលោក សម រង្ស៊ី នៅបន្តនិរទេសខ្លួននៅប្រទេសបារំាងនៅឡើយដើម្បីគេចពីទោសទណ្ឌ។ យ៉ាងណាក៏ដោយ ទំាងលោកសម រង្ស៊ី និងលោកស្រី មួរ សុខហួរ សុទ្ធតែបាត់បង់អភ័យឯកសិទ្ធិ ក្នុងរដ្ឋសភា។
លោកស្រី ពុង ឈីវកេក ប្រធានអង្គការលីកាដូ មានប្រសាសន៍ថា ប្រសិនបើលោក សម រង្ស៊ី នៅតែមិនអាចវិលចូលស្រុករហូតដល់ការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១២ខាងមុខ នោះវានឹងខាតប្រយោជន៍ដល់គណបក្សសមរង្ស៊ីផ្ទាល់ ហើយវាបង្ហាញពីការចូលរួមមិនស្មើភាពគ្នាក្នុងយុទ្ធនាការបោះឆ្នោតរបស់គណបក្ស នយោបាយក្នុងការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១២ខាងមុខ៕
