ភ្ជាប់​ទៅ​គេហទំព័រ​ទាក់ទង

ភាគី​កម្ពុជា​ក្នុង​សាលាក្ដី​ខ្មែរ​ក្រហម​ខ្វះ​ថវិកា​ធ្ងន់​ធ្ងរ​


មន្ដ្រី​ជាន់​ខ្ពស់​រដ្ឋា​ភិបាល​ខ្មែរ​ និង​មន្ដ្រី​អង្គការ​សហ​ប្រជា​ជាតិ ​បាន​សម្តែងកង្វល់​រួម​គ្នា​នៅ​ថ្ងៃ​ ច័ន្ទ​នេះ​ចំពោះ​កង្វះ​ថវិកា​យ៉ាង​ធ្ងន់​ធ្ងរ​នៅ​ក្នុង​សាលាក្ដី​ខ្មែរ​ក្រហម​ខាង​ភាគី​កម្ពុជា។​ ហើយ​កិច្ច​ប្រជុំ​ មួយ​នឹង​ត្រូវ​ ធ្វើ​ជា​បន្ទាន់​ក្នុង​សប្ដាហ៍​នេះ​ ដើម្បី​ស្វែង​រក​ដំណោះ​ស្រាយ​វិបត្តិ​នេះ។

កង្វល់​នេះ​បាន​ធ្វើ​ឡើង​នៅ​ក្នុង​ជំនួប​ក្នុង​ទី​ក្រុង​ភ្នំពេញ​ រវាង​លោក​ឧប​នាយក​រដ្ឋ​មន្ដ្រី​ខ្មែរ​ សុខ ​អាន​ រដ្ឋ​មន្ដ្រី​ទី​ស្ដី​ការ​គណៈ​រដ្ឋ​មន្រ្ដី​ ជា​មួយ​នឹង​លោក​ស្រី ​ប៉ាទ្រីស្យា​ អូប្រៀន​ អគ្គ​លេខា​ធិការ​រង​អង្គការ​ សហ​ប្រជា​ជាតិ ​ទទួល​បន្ទុក​កិច្ច​ការ​ច្បាប់ ​នេះ​បើ​យោង​តាម​លោក​ ឯក​ ថា​ អ្នក​នាំ​ពាក្យ​ក្រោយ​ពី​ជំនួប​ខាង​លើ។

«ភាគី​ទាំង​សង​ខាង​បាន​សម្តែង​នូវ​ការ​ព្រួយ​បារម្ភ​ពី​រឿង​ស្ថាន​ការណ៍​ផ្នែក​ហិរញ្ញ​វត្ថុ​ខាង​ភាគី​កម្ពុជា​ នៅ​សាលាក្ដី​ខ្មែរ​ក្រហម​នេះ​ដោយ​សារ​តែ​ភាគី​កម្ពុជា​មាន​កង្វះ​ខាត​ផ្នែក​ថវិកា​សម្រាប់​ចំណាយ​ទៅ​លើ​បុគ្គលិក​របស់​ខ្លួន​ប្រមាណ​២៩៤នាក់»។

កង្វះ​ថវិកា​នៅ​ក្នុង​សាលាក្ដី​ខ្មែរ​ក្រហម​ខាង​ភាគី​កម្ពុជា​ កើត​មាន​ឡើង​ស្រប​ពេល​ដែល​សាលា​ក្ដី​ខ្មែរ​ក្រហម​គ្រោង​នឹង​ធ្វើ​ការ​កាត់​ទោស​ជន​សង្ស័យ​ក្នុង​សំណុំ​រឿង​លេខ​០០២​ ដែល​មាន​ជន​សង្ស័យ​សរុប​ចំនួន​៥​នាក់​ រួម​មាន​នួន​ ជា​ ខៀវ សំផន​ អៀង​ សារី​ អៀង​ ធីរិទ្ធ​ និង​ ឌុច​ផង​ដែរ​ នៅ​ដើម​ឆ្នាំ​ ២០១១​ខាង​មុខ​នេះ។

លោក​ ឯក​ ថា ​បាន​ស្រង់​សម្តី​លោក​ សុខ​ អាន​ថា​ ភាគី​កម្ពុជា​នៅ​សល់​ថវិកា​ត្រឹម​តែ​២០​ម៉ឺន​ដុល្លារ​ អាមេរិក​តែ​ប៉ុណ្ណោះ​ ដែល​អាច​អនុញ្ញាត​ឲ្យ​ធ្វើ​ការ​ចាយ​វាយ​ទៅ​លើ​តម្រូវ​ការ​នានា​ បាន​ត្រឹម​តែ​ពីរ​ សប្ដាហ៍​ទៀត​ប៉ុណ្ណោះ។

សូម​បញ្ជាក់​ថា ​ភាគី​កម្ពុជា​ក្នុង​សាលាក្ដី​ខ្មែរ​ក្រហម​ត្រូវ​ការ​ចំណាយ​ចំនួន​៥០​ម៉ឺន​ដុល្លារ​អាមេរិក​ ក្នុង​មួយ​ខែៗ។

លោក​ ឌឹម​ សុវណ្ណារម្យ ​អ្នក​នាំ​ពាក្យ​មួយ​រូប​របស់​សាលាក្ដី​ខ្មែរ​ក្រហម​ មាន​ប្រសាសន៍​ថា​ កិច្ច​ប្រជុំ​បន្ទាន់​រវាង​សាលាក្ដី​ខ្មែរ​ក្រហម​ជា​មួយតំណាង​បណ្ដា​ប្រទេស​ដែល​ចាប់​អារម្មណ៍​នឹង​សាលាក្ដី​នឹង​ ត្រូវ​ធ្វើ​ឡើង​ក្នុង​ទី​ក្រុង​ភ្នំពេញ​ នៅ​ថ្ងៃ​ព្រហស្បតិ៍​សប្ដាហ៍​នេះ​ ដើម្បី​ដោះ​ស្រាយ​វិបត្តិ​ថវិកា​សម្រាប់​ ភាគី​កម្ពុជា។

លោក​ ឌឹម សុវណ្ណារម្យ​ មាន​ប្រសាសន៍​ថា ​ថវិកា​សព្វ​ថ្ងៃ​ខាង​ភាគី​កម្ពុជា​អនុញ្ញាត​ឲ្យ​បើក​ប្រាក់​ខែ​មួយ​ផ្នែក​ប៉ុណ្ណោះ​ដល់​បុគ្គលិក​កម្ពុជា​ នៅ​ក្នុង​ខែ​នេះ។

«ជា​ប្រាក់​ ខែ​ដែល​យើង​ត្រូវ​បើក​ជូន​បុគ្គលិក​ជាតិ​ ខែ​មេសា​នេះ​ មាន​ត្រឹម​តែ​៣០% ​តែ​ប៉ុណ្ណោះ»។

យោង​តាម​លោក​ ឯក​ ថា​ លោក​ស្រី​ប៉ាទ្រីស្យា​ អូប្រៀន​ អគ្គ​លេខា​ធិការ​រង​អង្គការ​សហ​ប្រជា​ជាតិ​ ទទួល​បន្ទុក​កិច្ច​ការ​ច្បាប់​ បាន​មក​ដល់​ប្រទេស​កម្ពុជា​ កាល​ពី​ថ្ងៃ​សៅរ៍​ សម្រាប់​ដំណើរ​ទស្សន​កិច្ច​ នៅ​ក្នុង​ប្រទេស​កម្ពុជា​រយៈ​ពេល​មួយ​សប្ដាហ៍ទាក់​ទង​ទៅ​នឹង​ដំណើរ​ការ​ឆ្ពោះ​ទៅ​រក​ការ​កាត់​ទោស​ អតីត​មេ​ដឹក​នាំ​ និង​អ្នក​ទទួល​ខុស​ត្រូវ​ខ្ពស់​បំផុត​នៃ​របប​ខ្មែរ​ក្រហម។

ក្នុង​ទស្សន​កិច្ចនេះ​ លោក​ស្រី​គ្រោង​នឹង​ជួប​ជា​មួយ​មន្ដ្រី​សាលាក្តី​ខ្មែរ​ក្រហម​នៅ​ថ្ងៃពុធ​ សប្ដាហ៍​នេះ​ និង​ជួប​ជា​មួយ​មន្រ្ដី​ទូត ​នៅ​ក្នុង​ប្រទេស​កម្ពុជា​ផង​ដែរ។

សាលាក្ដី​ខ្មែរ​ក្រហម​ កាល​ពី​សប្ដាហ៍​មុន ​បាន​ប្រកាស​ឲ្យ​ដឹង​ថា ​សហគមន៍​ផ្ដល់​ជំនួយ​បាន​សម្រេច​ ផ្ដល់​ជំនួយ​ចំនួន​ជាង​៨៧​លាន​ដុល្លារ​អាមេរិក​ដល់​សាលាក្ដី​ខ្មែរ​ក្រហម​ខាង​ភាគី​អង្គការ​សហ​ប្រជា​ ជាតិ ​សម្រាប់​ឆ្នាំ​២០១០​ និង​ឆ្នាំ​២០១១៕

អត្ថបទ​ទាក់ទង

XS
SM
MD
LG