ភ្ជាប់​ទៅ​គេហទំព័រ​ទាក់ទង

កង​ទ័ព​ថៃ​និង​កង​ទ័ព​កម្ពុជា​បាន​ប៉ះ​ទង្គិច​គ្នា​ជា​ថ្មី​ទៀត​


មាន​ការ​ពើប​ប្រយុទ្ធ​គ្នា​ក្នុង​រយៈ​ពេល​ខ្លី​ចំនួន​ពីរ​លើក​ជាប់ៗ​គ្នា​ នៅ​ព្រឹក​ថ្ងៃ​សៅរ៍​នេះ​ រវាង​កង​ទ័ព​ថៃ ​និង​កង​ទ័ព​របស់​ប្រទេស​កម្ពុជា​ នៅ​ព្រំ​ដែន​រួម​ក្បែរ​ឃុំ​អូរ​ស្មាច់​ ខេត្ត​ឧត្តរ​មាន​ជ័យ​ ខណៈ​ដែល​ ភាព​តាន​តឹង​បាន​កើត​ឡើង​ជា​ថ្មី​ម្ដង​ទៀត​ នៅ​ចំណុច​ភ្នំ​ទ្រព្យ​ភាគ​ខាង​លិច​ប្រាសាទ​ព្រះ​វិហារ។​ ក៏​ប៉ុន្ដែ​ការ​ប៉ះ​ទង្គិច​គ្នា​ដោយ​ប្រដាប់​អាវុធ​នេះ​ មិន​បាន​បណ្ដាល​ឲ្យ​ភាគី​ណា​មួយ​មាន​គ្រោះ​ថ្នាក់​នោះ​ទេ។​ នេះ​បើ​យោង​តាម​របាយ​ការណ៍​របស់​មន្ដ្រី​ផ្លូវ​ការ​នៃ​ប្រទេស​ទាំង​ពីរ។

លោក​ឧត្ដម​សេនីយ៍​ឯក​ ឈុំ ​សុជាតិ​ អនុ​រដ្ឋ​លេខា​ធិការ​ និង​ជា​អ្នក​នាំ​ពាក្យ​ក្រសួង​ការ​ពារ​ជាតិ​មាន​ប្រសាសន៍​ថា​ ការ​ប្រយុទ្ធ​គ្នារវាង​កង​ទ័ព​នៃ​ប្រទេស​ទាំង​ពីរ​ បាន​កើត​ឡើង​នៅ​ពេល​ដែល​កង​ទ័ព​កម្ពុជា​កំពុង​ដើរ​ល្បាត។

«វេលា​ម៉ោង​៨: ៥​នាទី​មាន​ការ​ផ្ទុះ​អាវុធ​ប្រហែល​១៥​នាទី។​ លើក​ទី២​ មាន​ផ្ទុះ​អាវុធ​ម្ដង​ទៀត​ប្រហែល​៥​នាទី​ គឺ​វេលា​ម៉ោង​៩និង​៣០​នាទី​ព្រឹក​ដែរ។​ មូល​ហេតុ​ផ្ទុះ​អាវុធ​ គឺ​ពេល​ដែល​កម្លាំង​របស់​ យើង​កំពុង​ធ្វើ​ការ​ដើរ​ល្បាត​តាម​ព្រំដែន​ដែល​យើង​ធ្លាប់​ធ្វើ​ជា​រៀង​រាល់​ថ្ងៃ​ កម្លាំង​ថៃ​បាន​បាញ់​អឹម១៦​ និង​អឹម៧៩​ មក​លើ​យើង។​ យើង​ក៏​បាញ់​តប​ទៅ​វិញ។​ យើង​បាន​បាញ់​បេ៤០​ និង​អាកា។​ តុល្យ​ការ​នៃ​ការ​ប្រយុទ្ធ​គ្នា​ហ្នឹង​ យើង​ឃើញ​ថា​ ខាង​កម្ពុជា​អត់​មាន​របួស​ឬ​ក៏​ស្លាប់​អី​ទេ»។

លោក​ឧត្ដម​សេនីយ៍​ ឈុំ ​សុជាតិ​ បញ្ជាក់​ថា​ កង​ទ័ព​នៃ​ប្រទេស​ទាំង​ពីរ​កំពុង​ធ្វើ​ការ​ចរចា​ជា​មួយ​គ្នា​ឡើង​វិញ ​ដើម្បី​ដោះ​ស្រាយ​បញ្ហា​នេះ។

ជា​មួយ​គ្នា​នេះ​ លោក​ថានី​ ថង​ផាក់​ឌី ​អគ្គ​នាយក​រង​ នៃ​នាយក​ដ្ឋាន​ព័ត៌​មាន​ក្រសួង​ការ​បរទេស​ថៃ ​បាន​ប្រាប់​VOA ​សំឡេង​សហ​រដ្ឋ​អាមេរិក​ តាម​ខ្សែ​ទូរ​ស័ព្ទ​ពី​ក្រុង​បាង​កក​ថា​ ភាគី​ទាំង​ពីរ​បាន​ស្វែង​យល់​គ្នា​ឡើង​វិញ ​បន្ទាប់​ពី​ការ​ប្រយុទ្ធ​គ្នា។​ មន្ដ្រី​ក្រសួង​ការ​បរទេស​ថៃ​ដដែល​បញ្ជាក់​ថា ​ពុំមាន​របាយ​ការណ៍​អំពី​ការ​ស្លាប់​ ឬ​ របួស​នៃ​កង​ទ័ព​ដែល​ប្រយុទ្ធ​គ្នា​នោះ​ទេ។

«របាយ​ការណ៍​ដែល​យើង​ទទួល​បាន​នោះ​ បង្ហាញ​ថា​ ពុំ​មាន​កង​ទ័ព​ណា​ម្នាក់​ត្រូវ​របួស​ ឬ​ត្រូវ​បាន​សម្លាប់​នោះ​ទេ។​ពួក​គេ​បាន​ជជែក​គ្នា​អំពី​ឧបទ្ទវ​ហេតុ​ដែល​បាន​កើត​ឡើង។​ ខ្ញុំ​ត្រូវ​បាន​គេ​រាយ​ការណ៍​ប្រាប់​ថា​ ពួក​គេ​បាន​ទាក់​ទង​គ្នា​នា​ពេ ល​បន្ទាប់​មក។​ បញ្ហា​នេះ​បាន​បញ្ចប់​ហើយ»។

សូម​រំឭក​ថា​ ការ​ប៉ះ​ទង្គិច​គ្នា​ដោយ​កម្លាំងយោធា​នេះ​ ធ្វើ​ឡើង​មួយ​ថ្ងៃ​ប៉ុណ្ណោះ​ បន្ទាប់​ពី​ប្រទេស​កម្ពុជា​ បញ្ចប់​ពិធី​បុណ្យ​ចូល​ឆ្នាំ​ថ្មី​របស់​ខ្លួន។

លោក​ ឧត្ដម​សេនីយ៍​ ឈុំ ​សុជាតិ​ អ្នក​នាំ​ពាក្យ​ក្រសួង​ការ​ពារ​ជាតិ​ បាន​ឲ្យ​ដឹង​ថា​ កង​ទ័ព​ថៃ​ចំនួន​១២​នាក់​ផ្សេង​ទៀត​បាន​ដើរ​ល្បាត​នៅ​តាម​បណ្ដោយ​ព្រំ​ដែន​ក្បែរ​ភ្នំ​ទ្រព្យ​ កាល​ពី​រសៀល​ថ្ងៃ​សុក្រម្សិល​មិញ​នេះ​ ដែល​ជា​ថ្ងៃ​ចូល​ឆ្នាំ​ចុង​ក្រោយ​របស់​ខ្មែរ។​ ហើយ​ក៏​បាន​ចូល​បង្កប់​ខ្លួន​នៅ​ទី​នោះ​តែ​ម្ដង​។​តំបន់​ភ្នំ​ទ្រព្យ​គឺ​ជា​កន្លែង​ដែល​មាន​ការ​ប្រយុទ្ធ​គ្នា​ ជា​ច្រើន​លើក​ចាប់​តាំង​ពី​ការ​ប្រឈម​មុខ​ដាក់​គ្នា​រវាង​កង​ទ័ព​កម្ពុជា​ និង​កង​ទ័ព​ប្រទេស​ថៃ។

លោក​ឈុំ ​សុជាតិ​ បាន​បញ្ជាក់​ថា ​មេ​បញ្ជា​ការ​កង​ទ័ព​កម្ពុជា​ បាន​ចរចា​ដើម្បី​ឲ្យ​កង​ទ័ព​ថៃ​ដក​ថយ​ទៅ​វិញ ​ប៉ុន្ដែ​កង​ទ័ព​ថៃ​មិន​ព្រម​ដក​ថយ​នៅ​ឡើយ​មក​ទល់​នឹង​រសៀល​ ថ្ងៃ​សៅរ៍​នេះ។

ទំនាក់​ទំនង​រវាង​ប្រទេស​កម្ពុជា​ និង​ប្រទេស​ថៃ​ បាន​ប្រែ​ទៅ​ជា​តាន​តឹង​ចាប់​តាំង​ពី​ខែ​កក្កដា​ ឆ្នាំ​២០០៨​មក​ម្ល៉េះ​ បន្ទាប់​ពី​ប្រាសាទ​ព្រះ​វិហារ​ដ៏​ចំណាស់​របស់​ខ្មែរ​ត្រូវ​បាន​ដាក់​បញ្ចូល​ជា​សម្បត្តិ​បេតិ​កភ័ណ្ឌ​ពិភព​លោក​ ដែល​ក្រុង​បាង​កក​បាន​ជំទាស់​យ៉ាង​ខ្លាំង។​ ការ​ប្រឈម​មុខ​ដោយ​យោធា​បាន​កើត​ឡើង​ ហើយ​មាន​ការ​ប្រយុទ្ធ​គ្នា​ជា​ច្រើន​លើក​បាន​កើត​មាន​ឡើង​នៅ​តំបន់​ក្បែរ​ប្រាសាទ​ព្រះ​វិហារ​ ដែល​ធ្វើ​ឲ្យ​មាន​ការ​ស្លាប់​ និង​របួស​ក្នុង​ចំណោម​កង​ទ័ព​ទាំង​សង​ខាង៕

អត្ថបទ​ទាក់ទង

XS
SM
MD
LG