ភ្ជាប់​ទៅ​គេហទំព័រ​ទាក់ទង

យុវ​ជន​ខ្មែរ​ចង់​បាន​ឱកាស​ការ​ងារ​និង​តួនាទី​ច្រើន​ថែម​ទៀត​ក្នុង​ឆ្នាំ​ថ្មី​ ឆ្នាំ​ខាល


យុវ​ជន​ខ្មែរ​ចង់​បាន​ឱកាស​ការ​ងារ​និង​តួនាទី​ច្រើន​ថែម​ទៀត​ក្នុង​ឆ្នាំ​ថ្មី​ ឆ្នាំ​ខាល

ក្រុម​យុវជន​នៅ​តាម​សាកល​វិទ្យា​ល័យ​និង​អង្គ​ការ​ក្រៅ​រដ្ឋា​ភិបាល​មួយ​ចំនួន​ក្នុង​ទី​ក្រុង​ភ្នំពេញ​រំពឹង​ថា ​នៅ​ក្នុង​ឆ្នាំ​ថ្មី​ឆ្នាំ​២០១០​នេះ​ ពួក​គេ​នឹង​ទទួល​បាន​ការ​យក​ចិត្ត​ទុក​ដាក់​ច្រើន​ថែម​ទៀត​ពី​សំណាក់​រដ្ឋាភិបាល​ក្នុង​ការ​លើក​កម្ពស់​គុណ​ភាព​និង​សេវា​អប់រំ​ ហើយ​បង្កើត​ការ​ងារ​បន្ថែម​ទៀត​សម្រាប់​ពួក​គេ។

កញ្ញា​ សំរិត​ ភូមី ​និស្សិត​ឆ្នាំ​ទី១​ផ្នែក​ចិត្ត​វិទ្យា​នៃ​សាកល​វិទ្យា​ភូមិន្ទ​ភ្នំពេញ​ បាន​និយាយ​នៅ​ក្នុង​បទ​សម្ភាសន៍​មួយ​កាល​ពី​ថ្ងៃ​អង្គារ​ថា​ កញ្ញា​ចង់​ឃើញ​មាន​ការ​បង្កើត​ឱកាស​ការ​ងារ​ច្រើន​ថែម​ទៀត​សម្រាប់​យុវជន​តាម​រយៈ​ការ​ទាក់​ទាញ​វិនិយោគ​ទុន​បរទេស​បន្ថែម​ទៀត​ចូល​មក​ក្នុង​ប្រទេស​កម្ពុជា។

«ក្នុង​នាម​ខ្ញុំ​ជា​យុវជន​ក្នុង​ឆ្នាំ​ថ្មី​នេះ​គឺ​ចង់​ឱ្យ​រដ្ឋា​ភិបាល​ផ្តល់​ឱកាស​និង​លើក​ទឹក​ចិត្ត​ដល់​បណ្តា​យុវជនរបស់​យើង​នៅ​ក្នុង​ប្រទេស​កម្ពុជា​ ព្រោះ​អី​យុវជន​របស់​យើង​រាល់​ថ្ងៃ​ បន្ទាប់​ពី​បញ្ចប់​ការ​សិក្សា​ទៅ​ ពេល​ខ្លះ​គាត់​អត់​មាន​ឱកាស​ធ្វើ​ការ​ងារ​ល្អៗ​ឱកាស​ធ្វើ​ការ​ងារ​ផ្សេងៗ​ទេ​ គឺ​គាត់​ពេល​ខ្លះ​ដើរ​ប៉ោឡែ​ឬបង្ក​បញ្ហា​ផ្សេងៗ​ក៏​មាន​ដែរ​ អញ្ចឹង​ទៅ​ចង់​ឱ្យ​ផ្តល់​ឱកាស​ការ​ងារ​ឬ​បង្កើន​ការ​យក​ចិត្ត​ទុក​ដាក់​ទៅ​ដល់​ពួក​គាត់​ និង​ទាញ​វិនិយោគ​ទុន​មក​ប្រទេស​កម្ពុជា​បន្ថែម​ទៀត»។

ការ​លើក​ឡើង​នេះ​បាន​ធ្វើ​ឡើង​ក្នុង​ខណៈ​ពេល​ដែល​ប្រទេស​កម្ពុជាកំពុង​ប្រារព្ធ​ទិវា​បុណ្យ​ចូល​ឆ្នាំ​ថ្មីប្រពៃណី​ជាតិ​របស់​ខ្លួន​រយៈ​ពេល​បី​ថ្ងៃ​គឺ​ចាប់​ពី​ថ្ងៃ​ទី១៤​ រហូត​ដល់​ថ្ងៃ​ទី១៦​ខែ​មេសា​ឆ្នាំ​២០១០។ថ្ងៃ​ទី១៦​ខែ​មេសា​ឆ្នាំ​នេះ​ ជា​ថ្ងៃ​ឆ្លង​ពី​ឆ្នាំ​ចាស់​ឆ្នាំ​ឆ្លូវ​ ចូល​ឆ្នាំ​ថ្មី​គឺ​ឆ្នាំ​ខាល​ ពុទ្ធ​សករាជ​ ២៥៥៤​ គិត​តាមប្រតិទិន​ពុទ្ធ​សាសនា។

បណ្តាញ​អង្គ​ការ​ក្រៅ​រដ្ឋា​ភិបាល​មួយ​ចំនួន​ដែល​ធ្វើ​ការ​ងារ​ជា​មួយ​យុវជន​បាន​ប៉ាន់​ប្រមាណ​ថា​ មាន​យុវជន​ពី​៣០​ម៉ឺន​ទៅ​៥០​ម៉ឺន​នាក់​នៅ​ក្នុង​ប្រទេស​កម្ពុជា​ដែល​គ្មាន​ការ​ងារ​ធ្វើ​ ហើយ​ថា​ ក្នុង​ចំណោម​និស្សិត​ដែល​បាន​បញ្ចប់​ការ​សិក្សា​៩នាក់​ គឺ​មាន​តែ​ម្នាក់​ប៉ុណ្ណោះ​អាច​រក​ការ​ងារ​ធ្វើ​បាន។

និស្សិត​ម្នាក់​ទៀត​ដែល​ជា​យុវជន​ស្ម័គ្រ​ចិត្ត​នៃ​អង្គ​ការ​ក្រៅ​រដ្ឋា​ភិបាល​មួយ​ក្នុង​ទីក្រុង​ភ្នំពេញ​គឺ ​លោក​ ខេ​ ឡុង​ម៉េង​ វ័យ​២៣​ឆ្នាំ​ក៏​បាន​ប្រាប់​ឱ្យ​ដឹង​ផង​ដែរ​ថា​ នៅ​ក្នុង​ឆ្នាំ​ថ្មី​នេះ​ លោក​ក៏​ចង់​ឃើញ​គុណ​ភាពនិង​សេវា​កម្ម​អប់រំ​ត្រូវ​បាន​ពង្រឹង​និង​ពង្រីក​បន្ថែម​ទៀត​ដើម្បី​ជួយ​ឱ្យ​យុវជន​ខ្មែរ​រួម​ទាំង​រូប​លោក​ផងដែរ​អាច​មាន​លទ្ធ​ភាព​និង​សមត្ថ​ភាព​គ្រប់​គ្រាន់​ស្រប​ទៅ​តាម​ការ​វិវឌ្ឍ​របស់​ពិភព​លោក​នៅ​សម័យទំនើប​នេះ។

«ឆ្នាំ​ថ្មី​នេះ​ ចង់​ឱ្យ​រដ្ឋា​ភិបាល​ពង្រឹង​បន្ថែម​នៅ​លើ​វិស័យ​អប់រំ​តាំង​ពី​សមត្ថ​ភាព​ តាំង​ពី​ជំនាញ​បច្ចេកទេស​នានា​ទាក់​ទង​នឹង​កំព្យូទ័រ​អី ​ពីព្រោះ​សម័យ​ឥឡូវ​គេ​ចូល​សត​វត្សរ៍ទី២១​ ហើយ​គេ​មាន​ការ​អភិវឌ្ឍ​ផ្នែក​ហ្នឹង​ច្រើន​ តែ​បើក្រឡេក​មើល​សង្គម​ខ្មែរ​វិញ​ នៅ​តាម​ជន​បទ​អីហ្នឹង​ពួក​គាត់​អត់​សូវ​មាន​ការ​ទទួល​ការ​អប់រំ​បាន​ច្រើន​ទេ​ គឺ​អ្នក​ខ្លះ​សូម្បី​ដល់​ឆ្នាំ​២០១០​នេះ​អត់​ទាន់​ដឹង​ថា ​កំព្យូទ័រ​ហ្នឹង​យ៉ាង​ម៉ិច​ គេ​បង្កើត​ឡើង​ដើម្បី​អី​ទៀត»។

លោក​ ខេ​ ឡុង​ម៉េង​បន្ថែម​ថា ​លោក​ក៏​ប្រាថ្នា​ចង់​ឃើញ​ការ​អនុវត្ត​ច្បាប់​នៅ​ក្នុង​ឆ្នាំ​ថ្មី​នេះ​ប្រកប​ដោយយុត្តិ​ធម៌​និង​ស្មើ​ភាព​គ្នា​ចំពោះ​ជន​គ្រប់​រូប​នៅ​ក្នុង​សង្គម​ ដោយ​មិន​គិត​ថា​ ជន​នោះ​ជា​អ្នក​មាន​លុយមាន​អំណាច​បុណ្យ​សក្តិ​ខ្ពង់​ខ្ពស់​ ឬ​ជា​ជន​ក្រីក្រ​នោះ​ទេ។

«ខ្ញុំ​ចង់​ឱ្យ​មាន​ភាព​ស្មើ​គ្នា​ចំពោះ​មុខ​ច្បាប់​តាំង​ពី​ការ​គោរព​ច្បាប់​ចរាចរណ៍។ ​មួយ​ទៀត​គេ​ហៅ​ថា​ គណ​នេយ្យ​ភាព​សង្គម​ទាក់​ទង​នឹង​ការ​ចូល​រួម​នៅ​ក្នុង​ផែន​ការ​អភិវឌ្ឍ​របស់​ឃុំ​សង្កាត់​ដែល​ជា​ កត្តា​មួយ​ដែល​ជួយ​ដល់​កិច្ច​អភិវឌ្ឍន៍​ផង​ដែរ​ ពីព្រោះ​ទាល់​តែ​មាន​ការ​ចូល​រួម​យ៉ាង​សកម្ម​ពី​គ្រប់​ភាគី​ ពាក់​ព័ន្ធ​ទាំង​អស់​ ទើប​ប្រទេស​មួយ​មាន​ការ​រីក​ចម្រើន​ទៅ​បាន»។

លោក​ជាង​ សុខា​ នាយក​ប្រតិ​បត្តិ​អង្គ​ការ​កម្ម​វិធី​អភិវឌ្ឍន៍​ធន​ធាន​យុវជន​ដែល​បច្ចុប្បន្ន​កំពុង​ធ្វើ​ការ​ងារ​ជា​មួយ​យុវជន​ប្រមាណ​៣០០​នាក់​នៅ​ក្នុង​សកម្ម​ភាព​អភិ​វឌ្ឍន៍​សិទ្ធិ​អំណាច​សហ​គមន៍​មូល​ដ្ឋាន​ បាន​មាន​ប្រសាសន៍​នៅ​ក្នុង​បទ​សម្ភាសន៍​មួយ​ថា ​យុវជន​ត្រូវ​ការ​យន្ត​ការ​ជាក់​លាក់​មួយ​ដើម្បី​ធានា​ថា​ ពួក​គេ​អាច​ចូល​រួម​បាន​កាន់​តែ​ច្រើន​ថែម​ទៀត​នៅ​ក្នុង​ការ​អភិវឌ្ឍ​សង្គម​ជាតិ​របស់​ខ្លួន។

«ការ​ចូល​រួម​របស់​យុវជន​នៅ​ក្នុង​កិច្ច​ការ​សង្គម​ យើង​ឃើញ​ថា​ ជា​បញ្ហាប្រឈម​មួយ​ដែល​យើង​មិនសូវ​មាន​ការ​ចូល​រួម​ច្រើន​នៅ​ក្នុង​ការ​អភិវឌ្ឍ​សង្គម​ទេ​ ហើយ​អា​នេះ​វា​មាន​មូល​ហេតុ​ច្រើន​ ប៉ុន្តែ​អ្វី​ ដែល​ជា​មូល​ហេតុ​ចម្បង​នោះ​គឺ​ទាក់​ទង​នឹង​ការ​អប់រំ​ តើ​ការ​អប់រំ​របស់​យើង​មាន​ការ​ជំរុញ​យុវជន​ ឬ​ការ​បណ្តុះ​នូវ​មនៈ​សិការ​សង្គម​ដល់​យុវជន​ឬ​អត់ ​ឬ​ការ​កសាង​សន្តិ​ភាព​សង្គម​ឬ​ការ​កាត់​បន្ថយ​អំពើ​ពុក​ រលួយ​ អា​នេះ​ជា​សំណួរ​ដែល​សំខាន់​»។

បច្ចុប្បន្ន​ ការ​ចូល​រួម​របស់​យុវជន​ក្នុង​ការ​អភិវឌ្ឍ​សង្គម​ធ្វើ​ឡើង​ក្នុង​រូប​ភាព​ជា​អ្នក​ស័្មគ្រ​ចិត្ត​នៅ​តាម​ បណ្តា​អង្គ​ការ​ក្រៅ​រដ្ឋា​ភិបាល​នានា​ ដើម្បី​ធ្វើ​សកម្ម​ភាព​មនុស្ស​ធម៌ ​អប់រំ​និង​ផ្សព្វ​ផ្សាយ​អំពី​សិទ្ធិ​អំណាច​របស់​ពល​រដ្ឋ​សម្រាប់​សហ​គមន៍​មូល​ដ្ឋាន​នានា​នៅ​ក្នុង​ប្រទេស​កម្ពុជា។

ក្រៅ​ពី​នេះ​ យុវជន​ក៏​ចូល​រួម​នៅ​ក្នុង​ការ​អង្កេត​តាម​ដាន​ដំណើរ​បោះ​ឆ្នោត​និង​សកម្ម​ភាព​នយោ​បាយកន្លង​មក​ផង​ដែរ។

ដោយ​មើល​ឃើញ​ពី​សារៈ​សំខាន់​របស់​យុវជន​នៅ​ក្នុង​ការ​អភិវឌ្ឍ​ជាតិ​ អ្នក​ស្រី​ស៊ុន​ ចាន់​សែន​ ប្រធាន​សមាគម​យុវជន​ខ្មែរ​មាន​ប្រសាសន៍​ថា​ យុវជន​ខ្មែរ​ប្រាថ្នា​ចង់​ឱ្យ​គោល​នយោ​បាយ​ស្តី​ពី​យុវជន​ជាតិ​ត្រូវ​បាន​អនុម័ត​នៅ​ក្នុង​ឆ្នាំ​ថ្មី​នេះ​ ដើម្បី​ជា​ត្រីវិស័យ​មួយ​សម្រាប់​ជួយ​ដល់​យុវជន​ក្នុង​ការ​ ចូល​រួម​ចំណែក​កសាង​ប្រទេស​របស់​ពួក​គេ។

«យើង​រំពឹង​ទុក​ថា​ នៅ​ក្នុង​ឆ្នាំ​ថ្មី​នេះ​ ខាង​ក្រសួង​អប់រំ​យុវជន​និង​កីឡា​នៃ​រាជ​រដ្ឋា​ភិបាល​កម្ពុជា​យើងហ្នឹង​នឹង​រុញ​ឱ្យ​ចេញ​បាន​លឿន​បំផុត​នូវ​គោល​នយោ​បាយ​ស្តី​ពី​យុវជន​ជាតិ​ពីព្រោះ​អី​គោល​នយោ​បាយ​ហ្នឹង​វា​មាន​សារៈ​ប្រយោជន៍​មួយ​នៅ​ក្នុង​ការ​ដឹក​នាំ​តម្រង់ផ្លូវ​ដល់​យុវជន​យើង​ ហើយ​ទាំង​រដ្ឋាភិបាល​ ទាំង​យុវជន​អាច​រួម​គ្នា​ធ្វើ​យ៉ាង​ម៉ិច​នៅ​ក្នុង​ការ​ពង្រឹង​និង​ស្ថាបនា​ឱ្យ​មាន​ការ​រីក​ចម្រើន»។

សូម​បញ្ជាក់​ថា ​ពង្រាង​គោល​នយោ​បាយ​ស្តី​ពី​យុវជន​ជាតិ​ត្រូវ​បាន​ធ្វើ​ឡើង​លើក​ដំបូង​ដោយ​នាយក​ដ្ឋាន​យុវ​ជន​និង​កីឡា​នៃ​ក្រសួង​អប់រំ​ក្នុង​ឆ្នាំ​២០០៤​ ហើយ​ត្រូវ​បាន​ពិភាក្សា​ក្នុង​សិក្ខា​សាលា​ពិគ្រោះ​ យោបល់​ជា​មួយ​ស្ថាប័ន​និង​បណ្តាញ​យុវជន​ចំនួន​បី​លើក​កន្លង​មក​ហើយ។​ បច្ចុប្បន្ន​សេចក្តី​ព្រាងនោះ​កំពុង​ស្ថិត​ក្នុង​ដំណាក់​កាល​ពង្រាង​ចុង​ក្រោយ។

លោក​ ផន​ សុគីម​ អគ្គ​នាយក​នៃ​អគ្គ​នាយក​ដ្ឋាន​យុវជន​ដែល​ទទួល​បន្ទុក​ព្រាង​គោល​នយោ​បាយ​ ស្តី​ពី​យុវជន​ជាតិ​នេះ​ ពុំ​បាន​បំភ្លឺ​អំពី​សេចក្តី​ព្រាង​គោល​នយោ​បាយ​នោះ​ទេ​ ដោយ​លោក​មានប្រសាសន៍​ថា​ លោក​កំពុង​ជាប់​ធុរៈ​ក្នុង​គ្រួសារ។

ប៉ុន្តែ​ លោក​ ខៀវ​ កាញា​រិទ្ធ​ អ្នក​នាំ​ពាក្យ​រដ្ឋា​ភិបាល​កម្ពុជា​មាន​ប្រសាសន៍​ថា ​រដ្ឋា​ភិបាល​តែង​តែ​បាន​ គិត​គូរ​ដល់​យុវជន​ក្នុង​ការ​ស្វែង​រក​ការ​ងារ​សម្រាប់​ពួក​គេ​តាម​រយៈ​ការ​ទាក់​ទាញ​វិនិ​យោគ​បរ​ទេស​ ឬ​ការ​បញ្ជូល​ពល​ករ​ទៅ​ធ្វើ​ការ​នៅ​ក្រៅ​ប្រទេស​ជា​ដើម។

«ដូច​កន្លង​មក ​ទោះ​បី​យើង​មិន​បាន​វិនិ​យោគ​ចូល​ក៏​យើង​ខិត​ខំ​ចរចា​ជា​មួយ​ប្រទេស​មួយ​ចំនួន​ដើម្បី​ នាំ​កម្លាំង​ពល​ករ​របស់​យើង​ចេញ​ អាហ្នឹង​ក៏​ជា​ផ្នែក​មួយ​ក្នុង​ការ​ស្វែង​រក​ការ​ងារ​ធ្វើ​ដែរ​តើ​ ពីព្រោះ​មាន​ មុខ​ជំនាញ​ខ្លះ​ យើង​រៀន​ហើយ​គឺ​នៅ​ស្រុក​ខ្មែរ​។ វា​អត់​មាន​ការ​ធ្វើ​នូវ​មុខ​ជំនាញ​ហ្នឹង​ទេ​ ប៉ុន្តែ​គេ​អាច​រក​នៅ​ក្រៅ​បាន»។

តែ​យ៉ាង​ណា​ក៏ដោយ​ មន្រ្តី​ក្រសួង​អប់រំ​ដែល​បាន​ចូល​រួម​នៅ​ក្នុង​ការ​ធ្វើ​សេចក្តី​ព្រាង​គោល​នយោ​បាយស្តី​ពី​យុវជន​ជាតិ​ បាន​មាន​ប្រសាសន៍​ដោយ​សុំ​មិន​បញ្ចេញ​ឈ្មោះ​និង​សម្លេង​ថា ​ពង្រាង​គោលនយោ​បាយ​ដែល​មាន​១០​ចំណុច​សំខាន់ៗ​នេះ​ ក៏​មាន​បញ្ចូល​នូវ​ការ​កំណត់​អំពី​ការ​លើក​កម្ពស់គុណ​ភាព​នៃ​ការ​អប់រំ​និង​ការ​ចូល​រួម​របស់​យុវជន​នៅ​ក្នុង​សកម្ម​ភាព​អភិវឌ្ឍន៍​សង្គម​ផង​ដែរ។

មន្ត្រី​ដដែល​បាន​បញ្ជាក់​ថា ​អគ្គ​នាយក​ដ្ឋាន​យុវជន​នៃ​ក្រសួង​អប់រំ​គ្រោង​នឹង​បើក​សិក្ខា​សាលាថ្នាក់​ជាតិ​លើក​ចុង​ក្រោយ​ដើម្បី​ពិគ្រោះ​យោបល់​ទៅ​លើ​សេចក្តី​ព្រាង​គោល​នយោ​បាយ​ស្តី​ពី​យុវជនជាតិ​នេះ​ នៅ​ថ្ងៃ​ទី​២៩ ​ខែ​មេសា​ឆ្នាំ​២០១០​ខាង​មុខ​នេះ​ មុន​នឹង​ដាក់​ជូន​ទី​ស្តី​ការ​គណៈ​រដ្ឋ​មន្រ្តី​អនុម័ត​ មិន​ឱ្យ​ហួស​ពី​ឆ្នាំ​២០១០​នេះ​ឡើយ៕

XS
SM
MD
LG