ភ្ជាប់​ទៅ​គេហទំព័រ​ទាក់ទង

អ្នក​ជំនួញ​បរទេស​៖ច្បាប់​ផ្តល់​កម្ម​សិទ្ធិ​ដល់​ជន​​បរ​ទេស​​ផ្តល់​​ផល​ប្រយោជន៍​​​ដល់​​អ្នក​​វិនិ​យោគ​​បរទេស


ក្រុម​អ្នក​ជំនួញ​បរទេស​បាន​ហៅ​ច្បាប់​ផ្តល់​កម្ម​សិទ្ធិ​ដល់​ជន​បរ​ទេស​នេះ​ថា ​ជា​ការ​ផ្តល់​ផល​ប្រយោជន៍​ដល់​អ្នក​វិនិ​យោគ​បរ​ទេស​ផង ​និង​ដល់​ប្រទេស​កម្ពុជា​ផង​ ក្នុង​ការ​ទាក់​ទាញ និង​ការ​បង្កើន​ជំនឿ​ទុក​ចិត្ត​ដល់​អ្នក​វិនិយោគ​បរទេស។

ក្រុម​ពាណិជ្ជ​ករ​បរ​ទេស​បាន​និយាយ​នៅថ្ងៃ​អង្គារ​នេះ​ថា ច្បាប់​ផ្តល់​កម្ម​សិទ្ធិ​ដល់​ជន​បរ​ទេស​ថ្មី​បាន​បើក​ផ្លូវ​សម្រាប់​អ្នក​វិនិ​យោគ​ទុន​បរ​ទេស​ ដើម្បី​ធ្វើ​ឱ្យ​ទី​ផ្សារ​អចលន​ទ្រព្យ​ងើប​ឡើង​វិញ​ ក្នុង​ការ​ជំរុញ​ការ​សាង​សង់​សំណង់​ និង​ការ​វិនិយោគ​លើ​អគារ​ស្នាក់​នៅ ​ឬ ​អគារ​ខុនដូ​នៅ​ក្នុង​ប្រទេស​កម្ពុជា។

ច្បាប់​ផ្តល់​កម្ម​សិទ្ធិ​អចលន​ទ្រព្យ​ដែល​ទន្ទឹង​រង់​ចាំ​ជា​យូរ​មក​ហើយ​ ត្រូវ​បាន​អនុម័ត​ដោយ​សំឡេង​ភាគ​ច្រើន​នៅ​ក្នុង​សម័យ​ប្រជុំ​រដ្ឋ​សភា​កាល​ពី​សប្តាហ៍​មុន​ និង​កែ​ប្រែ​ធ្វើ​ឱ្យ​ចម្រើន​ដល់​ទី​ផ្សារ​អចលន​ទ្រព្យ។​ ឥឡូវ​ ច្បាប់​នេះ​ត្រូវ​ការ​អនុម័ត​ដោយ​ព្រឹទ្ធ​សភា​ និង​បន្ទាប់​មក​ព្រះ​មហាក្សត្រ​ស្តេច​នឹង​ឡាយ​ព្រហស្ត​លេខា​ជា​ចុង​ក្រោយ​ មុន​នឹង​ក្លាយ​ទៅ​ជា​ច្បាប់​ពេញ​លក្ខណៈ។

គណៈ​រដ្ឋ​មន្ត្រី​បាន​អនុម័ត​ច្បាប់​នេះ​នៅ​ក្នុង​ខែ​ធ្នូ ក្នុង​កិច្ច​ខិត​ខំប្រឹង​ប្រែង​ធ្វើ​ឱ្យ​ប្រសើរ​ដល់​សិទ្ធិ​កម្ម​សិទ្ធិ​ឯក​ជន​ បង្កើន​ការ​វិនិយោគ​ទុន​ និង​បង្ក​លក្ខណៈ​ងាយ​ស្រួល​ដល់​ការ​ធ្វើ​វិនិយោគ​ទុន​នៅ​កម្ពុជា។​ ច្បាប់​នេះ​អនុញ្ញាតឱ្យ​ជន​បរទេស​មាន​កម្ម​សិទ្ធិ​លើ​អគារ​ស្នាក់​នៅ​ចាប់​ពី​ជាន់​ទី​១​ និង​ចំនួន​ទឹក​ប្រាក់​ដ៏​ច្រើន​នៅ​ក្នុង​ទ្រព្យ​សម្បត្តិ​លំ​នៅ​ដ្ឋាន​ឯក​ជន​សម្រាប់​ជន​បរទេស។

លោក​ Daniel​ Parkes ​អ្នក​គ្រប់​គ្រង​នៃ​ភ្នាក់​ងារ​អចលន​ទ្រព្យ​ពិភព​លោក​ប្រចាំ​នៅ​កម្ពុជា​ បាន​ថ្លែង​ប្រាប់ ​VOA​កាល​ពី​ថ្ងៃ​ព្រហស្បតិ៍ថា​ច្បាប់​ផ្តល់​កម្ម​សិទ្ធិ​ដល់​ជន​បរ​ទេស​នេះ​នឹង​ផ្តល់​ផល​ប្រយោជន៍​ដល់​អ្នក​វិនិយោគ​បរ​ទេស​ផង​ និង​ដល់​ប្រទេស​កម្ពុជា​ផង​និង​បង្កើន​ជំនឿ​ទុក​ចិត្ត​ក្នុង​ក្រម​ខ័ណ្ឌ​ច្បាប់​សម្រាប់​កម្ម​សិទ្ធិ​លើ​អចលន​ទ្រព្យ​របស់​ជន​បរ​ទេស​នៅ​ក្នុង​ប្រទេស​កម្ពុជា។

លោក​ Daniel Parkes​ បាន​បញ្ជាក់​ថា វា​ជា​បដិវត្តន៍​នៅ​ក្នុង​ការ​វិនិយោគ​អចលន​ទ្រព្យ​នៅ​កម្ពុជា​ដែល​កើត​ចេញ​ពី​លទ្ធ​ផល​នៃ​ច្បាប់​នេះ។​ លោក​គិត​ថា ​វា​ជា​ជំហាន​នៅ​លើ​ដង​ផ្លូវ​ឆ្ពោះ​មកកាន់​ប្រទេស​កម្ពុជា​កាន់​តែ​ច្រើន​ឡើង​ដោយ​ចាត់​ទុក​ថា ​ជាកន្លែង​មួយ​សម្រាប់​ការ​វិនិយោគ​ពី​អ្នក​វិនិយោគ​អន្តរ​ជាតិ ​និង​អភិវឌ្ឍ​អចលន​ទ្រព្យ។

«វា​នឹង​បង្កើន​ផល​ប្រយោជន៍​នៅ​កម្ពុជា។​ វា​ជា​ការ​សមរម្យ​នូវ​អ្វី​ដែល​ភាព​សំខាន់​នៃ​ច្បាប់​នេះ​ គឺ​ថា​ អគារ​ខុនដូ​នឹង​មាន​ផល​ចំណេញ​ និង ​ថា​តើ​ក្រុម​ហ៊ុន​គ្រប់​គ្រង​មាន​សារៈ​សំខាន់​សម្រាប់​ប្រជា​ពល​រដ្ឋ​ ដើម្បី​ពិចារណា​ នៅ​ពេល​ដែល​ពួក​គេ​កំពុង​វិនិយោគ​នៅ​ក្នុង​ប្រទេស​នេះ។​ វា​ដំណើរ​ការ​តាម​វិធី​មួយ​ចំនួន​ដើម្បី​ធ្វើ​ឱ្យ​ជំនឿ​ជឿ​ទុក​ចិត្ត​កាន់​តែ​ប្រសើរ​ឡើង​ និង​ធ្វើ​ឱ្យ​ការ​វិនិ​យោគ​កាន់​តែ​ប្រសើរ​ឡើង​នៅ​ក្នុង​ប្រទេស​កម្ពុជា។​ ប៉ុន្តែ​វា​មិន​មែន​ជា​ជម្លោះ​ទេ។​ ដូច្នេះ​វា​គឺ​ជា​ទី​កន្លែង​ដ៏​ល្អ​ដើម្បី​វិនិយោគ​ប្រាក់​របស់​ខ្ញុំ»។

លោក​ Paul​ Luchtenburg ​ប្រធាន​ប្រតិ​បត្តិ​នៃ​គ្រឹះ​ស្ថាន​ហិរញ្ញ​វត្ថុ​របស់​ក្រុម​ហ៊ុន​ AMK​ co.​,LTD​ បាន​ថ្លែងកាល​ពី​ថ្ងៃ​ព្រហស្បតិ៍​ថា​ ភរិយា​របស់​លោក​ជា​ជន​ជាតិ​ខ្មែរ​ដែល​មាន​ផ្ទះ​រួច​ជា​ស្រេច។​ ប៉ុន្តែ​លោក​ដឹង​ថា​ មិត្ត​ភក្ត្រ​ជា​ច្រើន​ដែល​ចង់​ស្វែង​រក​ផ្លូវ​ច្បាប់​ដ៏​ងាយ​ស្រួល​ដើម្បី​ទិញ​អគារ​ស្នាក់​នៅ​ក្នុង​ប្រទេស​កម្ពុជា។​ មាន​តម្រូវ​ការ​ជា​ច្រើន​ ពីព្រោះ​មនុស្ស​ជា​ច្រើន​ចង់​ទិញ​ផ្ទះ​ដែល​នឹង​មាន​តម្លៃ​ខ្ពស់។

«ខ្ញុំ​គិត​ថា​ ផល​ប្រយោជន៍​នេះ​នឹង​បង្កើន​តម្រូវ​ការ​សម្រាប់​អចលន​ទ្រព្យ។ ​ដូច្នេះ​ លោក​អ្នក​មាន​មនុស្ស​ជា​ច្រើន​អាច​រក​ទិញ​ផ្ទះ។​ ដូច្នេះ​រឿង​នោះ​នឹង​ជួយ​ឱ្យ​ចាប់​ផ្តើម​ឡើង​វិញ​នូវ​ជំនួញ​អចលន​ទ្រព្យ»។

Paul​ Luchtenburg ​បាន​បន្ថែម​ថា​ វា​នឹង​នាំ​យក​ប្រាក់​កាន់​តែ​ច្រើន​ចូល​មក​ក្នុង​ប្រទេស​នេះ។​ ដូច្នេះ​ លោក​គិត​ថា​ វា​ជា​រឿង​ល្អ​ណាស់ ​និង​ការ​សន្សំ​ប្រាក់​កាន់​តែ​បាន​ច្រើន​ថែម​ទៀត។

លោក​ JEREMY Ha ​នាយក​ធនាគារ​ភ្នំពេញ​ពាណិជ្ជ ​បាន​ថ្លែង​នៅ​ថ្ងៃអង្គារ​នេះ​ថា ​ក្រុម​ហ៊ុន​អភិវឌ្ឍន៍​ និង​សំណង់​កូរ៉េ​ខាង​ត្បូង​មាន​សុទិដ្ឋិ​និយម​ខ្លាំង​ណាស់​ចំពោះ​ការ​អនុម័ត​ច្បាប់​ផ្តល់​កម្ម​សិទ្ធិ​ដល់​ជន​បរទេស​នេះ។​ លោក​គិត​ថា ​ក្រុម​ហ៊ុន​មួយ​ចំនួន​សាង​សង់​អគារ​ស្នាក់​នៅ ​ឬ​អគារ​ខុនដូ ​នឹង​កើន​ឡើង​យ៉ាង​ពិត​ប្រាកដ​នៅ​ក្នុង​ពេល​អនាគត។

«អតិថិ​ជន​របស់​យើង​មាន​២​ផ្នែក​ គឺ​ជន​ជាតិ​កូរ៉េ​ និង​ជន​ជាតិ​ខ្មែរ​ ដោយ​១០% ​សម្រាប់​ក្រុម​ហ៊ុន​កូរ៉េ​ និង​៩០% ​សម្រាប់​ក្រុម​ហ៊ុន​ខ្មែរ​ដែល​ជា​ក្រុម​ហ៊ុន​សំណង់។​ ខ្ញុំ​ក៏​មាន​សុទិដ្ឋិ​និយម​ ជា​ជន​បរ​ទេស​ម្នាក់ ​ពីព្រោះ​ខ្ញុំ​អាច​ទិញ​អគារ​ស្នាក់​នៅ ​ឬអគារ​វីឡា​ ដោយ​ដាក់​ឈ្មោះ​របស់​ខ្ញុំ​ផ្ទាល់។​ ដូច្នេះ​ ជន​ជាតិ​កូរ៉េ​ជា​ច្រើនកំពុង​តែ​ជជែក​គ្នា​អំពី​បញ្ហា​នេះ។​ ច្បាប់​នេះ​គឺ​ងាយ​ស្រួល​ទាក់​ទាញ​ការ​វិនិយោគ​ពី​ប្រទេស​កូរ៉េ​ និង​ប្រទេស​ជប៉ុន»។

លោក​ស៊ឹង​ ប៊ុណ្ណា​ ប្រធាន​សមាគម​វាយ​តម្លៃ​អចលន​ទ្រព្យ​កម្ពុជា​ និង​ជា​ប្រធាន​ក្រុម​ហ៊ុន​អចលន​ទ្រព្យ​ Bonna​ Realty ​Group​ បាន​ថ្លែង​នៅ​ថ្ងៃ​អង្គារ​នេះ​ថា​ ច្បាប់​នេះ​បាន​ផ្តល់​ផល​ប្រយោជន៍​សម្រាប់​ជំរុញ​សកម្ម​ភាព​អចលន​ទ្រព្យ​និង​ទាក់​ទាញ​អ្នក​វិនិយោគ​បរទេស​ឱ្យ​មក​បណ្តាក់​ប្រាក់​ទុន​នៅ​កម្ពុជា។

លោក​ ស៊ឹង​ ប៊ុណ្ណា​បាន​បញ្ជាក់​ថា ​នេះ​ជា​ឱកាស​សម្រាប់​អ្នក​វិនិយោគ​បរទេស​ ដែល​មាន​កម្ម​សិទ្ធិ​ផ្ទាល់​ខ្លួន​លើ​ផ្ទះ​ សម្រាប់​ការ​វិនិយោគ​ និង​ការ​ស្នាក់​នៅ។

លោក​ ស៊ឹង ​ប៊ុណ្ណា ​បាន​បន្ត​ថា ​ច្បាប់​នេះ​នឹង​ជួយ​ជំរុញ​ឱ្យ​ក្រុម​ហ៊ុន​របស់​លោក​អាច​មាន​ដំណើរ​ការ​ល្អ​នៅ​ឆ្នាំ​២០១១​ និង​ជា​កត្តា​មួយ​ជំរុញ​កំណើន​សេដ្ឋ​កិច្ច​កម្ពុជា​ និង​គ្មាន​ការ​ព្រួយ​បារម្ភ។

«ការ​បញ្ចេញ​នូវ​អនុក្រឹត្យ​សម្រាប់​អនុវត្ត​ច្បាប់​ចង់​ឱ្យ​លឿន​ ចង់​ឱ្យ​ចេញ​មក​ដោយ​រលូន​ ចង់​ឱ្យ​ច្បាស់​លាស់​ និង​ត្រឹម​ត្រូវ​ ទៅ​តាម​ច្បាប់​ដែល​បាន​អនុម័ត​ ពីព្រោះ​ច្បាប់​ដែល​បាន​អនុម័ត​នេះ​ មាន​ន័យ​គ្រប់​គ្រាន់​ និង​សម​ស្រប​ ដែល​អ្នក​វិនិយោគ​ក្នុង​ស្រុក ​និង​បរទេស​ សប្បាយ​ចិត្ត​ចំពោះ​ច្បាប់​នេះ​ខ្លាំង​ណាស់»។

លោក​ Daniel​ Parkes ​បាន​ថ្លែង​ថា ​វា​នឹង​ជួយ​ទាក់​ទាញ​ផល​ប្រយោជន៍​បរ​ទេស​ ហើយ​អ្នក​ទាំង​នោះ​រៀប​ចំ​ខ្លួន​មក​វិនិយោគ​នៅ​កម្ពុជា​ឥឡូវ​នេះ​ នឹង​ផ្តល់​ផល​ប្រយោជន៍​ច្រើន​ឡើង​នៅ​ឆ្នាំ​២០១១។

លោក​ Daniel​ Parkes ​បាន​បញ្ជាក់​ថា​ នៅ​៦​ខែ​ខាង​មុន​នេះ​ គឺ​ជា​ពេល​វេលា​ដ៏​ល្អ​ដើម្បី​ទិញ។​ ដោយ​ប្រៀប​ធៀប​ វា​មាន​គុណ​សម្បត្តិ​ជាង​ប្រទេស​ថៃ ​និង​ប្រទេស​វៀតណាម​ សម្រាប់​អ្នក​វិនិយោគ​បរទេស។

ច្បាប់​នេះ​អនុញ្ញាត​ឱ្យ​ជន​បរទេស​មាន​សិទ្ធិ​ទិញ​អចលន​ទ្រព្យ​ចាប់​ពី​ជាន់​ទី​១​ឡើង​ទៅ​ ប៉ុន្តែ​ការ​ទិញ​ផ្ទះ​នៅ​ជាន់​ផ្ទាល់​ដី ​និង​ដី​ធ្លី​ត្រូវ​បាន​ហាម​ឃាត់ ​ហើយ​ការ​ទិញ​អចលន​ទ្រព្យ​ក្នុង​ចម្ងាយ​៣០​ គីឡូ​ម៉ែត្រ​ ​ពី​ព្រំ​ដែន​កម្ពុជា​ជាប់​ជា​មួយ​ប្រទេស​វៀតណាម​ ឡាវ​ និង​ថៃ ​ត្រូវ​បាន​ហាម​ឃាត់។​ ប៉ុន្តែ​លើក​លែង​តែ​នៅ​ក្នុង​តំបន់សេដ្ឋ​កិច្ច​ពិសេស​ និង​តំបន់​ផ្សេងៗ​ទៀត​ដែល​បាន​កំណត់​ដោយ​រដ្ឋា​ភិបាល។

លោក​ អ៊ឹម​ ឈុន​លឹម ​រដ្ឋ​មន្ត្រី​ក្រសួង​ដែន​ដី​នគរូបនីយ៍​កម្ម​ និង​សំណង់​ បាន​បញ្ជាក់​ថា​ ច្បាប់​នេះ​នឹង​ជួយ​ទាក់​ទាញ​អ្នក​ទិញ​បរទេស​ និង​បង្កើន​កំណើន​សេដ្ឋ​កិច្ច​កម្ពុជា។​ ច្បាប់​នេះ​ជំរុញ​ការ​វិនិយោគ​ដោយ​លើក​ទឹក​ចិត្ត​ដល់​ការ​សាង​សង់​សំណង់​នៃ​អគារ​ទំនើបៗ ​អគារ​ខ្ពស់ៗ​ អគារ​ស្នាក់​នៅ​ និង​អគារ​ខុនដូ។

ក្រុមមន្ត្រី​បាន​ថ្លែង​ថា ​អនុក្រឹត្យ​នឹង​ត្រូវ​សរសេរ​យ៉ាង​ត្រឹម​ត្រូវ​ស្រប​តាម​ច្បាប់​ដែល​បាន​អនុម័ត​ ហើយ​អនុក្រឹត្យ​នេះ​មាន​លក្ខណៈ​ត្រឹម​ត្រូវ​ និង​សម​រម្យ​សម្រាប់​ភាគី​ទាំង​អស់។

ការ​ផ្តន្ទា​ទោស​នៅ​ក្នុង​ច្បាប់​នេះ​នៃ​មាត្រា​២០​និង​២១​បាន​ចែង​យោង​នៅ​ក្នុង​ច្បាប់​ភូមិ​បាល។​ ច្បាប់​ភូមិ​បាល​ បាន​ សរសេរ​ថា​ ជន​បរទេស​ណា​ដែល​រំលោភ​ច្បាប់​ផ្តល់​កម្ម​សិទ្ធិ​ដល់​ជន​បរទេស​នេះ​នឹង​ត្រូវ​ផ្តន្ទា​ទោស​ពិន័យ​ជា​ប្រាក់​រហូត​ដល់​២.២៥០​ដុល្លារ​អាមេរិក​ ហើយ​មន្ត្រី​សូរិយោដី​ណា​ដែល​រំលោភ​ច្បាប់​ផ្តល់​កម្ម​សិទ្ធិ​ដល់​ជន​បរទេស​នេះ​ នឹង​ផ្តន្ទា​ទោស​ពិន័យ​ជា​ប្រាក់​រហូត​ដល់​១.២៥០​ ដុល្លារ​អាមេរិក​ និង​បន្ថែម​ទោស​រដ្ឋ​បាល​ទៀត៕

XS
SM
MD
LG