ភ្ជាប់​ទៅ​គេហទំព័រ​ទាក់ទង

អង្គការ​ក្រៅ​រដ្ឋា​ភិបាល​គាំ​ទ្រ​វិធាន​ការណ៍​លុប​បំបាត់​បទ​ល្មើស​ព្រៃ​ឈើ


ក្រុម​សម្ព័ន្ធ​អង្គការ​សង្គម​ស៊ីវិល​ចំនួន​ជាង​១០០​នៅ​កម្ពុជា​ ដែល​រួម​គណៈ​កម្មា​ធិការ​ប្រព្រឹត្តិ​កម្ម​ នៃ​អង្គ​ការ​សមាគមន៍​សិទ្ធិ​មនុស្ស​ ដែល​មាន​សមាជិក​ចំនួន​២៣​ វេទិកា​នៃ​អង្គការ​មិន​មែន​រដ្ឋា​ភិបាល​ស្តី​ពី​កម្ពុជា​ ដែល​មាន​សមាជិក​ចំនួន​៨២​ និង​ក្រុម​ការ​ងារ​ពិសេស​សិទ្ធិ​លំ​នៅ​ដ្ឋាន​ ដែល​មាន​សមាជិក​ ចំនួន​១៣​ នៅ​ថ្ងៃ​សុក្រ​នេះ​ បាន​ចេញ​សេចក្តី​ប្រកាស​ព័ត៌​មាន​រួម​គ្នា​មួយ​ ដោយ​បាន​គាំទ្រ​វិធាន​ការណ៍​ របស់​រដ្ឋាភិ​បាល​ក្នុង​ការ​លុប​បំបាត់​បទ​ល្មើស​ព្រៃ​ឈើ​ ក៏​ប៉ុន្តែ​បាន​ទទូច​ឲ្យ​រដ្ឋា​ភិបាល​កម្ពុជា​ បន្ត​ចាត់​ វិធាន​ការណ៍​តាម​ផ្លូវ​ច្បាប់​ដល់​ជន​ល្មើស​ដែល​បាន​ប្រព្រឹត្ត​បទ​ល្មើស​ព្រៃ​ឈើ​ដោយ​គ្មាន​ការ​រើស​អើង​និន្នា​ការ​នយោ​បាយ។

នៅ​ក្នុង​សេចក្តី​ថ្លែង​ការណ៍​រួម​គ្នា​ ដែល​បាន​ចែក​ជូន​ក្រុម​អ្នក​កាសែត​របស់​ក្រុម​សម្ព័ន្ធ​អង្គការ​ សង្គម​ស៊ីវិល​ បាន​និយាយ​ថា​ អស់​រយៈ​ពេល​ជា​ច្រើន​ទស​វត្សរ៍​កន្លង​មក​ហើយ​ ដែល​ព្រៃ​ឈើ​កម្ពុជា​ បាន​ទទួល​រង​នូវ​ការ​ទន្រ្ទាន​ខុស​ច្បាប់​ ហើយ​ការ​ខ្វះ​ខាត​នៃ​ចំណាត់​វិធាន​ការណ៍​ទប់​ស្កាត់​បទ​ល្មើស​ព្រៃ ​ឈើ​របស់​អាជ្ញា​ធរ​មាន​សមត្ថ​កិច្ច​កន្លង​មក​ធ្វើ​ឲ្យ​ព្រៃ​ឈើ​ទទួល​រង​នូវ​ការ​កាប់​បំផ្លាញ​យ៉ាង​ធ្ងន់​ធ្ងរ។

លោក​ឈិត​ សំអាត​ នាយក​ប្រតិ​បត្តិ​នៃ​អង្គការ​មិន​មែន​រដ្ឋា​ភិបាល​ស្តី​ពី​កម្ពុជា​ បាន​បញ្ជាក់​ថា យើង​មាន​ការ​សោក​ស្តាយ​ខ្លាំង​ណាស់​ ចំពោះ​ការ​បាត់​បង់​ព្រៃ​ឈើ។

លោក​បាន​មាន​ប្រសាសន៍​ទៀត​ថា​ កន្លង​មក​មាន​ការ​កាប់​បំផ្លាញ​ព្រៃ​ឈើ​តាម​រយៈ​រូបភាព​ ផ្សេងៗ​ ហើយ​ការ​ផ្តល់​ដី​សម្បទាន​សេដ្ឋ​កិច្ច​ បាន​ធ្វើ​ឲ្យ​ប៉ះ​ពាល់​ដល់​ព្រៃ​ឈើ​កម្ពុជា។

«ព្រៃ​ឈើ​ គឺ​ជា​ប្រភព​មួយ​យ៉ាង​សំខាន់​សម្រាប់​ជីវភាព​រស់​នៅ​របស់​ប្រជាជន​កម្ពុជា​រាប់​លាន​នាក់​ ដែល​គាត់​រស់​នៅ​ពឹង​ផ្អែក​ទៅ​លើ​អនុផល​ និង​ទិន្ន​ផល​ព្រៃ​ឈើ​របស់​យើង​នេះ​»។

លោក​ហង្ស​ ឆាយា​ ប្រធាន​សម្រប​សម្រួល​គណៈ​កម្មាធិ​ការ​ប្រព្រឹត្ត​កម្ម​ និង​ជា​នាយក​ប្រតិ​បត្តិ​ នៃ​វិទ្យា​ស្ថាន​ខ្មែរ​សម្រាប់​លិទ្ធិ​ប្រជាធិប​តេយ្យ​ បាន​លើក​ឡើង​ថា​ បញ្ហា​កាប់​បំផ្លាញ​ព្រៃ​ឈើ​នៅ​កម្ពុជា​ ជា​បញ្ហា​រួម​ និង​ជះ​ឥទ្ធិ​ពល​ពី​បរទេស។

លោក​បាន​លើក​ឡើង​ទៀត​ថា ​ប្រទេស​កម្ពុជា​ជាប់​ចំណាត់​ថ្នាក់​លេខ​៣ ​នៅ​ក្នុង​ចំណោម​បណ្តា​ប្រទេស​ ដែល​មាន​ឈ្មោះ​ក្នុង​ការ​កាប់​បំផ្លាញ​ព្រៃ​ឈើ​យ៉ាង​រង្គាល​ក្នុង​ពិភព​លោក​យើង​នេះ​បន្ទាប់​ពី​ប្រទេស​នីហ្សីរីយ៉ា​ និង​ប្រទេស​វៀតណាម។

លោក​បាន​មាន​ប្រសាសន៍​ទៀត​ថា​ បើ​តាម​ការ​សិក្សា​មួយ​របស់​អង្គការ​សហ​ប្រជា​ជាតិ​ចាប់​ពី​ ឆ្នាំ​២០០០​ ដល់​ ឆ្នាំ​២០០៥​ បាន​ឲ្យ​ដឹង​ថា​ ប្រទេស​កម្ពុជា​បាន​កាប់​បំផ្លាញ​ព្រៃ​ឈើ​ចំនួន​២៩%​ ក្នុង​១​ឆ្នាំៗ ។

លោក​អ៊ិន​ ណាំ​ តំណាង​សហគមន៍​ព្រៃ​ឈើ​មក​ពី​ខេត្ត​កំពង់​ធំ ​បាន​បញ្ជាក់​ថា​ ព្រៃ​ឡង់​ដែល​មាន​ទី​តាំង​នៅ​ក្នុង​ខេត្ត​កំពង់​ធំ ​កាល​ពី​ដើមលោក​បាន​ចូល​រក​អនុផល​ព្រៃ​ឈើ​ជា​មួយឳពុក​ ម្តាយ​ ដែល​សំបូរ​ទៅ​ដោយ​ព្រៃ​ឈើ​ តូច ​ធំ ​ជីវៈ​សាស្រ្ត​ចម្រុះ​ សត្វ​ដំរី ​ខ្លា​ និង​ខ្ទីង​ជា​ដើម។​ក៏​ប៉ុន្តែ​ បច្ចុប្បន្ន​នេះ​ បាន​បាត់​បង់​អស់​ហើយ។

លោក​អ៊ិន​ ណាំ​ បាន​និយាយ​ទៀត​ថា ការ​បាត់​បង់​ព្រៃ​ឈើ​នេះ​ គឺ​ដោយ​សារ​តែ​អ្នក​មាន​អំណាច​ អ្នក​មាន​លុយ​ចូល​កាប់​បំផ្លាញ​ព្រៃ​ឈើ​ រុក​រក​រ៉ែ ​និង​ការ​ផ្តល់​ដី​សម្បទាន​សេដ្ឋ​កិច្ច​របស់​រដ្ឋាភិ​បាល​ជា​ដើម​។

«សូម​ឲ្យ​ជួយ​ចុះ​បង្រ្កាប​បទ​ល្មើស​នេះឲ្យ​បាន​ដល់​គល់ ​ឫស​កែវ​របស់​បទ​ល្មើស»។

លោក​ឆេង​ គឹម​ស៊ុន​ ប្រតិភូ​រដ្ឋាភិ​បាល​ ទទួល​បន្ទុក​រដ្ឋ​បាល​ព្រៃ​ឈើ ​នៅ​ថ្ងៃ​សុក្រ​នេះ​ បាន​បដិសេធ​ពុំ​ធ្វើ​អត្ថាធិប្បាយ​ទេ​ ក៏​ប៉ុន្តែ​កាល​ពី​ថ្ងៃ​អង្គារ​ ដើម​សប្តាហ៍​នេះ​ លោក​បាន​មាន​ប្រសាសន៍​ថា​ លោក​ នឹង​ប្តេជ្ញា​បង្ក្រាប​បទ​ល្មើស​ព្រៃ​ឈើ ​នៅ​ក្នុង​តួនាទី​ថ្មី​របស់​លោក​នេះ។

លោក​នាយក​រដ្ឋ​មន្រ្តី​ហ៊ុន​ សែន​ កាល​ពី​ដើម​សប្តាហ៍​នេះ​ បាន​ដក​ហូត​តំណែង​លោក​ទី ​សុគន្ធ​ អតីត​ប្រតិភូ​រដ្ឋា​ភិបាល​ទទួល​បន្ទុក​រដ្ឋ​បាល​ព្រៃ​ឈើ​ចេញ​ពី​មុខ​តំណែង​ ដោយ​សារ​តែ​លោក​បាន​ខក​ ខាន​បង្រ្កាប​បទ​ល្មើស​ព្រៃ​ឈើ។

លោក​សុក​ សំអឿន​ នាយក​ប្រតិ​បត្តិ​ក្រុម​អ្នក​ច្បាប់​ការ​ពារ​សិទ្ធិ​កម្ពុជា​ បាន​បញ្ជាក់​ថា​ ការ​ដក​ តំណែង​លោក​ទី ​សុគន្ធ​ នេះ​ បាន​បង្ហាញ​ពី​ការ​ចាប់​ផ្តើម​ដ៏ល្អ​មួយ​ ហើយ​យើង​សង្ឃឹម​ថា​ នៅ​ថ្ងៃ​ខាង​ មុខ​ទៀត​ចំណាត់​វិធាន​ការណ៍​របស់​រដ្ឋាភិ​បាល​អាច​ច្បាស់​លាស់​ជាង​នេះ។

XS
SM
MD
LG