ប្រទេសថៃបានចេញដីកាចាប់ខ្លួនមន្រ្តីជាន់ខ្ពស់យោធាម្នាក់ ពីបទសង្ស័យមានការពាក់ព័ន្ធនៅក្នុងការជួញដូរជនចំណាកស្រុកពីប្រទេសភូមានិងបង់ក្លាដែស។
ឧត្តមសេនីយ៍ត្រី Manas Kongpan ជាមន្រ្តីជាន់ខ្ពស់បំផុតដែលមានការពាក់ព័ន្ធក្នុងអំឡុងពេលនៃការបង្ក្រាបរបស់រដ្ឋាភិបាលថៃលើបណ្តាញជួញដូរមនុស្សដ៏ធំមួយ។
បុរសអាយុ៥៨ឆ្នាំរូបនេះ បានរងការចោទប្រកាន់បីគឺ ការជួញដូរមនុស្ស ការឃុំខ្លួនជនរងគ្រោះពីការជួញដូរមនុស្ស ហើយនិងការចាប់ជនរងគ្រោះពីការជួញដូរមនុស្សដើម្បីជំរិតយកប្រាក់ នេះតាមសេចក្តីរាយការណ៍របស់កាសែតបាងកកប៉ុស្តិ៍។
មុននេះក្រុមយោធាថៃដែលកំពុងកាន់អំណាចក្នុងប្រទេសថៃ បាននិយាយសម្រាលពីការដែលថាមន្រ្តីរបស់ខ្លួនបានពាក់ព័ន្ធនៅក្នុងបណ្តាញជួញដូរមនុស្សនេះ តែផ្ទុយទៅវិញបានចាប់មន្រ្តីជាន់ទាបរាប់សិបនាក់។
ការបង្រ្កាបដែលបានចាប់ផ្តើមកាលពីខែមុន បានបង្អាក់បណ្តាញដឹកជញ្ជូនឧក្រិដ្ឋកម្មដែលមានជាយូរយាណាស់មកហើយ ក៏ប៉ុន្តែបានបោះបង់ចោលជនរងគ្រោះជាច្រើននៅកណ្តាលសមុទ្រ។
ក្នុងរយៈពេលមួយខែកន្លងមកនេះ ជនចំណាកស្រុករាប់ពាន់នាក់ បានហែលទឹកមកច្រាំងសមុទ្រឬត្រូវបានជួយសង្គ្រោះពីទូកនៅផ្ទៃទឹកតាមបណ្តោយឆ្នេរសមុទ្រប្រទេសម៉ាឡេស៊ី ឥណ្ឌូនេស៊ី ថៃនិងបង់ក្លាដែស។
ជនចំណាកស្រុករាប់ពាន់នាក់ទៀត ត្រូវបានគេគិតថា បានស្ថិតនៅកណ្តាលសមុទ្រ Andaman និងច្រកសមុទ្រ Bengal ដែលនៅទីនោះពួកគេបានស្ថិតនៅលើទូកដែលហៀបនឹងលិច ពោរពេញទៅដោយមនុស្ស និងមានគ្រឿងផ្គត់ផ្គង់បន្តិចបន្តួច។
លោក Chris Lewa ដែលជានាយកនៃអង្គការគម្រោង Arakan ដែលកំពុងឃ្លាំមើលវិបត្តិនោះ និយាយនៅថ្ងៃអង្គារនេះថា ជនជាតិភាគតិចរ៉ូហ៊ីងយ៉ាកាន់សាសនាអ៊ីស្លាមនិងជនជាតិបង់ក្លាដែសយ៉ាងហោចណាស់ក៏៥៦១៩នាក់ដែរ បានចាកចេញពីទូកនៅច្រាំងសមុទ្រនៅតំបន់អាស៊ីអាគ្នេយ៍កាលពីខែឧសភា៕
