ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលា​ឧទ្ធរណ៍ ​បានបន្ឋូរ​បន្ថយ​ទោស​មហាសេដ្ឋី​ជនជាតិ​រុស្ស៊ី


ភ្នំពេញ៖ សាលា​ឧទ្ធរណ៍ ​បាន​បន្ឋូរ​បន្ថយ​ទោស​មហា​សេដ្ឋី​ជនជាតិ​រុស្ស៊ីពីរយៈពេលពី​១៧​ឆ្នាំ​មក​នៅ​ត្រឹម​៨​ឆ្នាំ​វិញ​ ​បន្ទាប់​ពី​តុលាការរក​ឃើញ​ថា​ លោក​ Alexander​ Trofimov​ ​បាន​សារភាព​កំហុស​និង​បាន​សំដែង​ការ​សោក​ស្តាយ​ចំពោះ​ទង្វើ​ដែល​ខ្លួន​បាន​ប្រព្រឹត្ត។​ ក៏​ប៉ុន្តែ​មេធាវី​ការពារ​ជន​រង​គ្រោះ​មិន​ពេញ​ចិត្ត​នឹង​ការ​ប្រកាស​សាល​ក្រម​នេះ​ទេ។

សាលា​ឧទ្ធរណ៍​នៅ​ថ្ងៃ​ព្រហស្បតិ៍​នេះ​ ​បាន​ប្រកាស​សាល​ក្រម​កម្បាំង​មុខចំពោះ​លោក ​Alexander​ Trofimov​ ​មហា​សេដ្ឋី​ជនជាតិ​រុស្ស៊ី​មួយរូប​ ​ដោយ​បាន​បន្ធូរ​បន្ថយ​ទោសពី​ការ​កាត់​ទោស​ឲ្យ​ជាប់​ពន្ធនា​គារ​រយៈ​ពេលពី​១៧​ឆ្នាំ​មក​នៅ​ត្រឹម​ប្រាំបី​ឆ្នាំ​វិញ។

លោក​សេង ​ស៊ីវុត្ថា ​ប្រធាន​ចៅក្រម​ជំនុំ​ជម្រះ​នៃ​សាលា​ឧទ្ធរណ៍​ ​បាន​ប្រកាស​ថា​ ​មូល​ហេតុ​ដែល​នាំ​ឲ្យ​មាន​ការ​បន្ធូរ​បន្ថយ​ទោស​នេះ ​គឺ​ដោយសារ​តែ​លោក​ Alexander​ Trofimov ​បាន​សារភាព​ទោស​កំហុស​និង​បាន​សំដែង​ការ​សោក​ស្តាយ​ចំពោះ​ទង្វើ​ ដែល​ខ្លួន​បាន​ប្រព្រឹត្ត​កន្លងមក​ ​ព្រម​ទាំង​បាន​លើក​ឡើង​ថា​ ​លោក​ជា​ជន​បរទេស​ខ្វះ​ការ​យល់ដឹង​ពី​ច្បាប់ ​និង​ទំនៀម​ទម្លាប់​ក្នុង​ប្រទេសកម្ពុជា។

លោក​ចៅក្រម​សេង ​ស៊ីវុត្ថា​ ​បាន​មាន​ប្រសាសន៍ថា​ ​ជន​ជាប់ចោទ​ត្រូវ​បាន​កែប្រែ​បទ​ល្មើស​ពីការចោទ​ប្រកាន់​ពីបទ​អំពើ​អាស់​មក​ចោទ​ប្រកាន់​ពីបទ​ពេស្យា​ចារ​កុមារ​វិញ ​តាម​មាត្រា​ទី​៣៤​នៃ​ច្បាប់​ស្តីពី​ការ​បង្រ្កាប​ការ​ជួញដូរ​មនុស្ស ​និង​ការ​ធ្វើ​អាជីវ​កម្ម​ផ្លូវ​ភេទ។

លោក​នួន ផានិត ​មេធាវី​ការពារ​ជន​រង​គ្រោះ​មក​ពី​អង្គការ​សកម្ម​ភាព​ដើម្បី​កុមារ​ ​បាន​ថ្លែង​ប្រាប់​ក្រុមអ្នក​កាសែតនៅ​សាលា​ឧទ្ធរណ៍​ថា​ ​លោក​មិន​ពេញ​ចិត្ត​ចំពោះ​ការ​ប្រកាស​សាលក្រម​នេះ​ទេ។

«មូល​ហេតុដែល​យើង​មិន​អាច​ទទួល​យក​បាន​នេះ​ ​គឺ​ដោយសារ​តែ​ចៅក្រម​គាត់​បាន​ប្រើ​ឆន្ទានុ​សិទ្ធិ​របស់​គាត់​តាម​គោល​ការណ៍​សុំ​ទោស​ ​ដែល​គាត់​មិន​បាន​ពិចារណា​ទៅលើ ​ទីមួយ​គឺ​ចំនួន​ជន​រងគ្រោះ​ ​ដែល​មាន​ច្រើន​រហូត​ដល់​បី​សំណុំ​រឿង​ ​រហូត​ដល់​១៨​នាក់។​ ​ហើយ​ជន​រងគ្រោះ​ទៀត​សោត​សុទ្ធ​តែ​ជា​អនីតិជន​ ​ហើយ​ទីពីរក៏​មាន​សំណុំ​រឿង​ច្រើន​ ​រហូតដល់​បី​សំណុំ​រឿង»។

ចំណែក​លោក​សាំង វណ្ណៈ​ ​មេធាវី​ការពារ​ជន​ជាប់​ចោទ​វិញ​ ​បាន​មាន​ប្រសាសន៍​ថា​ ​លោក​នឹង​ពិចារណា​បណ្តឹង​ករណី​នេះ​ ​ទៅ​តុលាការ​កំពូល​បន្ត​ទៀត។

«និយាយ​ចំណុច​នេះ​ ​ដោយ​ថា​ ​កូន​ក្តី​ខ្ញុំ​មាន​ការ​ភ្ញាក់​រឭក​ ​និង​មាន​ការ​សុំទោស​ទៅដល់​ប្រជាជន​ខ្មែរ​និង​ជន​រង​គ្រោះ​ ខ្ញុំក៏​មាន​ការ​រីករាយ​ ដោយ​តុលាការ​ ​គាត់​បាន​អនុវត្ត​នូវ​វិធាន​តាម​ច្បាប់​ ​ដែល​បានអនុម័ត​បញ្ញត្តិ​»។

លោក​ ​Alexander Trofimov អាយុ​៤១ឆ្នាំ​ ជា​មហាសេដ្ឋី​ជនជាតិ​រុស្ស៊ី​មួយ​រូប​ ​និង​ជា​អតីតនាយក​ក្រុម​ហ៊ុន​កោះពស់​ ដែល​មាន​គម្រោង​សាងសង់់​ឆ្នេរ​លំហែ​កាយ​នៅ​ទីក្រុង​កំពង់ផែ​ ​ក្រុង​ព្រះសីហនុ មាន​ចំនួន​ទឹក​ប្រាក់​ជាង​៣០០លាន​ដុល្លារសហ​រដ្ឋ​អាមេរិក។ លោក​ត្រូវ​បាន​សាលា​ឧទ្ធរណ៍​ ​កាលពី​ថ្ងៃ​ទី​១៨​ ​បើក​សវនាការ​ម្តង​ ​ហើយ​បាន​រក​ឃើញ​ថា​ ​លោក​ជាប់​ពាក់ព័ន្ធ​នឹង​ការ​រួមភេទ​ជាមួយ​នឹង​កុមារី​កម្ពុជា​ ​ចំនួន​១៧​នាក់​ ​ដែល​ភាគច្រើន​ជា​អនីតិជន។

តុលាការ​បាន​រក​ឃើញ​ថា​ ​លោក​ Alexander​ Trofimov​ ​បាន​ចំណាយ​ទឹកប្រាក់​ប្រមាណ​ពី​ប្រាំដុល្លារ​ រហូត​ដល់​២០០០​ដុល្លារ​សហ​រដ្ឋ​អាមេរិក​តែ​ប៉ុណ្ណោះ​ ជា​ថ្នូរ​នឹង​ការ​រួមភេទ​ជាមួយ​នឹង​កុមារី​កម្ពុជា​ទាំង​នោះ។

លោក​សំលៀង ​សីលា​ នាយក​អង្គការ​សកម្មភាព​ដើម្បី​កុមារ​ ​បាន​សំដែង​ការ​សោក​ស្តាយ​ចំពោះ​ការ​ប្រកាស​សាលក្រម​របស់​សាលា​ឧទ្ធរណ៍។

លោក​បាន​មាន​ប្រសាសន៍​ថា​ ​ការ​បន្ធូរ​បន្ថយ​ទោសនេះ​ មិន​បាន​ឆ្លុះ​បញ្ជាំង​ពី​កិច្ច​ខិតខំ​ប្រឹងប្រែង ក្នុង​ការ​លុប​បំបាត់​នូវ​បញ្ហា​ទេស​ចរណ៍​ផ្លូវភេទ​លើ​កុមារ​ទេ។

«យើង​ឃើញថា​ ​បញ្ហា​ទេស​ចរណ៍​ផ្លូវ​ភេទ​លើ​កុមារ​នៅ​តែ​ជា​បញ្ហា​ធំ​មួយ ​ដែល​គួរ​ឲ្យ​ព្រួយ​បារម្ភ​ ពីព្រោះ​នៅមាន​ជន​បរទេស​ ​ដែលស្វែង​រក​សេវា​ផ្លូវ​ភេទ​ជាមួយ​កុមារ​នេះ ​មាន​ជំនឿ​ថា កម្ពុជា​នៅតែ​ជាទី​តាំង​ ​ឬ​ក៏​គោល​ដៅ​មាន​សុវត្ថិភាព​ ឬ​ក៏ជា​ទីតំាង​ ដែ​លគាត់​អាច​រក​សេវា​ផ្លូវភេទ​ជាមួយ​នឹង​កុមារ ​បាន​យ៉ាង​ងាយ​ស្រួល»។

គួរ​បញ្ជក់​ផង​ដែរ​ថា​ ​អាជ្ញាធរ​កម្ពុជា​បាន​ចាប់​ខ្លួន​លោក​ ​Alexander Trofimov​ ​នៅក្នុង​អំឡុង​ឆ្នាំ​២០០៧​ ​នៅ​ទីក្រុង​ឆ្នេរ​លំហែ​កាយ​នៃ​ក្រុង​ព្រះសីហនុ។ លោក​សំលៀង សីលា ​បាន​ឲ្យ​ដឹងថា​ ​នៅ​ក្នុង​អំឡុង​ឆ្នាំ​២០០៩​ ​អាជ្ញាធរ​ប៉ូលិស បាន​ចាប់​ខ្លួន​ជន​បរទេស​ចំនួន​២៩​នាក់​ ​ ហើយ​នៅ​ក្នុង​រយៈ​ពេលប្រាំបី​ខែ​ឆ្នាំ២០១០​នេះ​ ​ប៉ូលិស​បាន​ចាប់ខ្លួន​ចំនួន​១៣​នាក់​ពាក់​ព័ន្ធ​ទៅនឹង​ទេស​ចរណ៍​ផ្លូវ​ភេទ​លើ​កុមារ៕

XS
SM
MD
LG