ភ្នំពេញ៖ ការវិវត្តនៃពាក្យបណ្តឹងទាក់ទងនឹងការទារប្រាក់លើសតម្លៃរដ្ឋកំណត់នៅក្នុងការប្រមូលពន្ធលើយានយន្តប្រចាំឆ្នាំត្រូវបានទទួលស្វាគមន៍ និងអបអរសាទរពីអង្គការសង្គមស៊ីវិល ខណៈដែលអង្គភាពប្រឆាំងអំពើពុករលួយ និងអគ្គនាយកដ្ឋានពន្ធដារនៃក្រសួងហិរញ្ញវត្ថុ និងសេដ្ឋកិច្ចកំពុងសិក្សាលើសំណុំរឿងបណ្តឹងរបស់ប្រជាពលរដ្ឋប្រឆាំងនឹងភ្នាក់ងារពន្ធដារចំពោះការប្រព្រឹត្តអំពើពុករលួយ។
ក្នុងកិច្ចខំប្រឹងប្រែងលប់បំបាត់អំពើពុករលួយនៅកម្ពុជា ក្រុមមន្ត្រីបាននិយាយនៅក្នុងសប្តាហ៍នេះថា អង្គភាពប្រឆាំងអំពើពុករលួយកំពុងរៀបចំនីតិវិធីផ្ទៃក្នុងខ្លួនពិភាក្សាពាក្យបណ្តឹងចំនួន៩០របស់ប្រជាពលរដ្ឋរាប់ពាន់នាក់ ដែលបានអះអាងថា ភ្នាក់ងារពន្ធដារនៃក្រសួងហិរញ្ញវត្ថុ និងសេដ្ឋកិច្ចបានទារប្រាក់លើសតម្លៃរដ្ឋកំណត់ចំពោះការទិញប័ណ្ណពន្ធយានយន្តប្រចាំឆ្នាំ។
ពាក្យបណ្តឹងចំនួន៩០បានផ្តល់ឱ្យដោយប្រជាពលរដ្ឋចំនួន២.៧០០នាក់ពីខេត្តក្រុងចំនួន១៤ នឹងធ្វើការសាកល្បងយ៉ាងពិតប្រាកដលើកទីមួយទៅលើអង្គភាពប្រឆាំងអំពើពុករលួយដែលបានបង្កើតឡើងក្រោមច្បាប់ប្រឆាំងអំពើពុករលួយថ្មីដែលត្រូវបានសារទថា ជាការទម្លុះទម្លាយរបស់រដ្ឋាភិបាល ប៉ុន្តែក្រុមប្រឆាំងបានរិះគន់ថា ច្បាប់នេះគ្មានអំណាចទេ។ ក្រុមមន្ត្រីបានបញ្ជាក់ថា ពាក្យបណ្តឹងទាំងអស់នេះកំពុងស្ថិតនៅក្នុងដំណើរការសិក្សារបស់អង្គភាពប្រឆាំងអំពើពុករលួយ និងអគ្គនាយកដ្ឋានពន្ធដារនៃក្រសួងហិរញ្ញវត្ថុ និងសេដ្ឋកិច្ច មុននឹងធ្វើការសម្រេចបែបណានោះ។
លោកឱម យិនទៀង ប្រធានអង្គភាពប្រឆាំងអំពើពុករលួយ បាននិយាយនៅក្នុងកិច្ចពិភាក្សាតុមូលនៅមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យកាលពីថ្ងៃអង្គារថា អង្គភាពរបស់លោកកំពុងរៀបចំពាក្យបណ្តឹងទាំងអស់ដាក់នៅលើតុសម្រាប់ដំណើរការតាមនីតិវិធី។ លោកបន្តថា៖
«មន្ត្រីសមត្ថកិច្ចពន្ធដារទៅយកប្រាក់អ្នកណាមានវិក្កយបត្រ អត់វិក្កយបត្រ។ យើងខ្ញុំកំពុងតែដាក់លើតុហើយបញ្ហានេះ ដើម្បីរៀបចំដំណើរការ»។
លោកអោម ចន អនុប្រធាននៃនាយកដ្ឋានច្បាប់ វិវាទ និងស្ថិតិនៃអគ្គនាយកដ្ឋានពន្ធដារ បានបញ្ជាក់ថា អគ្គនាយកដ្ឋានពន្ធដារកំពុងសិក្សាលើពាក្យបណ្តឹងទាំងអស់នេះ និងមិនព្រងើយកន្តើយចំពោះការស៊ើបអង្កេតបន្ថែមលើពាក្យបណ្តឹងទាំងអស់នេះទេ។
លោកសន ជ័យ អ្នកសម្របសម្រួលបណ្តាញរួបរួមដើម្បីគណនេយ្យភាពសង្គមនៅអាស៊ីបូព៌ា និងប៉ាស៊ីហ្វិកបានថ្លែងថា លោកមានការសប្បាយរីករាយចំពោះព័ត៌មាននេះ និងស្វាគមន៍ការវិវត្តនៃករណីពាក្យបណ្តឹងទាំងអស់នេះ។
«នេះគឺជាការចាប់ផ្តើមរបស់អង្គភាពប្រឆាំងអំពើពុករលួយ។ អង្គភាពនេះនឹងមិនព្រងើយកន្តើយចំពោះពាក្យបណ្តឹង ឬហៅថាជាព័ត៌មានដែលយើងបានមកពីសេចក្តីរាយការណ៍ពីប្រជាពលរដ្ឋនេះទេ។ ខ្ញុំលើកទឹកចិត្តយ៉ាងខ្លាំងដល់អង្គភាពប្រឆាំងអំពើពុករលួយ ក្នុងការជួយស៊ើបអង្កេតបន្ថែម និងការចាត់វិធានការដើម្បីលប់បំបាត់អំពើពុករលួយក្នុងការប្រមូលពន្ធលើមធ្យោបាយធ្វើដំណើរជារៀងរាល់ឆ្នាំ»។
លោកសន ជ័យ បានថ្លែងថា លោកមិនបានដាក់ឈ្មោះ និងអត្តលេខរបស់ភ្នាក់ងារពន្ធដារដែលបានទារប្រាក់លើសនៅក្នុងពាក្យបណ្តឹងទាំងនោះទេ ពីព្រោះលោកចង់មន្ត្រីខិលខូចទាំងនោះផ្លាស់ប្តូរឥរិយាបថដោយស្មគ្រ័ចិត្តប្រសើរជាងការទទួលផ្តន្ទាទោល។
លោកសន ជ័យ បានបន្ថែមថា គ្រប់ពាក្យបណ្តឹងទាំងអស់មានភស្តុតាងសំឡេង និងឈ្មោះរបស់ប្រជាពលរដ្ឋដែលជាអ្នកប្តឹង ព្រមទាំងមានឈ្មោះ និងអត្តលេខរបស់ភ្នាក់ងារពន្ធដារ ទីកន្លែង និងពេលវេលាតាមរយៈ ការហៅទូរស័ព្ទទាន់ហេតុការណ៍។
លោកសន ជ័យ បានបញ្ជាក់ថា បើវាមានករណីចាំបាច់ លោកនឹងផ្តល់ជូនអង្គភាពប្រឆាំងអំពើពុករលួយ និងអគ្គនាយកដ្ឋានពន្ធដារនូវឯកសារលំអិត ដូចជាឈ្មោះអ្នកប្តឹង និងឈ្មោះ និងអត្តលេខរបស់ភ្នាក់ងារពន្ធដារដែលប្រជាពលរដ្ឋបានរាយការណ៍មក។