ភ្ជាប់​ទៅ​គេហទំព័រ​ទាក់ទង

សិស្ស​​រក​ស៊ី​​ផ្លូវ​ភេទ​លួចលាក់​​មួយ​​ចំនួន​​បាន​​កែប្រែ​​ខ្លួន​


ភ្នំពេញ៖ សិស្ស​សាលា​ដែល​ប្រកប​របរ​រកស៊ី​ផ្លូវភេទ​ដោយ​លួចលាក់​មួយ​ចំនួន​បាន​កែប្រែ​ខ្លួន​ ដើម្បី​ រៀបចំ​អនាគត​ជាថ្មី​របស់​ពួក​គេ​ឡើងវិញ​ ​បន្ទាប់​ពី​ពួក​គេ​បាន​ជួប​ប្រទេះ​បញ្ហា​យ៉ាង​ធ្ងន់ធ្ងរ​កន្លង​មក។​ ក៏​ប៉ុន្តែ​ទោះបី​ជា​យ៉ាង​ណា​ក៏​នៅ​មាន​សិស្ស​សាលា​ ដែល​ប្រកប​របរ​នេះ​មួយ​ចំនួន​នៅតែ​មិន​អាច​បោះ​បង់​មុខ​របរ​នេះ​ចោល​បាន​ដែរ។

នៅ​ក្នុង​ហាង​អ៊ុតសក់​មួយ​ក្នុង​ក្រុង​ភ្នំពេញ ​ជា​ តា ​កំពុង​តែ​កៀប​សក់អតិថិជន​ស្រី​ម្នាក់​ឲ្យ​ត្រង់។​ ក៏ប៉ុន្ដែ​នាង​មិន​ទាន់​មាន​ភាព​ប៉ិនប្រសព្វ​នៅឡើយ។​ ដោយ​មិន​ប្រាកដ​នៅក្នុង​ខ្លួន​ ជាតា​បាន​ងាក​ទៅ​សួរ​មេជាង​ ដែល​ស្ថិតនៅ​ខាងស្តាំ​ដៃ​របស់​នាង​ ដើម្បី​សួរ​ថា​ ​តើ​ធ្វើ​យ៉ាង​ណាតម្រង់​សក់​របស់​អតិថិ​ជន​របស់​នាង​ឲ្យ​បាន​ស្អាត​ល្អ។

ប្រមាណ​ជា​៣ខែ​កន្លង​មក​ហើយ​ ​ជា​ តា ជា​ឈ្មោះ​ដែល​អ្នក​និពន្ធ​ដាក់​ឲ្យ​ ​បាន​ចាក​ចេញ​ពី​ការ​រក​ស៊ី​ផ្លូវ​ភេទ​ដោយ​លួច​លាក់​នៅ​ក្នុង​ពេល​ដែល​នាង​កំពុង​តែ​បន្ដ​ការ​សិក្សា​នៅ​ក្នុង​ថ្នាក់​ទី៩​នៃ​សាលា​រៀន​មួយ​ក្នុង​ក្រុង​ភ្នំពេញ​ ​ហើយ​នាង​បាន​ស្វែង​រក​អាជីព​មួយ​សម្រាប់​កសាង​អនាគត​ថ្មី​របស់​នាង។​ នោះ​គឺ​មុខវិជ្ជា​ជំនាញ​ខាង​អ៊ុតសក់​ និង​តុប​តែង​មុខ។

ក៏ប៉ុន្តែ​ ​នៅ​មុន​ពេល​ដែល​នាង​ចូល​រៀន​មុខ​ជំនាញ​នេះ​បាន​បន្ដិច​ ជាតាបាន​បោះបង់​ចោល​ការ​សិក្សា​របស់​ខ្លួន​នៅ​សាលា​ចំណេះ​ទូទៅ​រួច​ទៅ​ហើយ។

ជាតាមាន​សាច់​ថ្ពាល់​ម៉ត់​ស​រលោង​ រាង​តូច ​ស​ ស្តើង​ ខ្ពស់​ស្រឡូន​ គួរ​ឲ្យ​ចង់​គយគន់។ ​ឆ្នាំនេះនាងអាយុ​១៥ឆ្នាំ។​ នាងបាន​លង់​ខ្លួន​ធ្លាក់​ក្នុង​ការ​រកស៊ី​ផ្លូវភេទ​ក្នុង​វ័យ​សិក្សា​កាល​ពី​ដើម​ឆ្នាំ២០១០​ដោយសារ​តែ​ភាព​សប្បាយ​ភ្លឺតភ្លើន​តាម​មិត្តភក្រ្ដ។

ជាតា​ពោល​ដោយ​សំដី​មួយៗ​ ថ្នមៗ​យ៉ាង​សុភាព​រាប​សារ ​ដែល​ពិបាក​នឹង​ឲ្យ​គេ​នឹក​ស្មាន​ថា​ នាង​បាន​ប្រព្រឹត្តអ្វី​ដែល​នាង​បាន​ធ្វើនា​ពេល​កន្លង​មក​នេះ។​ នាង​បាន​សម្តែង​ការ​សោក​ស្តាយ​ ដោយ​នាង​បាន​ប្រកប​របរ​រកស៊ី​ផ្លូវភេទ​ ដោយ​លាក់​បាំង​ពី​ឪពុកម្ដាយ​ និង​ក្រុម​គ្រួសារ​របស់​នាង​ ​ប៉ុន្ដែ​នៅ​ពេល​ដែល​នាង​ឃើញ​ថា​ ​សង្គម​គ្រួសារ​របស់​នាង​ស្អប់​ខ្ពើម​ទង្វើ​នេះ​ នាង​ក៏​មាន​ភាព​អៀនខ្មាស់​ជា​ខ្លាំង​ ដែល​ធ្វើ​ឲ្យ​នាង​សុខ​ចិត្ត​លះបង់​របរ​ដែល​ពុំ​មាន​ការ​ឲ្យ​តម្លៃ​នេះ។

«មក​ពី​ខ្ញុំ​គិត​ថា​ ធ្វើ​អញ្ចឹង​ទៅ​អត់​ល្អ​ ​ហើយ​ណា​មួយ​ចូល​សង្គម​គេ​អត់​ចុះ។ និយាយរួម ​ចង់​ធ្វើ​មនុស្ស​ល្អ​វិញ​តែ​ម្តង ​ ណាមួយ​ ​បើ​យើង​នៅតែ​ធ្វើ​អញ្ចឹង​ ​បងប្អូន​យើង​មិន​ចង់​និយាយ​រក​យើង។ ​គេ​អត់​ចូល​ចិត្ត​យើង​ ​ហើយ​យើង​កែ​ខ្លួន​ គេ​ស្រឡាញ់យើង​វិញ។​ ខ្ញុំ​គិត​ថា​ ​ពេល​យើង​កែ​ខ្លួន​ ​មានកេរ្តិ៍ឈ្មោះ​ថ្លៃថ្នូរ​ ​តែ​បើ​យើង​អត់​កែ​ខ្លួន​វិញ​ ​និយាយ​រួម​ ​ទៅ​ណា​ ​គេ​ស្គាល់​មុខ​យើង​ ​អញ្ចឹង​ល្បី​តែ​ម្តង។​ ទោះ​អត់​លុយ​ចាយ​យ៉ាងណា​ក៏​ឈប់​ទៅ​ជា​មួយ​ភ្ញៀវ​ដែរ»។

តាម​ការ​ឲ្យ​ដឹង​ពី​មន្រ្តី​អង្គការ​ក្រៅ​រដ្ឋាភិបាល​ថា​ ​កូន​សិស្ស​សាលា​លក់​ខ្លួន​មាន​តាំង​ពី​យូរ​មក​ហើយ​ ​ក៏​ប៉ុន្តែ​មិន​ទាន់​មាន​អង្គការ​ ឬ​ស្ថាប័ន​ណាមួយ​ធ្វើការ​សិក្សា​ទៅលើ​ករណី​នេះ​នៅ​ឡើយ​ ​ដូច្នេះ​ពុំទាន់​មាន​ទិន្ន​ន័យ​ណា​មួយ​បញ្ជាក់​ពីបញ្ហា​នេះ​ទេ។

លោកស្រី​ម៉ម សូម៉ាលី ​នាយិកា​អង្គការ​អាហ្វេស៊ីបកម្ពុជា​ ដែល​ធ្វើការ​ទាក់ទង​ និងជួយ​ផ្ដល់​ការ​បណ្ដុះ​បណ្ដាល​ជំនាញ​ដល់​ស្ដ្រី​រកស៊ី​ផ្លូវភេទ​ជាច្រើន​ ​បាន​មាន​ប្រសាសន៍​ថា​ ​ក្រុមគ្រួសារគឺជា​ប្រភព​ដ៏​សំខាន់​បំផុត​ក្នុងការ​អូស​ទាញ​សិស្ស​សាលា​ឲ្យ​ចាក​ចេញ​ពី​ការ​រកស៊ី​ផ្លូវភេទ​ ​ហើយ​ឲ្យ​ពួក​គេ​វិល​ត្រឡប់មក​រក​ផ្លូវ​ល្អ​វិញ​បាន។

លោកស្រី​បាន​បញ្ជាក់​ថា​ ​គួរតែ​មាន​ការ​លើក​ទឹកចិត្ត​សិស្ស​សាលា​ ដែល​ប្រព្រឹត្តខុស​ទាំង​នោះ​ឲ្យវិលត្រឡប់​មក​កាន់​ផ្លូវ​វិញ។

«ប្រពៃណី​ ​វប្បធម៌​យើង​ ​ពេល​ខ្លះ​ឲ្យ​តែ​នាង​ខូច​បន្តិច​ ​យើង​ចេះ​តែ​ថា​ ​ខូច​អស់​សាច់​ ​ចេះ​តែ​រុញក្មេង​ឲ្យ​ទៅ​ខូច​ថែមទៀត។ សង្គម​ខ្មែរ​យើង​ឥឡូវ​យើង​គួរតែ​ជួយ​គ្នា​ ​មិន​គួរ​ណា​រិះគន់​គ្នា​ ​បង្អាប់​គ្នា​ ​ឲ្យ​គ្នា​ធ្លាក់​ខ្លួន​ទៅ​អញ្ចឹង​សោះ។ ​ យើង​គួរ​គិត​ថា​ ​កំហុស​មិន​មែន​ជា​បញ្ហា​ធំ​ទេ​ ​បើសិន​ជា​អ្នក​ខុស​នោះដឹង​ថា​ ខ្លួន​ឯង​ខុស។ ​ដូច​ថា​ ជ្រុល​ជា​ខុស​អញ្ចឹង​ ​ហើយ​អាច​បក​ក្រោយវិញ​។ ​បើ​ប្អូន​អញ្ចឹង​ ​ប្អូន​អាច​ត្រឡប់​ក្រោយ​ ​កែខ្លួន​ ​ខំប្រឹង​រៀន​ ​កសាង​ខ្លួន​ជាថ្មី។ ​អ្នកណា​ក៏​ធ្លាប់​ធ្វើ​ខុស​ដែរ។​ ​ខុស​ប៉ុណ្ណា​ក្តី​ ប្អូន​អាច​កែ​ ខ្លួន​បាន។ ​គ្មាន​ពេល​ថា​ ​មិន​អាច​ត្រឡប់ក្រោយ​បាន​ទេ។​ យើង​ត្រូវតែ​ត្រឡប់ក្រោយ ​ដើម្បី​ដើរ​ទៅ​ផ្លូវ​មួយ​ទៀត»។

ក៏​ប៉ុន្ដែ​ការ​វិល​មក​រក​ផ្លូវ​ត្រូវ​វិញ​របស់​សិស្ស​ស្រី​មួយ​ចំនួន​ដែល​ប្រកប​រប​រកស៊ី​ផ្លូវភេទ​ ជួន​កាល​ហាក់​បី​ដូច​ជា​យឺត​ពេល​ ​ហើយ​ធ្វើ​ឲ្យ​ពួក​នាង​ខ្លាច​សាលា​និង​អស់​ទឹក​ចិត្ត ​ក្នុង​ការ​បន្ដ​ការ​រៀន​សូត្រ​ ​បន្ទាប់​ពី​ពួក​នាង​បាន​ប្រឡូក​នៅ​ក្នុង​មជ្ឈ​ដ្ឋាន​ខាង​ក្រៅ​អស់​មួយ​រយៈ​ពេល។

លោក​សុខ សុវណ្ណា ​នាយក​វិទ្យាល័យ​បាក់ទូក​ ​បាន​ឲ្យ​ដឹងថា​ ​ចំពោះ​ក្មេង​ដែល​កែ​ខ្លួនតែងតែ​ទទួល​បាន​ការ​អនុគ្រោះ​ឲ្យ​វិល​ត្រឡប់​មក​រក​ការ​សិក្សា​វិញ​ ​ប្រសិន​បើ​ពួក​គេ​ចង់។

លោក​សុខ សុវណ្ណា​ ​លើក​ឡើងថា​ ​ការ​ក្លាយ​ខ្លួន​ជា​សិស្ស​រក​ស៊ី​ផ្លូវភេទ​មិន​មែន​ជា​ការ​ទទួល​ខុសត្រូវ​នៃ​ការ​អប់រំ​របស់​សាលា​នោះ​ទេ។

«រឿង​នេះ គឺជា​រឿង​របស់​ឪពុកម្តាយ​របស់​គេ។ ​យើង​ សាលា​យើង​អប់រំ​រាល់​ថ្ងៃ​ ​ហើយ​គាត់​ត្រូវ​តែ​មាន​ភារកិច្ច​មើល​កូន។ ​មិន​អាច​ថា​ ​គាត់​ប្រគល់​ឲ្យ​សាលា​ទាំង​ស្រុង​ទេ។ ​ចំពោះ ​គោល​ការណ៍​ក្រសួង​អប់រំ​ ​អត់​មាន​ដែល​បិទ​ទេចំពោះ​សិទ្ធិ​សេរីភាព។ ​គេ​ចង់​ឲ្យ​តែ​កូនសិស្ស​ចេះ​ទេ។ ​បើក​សេរី​ចំពោះ​ការងារ​ចូល​រៀន​សូត្រ​នេះ​។ ​គោល​ការណ៍អប់រំ​គឺ​សម្រាប់​ទាំងអស់​គ្នា​ ​គឺ​ទទួល​សិស្ស​គ្រប់​ ​ទោះបី​ សិស្ស​យ៉ាង​មេ្តចក៏ដោយ។ ​ក្រសួង​អប់រំ​បើក​ទូលាយ​ជានិច្ច​ចំពោះ​យុវជន​ណា​ដែល​កែ​ខ្លួន»។

ជាមួយ​គ្នា​នេះ​ដែរ លោកស្រី​ស៊ី ឌេហ្វីន ​រដ្ឋលេខា​ក្រសួង​កិច្ចការ​នារី​ បាន​ឲ្យ​ដឹង​ថា​ ​ទាំង​ក្រសួង​កិច្ចការ​នារី ​ក្រសួង​សង្គម​កិច្ច​ ក្រសួង​ការងារ ​និង​អង្គការ​ក្រៅ​រដ្ឋា​ភិបាល​មួយ​ចំនួន​មាន​កន្លែង​សម្រាប់​បណ្តុះ​បណ្តាល​ជំនាញ​វិជ្ជាជីវៈ​ដល់​អ្នក​ដែល​កែប្រែ​ខ្លួន​បែប​នេះ។

«ក្រសួង​សង្គមកិច្ច​ក៏​គេ​នៅ​មាន​កន្លែង​ជួយ​ ​ហើយ​ផ្នែក​អង្គការ​ក្រៅ​រដ្ឋាភិបាលផង​ សង្គម​ស៊ីវិល​ផង​ ​គេ​ក៏​អាច​មាន​លទ្ធភាព​ជួយ​មួយ​ចំនួន​ទៀត។ ​មិន​ខ្វះ​ទេ​ឲ្យ​តែ​គាត់​មានការ​ផ្លាស់​ប្តូរ​ ​សម្រេចចិត្ត​ឲ្យ​បាន​ត្រឹមត្រូវ​ ​ហើយ​មាន​ឆន្ទៈ​ពិត​ប្រាដក​ថា​ ​យើង​ចង់​កសាង​ខ្លួន​យើង​ឲ្យទៅ​ជា​ពលរដ្ឋ​ល្អ​ ​រស់នៅ​មាន​សភាព​ថ្លៃថ្នូរ។

ទោះជា​យ៉ាងណា​ក៏ដោយ​ ម៉ានី​ដែល​ជា​សិស្សសាលា​លក់​ខ្លួន​ម្នាក់​ ដែល​ស្គាល់​សិស្ស​សាលា​លក់​ខ្លួនជា​ច្រើន​ទៀត​ ​បាន​ឲ្យ​ដឹងថា​ មាន​សិស្ស​សាលា​ដែល​ប្រកប​របរ​រកស៊ី​ផ្លូវភេទនេះ ចំនួនតិចតួច​បំផុត​ ​សុខ​ចិត្ត​កែ​ខ្លួន​ ​និង​បោះបង់​មុខ​របរ​នេះ​ចោល។

ម៉ានី​ និយាយ​ដោយ​ត្រង់​ឥត​លាក់​លៀម​ថា​ ​សូម្បីតែ​ខ្លួន​នា​ងក៏​មិន​អាច​បោះ​បង់​ចោល​មុខ​របរ​នេះបាន​ដែរ​ ​ដោយសារ​មុខរបរ​នេះ​រក​លុយ​បាន​ច្រើន​ ​ហើយ​មិន​ពិបាក​ទៀត។

«និយាយ​រួម​ ​អ្នក​ដែល​កែ​ខ្លួន​តិច​ណាស់​ ​ដែល​ខ្ញុំ​ស្គាល់​តិច​ណា៎។ គេ​ធ្លាប់​បាន​ ​ធ្លាប់​ទិញ​ឥវ៉ាន់​ ​របស់​ស្អាតៗ​ ​ធ្លាប់​ចាយ​លុយ​កប់ៗ​ដៃ​ ​អញ្ចឹង​ធ្វើ​ឲ្យ​ពួក​វា​អត់​កែ​ប្រែវិញ​បាន។​ លុយ​គេ​ដាក់មក​ដល់​ដៃ ​នរណា​មិន​ចង់​យក?​ គេ​ហៅ​ទៅ​យក​លុយ ​ខ្ញុំ​ទៅ​យក​ហើយ​ ​ចេះ​តែ​ទៅៗ​ ​ហើយ​ណា​មួយ​ចំ​ពេល​ខ្វះ​អញ្ចឹង​ទៅ​ ​ទៅ​បណ្តាយ»។

យោង​តាម​សិស្ស​សាលា​លក់​ខ្លួន​មួយ​ចំនួន ​ដែល​បាន​កែ​ខ្លួន​និង​ទាំង​កំពុង​ស្ថិត​ក្នុង​របរ​រក​ស៊ី​ផ្លូវ​ភេទ​នៅ​ឡើយ​ ​បាន​ឲ្យ​ដឹងថា​ ​នៅពេល​ដែល​ពួក​គេ​កែ​ខ្លួន​នោះ​ ​ពួក​គេ​នឹង​មិន​បាន​ប្រឈម​នឹង​ការ​រើស​អើង​ក្នុង​សង្គម​គ្រួសារ​នោះ​ទេ។ ​ផ្ទុយ​ទៅ​វិញ​ ​ថ្វីបើ​ឪពុក​ម្តាយ​និង​បងប្អូន​របស់​ពួក​គេ​មិនបាន​ដឹង​ពី​ស្ថាន​ភាព​ពិត​ប្រាកដ​ថា​ ​ពួក​គេ​បាន​ប្រកប​របរ​រកស៊ី​ផ្លូវភេទ​ក៏ដោយ​ ​ពួកគេ​ក៏បាន​ជំរុញ​ឲ្យ​កូនៗ​របស់​គេ​វិល​មក​រក​ផ្លូវ​ត្រូវ​វិញដែរ។

ក៏​ប៉ុន្តែ​កត្តា​ដែល​សំខាន់​នោះ​គឺ​ពួក​គេ​ពិបាក​ធ្វើការ​កែ​ខ្លួន​ ​ដោយសារ​តែ​ពួក​គេ​មាន​ទម្លាប់ដើរ​លេង​សប្បាយ​ភ្លើត​ភ្លើន​តាម​បែប​យុវវ័យ​របស់​ពួក​គេ។

នេះ​គឺជា​បញ្ហា​ដ៏​ធំ​ដែល​បណ្តាល​ឲ្យ​សិស្ស​សាលា​ប្រកប​របរ​រកស៊ី​ផ្លូវភេទ​ចំនួនតិចតួចប៉ុណ្ណោះ​បានកែប្រែ​ខ្លួនឡើងវិញ​ ​ដើម្បី​រៀបចំ​អនាគត​របស់​ពួក​គេ​ជាថ្មី​ឡើង​វិញ៕

XS
SM
MD
LG