ភ្ជាប់​ទៅ​គេហទំព័រ​ទាក់ទង

«ទិវារកុមារ»​​អាហ្វ្រិក​អំពាវនាវ​ឲ្យ​​មាន​ការ​​ការ​ពារ​​ច្រើន​​ជាង​មុន


ក្មេងប្រុស​ដើរ​នៅ​វាលខ្សាច់​នៅភូមិ Moghtar-Lajjar នៅ​ភាគខាងត្បូង Sahel នៅ​អាហ្វ្រិក។
ដោយ៖ ​Nina de Vries

នៅ​ក្នុងអំឡុង​ខែមិថុនានេះ ​ប្រជា​ពលរដ្ឋ​នៅទូទាំង​ទ្វីប​អាហ្វ្រិក កំពុង​ប្រារព្ធ​ទិវារ​កុមារ​អាហ្វ្រិក​ (Day of the African Child) ដោយ​ផ្តល់​ការ​គោរពដល់សិស្សា​នុសិស្ស​ស្បែក​ខ្មៅ​ជាតិអាហ្វ្រិក​ខាងត្បូងរាប់​ពាន់នាក់​ ដែលបាន​ដើរ​ដង្ហែក្បួននៅតាម​ផ្លូវ ក្នុង​ទីក្រុង​ ស៊ូវេតូ(Soweto) កាលពីថ្ងៃ​ទី១៦ ខែមិថុនា ឆ្នាំ១៩៧៦ ដើម្បី​ទាមទារឲ្យមានការ​អប់រំ​ប្រសើរជាងមុន និងសិទ្ធិទទួល​ការ​បង្រៀន​តាមភាសារបស់ពួកគេ​ផ្ទាល់។ កងកម្លាំង​សនិ្តសុខរបស់​របប​អាផាថាយ (apartheid) ឆ្លើយ​តបវិញដោយ​ប្រើ​ឧស្ម័ន​បង្ហូរទឹកភ្នែក និងគ្រាប់​កាំភ្លើងពិតប្រាកដ ដែល​បានសម្លាប់កុមារា និង​កុមារីជាច្រើននាក់ ដែល​មានចំនួនប្រហែល​២០០នាក់។ ការ​ប្រារព្ធ​ពិធីនៅថ្ងៃទី១៦ខែ​មិថុនា បន្តគោរព​អ្នកដែល​បានស្លាប់ ប៉ុន្តែ​ក៏​គូស​បញ្ជាក់អំពី​ការ​តស៊ូ ដែលកុមារអាហ្វ្រិកជាច្រើន នៅ​តែ​ប្រឈម​មុខ​នាពេល​សព្វថ្ងៃនេះ។

«ឪពុក​ម្តាយ​ គាំទ្រ​កូន​ស្រីនិងផ្តល់ឳកាសឲ្យ​ពួកគេ​ចូលរៀន»។​ នេះ​ជាអ្វី​ដែល​កុមារី​ជិត១០០នាក់បានច្រៀង ខណៈដែល​ពួកគេ​ដើរ​ឆ្លងកាត់​ផ្លូវ​ក្នុង​ទីក្រុង​ហ្វ្រីថោន ដែល​ពោរពេញទៅដោយភាព​ចលាចល។

ពួកគេចង់ឲ្យ​សម្លេង​របស់ពួកគេ​ត្រូវ​បានស្តាប់ឮខ្លាំងៗនិងច្បាស់ៗ នៅ​ក្នុងទិវារ​ស្តីពីកុមារ​អាហ្វ្រិក(Day of the African Child)នេះ។

តួយ៉ាង​ដូចជា កុមារ​វ័យ១៤ឆ្នាំឈ្មោះ អាយ៉េស្សា មុនុ (Ayesha Munu) ដែល​បាន​ចំណាយពេលវេលារបស់ខ្លួន​ដើម្បីចងចាំនូវ​អ្វី​ដែល​បាន​កើត​ឡើង​កាលពីឆ្នាំ​១៩៧៦។​

«ខ្ញុំ​មាន​អារម្មណ៍ទុកព្រួយ​យ៉ាង​ខ្លាំង ជារៀងរាល់ថ្ងៃ និងរាល់ឆ្នាំ នៅពេល​ដែល​ខ្ញុំនឹក​ឃើញថ្ងៃទី១៦ ខែមិថុនា។ ថ្ងៃនេះ​នឹង​ក្លាយជា​ថ្ងៃ​ដែល​យើង​ចង​ចាំ​នូវ​អ្វី​ដែលអ្នកដែល​បានស្លាប់​កាលពីឆ្នាំ​១៩៧៦ បាន​ឆ្លង​កាត់។ ដូច្នេះ យើងអាច​ពង្រឹងខ្លួនយើង​ដើម្បី​ប្រយុទ្ធប្រឆាំង​បន្ថែម​ទៀត​ជារៀង​រាល់ឆ្នាំ»។

លោកស្រី​ អានីតា កូរ៉ូម៉ា ជា​នាយកប្រចាំ​ប្រទេសនៃ​បណ្តាញកុមារី ដែលបាន​ជួយ​ឲ្យ​កុមារីបញ្ចប់ការសិក្សា​របស់ពួកគេ​ ឬ​គេច​ផុតពីសភាព​ការណ៍នៃ​ការរំលោភ​បំពាន​ផ្លូវភេទ​ជាដើម។

លោកស្រីបានរៀបចំ​ការ​ជួបជុំគ្នានេះ ហើយ​ចង់​ផ្តោត​លើ​ការលើក​កម្ពស់​ការយល់​ដឹង​អំពី​ការ​ជួញដូរ​ផ្លូវភេទ​កុមារី​នៅក្នុង​ប្រទេស​សេរ៉ាឡេអូន​។

លោកស្រី កូរ៉ូម៉ា ត្រូវការ​ច្បាប់​ដែល​តឹងរ៉ឹងជាងមុនដូចនៅ​តាម​បណ្តា​ប្រទេស​អាហ្វ្រិក​ដទៃទៀត​ដែរ ដោយ​មានរយៈពេល​នៃការ​ដាក់​ពន្ធនាគារ​យូរជាងមុន​ចំពោះ​ការ​រំលោភ និងការ​ត្រួតពិនិត្យ​ទៅលើក្លឹបកំសាន្តពេលយប់ឲ្យ​បានខ្លាំងក្លា ដើម្បីធានា​ឲ្យ​ប្រាកដ​ថា កុមារី​ក្រោមអាយុ​១៨ឆ្នាំ​ មិនត្រូវ​បានអនុញ្ញាតឲ្យ​ចូល។

«ប្រទេស​ហ្គាណា(Ghana) បានធ្វើកិច្ចការ​នេះ។ ប្រទេស​លីបេរីយ៉ា​(Liberia) បានធ្វើកិច្ចការនេះ​។ ប្រទេស​សេរ៉ាឡេអូន ត្រូវតែ​ភ្ញាក់​ពី​ដំណេក»។

លោកស្រី កូរ៉ូម៉ា បានធ្វើការជាមួយកុមារី​ចំនួនប្រហែល​៣ពាន់នាក់ នៅ​ក្នុងបណ្តាញ​របស់​លោកស្រី ហើយថ្លែងថា កុមារី​ប្រហែល៦០ភាគរយ នៅ​សេរ៉ាឡេអូន បានប្រឈមមុខ​ទៅនឹង​ការ​ជួញដូរផ្លូវភេទ។

កុមារីវ័យ១៣ឆ្នាំ ដែល​បានចូលរួមក្នុងការ​ជួបជុំគ្នានេះ​ដែរ ប៉ុន្តែ​មិន​អាច​ប្រាប់ឈ្មោះ និយាយថា មិត្ត​ភ័ក្រឪពុកមា​របស់ខ្លួន បានព្យាយាម​រំលោភ​នាង ប៉ុន្តែ​នាង​មានភាពអៀនខ្មាស់​ខ្លាំងពេករហូតដល់​មិនហ៊ាន​ប្រាប់​ក្រុមគ្រួសារ​របស់នាងឡើយ។​

«ខ្ញុំ​មិន​ចង់​ប្រាប់ឪពុកមា​របស់​ខ្ញុំ​ទៀតផង។ ឪពុកមា​របស់ខ្ញុំ​នឹង​និយាយ​ថា ​ខ្ញុំ​និយាយកុហក»។

លោកស្រី កូរ៉ូម៉ា ថ្លែងថា ជា​អកុសលណាស់ ដែល​រឿងនេះ​ហាក់​ដូច​ជា​ស្រដៀង​គ្នាខ្លាំងពេក ដែល​កុមារី​ក្មេងៗភ័យខ្លាច​មិនហ៊ាន​និយាយ​ចេញ។ ហើយ លោកស្រី​មានប្រសាសន៍ទៀតថា វាកាន់តែ​ធ្ងន់​ធ្ងរ​ជាងនេះ​សម្រាប់អ្នកដែល​មានពិការភាព។​

លោកស្រី កូរ៉ម៉ា និយាយថា ខ្លឹមសារ​នៅក្នុងឆ្នាំនេះ​សម្រាប់​ទិវារ​កុមារ​អាហ្វ្រិក កំពុងផ្តោតទៅលើ​កុមារ​ដែលមានពិការភាព។

«សម្រាប់​កុមារី​ពិការ គ្មាន​នរណាម្នាក់​និយាយអំពីពួកគេទេ ប៉ុន្តែ​ពួកគេ​ក៏ទទួលរងគ្រោះ​ដែរ។ ពួកគេ​ត្រូវការ​សម្លេង។ កុមារី​ ដែលមានវ័យ​ក្មេង​បំផុត​ត្រឹម១១ឆ្នាំ​ឬ១២ឆ្នាំ ត្រូវ​បាន​ជួញដូរ»។

ហើយ ប្រជាពលរដ្ឋ​ កំពុង​ចាប់ផ្តើម​ផ្តោតការយកចិត្ត​ទុកដាក់ ហើយ​បង្ហាញ​ពីការ​គាំទ្រ។

លោក ចូសិប កូបា (Joseph Kobba) ជាគ្រូម្នាក់​នៅឯ​អនុវិទ្យាល័យ​មួយ​កន្លែង​ នៅក្នុងទីក្រុងហ្វ្រី​ថោន។ លោក​ចេញមុខចូលរួម​ក្នុងការ​ជួប​ជុំគ្នា​នេះ ដោយសារ​លោកក៏មានការ​ព្រួយបារម្ភ​អំពីកុមារី​ ដែលត្រូវ​បានកេង​ប្រវ័ញ្ច។

«ដោយសារប្រវតិ្ត​សង្គមសេដ្ឋកិច្ច​ កុមារីទាំងនេះ​មិនអាច​មានលទ្ធភាព​ចូលរៀន​នៅតាមសាលា​។ ដូច្នេះ​ បុរសទាំងនេះ​ចេញមុខ​បង់ថ្លៃ​សាលា​សម្រាប់​ពួកគេ។ បុរសខ្លះទៀត​ផ្តល់ជូនកុមារី​នូវ​អាហារ​ថ្ងៃត្រង់ ហើយមុន​ពេល​ដែលអ្នកអាច​ដឹងបាន កុមារីទាំង​នោះមាន​ផ្ទៃពោះ​រួច​ទៅ​ហើយ»។​

សម្រាប់លោកស្រី អានីតា កូរ៉ូម៉ា លោកស្រី​ មានផែនការ​ធ្វើ​ញ្ញាតិ​ជូន​ទៅ​រដ្ឋាភិបាល​សេរ៉ាឡេអូន ដើម្បីឲ្យមានច្បាប់​ដ៏តឹងរ៉ឹងមួយ សម្រាប់​បំបែក​នូវ​អ្វី​ដែល​លោកស្រី​ហៅថាជា «វដ្ត​នៃ​ការរំលោភផ្លូវភេទលើ​កុមារីយ៉ាង​ព្រៃផ្សៃ»៕​

ប្រែសម្រួលដោយ លី សុខឃាង
XS
SM
MD
LG