ភ្ជាប់​ទៅ​គេហទំព័រ​ទាក់ទង

គណបក្ស​សម រង្ស៊ី៖ លោក​ងួន ញ៉ិល​មាន​ទីប្រឹក្សា​ដ៏​ច្រើន​ ​នាំឲ្យ​ខ្ជះខ្ជាយ​ថវិកា​ជាតិ​សន្ធឹក​សន្ធាប់


ភ្នំពេញ៖ ក្រុមតំណាងរាស្ត្រ​បក្ស​ប្រឆាំងលើក​ឡើង​ថា​ អនុប្រធាន​រដ្ឋ​សភា​កម្ពុជា​ម្នាក់​មាន​ទីប្រឹក្សា​រហូត​ដល់​ជាង​៧០នាក់​។​ ចំនួនទីប្រឹក្សា​ដ៏​ច្រើន​សន្ធឹក​សន្ធាប់​នេះ​បាន​ធ្វើ​ឲ្យ​ខ្ជះខ្ជាយ​ថវិកា​ជាតិ​យ៉ាង​ច្រើន។

ក្រុម​អ្នកតំណាង​រាស្ត្រ​ចំនួន​១១​រូប​មក​ពី​គណបក្ស​ជំទាស់​សម រង្ស៊ី បាន​លើក​ឡើង​ថា​ លោកងួន ញ៉ិល​ អនុ​ប្រធាន​ទី១​នៃ​រដ្ឋ​សភា​បច្ចុប្បន្ន​មាន​ទីប្រឹក្សា​រហូត​ដល់​៧១​នាក់ ដែល​ចំនួន​ទីប្រឹក្សា​ដ៏​ច្រើន​នេះ​ បាន​ធ្វើ​ឲ្យខាត​បង់​ថវិកា​ជាតិ​យ៉ាង​សម្បើម។

នៅ​ក្នុង​លិខិត​មួយ​ច្បាប់​ចុះ​ថ្ងៃទី​២៧​ ខែ​សីហា​ផ្ញើរ​ជូន​លោកហេង សំរិន​ ប្រធាន​រដ្ឋ​សភាក្រុមអ្នក​តំណាង​រាស្រ្ត​ខាង​គណបក្ស​សម រង្ស៊ី​ទាំងនោះ​ដែល​រួមមាន​លោក​សុន ឆ័យ​ ​លោក​ជា ប៉ូច​ ​លោក​យន្ត ថារ៉ូ​ ​លោក​ហូ វ៉ាន់​ លោក​អេង ឆៃអ៊ាង​ លោក​ឡុង រី លោក​ប៉ែន សុថាវរិន្ទ្រ ​លោក​ជីវ កត្តា​ លោក​ឃី វណ្ណដេត​ លោក​គួយ ប៊ុនរឿន​ និង​លោកស្រី​ថាក់ ឡានី ​បាន​សរសេរ​ថា​ ​ថវិកា​ជាតិ​ចំនួន​ជាង​១១២​លាន​រៀល​ ឬ​ស្មើ​នឹង​ជាង​២​ម៉ឺន​៦ពាន់​ដុល្លាររ​អាមេរិក​ក្នុង​មួយ​ខែៗ​ ​ត្រូវ​បាន​ចំណាយ​ទៅ​លើ​ទីប្រឹក្សា​ទាំង​៧១​នាក់​របស់​លោក​ងួន ញ៉ិល។ ​ក្នុង​ចំណោម​ទីប្រឹក្សា​ទាំង​នោះ​ ​ក៏​មាន​រួម​ទាំង​អ្នក​តំណាង​រាស្ត្រ​ ​លោក​ញ៉ែម ថ្ថាវី​ ដែល​ត្រូវជា​ប្អូន​ថ្លៃ​របស់​លោក​ងួន ញ៉ិល​ផង​ដែរ។

តាមរយៈ​លិខិត​ដដែល​នេះ​ ​ក្រុម​អ្នក​តំណាង​រាស្រ្ត​ខាង​គណបក្ស​ជំទាស់​ក៏​បាន​ស្នើ​ឲ្យ​ប្រធាន​រដ្ឋ​សភា​ លោក​ហេង សំរិន​ពន្យល់​ពី​ការ​ចំណាយ​ដ៏​ច្រើន​សន្ធឹក​សន្ធាប់​ទៅ​លើ​ទីប្រឹក្សា​របស់​លោកងួន ញ៉ិល​ និង​ស្នើ​ឲ្យ​រដ្ឋសភា​ចាត់​វិធាន​ការ​ជា​បន្ទាន់​«ដើម្បី​បញ្ឈប់​ភាព​មិន​ប្រក្រតី​នេះ»។

លោក​សុន ឆ័យ ​ប្រធាន​ក្រុម​អ្នក​តំណាង​រាស្ត្រ​ខាង​គណបក្ស​សម រង្ស៊ី ​បាន​ថ្លែង​ថា​ ​កន្លង​មក​រដ្ឋាភិបាល​តែងតែ​អះអាង​អំពី​ការ​ខ្វះខាត​ថវិកា​សម្រាប់​ជួយ​តម្លើង​ប្រាក់ខែ​ដល់​មន្រ្តី​រាជការ​ និង​កង​កម្លាំង​ប្រដាប់​អាវុធ​ ​ប៉ុន្តែ​បែរ​ជា​មាន​ប្រាក់​សម្រាប់​ចំណាយ​ទៅ​លើ​ទីប្រឹក្សា​ដ៏​ច្រើន​សន្ធឹក​សន្ធាប់​របស់​ថ្នាក់​ដឹកនាំ​នៃ​ស្ថាប័ន​កំពូល​របស់​ជាតិ​នេះ​ទៅ​វិញ។

«វា​ជា​ការ​តែង​តាំង​ហួសហេតុ។ ​ខ្ញុំ​មិន​ដឹង​ ​ថា​តើ​ក្នុង​ពិភព​លោក​នេះ​មាន​ប្រទេស​ណា​មួយ​ដែល​អនុ​ប្រធាន​សភា​មាន​ទីប្រឹក្សា​ដល់​៧១​រូប​ មិន​ដឹង​ជា​ទី​ប្រឹក្សា​នោះ​ទៅ​អង្គុយ​ធ្វើ​ការ​កន្លែង​ណា»។

ចំនួន​ទី​ប្រឹក្សា​ពិតប្រាកដ​នៅក្នុង​ស្ថាប័ន​រដ្ឋសភា​ពុំ​ត្រូវ​បាន​ប្រកាស​ជា​សាធារណៈ​ទេ។

លោក​សុន ឆ័យ​មាន​ប្រសាសន៍​បន្ថែម​ថា​ ​ទីប្រឹក្សា​ភាគ​ច្រើន​ពុំ​បាន​ធ្វើ​ការងារ​ផ្តល់​យោបល់​ដល់​រដ្ឋ​សភា​នោះ​ទេ​ គឺ​ពួកគេ​គ្រាន់តែ​មក​បើក​ប្រាក់​បំណាច់​ និង​យក​តួនាទី​នេះដើម្បី​ការពារ​មុខ​របរ​រកស៊ី​របស់​ពួក​គេ​ប៉ុណ្ណោះ។

លោក​ងួន ញ៉ិល ​អនុ​ប្រធាន​ទី១​នៃ​រដ្ឋសភា​កម្ពុជា​ ​មាន​ប្រសាសន៍​ថា​ ​លោក​បាន​តែង​តាំង​ទីប្រឹក្សា​ទាំង​នេះ ​ដើម្បី​ជួយ​សម្រួល​ការងារ​របស់​លោក​ ​ជា​អ្នក​តំណាង​រាស្ត្រ​ ដើម្បី​ធានា​ឲ្យ​បាន​នូវ​ប្រសិទ្ធិ​ភាព​ខ្ពស់​ក្នុង​ការ​បម្រើ​ផល​ប្រយោជន៍​ជូន​ប្រជាពល​រដ្ឋ។

«ទីប្រឹក្សា​ដែល​ធ្លាប់​បម្រើ​ការងារ​ខ្ញុំ​ ​ហើយ​គ្មាន​តួនាទី​ឯណា​ទៀត​នោះ​ ​ហើយ​មាន​បទ​ពិសោធន៍​និង​ចំណេះ​ដឹង​ទូទៅ​ច្រើន​ផង​ ​ខ្ញុំ​ក៏​បាន​ចាប់​ផ្តើម​តែង​តាំង​ទី​ប្រឹក្សា​ដែល​ធ្លាប់​បម្រើ​ការងារ​ឲ្យ​ខ្ញុំ​មាន​ប្រសិទ្ធិ​ភាព​ ​ពីព្រោះ​ខ្ញុំ​គ្រប់គ្រង​ខេត្ត​បីបួន​ ​ហើយ​មាន​ករណី​រាប់រយ​ដែល​ត្រូវ​មាន​ទីប្រឹក្សា​ហ្នឹង​ចុះ​ទៅ​ដោះ​ស្រាយ​នៅ​មូល​ដ្ឋាន បាន​ជោគ​ជ័យ​ជូន​ប្រជា​ពលរដ្ឋ​ និង​ប្រទេស​ជាតិ​យើង»។

លោក​ងួន ញ៉ិល​មាន​ប្រសាសន៍​បន្ថែម​ថា​ ​ការ​តែងតាំង​អ្នក​តំណាងរាស្រ្តលោក​ញ៉ែម ថ្ថាវី​ដែល​ត្រូវ​ជា​ប្អូន​ថ្លៃ​របស់លោក​នោះ​ ឲ្យ​ធ្វើ​ជា​ទី​ប្រឹក្សា​ដែរ​នេះ​ គឺ​មិនមែន​ជា​បញ្ហា​បក្ខ​ពួក​ ឬគ្រួសារ​និយម​នោះ​ទេ​ ​ប៉ុន្តែ​គឺ​ដោយសារ​លោក​ញ៉ែម ថ្ថាវី​ជា​មនុស្ស​ដែល​មាន​សមត្ថភាព​អាច​ជួយ​កិច្ច​ការងារ​របស់​លោក​បាន។

បច្ចុប្បន្ន ​ដោយ​មិន​រាប់​បញ្ចូល​ចំនួន​ទីប្រឹក្សា​ផង​នោះ​ ​ប្រទេស​កម្ពុជា​មាន​នាយក​រដ្ឋមន្រ្តី​ម្នាក់​ ឧប​នាយក​រដ្ឋមន្រ្តី​ចំនួន​១០​នាក់​ ​ទេស​រដ្ឋមន្រ្តី​ចំនួន​១៧​នាក់​ រដ្ឋមន្រ្តី​ចំនួន​២៦​នាក់​ និង​រដ្ឋ​លេខាធិការ​និង​អនុ​រដ្ឋលេខា​ធិការ​ប្រមាណ​ជាង​៣០០​នាក់។ ​ប៉ុន្តែ​គេ​មិន​ដឹង​ពិត​ប្រាកដ​ពី​ចំនួន​ទីប្រឹក្សា​ឬ​ជំនួយ​ការ​របស់​ថ្នាក់​ដឹកនាំ​ ​សមាជិក​ និង​មន្រ្តី​រដ្ឋាភិបាល​ទាំង​អស់​នេះទេ។

លោក​អ៊ូ វីរៈ​ ប្រធាន​មជ្ឈ​មណ្ឌល​សិទ្ធិ​មនុស្ស​កម្ពុជា​ ​មាន​ប្រសាសន៍ថា​ ​រដ្ឋា​ភិបាល​គួរ​តែ​យកថវិកា​ដែល​ចំណាយ​ទៅលើ​ទីប្រឹក្សា​ដែល​មិន​ធ្វើការ​នេះ​ ​ទៅ​ប្រើ​ប្រាស់​បម្រើ​ផល​ប្រយោជន៍​ជាតិ​វិញ។

លោក​បន្ថែម​ថា​ ​បញ្ជី​ឈ្មោះ​ទី​ប្រឹក្សា​ទាំង​អស់​គួរតែ​ត្រូវ​បាន​ប្រកាស​ជា​សាធារណៈ​ដើម្បី​ឲ្យ​មាន​តម្លាភាព​ក្នុង​ការ​ចំណាយ​ថវិកា​ជាតិ​ទៅលើ​ពួក​គេ​ទាំង​នោះ៕

XS
SM
MD
LG