ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាពាហ៍ពិពាហ៍រវាងខ្មែរនឹង ជនជាតិកូរ៉េខាងត្បូងត្រូវផ្អាក


អាពាហ៍ពិពាហ៍រវាងខ្មែរនឹង ជនជាតិកូរ៉េខាងត្បូងត្រូវផ្អាក
អាពាហ៍ពិពាហ៍រវាងខ្មែរនឹង ជនជាតិកូរ៉េខាងត្បូងត្រូវផ្អាក

<!-- IMAGE -->

ដើម្បីស្តាប់ព័ត៌មាននេះ

ក្រសួងការបរទេសនៃប្រទេសកម្ពុជាបានបញ្ជាឲ្យផ្អាកជាបណ្តោះអាសន្នមិនឲ្យ
មានការរៀបអាពាហ៍ពិពាហ៍រវាងប្រជាពលរដ្ឋកម្ពុជាជាមួយ និង ជនជាតិកូរ៉េ
ខាងត្បូងទេ បន្ទាប់ពីអាជ្ញាធរនគរបាលកម្ពុជាបានរកឃើញថា មានស្រ្តីជនបទ
ចំនួន២៥នាក់ ត្រូវបានមេខ្យល់នាំយកមកលក់សម្រាប់រៀបអាពាហ៍ពិពាហ៍ទៅ
ប្រទេសកូរ៉េខាងត្បូងនោះ។

លោក កុយ គួង អ្នកនាំពាក្យក្រសួងការបរទេស បានឲ្យដឹងថា ក្រសួងការបរ
ទេសបានជូនដំណឹងដល់ស្ថានទូតកូរ៉េខាងត្បូង ប្រចាំនៅប្រទេសកម្ពុជាអំពី
បញ្ហាខាងលើនេះរួចហើយកាលពីថ្ងៃទី៥ខែមិនានេះ។

លោកកុយ គួង បានបន្តថា ការផ្អាករៀបអាពាហ៍ពិពាហ៍ជាបណ្តោះអាសន្ននេះ
ដើម្បីទប់ស្កាត់ការជួញដូរស្រ្តីខ្មែរទៅកូរ៉េខាងត្បូង។

«យើងផ្អាកនេះដើម្បីពិនិត្យនីតិវិធីនេះឡើងវិញដើម្បីទប់ស្កាត់ការជួញដូរមនុស្ស
នេះឲ្យកាន់តែមានប្រសិទ្ធិភាព។ បាទ តែមួយរយៈទេ។ នៅពេលដែលយើងរក
ឃើញនូវនិតិវិធី ឬក៏វិធានការណ៍ទប់ស្កាត់បានល្អហើយគឺយើងនឹងប្រកាសបើក
ទទួលវិញ។ យើងមិនអាចកំណត់បាននៅឡើយទេ ពីព្រោះរឿងនេះ ដល់ក្រុម
ការងារអ្នកបច្ចេកទេសគេរកឃើញបានលឿននោះ យើងបើកភ្លាមហើយ»។

កាលពីចុងខែមិនាឆ្នាំ២០០៨កន្លងទៅនេះ ក្រសួងមហាផ្ទៃបានចេញសេចក្តីប្រ-
កាសមួយឲ្យផ្អាកជាបណ្តោះអាសន្ននូវការអនុញ្ញាតច្បាប់រៀបអាពាហ៍ពិពាហ៍
រវាងពលរដ្ឋកម្ពុជាជាមួយជនបរទេស បន្ទាប់ពីលោកនាយករដ្ឋមន្រ្តីហ៊ុន សែន
បានមានប្រតិកម្មយ៉ាងខ្លាំងចំពោះនារីខ្មែរមួយចំនួនថា បានរៀបការទៅក្រៅប្រ-
ទេស ហើយត្រូវបានគេកេងប្រវ័ញ្ចកម្លាំងពលកម្ម និង ត្រូវគេលក់ឲ្យបម្រើក្នុង
សេវារកស៊ីផ្លូវភេទ។

បន្ទាប់មកនៅខែវិចិ្ឆកាឆ្នាំ២០០៨ក៏មានការបើកឲ្យរៀបអាពាហ៍ពិពាហ៍ឡើងវិញ
ក៏ប៉ុន្តែការរៀបអាពាហ៍ពិពាហ៍នោះ គឺមិនត្រូវធ្វើតាមរយៈភា្នក់ងាររើសគូស្រករ
ឈ្នួញកណ្តាល ឬក្រុមហ៊ុនអាជីវកម្មទេ។ ជាងនេះទៅទៀត អនុក្រឹត្យតំរូវឲ្យជន
បរទេសដែលមានបំណងចង់រៀបការត្រូវមកបំពេញសំណុំបែបបទដោយផ្ទាល់
ខ្លួននៅក្នុងប្រទេសកម្ពុជា។

លោកស្រីជូ ប៊ុនអេង រដ្ឋលេខាធិការនៃក្រសួងមហាផ្ទៃបានឲ្យដឹងដែរថា បន្ទាប់
ពីមានការអនុញ្ញាតមានការរៀបអាពាហ៍ពិពាហ៍ឡើងវិញរវាងពលរដ្ឋខ្មែរនិងជន
បរទេស មានការដាក់ពាក្យសុំរៀបការទៅប្រទេសកូរ៉េប្រហែលជាជិត១ពាន់គូ
ក្នុងនោះភាគច្រើនជនជាតិកូរ៉េដែលបានរៀបការរួចហើយនោះ មិនបានបង្ហាញ
ខ្លួននៅក្នុងពេលបំពេញបែបបទនោះទេ។

លោកស្រីបានបន្តថា នេះគឺជាបញ្ហាលំបាកមួយក្នុងការបែងចែកថា តើការរៀប
អាពាហ៍ពិពាហ៍មួយណាដែលពិតប្រាកដ ហើយមានសុវត្ថិភាពដោយសារប្រ-ទេសកូរ៉េមានការអនុញ្ញាតឱ្យឈប់សម្រាកបានត្រឹមតែមួយសប្តាហ៍ប៉ុណ្ណោះ
ក្នុង១ឆ្នាំ។ លោកស្រីបានបញ្ជាក់ថា ការផ្អាកបណ្តោះអាសន្ននេះក៏ជាការមួយ
រង់ចាំរកដំណោះស្រាយឲ្យបានត្រឹមត្រូវនិងសមស្របទៅនឹងការឈប់សម្រាក
នៃប្រទេសនេះផងដែរ។

« មានការផ្អាកបណ្តោះអាសន្ននេះដើម្បីរកដំណោះស្រាយថា ត្រូវធ្វើដូចម្តេច
មិនមែនមានន័យថា យើងកំពុងតែធ្វើឲ្យបញ្ហារឹតតែស្មុគស្មាញទេគឺថា តើយើង
ធ្វើដូចម្តេចដើម្បីផ្តល់ឱកាសសម្រាប់ប្រជាពលរដ្ឋមានសិទ្ធិក្នុងការជ្រើសរើសគូ
ស្រករដែលធ្វើស្របតាមច្បាប់ ហើយការពារគាត់ពីភាពរងគ្រោះ ដោយប្រការ
ផ្សេងៗ អាចថា ជាអំពើជួញដូរមនុស្ស ឬការកេងប្រវ័ញ្ចផ្លូវភេទ ឬ កេងប្រវ័ញ្ច
ពលកម្មតាមរូបភាពអាពាហ៍ពិពាហ៍។ យើងក៏មិនចង់ឲ្យការផ្អាកនេះមានរយៈ
ពេលយូរដែរ»។

លោកស្រីមាន ស្រីនូ អនុរដ្ឋលេខាធិការនៃក្រសួងកិច្ចការនារី បានគាំទ្រដល់ការ
ផ្អាកនេះ ដើម្បីពង្រឹងបន្ថែមទៀតដល់សុវត្ថិភាពស្រ្តីខ្មែរ មុននឹងធ្វើការរៀបការ
ចាកចេញពីប្រទេសរបស់ខ្លួន។

«ការរៀបការរបស់ស្រ្តី ជួនកាលការសម្រេចចិត្តរបស់គាត់ធ្វើឡើងដោយសារ
ជីវភាពគ្រួសារគាត់ទីទ័ល ដោយសារគាត់សង្ឈឹមថា បើយកប្តីកូរ៉េទៅវានឹងមាន
ជីវភាពធូរធារ។ ប៉ុន្តែបន្ទាប់ពីគាត់រៀបការហើយទៅ អ្វីដែលគាត់ទទួលបានវា
ខុសពីការគិតទុកនេះ។ ជួនការគាត់ទៅជាអ្នកបម្រើសេវានៅតាមផ្ទះទៅវិញ ជួន
កាលត្រូវប្តីវាយធ្វើបាប។ វាច្រើនតែជួបនូវបញ្ហាអស់នេះ ដូច្នេះការផ្អាករបស់ក្រ-
សួងការបរទេសគឺជាការត្រឹមត្រូវហើយ»។

ចំណែកឯលោកស្រី លី វជ្ជុតា នាយកនៃអង្គការជំនួយផ្លូវច្បាប់ដល់កុមារនិងស្រី្ត
បានចាត់ទុកការផ្អាកជាបណ្តោះអាសន្ននេះគឺជាការល្អប្រសើរមួយ ពីព្រោះចាប់
តាំងពីចុងឆ្នាំ២០០៩រហូតមកដល់ពេលនេះ អង្គការបានទទួលពាក្យបណ្តឹងពី
ស្រ្តីខ្មែរដែលបានរៀបការទៅប្រទេសកូរ៉េចំនួន៤ករណី ដោយសារអ្នកទាំងនោះ
មិនទទួលបាននូវសិទ្ធិសេរីភាពពេញលេញក្នុងការរស់នៅ រងអំពើហិង្សាខាង
ផ្នែករាងកាយ ធ្វើបានផ្លូវកាយ ផ្លូវចិត្ត និង បិទសិទ្ធិសេរីភាពផ្នែកសេដ្ឋកិច្ចជា
ដើម។

លោកស្រ្តីបានបញ្ជាក់ថា តាមការប៉ាន់ស្មានស្រ្តី ដែលរៀបការទៅប្រទេសកូរ៉េ
អាចមានបញ្ហាច្រើនជាងនេះ ក៏ប៉ុន្តែអាចអ្នកទាំងនោះនៅមិនទាន់បានដឹងពីការ
ទំនាក់ទំនងធ្វើយ៉ាងណាដើម្បីឲ្យគេទទួលបានសេវាជួយសង្រ្គោះនៅឡើយ។

«ករណីដែលខ្ញុំបានទទួលភាគច្រើន គឺគាត់មានបញ្ហាធ្វើបាបដោយផ្លូវចិត្ត ផ្លូវ
កាយនិងផ្លូវសេដ្ឋកិច្ច។យល់ថា វាជារឿងមួយល្អដែរដើម្បីឲ្យយើងមើលឲ្យបាន
ច្បាស់លាស់ថា តើបញ្ហាស្រ្តីដែលបានរៀបការវាមានបញ្ហាអ្វីខ្លះ ពីព្រោះយើង
ដឹងថារៀបការទៅប្រទេសកូរ៉េឥឡូវមានច្រើន»។

ស្រ្តីខ្មែរមួយចំនួនបានសម្រេចចិត្តរៀបការទៅក្រៅប្រទេសដោយសារតែមាន
បញ្ហាជីវភាព ហើយមានអ្នកខ្លះបានគិតថា រៀបការទៅក្រៅប្រទេសអាចធ្វើឲ្យ
ពួកគេមានអនាគតល្អប្រសើរជាងការដែលរៀបការនៅក្នុងប្រទេស។ ក៏ប៉ុន្តែការ
ដែលរំពឹងទុកនេះធ្វើឲ្យស្រ្តីមួយចំនួនបានសម្រេចដូចបំណងមែន ហើយក៏មាន
អ្នកខ្លះបានត្រឹមតែទទួលការសោកស្តាយតែប៉ុណ្ណោះ ដែលជាហេតុធ្វើឲ្យមន្រ្តី
រដ្ឋាភិបាល និង អង្គការក្រៅរដ្ឋាភិបាលមួយចំនួនតែងតែធ្វើការអំពាវនាវឱ្យស្រ្តី
ខ្មែរគិតគូរឲ្យបានល្អិតល្អន់ ម៉ត់ចត់មុននឹងសម្រេចរៀបការទៅក្រៅប្រទេស៕

អត្ថបទ​ទាក់ទង

XS
SM
MD
LG