ស្រ្តីប្រកបរបរផ្លូវភេទ ធ្វើបុណ្យផ្កាសាមគ្គឺ

ដើម្បីស្តាប់ព័ត៌មាននេះ

ស្រ្តីរកស៊ីផ្លូវភេទប្រមាណជា២០០នាក់ នៅក្នុងទីក្រុងភ្នំពេញ បានរួបរួមគ្នាធ្វើ
បុណ្យផ្កាសាមគ្គីមួយក្នុងទីក្រុងភ្នំពេញកាលពីថ្ងៃច័ន្ទនិងថ្ងៃអង្គារដើមសប្តាហ៍
នេះដើម្បីប្រមូលបច្ច័យចូលរួមកសាងសមិទ្ធិផលក្នុងវិស័យព្រះពុទ្ធសាសនានិង
ជួយដល់អ្នករកស៊ីផ្លូវភេទខ្លះដែលជួបបញ្ហាផ្នែកជីវភាព។

ពិធីបុណ្យនេះ រៀបចំឡើងដោយបណ្តាញការងារស្រ្តីរួបរួមគ្នា ដែលជាអង្គការ
ក្រៅរដ្ឋាភិបាលមួយធ្វើការផ្តោតទៅលើការអប់រំផ្នែកសុខភាពរបស់ស្រ្តីរកស៊ីផ្លូវ
ភេទនិងជួយទប់ស្តាត់ការជួញដូរមនុស្ស។ពិធីបុណ្យនេះមានការចូលរួមពីអាជ្ញា
ធរដែនដី និងមន្ត្រីអង្គការមួយចំនួនដែលធ្វើការពាក់ព័ន្ធនឹងស្រ្តីរកស៊ីផ្លូវភេទ។

អ្នកស្រីកែវ ថា អ្នកសម្របសម្រូលបណ្តាញការងារស្រ្តីរួបរួមគ្នា បានឲ្យដឹងថា
ការប្រារព្ធពិធីបុណ្យផ្កាសាមគ្គីនេះ ធ្វើឡើងដើម្បីចូលរួមចំណែកសាងសង់កុដិ
មួយនៅវត្តចិនដំដែកដែលជាទីកន្លែងប្រារព្ធពិធីបុណ្យនេះ និងយកបច្ច័យខ្លះ
ទៅឧបត្ថម្ភដល់កម្មវិធីអប់រំក្រៅប្រព័ន្ធសម្រាប់កូនៗរបស់អ្នកប្រកបរបរផ្លូវភេទ
ចំនួន៣៧០នាក់ ជាពិសេសសម្រាប់ការទិញសម្លៀកបំពាក់ សំភារៈសិក្សានិង
មានការផ្តល់រង្វាន់លើកទឹកចិត្តដល់កុមារទាំងនោះក្នុងការរៀនសូត្ររបស់ពួក
គេ។ អ្នកស្រីបានបញ្ជាក់ដែរថា នេះជាការបង្ហាញឲ្យឃើញថា ដរាបណាអ្នក
ប្រកបរបរផ្លូវភេទនៅមានជីវិត ពួកយើងតែងតែគោរពនិងស្រឡាញ់នូវជំនឿ
សាសនា ប្រពៃណី វប្បធម៌ជានិច្ច។

«យើងធ្វើបុណ្យ ចង់ឲ្យយើងទៅថ្ងៃអនាគតទៅ ឲ្យយើងទៅជាមនុស្សល្អ កុំឲ្យ
យើងជួបប្រទះដូចអញ្ចឹងទៀត ។ មូលហេតុដែលយើងនាំគ្នាធ្វើបុណ្យផ្កានេះ
ឡើងដោយសារគេថា អ្នករកស៊ីផ្លូវភេទនេះមិនចេះធ្វើបុណ្យធ្វើទាន អត់ដែល
ចេះកាន់ប្រពៃណីខ្មែរទេ ឲ្យវាខូចដល់សង្គម ប៉ុន្តែសំខាន់ដោយសារជីវភាព
យើង ក្រពះយើងត្រូវការដើម្បីរស់ចិញ្ចឹមគ្រួសារយើង»។

អ្នកស្រី កែវ ថាបានឲ្យដឹងបន្តទៀតថា បច្ច័យដែលបានមកពីពិធីបុណ្យនេះ
មានចំនួនប្រហែលជិត៧០០ដុល្លារអាមេរិក។

អ្នកស្រី ផាន់នី មានអាយុ៤៥ឆ្នាំ ជាស្រ្តីរកស៊ីផ្លូវភេទអស់រយៈពេល២០ឆ្នាំកន្លង
មកហើយ បានឲ្យដឹងថា ការធ្វើបុណ្យនេះដើម្បីសន្សំបុណ្យកុសលទៅជាតិមុខ
ហើយក៏ជាការបង្ហាញថា ស្រីរកស៊ីផ្លូវភេទក៏ចេះធ្វើបុណ្យដូចជាអ្នកដទៃដែរ។
«សម្រាប់ពួកខ្ញុំដែលធ្វើបុណ្យផ្កាសាមគ្គីមានប្រយោជន៍គឺដើម្បីហែរផ្កា។ អញ្ចឹង
អាជ្ញាធរដែនដី ច្បាប់ រដ្ឋាភិបាល គាត់ទទួលស្គាល់ដឹងឮថា អ្នកប្រកបរបរផ្លូវ
ភេទចេះធ្វើបុណ្យផ្កាចេះគោរពព្រះពុទ្ធសាសនាដូចគេដូចឯងដែរ»។

អ្នកស្រីរំពឹងថា ការធ្វើបុណ្យនេះពិតជាបានទទួលបុណ្យកុសល ទោះបីជាប្រាក់
ដែលយកមកធ្វើបុណ្យនេះបានមកពីការលក់ខ្លួនក៏ដោយ។

យោងតាមរបាយការណ៍របស់មជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក
និងកាមរោគបានឲ្យដឹងថា នៅក្នុងប្រទេសកម្ពុជា ស្រ្តីរកស៊ីផ្លូវវភេទមានចំនួន
៣.៤១៩៣នាក់ដែលភាគច្រើនមានអាយុចន្លោះពី១៨ឆ្នាំដល់៣០ឆ្នាំ ហើយនៅ
ក្នុងនោះមានស្រ្តីជិត៣.០០០នាក់បានប្រកបរបរនេះដោយផ្ទាល់ ហើយក្រៅពី
នេះបានប្រព្រឹត្តដោយប្រយោល ដូចជាបម្រើក្នុងហាងម៉ាស្សា ខារ៉ាអូខេ ជាអ្នក
បម្រើស្រាបៀរ និង ធ្វើការក្នុងភោជនីយដ្ឋានជាដើម។ ក៏ប៉ុន្តែការប្រកបរបរផ្លូវ
ភេទនៅប្រទេសកម្ពុជាគឺជាមុខរបរខុសច្បាប់។

យោងទៅតាមព្រះតេជគុណប៉ាង សុដារ ព្រះចៅអធិការវត្តភ្នំពេញថ្មីនៅក្នុងខេត្ត
កំពង់ចាមបានមានសង្ឈដីកាថា របររកស៊ីផ្លូវភេទជាមុខរបរខុសឆ្គងមួយក្នុងព្រះ
ពុទ្ធសាសនា ក៏ប៉ុន្តែព្រះតេជគុណបានមានសង្ឃដីកាបញ្ជាក់ថា ការរួបរួមគ្នាធ្វើ
បុណ្យរបស់ស្រ្តីទាំងនេះគឺជាកុសលផលបុណ្យមួយ។

លោកស្រី ស៊ី ឌីហ្វីន រដ្ឋលេខាធិការក្រសួងកិច្ចការនារី បានអបអរសាទរចំពោះ
ការធ្វើបុណ្យនេះ ដោយលោកស្រីបានចាត់ទុកថា ជាសកម្មភាពមួយដ៏ល្អរបស់
ស្រ្តីប្រកបរបរផ្លូវភេទក្នុងការជួយជំរុញកូនៗរបស់ខ្លួនឲ្យបានរៀនសូត្រ និងមាន
ការជួយទ្រទ្រង់ ដល់គោរពព្រះពុទ្ធសាសនា ។

«ចំណុចនេះខ្ញុំយល់ឃើញថា ជាចំណុចល្អទេ ពីព្រោះវាអត់មានធ្វើអីប៉ះពាល់
ទៅដល់សង្គមទេមានតែការជួយដល់ទាំងពុទ្ធចក្រនិងអាណាចក្រ ការធ្វើបុណ្យ
ទោះជាអ្នកណា ឲ្យតែគេមានចិត្តសទ្ធាជ្រះថ្លា មិនមានអីជាអាក្រក់នោះទេគឺថា
ធម៌អាថ៌អាចបំភ្លឺផ្លូវជូនគាត់ផងឲ្យប្រព្រឹត្តតែអំពើល្អ ហើយយើងក៏អបអរសាទរ
គាត់ផងដែរ ។ គាត់ចេះធ្វើផ្លូវត្រូវបាន ពីព្រោះគាត់ចេះទៅកសាងវត្ត គាត់ចេះ
យកលុយឲ្យកូនគាត់ទៅរៀន»។

ជាមួយគ្នានេះដែរ លោកគឹម សំបូរ មេភូមិទួលគោក ដែលបានចូលរួមក្នុងពិធី
បុណ្យនោះ បានមានប្រសាសន៍ថា ពិធីបុណ្យនេះ គឺជាការបង្ហាញឆន្ទៈគោរព
ស្រឡាញ់នូវព្រះពុទ្ធសាសនានិងសាមគ្គីភាពដ៏រឹងមាំ របស់អ្នកប្រកបរបរផ្លូវភេទ
និងអ្នកបម្រើសេវាកំសាន្ត ដែលជាប្រជាជនងាយរងគ្រោះ និង ទទួលរងនូវការ
រើសអើងពីសង្គម៕