ភ្ជាប់​ទៅ​គេហទំព័រ​ទាក់ទង

រដ្ឋាភិបាលបានហៅរបាយការណ៍ របស់ស.រ.អា.មិនគ្រប់ជ្រុងជ្រោយ

  • ហេង រស្មី

រដ្ឋាភិបាលបានហៅរបាយការណ៍ របស់ស.រ.អា.មិនគ្រប់ជ្រុងជ្រោយ

<!-- IMAGE -->

ដើម្បីស្តាប់ព័ត៌មាននេះ

លោកផៃ ស៊ីផាន អ្នកនាំពាក្យ និងជារដ្ឋលេខាធិការទីស្តីការគណៈរដ្ឋមន្រ្តី បាន
មានប្រសាសន៍ នៅថ្ងៃសុក្រនេះថា ការរិះគន់របស់សហរដ្ឋអាមេរិកចំពោះស្ថាន
ភាពសិទ្ធិមនុស្សនៅកម្ពុជាគឺជាការលើកឡើងមិនគ្រប់ជ្រុងជ្រោយទាំងអត្ថន័យ
និងគុណភាព ។

«លើកឡើងមិនគ្រប់ជ្រុងជ្រោយ ទីមួយទាំងអត្ថន័យ ទាំងគុណភាព ដោយសារ
យកប្រទេសយើងប្រៀបធៀបជាមួយប្រទេសដទៃទៀត» ។

កាលពីថ្ងៃព្រហស្បតិ៍ម្សិលមិញនេះ សហរដ្ឋអាមេរិក បានចេញរបាយការណ៍ស្តី
អំពីបញ្ហាសិទ្ធិមនុស្សជាសកល ដែលក្នុងនោះ សហរដ្ឋអាមេរិកបានរិះគន់បញ្ហា
សិទ្ធិមនុស្សនៅកម្ពុជា ក៏ដូចជាបណ្តាឆ្នាំមុនៗដែរគឺនៅឆ្នាំ២០០៩នេះកម្ពុជាស្ថិត
នៅលំដាប់ថ្នាក់អន់ថយនៅឡើយខាងការគោរពសិទ្ធិមនុស្ស ។

ការរិះគន់របស់សហរដ្ឋអាមេរិកនេះបាននិយាយសំដៅទៅលើការសម្លាប់ក្រៅ
ច្បាប់ធ្វើឡើងដោយមន្រ្តីសន្តិសុខ ការធ្វើទារុណកម្មអ្នកជាប់ឃុំឃាំងយកចម្លើយ
ការចាប់ខ្លួនតាមអំពើចិត្តដោយមិនស្របច្បាប់ ការឃុំខ្លួនហួសពេលកំណត់ ការ
បណ្តេញប្រជាពលរដ្ឋចេញពីលំនៅដ្ឋាន ការរិតត្បិតសេរីភាពប្រមូលផ្តុំនិងសេរី-
ភាពផ្នែកបញ្ចេញមតិ និង ការរិតបន្តឹងបញ្ហាប្រព័ន្ធផ្សព្វផ្សាយ តាមរយៈបណ្តឹង
បរិហារកេរ្តិ៍ និងផ្សព្វផ្សាយព័ត៌មានមិនពិត ។

ក៏ប៉ុន្តែទោះជាយ៉ាងណាក៏ដោយ ក៏នៅក្នុងរបាយការណ៍របស់សហរដ្ឋអាមេរិក
បានទទួលស្គាល់ផងដែរថា មិនមានការសម្លាប់ណាមួយត្រូវបានរាយការណ៍ថា
បានកើតមានឡើងដោយរដ្ឋាភិបាល ឬ ក៏ភ្នាក់ងាររដ្ឋាភិបាល ដោយហេតុផល
នយោបាយទេ ។

លោកផៃ ស៊ីផានបានមានប្រសាសន៍ថា កម្ពុជាទើបតែបានចាកចេញពីសង្គ្រាម
ស៊ីវិលអស់រយៈពេលជាង១០ឆ្នាំប៉ុណ្ណោះ គឺមិនអាចធ្វើការប្រៀបធៀបជាមួយ
បណ្តាប្រទេសផ្សេងទៀតបានទេ ។

«ការយល់ដឹងនៃប្រទេសយើងជាមួយប្រទេសដទៃដើម្បីការចាត់ថ្នាក់ អាហ្នឹង
ជាការអយុត្តិធម៌ ហើយមិនសមរម្យក្នុងការធ្វើរបាយការណ៍ដែលមានលក្ខណៈ
ជាគុណភាពតាមលក្ខណៈវិទ្យាសាស្រ្តនោះឡើយ» ។

លោកយឹម សុវណ្ណ អ្នកនាំពាក្យ និងជាអ្នកតំណាងរាស្រ្តគណបក្សប្រឆាំង បាន
និយាយថា ស្ថានភាពសិទ្ធិមនុស្សនៅកម្ពុជា ដូចដែលបានលើកឡើងនៅក្នុង
របាយការណ៍របស់សហរដ្ឋអាមេរិកពិតប្រាកដមែន ។

លោកបានមានប្រសាសន៍ថា យើងមានការព្រួយបារម្ភចំពោះស្ថានភាពសិទ្ធិ
មនុស្សនៅកម្ពុជា ពីមួយថ្ងៃទៅមួយថ្ងៃកាន់តែធ្ងន់ធ្ងរទៅដែលជាឧបសគ្គក្នុងការ
កសាង និងអភិវឌ្ឍន៍ប្រទេស ។

«បើរដ្ឋាភិបាលមិនប្តូរជំហរកែលម្អមុខមាត់របស់ប្រទេសជាតិយើងទាក់ទងនឹង
បញ្ហាសិទ្ធិមនុស្សនេះទេ គឺស្ថិតនៅក្នុងស្ថានភាពឯកោហើយ»។

ចំណែកលោកអំ សំអាត មន្រ្តីស៊ើបអង្កេតរបស់អង្គការសិទ្ធិមនុស្ស LICADHO
វិញ បានមានប្រសាសន៍ថា ការបណ្តេញមនុស្សចេញពីទីប្រជុំជន ការបាញ់
សម្លាប់ក្រៅច្បាប់នៅតែកើតមាននៅឡើយនៅក្នុងប្រទេសកម្ពុជា។

លោកអំ សំអាត បានមានប្រសាសន៍ថា បញ្ហាទាំងនេះ គឺដោយសារតែកម្ពុជា
ការអនុវត្តច្បាប់នៅមានភាពធូររលុងនៅឡើយ ។

«ដោយសារតែមានទម្លាប់អ្នកមានអំណាចឬអ្នកមានបក្ខពួកហ្នឹងតែងតែប្រព្រឹត្ត
នូវបទល្មើសទាំងអស់នោះ ហើយមិនត្រូវបានយកទៅផ្តន្ទាទោសទៅតាមផ្លូវ
ច្បាប់»។

នៅក្នុងរបាយការណ៍ស្តីអំពីបញ្ហាស្ថានភាពសិទ្ធិមនុស្សឆ្នាំ២០០៩របស់សមាគម
សិទ្ធិមនុស្ស ADHOC បានលើកឡើងថា មានករណីឃាដកម្មដោយសមត្ថកិច្ច
ចំនួន៣០ករណីត្រូវបានកើតឡើង ហើយនៅក្នុងនោះ មាន១៨ករណីបង្កឡើង
ដោយនគរបាល ៨ករណីជនប្រព្រឹត្តជាយោធា និង៤ករណីទៀតជនប្រព្រឹត្តមិន
ស្គាស់អត្តសញ្ញាណ៕

អត្ថបទ​ទាក់ទង

XS
SM
MD
LG