ភ្ជាប់​ទៅ​គេហទំព័រ​ទាក់ទង

ផ្ទាំងគំនូរអរូបិយសម្តែងកង្វល់អំពីបរិស្ថាន

  • វិញ សុជាតា

ដើម្បីស្តាប់ព័ត៌មាននេះ

ថ្នាំប្រេងចម្រុះពណ៌បៃតង ក្រហម លឿងត្រូវបានគូរប៉ាត ក្រវិចក្រវៀនពេញលើ
ផ្ទៃក្រណាត់មួយផ្ទាំងប្រវែងជិត២ម៉ែត្របួនជ្រុងដែលរំលេចជារូបភាពដ៏ស្មុគស្មាញ
ពិបាកយល់។ រូបនេះត្រូវបញ្ឈរសម្រាប់លក់ក្នុងតម្លៃ១២០០ដុល្លារក្នុងបន្ទប់គំនូរ
ឯកជនមួយនៅក្បែរផ្សារថ្មីក្នុងទីក្រុងភ្នំពេញ។

មនុស្សភាគច្រើនមើលមិនយល់អ្វីនៅក្នុងរូបភាពនេះ ក្រៅតែពីស្នាមគំនូរទឹកថ្នាំ
ក្រវេមក្រវាមនោះទេ។ ក៏ប៉ុន្តែសម្រាប់លោកឈឹម សុធី ដែលជាម្ចាស់ស្នាដៃនេះ
វិញ វាជារូបគំនូរដ៏ទំនើបមួយដែលមានបង្កប់ទៅដោយអត្ថន័យយ៉ាងជ្រាលជ្រៅ។

«រូបនេះ មើលមួយភ្លែតអញ្ចឹងអត់ដឹងថា ជារូបអ្វីទេ។ តែបើយើងសង្កេតពិនិត្យ
មួយៗទៅតាមលក្ខណៈប្លង់ និងត្រេរបស់រូបភាពហ្នឹង យើងឃើញថា មានសត្វ
ប្រើសបីក្បាល ឃើញក្បាលតិចៗ គ្រាន់តែឃើញលក្ខណៈត្រេហេតុៗ។ វាអត់
បង្ហាញច្បាស់ដែលយើងឃើញភ្លាមៗតែម្តងទេ។ លក្ខណៈរូបភាព អរូបីយ៍ដែល
ហៅថា Abstract Artហ្នឹង ទាមទារឱ្យយើងប្រើពេលវេលាមើលរូបហ្នឹងឱ្យបាន
យូរ ដើម្បីស្វែងយល់ថា តើរូបហ្នឹងវាលេចចេញជាអ្វី ព្រោះរូបនីមួយៗ វាបង្កប់
អាថ៌កំបាំង។ រូបប្រើសបីក្បាលនេះ យើងចង់និយាយថា គ្រប់ប្រភេទសត្វទាំង
អស់មិនថា ប្រើស ឬ ក្តាន់ទេ ព្រៃឈើក៏កំពុងរង់គ្រោះដោយសារការបំផ្លាញពី
សំណាក់ជនដែលគិតតែប្រយោជន៍ផ្ទាល់ខ្លួន ធ្វើឱ្យសម្បត្តិធម្មជាតិ សត្វ យើង
ទាំងគ្នានិងសត្វហ្នឹងខ្វះទីជម្រក មនុស្សយើងបាត់បរិស្ថានល្អ»។

លោក ឈឹម សុធី វ័យ៤១ឆ្នាំ គឺជាវិចិត្រករខ្មែរមួយរូប ដែលគេទទួលស្គាល់ជា
សាធារណៈចំពោះសមត្ថភាពផ្នែកសិល្បៈរបស់លោកក្នុងការគូរគំនូរបែបអរូបីយ៍
នេះ។

គំនូរបែបអរូបីយ៍ ដែលបានលេចរូបរាងនៅអឺរ៉ុបនិងបច្ចឹមប្រទេសក្នុងអំឡុងដើម
សតវត្សន៏ទី១៩នោះគឺជារូបគំនូរដែលភាគច្រើនគេប្រើពណ៌ចម្រុះគ្នាដើម្បីបង្កើត
ជារូបបង្កប់ ឬ រូបភាពដែលពិបាកយល់ ឬ មិនអាចយល់បានតែម្តង បើគ្មានការ
ពន្យល់ពីវិចិត្រករនោះ។

លោកឈឹម សុធីមានប្រសាសន៍ថា សិល្បៈគំនូរបែបអរូបីយ៍នេះពិតជាទាមទារ
នូវកម្រិតយល់ដឹងខ្ពស់អំពីសិល្បៈនៃគំនូរនេះមែន។ ប៉ុន្តែលោកបញ្ជាក់ថា គំនូរ
បែបនេះធ្វើឱ្យអ្នកមើលហាត់រៀនប្រើអារម្មណ៍ និងគំនិតដើម្បីអាចយល់អត្ថន័យ
នៃគំនូរបែបនេះបាន។

«លក្ខណៈសិល្បៈបែបអរូបីយ៍ហ្នឹង កាលណាចំណេះដឹងអត់ដល់ផ្ទាំងគំនូរហ្នឹង
មានការលំបាកមើលបន្តិច ។ ប៉ុន្តែឱ្យមនុស្សយើងរៀន រៀនសូត្រក្នុងការមើល
បន្តិចម្តងៗ គង់តែស្វែងយល់អំពីសិល្បៈហ្នឹងទេ។ទោះបីនៅស្រុកគេក៏អញ្ចឹងដែរ
ជួនកាលគេអត់ទាន់ចេះមើលរូបណា modern ទំនើបខ្លាំងអញ្ចឹង។ ប៉ុន្តែគេហាត់
មើល ហាត់រៀនព្យាយាមប្រើអារម្មណ៍ ប្រើគំនិតទៅតាមរូបភាពរបស់យើង»។

លោក ឈឹម សុធី ដែលមានស្រុកកំណើតក្នុងស្រុកល្វាឯម ខេត្តកណ្តាល បាន
សិក្សាផ្នែកគំនូរអស់រយៈពេល១០ឆ្នាំ ហើយលោកទទួលបានបរិញ្ញាប័ត្រផ្នែក
គំនូរពីសកលវិទ្យាល័យភូមិន្ទវិចិត្រសិល្បៈក្នុងទីក្រុងភ្នំពេញនៅឆ្នាំ១៩៩៥។

ក្រោយពីបញ្ចប់ការសិក្សា លោកឈឹម សុធី បានចូលបម្រើការងារជាគ្រូបង្ហាត់
ផ្នែកគំនូរនៅតាមអង្គការក្រៅរដ្ឋាភិបាលមួយចំនួនរហូតដល់ឆ្នាំ១៩៩៨ ជាពេល
ដែលលោកបានចូលបម្រើការងារក្នុងក្រសួងវប្បធម៌និងវិចិត្រសិល្បៈ។

បច្ចុប្បន្នជាអនុប្រធាននាយកដ្ឋានសិល្បៈសូនរូប និងសិប្បកម្មនៃក្រសួងវប្បធម៌
ផងដែរនោះ លោកឈឹម សុធីមានប្រសាសន៍ថា គំនូរបែបអរូបីយ៍នេះមានតម្លៃ
និងគុណតម្លៃខ្ពស់ដោយសារវាមិនបានបង្ហាញត្រង់ៗឱ្យអ្នកទស្សនាមើលឃើញ
និងដឹងអំពីគំនិតរបស់វិចិត្រករនៃគំនូរនោះភ្លាមៗទេ។

«កាលណារូបភាពដែលពិបាកមើលណាស់ គេកាន់តែចូលចិត្តណាស់ ព្រោះថា
អាហ្នឹងធ្វើឱ្យគេហាត់ប្រើគំនិតរៀនសូត្រ ដូចរូប Picasso អញ្ចឹង។ រូបគាត់តម្លៃ
រាប់លានដុល្លារដោយសារស្ទីលហ្នឹងមានតែគាត់ ហើយរូបគាត់មានន័យទាក់ទង
នឹងសង្គមសម័យសង្រ្គាមប្រឆាំងនឹងមនុស្សជាតិ។ វាខ្លាំងក្លាណាស់»។

ជាឪពុកនៃកូនប្រុសបីនាក់ និងមានភរិយាជាគ្រូបង្រៀននៅវិទ្យាល័យមួយក្នុងទី
ក្រុងភ្នំពេញ លោកឈឹម សុធីត្រូវបានសាធារណជនទទួលស្គាល់ជាលើកដំបូង
កាលពីឆ្នាំ២០០១ ចំពោះស្នាដៃគំនូរបុរាណអំពីរឿងរាមកេរ្តិ៍ និង ពុទ្ធប្រវត្តិដ៏ល្អ
វិចិត្ររបស់លោកដែលមានក្បូរក្បាច់យ៉ាងល្អិតគួរឱ្យចង់គយគន់។

ប៉ុន្តែនៅក្នុងរយៈពេលប៉ុន្មានឆ្នាំចុងក្រោយនេះ លោកសុធីក៏បានចាប់ផ្តើមងាក
មកគូរគំនូរបែបសម័យទំនើបវិញ ដោយលោកយល់ថា គំនូរបុរាណមិនអាចឱ្យ
សិល្បៈគំនូរខ្មែរអាចឈានជើងចូលទៅក្នុងឆាកអន្តរជាតិបាននោះទេ។

«ដើម្បីឱ្យទាន់ស្រុកគេ ត្រូវតែបកមកគំនូរបែបអរូបីយ៍អស់ហ្នឹងហើយដើម្បីធ្វើការ
ប្រកួតប្រជែងឱ្យទាន់គេ។ បើយើងយកគំនូរបែបបុរាណទៅប្រកួតប្រជែងជាមួយ
គេ គេប្រើសិល្បៈខ្ពស់ទៅហើយ។ បុរាណនេះគ្រាន់តែជាលក្ខណៈអភិរក្សរបស់
យើង។ បើយើងយកបុរាណទៅប្រឡងប្រណាំងលក្ខណៈអន្តរជាតិ គេអត់យល់
ទេ។គេអត់សូវយល់ពីបុរាណខ្មែរយើងទេ។អញ្ចឹងយើងលេងអ្វីដែលទំនើបដើម្បី
ដេញតាមស្រុកគេ»។

លោកឈឹម សុធី ទទួលបានរង្វាន់ជាច្រើននៅក្នុងការប្រកួតប្រជែងគំនូររួមមាន
រង្វាន់សិល្បៈអាស៊ានឆ្នាំ២០០០នៅប្រទេសសិង្ហបុរីនិងរង្វាន់លេខ១ចំនួនពីរដង
ជាប់គ្នាពីក្រសួងវប្បធម៌និងវិចិត្រសិល្បៈកម្ពុជាក្នុងឆ្នាំ២០០៣និង២០០៤ជាដើម។
លោកសុធីក៏បានដាក់បង្ហាញរូបគំនូររបស់លោកនៅតាមវិចិត្រសាលនានាក្នុងទី
ក្រុងភ្នំពេញនិងនៅតាមបណ្តាខេត្តខ្លះ ព្រមទាំងដាក់បង្ហាញនៅតាមប្រទេសមួយ
ចំនួនទៀតផងដែរ ដូចជាប្រទេសហ្វីលីពីន សិង្ហបុរី ថៃ បារាំង ហើយនិងសហ
រដ្ឋអាមេរិកជាដើម។

ចាប់ពីថ្ងៃទី២៥ខែកុម្ភៈរហូតដល់ថ្ងៃទី៨ខែមេសាឆ្នាំ២០១០នេះ លោកឈឹមសុធី
ក៏នឹងដាក់តាំងពិព័រណ៍រូបគំនូររបស់លោកដែលមានចំណងជើងថា "ជម្រៅនៃក្តី
សង្ឃឹម" នៅវិទ្យាស្ថានរៃយំក្នុងក្រុងភ្នំពេញ ចាប់ពីម៉ោង៤ដល់៧ល្ងាច។ សាធា-
រណជនអាចចូលទស្សនារូបគំនូរសម័យទំនើបរបស់លោកចំនួន២២ផ្ទាំង មាន
ទាំងបែបអរូបីយ៍ផងទាំងបែបរូបីយ៍ខ្លះផង៕

អត្ថបទ​ទាក់ទង

XS
SM
MD
LG