រដ្ឋាភិបាល៖ត្រូវធ្វើរបាយការណ៍ សិទ្ធិមនុស្សមិនលម្អៀង

តំណាងរាស្ត្រគណបក្សប្រជាជនកម្ពុជាបានទាមទារឱ្យប្រេសិតពិសេសអង្គការ
សហប្រជាជាតិទទួលបន្ទុកកិច្ចការសិទ្ធិមនុស្ស ធ្វើរបាយការណ៍ស្តីពីស្ថានភាព
សិទ្ធិមនុស្សនៅកម្ពុជាឱ្យមានតម្លាភាព និងភាពជាក់ស្តែង។

ប្រេសិតពិសេសអង្គការសហប្រជាជាតិ Surya Prasad Subedi និង តំណាង
រាស្រ្តគណបក្សប្រជាជនកម្ពុជានៅថ្ងៃច័ន្ទនេះបានជួបពិភាក្សាគ្នាអំពីរបៀបធ្វើឱ្យ
របាយការណ៍ស្តីពីស្ថានភាពសិទ្ធិមនុស្សនៅកម្ពុជាប្រកបដោយភាពសុក្រឹត្យនិង
ភាពជាក់ស្តែង។

ប្រទេសកម្ពុជាត្រូវបានទទួលរងនូវការរិះគន់អំពីការរំលោភសិទ្ធិទាក់ទងនឹងការ
បណ្តេញចេញដោយបង្ខំ ការរឹបអូស យកដីធ្លី ការគំរាមគំហែង និងបំភិតបំភ័យ
អ្នកការពារសិទ្ធិមនុស្ស ចាប់ខ្លួនអ្នកតវ៉ា ឬ សកម្មជនសហគមន៍ចំពោះការតវ៉ា
ប្រឆាំងនឹងការរំលោភសិទ្ធិផ្សេងៗ ការបំបិទសិទ្ធិសេរីភាពនៃការបញ្ចេញមតិនិង
ការប្រមូលផ្តុំការចោទប្រកាន់និងកាត់ទោសតំណាងរាស្ត្រគណបក្សប្រឆាំងនិង
ប្រព័ន្ធតុលាការមិនឯករាជ្យ។

លោក អាយ ខន អនុប្រធានគណៈកម្មការផែនការ និងកសិកម្មនៃរដ្ឋសភាបាន
ថ្លែងប្រាប់ VOAថា លោកប្រេសិតពិសេសអង្គការសហប្រជាជាតិរូបនេះ គួរតែ
ជួបពិភាក្សាជាមួយលោកនាយករដ្ឋមន្ត្រី ហ៊ុន សែន សមាជិកសភាព្រឹទ្ធសភា
តំណាងអង្គការមិនមែនរដ្ឋាភិបាលនិងតំណាងគណបក្សនយោបាយមុនពេលធ្វើ
របាយការណ៏ស្តីពីស្ថានភាពសិទ្ធិមនុស្សនៅកម្ពុជាប្រចាំឆ្នាំ ដើម្បីធ្វើការថ្លឹងថ្លែង
ឱ្យបានត្រឹមត្រូវអំពីស្ថាន ភាពសិទ្ធិមនុស្សនៅកម្ពុជា។

"ពេលដែលគាត់ធ្វើរបាយការណ៏ឱ្យគាត់មានការថ្លឹងថ្លែងឱ្យបានគ្រប់ជ្រុងជ្រោយ
ហើយសំខាន់បំផុតឱ្យស្របតាមសភាពជាក់ស្តែងរបស់ប្រទេសកម្ពុជាយើងអំពី
ស្ថានភាពសិទ្ធិមនុស្ស និងស្ថាន ភាពរីកចម្រើននៃលទ្ធិប្រជាធិបតេយ្យ ពីព្រោះ
យើងចងបានឱ្យល្អច្រើនជាងនេះតទៅទៀត ហើយយើងកំពុងប្រឹងប្រែងហើយ"។

លោកម៉ុម ជឹមហ៊ុយ ប្រធានគណៈកម្មការអប់រំនៃរដ្ឋសភា បានបញ្ជាក់ថា យើង
ចង់បានការគោរព សិទ្ធិមនុស្ស និងលទ្ធិប្រជាធិបតេយ្យ ហើយយើងបានលើក
ឡើងចំណុចវិជ្ជមានជាច្រើនលើបញ្ហាសិទ្ធិមនុស្សនៅកម្ពុជា ប៉ុន្តែយើងមិនទាន់
បំពេញភាពឥតខ្ចោះនៃបញ្ហាសិទ្ធិមនុស្សនេះទេ។យើងត្រូវការពេលវេលាដើម្បី
បន្តធ្វើឱ្យបញ្ហាសិទ្ធិមនុស្សកាន់តែប្រសើរឡើងនៅកម្ពុជា។

លោកម៉ុម ជឹមហ៊ុយបានបន្តថា ការដកអភ័យឯកសិទ្ធិសភារបស់លោកស្រី មួរ
សុខហួរ និងលោក សម រង្ស៊ី មិនមែនធ្វើឡើងដោយភាពរវើរវាយ និងខុសច្បាប់
នោះទេ។

"ស្ថាប័នសភាជានិច្ចកាលយកច្បាប់ជាធំ ដូចជាច្បាប់រដ្ឋធម្មនុញ្ញក្តី ច្បាប់ផ្ទៃក្នុង
រដ្ឋសភាក្តី និង ច្បាប់លក្ខន្តិកៈក្តី។ យើងធ្វើតាមច្បាប់នេះទាំងអស់។ យើងមិន
ដែលប្រាសចាកពីច្បាប់ទាំងអស់ ដោយ ការសម្អប់ និងការគំគួនទេ។ យើងនឹង
បន្តធ្វើការជាមួយគ្នាលើបញ្ហាសិទ្ធិមនុស្ស។ យើងត្រូវការគ្នា ទៅវិញទៅមកក្នុង
ការធ្វើឱ្យស្ថានភាពសិទ្ធិមនុស្សនៅកម្ពុជាកាន់តែប្រសើរឡើង"។

ក្នុងដំណើរទស្សនកិច្ចការងាររយៈពេល១០ថ្ងៃនៅកម្ពុជា លោក Surya Prasad
Subedi បានជួបពិភាក្សាអំពីបញ្ហាសិទ្ធិមនុស្សជាមួយលោកនាយករដ្ឋមន្ត្រី ហ៊ុន
សែន តំណាងអង្គការសិទ្ធិមនុស្សសំខាន់ៗ តំណាងអង្គទូតបរទេសប្រចាំនៅ
កម្ពុជានិងតំណាងរាស្ត្រគណបក្សប្រឆាំងដើម្បីរិះរកវិធីសាស្ត្រសហប្រតិបត្តិការ
រួមគ្នា ធ្វើយ៉ាងណាឱ្យស្ថានភាពសិទ្ធិមនុស្សនៅកម្ពុជាកាន់តែប្រសើរឡើង។

ពីទីក្រុងភ្នំពេញ ខ្ញុំ ជន សក្តា VOA សម្លេងស.រ.អា.៕