ភ្ជាប់​ទៅ​គេហទំព័រ​ទាក់ទង

តុលាការកាត់ទោសជនជាតិអង់គ្លេស ម្នាក់ឲ្យជាប់ពន្ធនាគារ១ឆ្នាំ ពីបទអាសលើកុមារី

  • ហេង រស្មី
  • VOA

តុលាការក្រុងភ្នំពេញ បានកាត់ទោសជនជាតិអង់គ្លេសម្នាក់ឲ្យជាប់ពន្ធនាគារ
រយៈពេល១ឆ្នាំពីបទថា បានប្រព្រឹត្តអំពើអាសលើកុមារីអាយុ ១៣ឆ្នាំ។

លោកហេង រស្មី សូមជូនព័ត៌មាននេះ ដូចតទៅ៖

តុលាការក្រុងភ្នំពេញ នៅថ្ងៃសុក្រនេះ បានសម្រេចផ្តន្ទាទោសជនជាតិអង់គ្លេស
ម្នាក់ឲ្យជាប់ពន្ធនាគាររយៈពេល១ឆ្នាំ ហើយពិន័យជាប្រាក់ប្រមាណជិត១០០០
ដុល្លារសហរដ្ឋអាមេរិកពីបទថា បានប្រព្រឹត្តអំពើ់អាសទៅលើកុមារីជនជាតិ
កម្ពុជាមួយរូបអាយុ១៣ឆ្នាំ។

លោកកែ សាខន ប្រធានចៅក្រមជំនុំជម្រះនៃតុលាការក្រុងភ្នំពេញ បានប្រកាស
ថា លោក Gareth Ashley Korbett អាយុ៥១ឆ្នាំ ជនជាតិអង់គ្លេសដែលត្រូវ
បានអាជ្ញាធរប៉ូលិសចាប់ខ្លួនកាលពីខែកក្កដាឆ្នាំ២០០៨នោះត្រូវតុលាការសម្រេច
ផ្តន្ទាទោសឲ្យជាប់ពន្ធនាគាររយៈពេល១ឆ្នាំ តាមមាត្រាទី៤៣ នៃច្បាប់ស្តីពីការ
បង្រ្កាបការជួញដូរមនុស្ស និងការធ្វើអាជីវកម្មផ្លូវភេទ។

លោកGareth Ashley Korbett អាយុ៥១ឆ្នាំ ត្រូវបានអាជ្ញាធរប៉ូលិសចាប់ខ្លួន
នៅក្នុងភោជនីយដ្ឋានរបស់លោកមួយកន្លែងនៅក្នុងខេត្តព្រះសីហនុ បន្ទាប់ពី
ម្តាយរបស់កុមារីជនរងគ្រោះដាក់ពាក្យបណ្តឹងប្តឹងលោក។

ជនរងគ្រោះឈ្មោះស្រី ពៅ អាយុ១៣ឆ្នាំ បានចោទប្រកាន់បុរសជនជាតិអង់
គ្លេសរូបនេះថា បានប៉ុនប៉ងប្រព្រឹត្តអំពើអាសទៅលើរូបនាងជាច្រើនដងរហូត
ដល់បានសម្រេចមួយលើក នៅក្នុងខណៈដែលនាងបម្រើការងារនៅក្នុងភោជ-
នីយដ្ឋានរបស់ជនជាតិអង់គ្លេសរូបនោះ។

ក្នុងបន្ទប់សាវនាការកាលពីថ្ងៃទី១៦ ខែធ្នូកន្លងទៅនេះ លោកGareth Ashley
Korbett បានថ្លែងប្រាប់តុលាការថា លោកពុំបានប្រព្រឹត្តដូចមានការចោទប្រ-
កាន់ទេ ដោយសារតែលោកបានយកកុមារីរូបនេះឲ្យបម្រើការងារជាអ្នកលាង
ចាននិងជូតតុតែប៉ុណ្ណោះ។

ក៏ប៉ុន្តែទោះជាយ៉ាងណាក៏ដោយ ក៏កញ្ញាប៉េង ម៉ាណែត មេធាវីការពារក្តីជនរង
គ្រោះបានបញ្ជាក់ថា ជនជាតិអង់គ្លេសរូបនេះពិតជាបានប្រព្រឹត្តអំពើអាសទៅ
លើកូនក្តីរបស់នាងពិតប្រាកដមែន ។

កញ្ញាប៉េង ម៉ាណែតបានមានប្រសាសន៍ទៀតថា តុលាការផ្តន្ទាទោសជនជាតិ
អង់គ្លេសរូបនេះឲ្យជាប់ពន្ធនាគាររយៈពេល១ឆ្នាំ ហាក់បីដូចជាតិចតូចពេក
ចំពោះទោសកំហុសរបស់គាត់ ដែលបានប្រព្រឹត្តកន្លងមក ។

"មួយឆ្នាំ គឺជាស្ថានសម្រាលដែលទាបបំផុតសម្រាប់ជនរងគ្រោះ ម៉្យាងទៀតគឺ
បញ្ហាសំណងគឺជនរងគ្រោះមិនបានទទួលទេ អញ្ចឹងជនរងគ្រោះមិនទទួល
បាននូវយុត្តិធម៌សម្រាប់គាត់ពេញលេញទេ វានៅមានភាពខ្វះខាតយុត្តិធម៌
ចំពោះគាត់"។

ចំណែកលោក ថេង ប៉េងអុី មេធាវីការពារក្តីជនជាប់ចោទវិញ បាននិយាយថា
តុលាការខ្វះភស្ថុតាងក្នុងការដាក់បន្ទុកទៅលើកូនក្តីរបស់លោក ហើយលោក
បានហៅការប្រកាសសាលក្រមរបស់តុលាការនេះថា អយុត្តិធម៌ចំពោះកូនក្តី
របស់លោក។

"ដោយសារនៅពេលសាវនាការហ្នឹង គឺ បញ្ជាក់ច្បាស់ហើយ អត់មានភស្ថុតាង
សាក្សីណាមកឆើ្លយដាក់បន្ទុកលើកូនក្តីខ្ញុំផងហ្នឹង ហើយកាត់ឲ្យគាត់ជាប់គុក១
ឆ្នាំវាមិនផ្តល់យុត្តិធម៌ដល់គាត់ផង ផ្អែកតែទៅលើសម្តីក្មេងស្រីម្នាក់ដែលនិយាយ
ម្តងអញ្ចេះម្តងអញ្ចុះមិនទាន់ដឹងអីច្បាស់លាស់ផង ហើយគ្មានភស្ថុតាងអីទៀត
ផ្សេងឲ្យគ្រប់គ្រាន់ដើម្បីដាក់ទោសទេ"។

លោកសំណង សីលា ប្រធានអង្គការសកម្មភាពដើម្បីកុមារ បាននិយាយថា ការ
ដាក់ទោសរបស់តុលាការនេះ វាហាក់បីដូចជាស្រាលពេក ហើយជនរងគ្រោះពុំ
ទទួលបានសំណងអ្វីទាំងអស់។ លោកបានបញ្ជាក់ថា តុលាការគួរតែដាក់ទោស
ឲ្យបានធ្ងន់ជាងនេះ។

"ដោយសារនៅក្នុងច្បាប់ស្តីពីការបង្រ្កាបអំពើជួញដូរមនុស្ស និង កេងប្រវ័ញ្ចផ្លូវ
ភេទហ្នឹងគឺថា ក្នុងការប្រព្រឹត្តអំពើអាស ទោសមានពី១ឆ្នាំ ទៅ៣ឆ្នាំ ប៉ុន្តែនៅក្នុង
ករណីនេះ គឺគាត់ទទួលបានតែ១ឆ្នាំទេ ហើយតុលាការក៏មិនបានសម្រេចផ្តល់
សំណងជាប្រាក់ឲ្យជនរងគ្រោះដែរ"។

លោក សំណង សីលាបានញ្ជាក់ទៀតថា ការប្រព្រឹត្តអំពើអាសទៅលើកុមារ
កម្ពុជាពីសំណាក់ជនបរទេសនៅក្នុងឆ្នាំនេះមានការកើនឡើងគឺបានកើនឡើង
ពី១៣ករណីកាលពីឆ្នាំ២០០៨មក២៦ករណី នៅឆ្នាំ២០០៩នេះ។

ខ្ញុំ ហេង រស្មី រាយការណ៍ពីទីក្រុងភ្នំពេញ៕

XS
SM
MD
LG