ភ្ជាប់​ទៅ​គេហទំព័រ​ទាក់ទង

site logo
ព័ត៌មាន​​ថ្មី

លោកចម ប្រសិទ្ធៈ មិនមានសម្លៀក បំពាក់បរទេសវ៉ៃផ្លាកនៅកម្ពុជាទេ


លោករដ្ឋមន្ត្រីក្រសួងពាណិជ្ជកម្មនៃប្រទេសកម្ពុជា បានប្រតិកម្មដ៏ធ្ងន់ៗច្រាន
ចោលការចោទប្រកាន់នានាដែលថា កម្ពុជាធ្លាប់បានអនុញ្ញាតឲ្យផលិតផល
សម្លៀកបំពាក់ពីប្រទេសជិតខាងចូលវាយផ្លាកនៅកម្ពុជា ហើយនាំចេញទៅ
លក់នៅក្នុងសហរដ្ឋអាមេរិកនោះថា ជាការចោទប្រកាន់មិនអាចទទួលយក
បាន។

លោកតាំង សារ៉ាដា នៃ VOA មានសេចក្តីរាយការណ៍មកថា ក្រុមអ្នកប្រឆាំង
និយាយថា លោករដ្ឋមន្រ្តីមិនបានទទួលខុសត្រូវ និង មិនបានចាត់វិធានការ
ដល់ការចោទប្រកាន់ទាំងឡាយដែលធ្លាប់កើតមាននោះឡើយ។

បន្ទាប់ពីមានការរិះគន់នានាពីខាងគណបក្សជំទាស់ និង ក្រុមសហជីពកម្មករ
ក្នុងប្រទេសកម្ពុជាថា កម្ពុជាធ្លាប់បានអនុញ្ញាតឲ្យផលិតផលសម្លៀកបំពាក់ពី
ប្រទេសជិតខាងចូលវាយផ្លាកក្នុងប្រទេសហើយនាំចេញទៅលក់ក្នុងសហរដ្ឋ
អាមេរិកនោះ លោកចម ប្រសិទ្ធិ រដ្ឋមន្ត្រីក្រសួងពាណិជ្ជកម្មបានបដិសេធការ
ចោទប្រកាន់នោះថា ជាការចោទប្រកាន់មិនមានលក្ខណៈសមរម្យ។

ប្រតិកម្មរបស់លោកបានធ្វើឡើងនៅក្នុងកិច្ចសម្ភាសន៍ពិសេសមួយជាមួយVOA
កាលពីសប្តាហ៍កន្លងទៅនេះក្នុងរដ្ឋធានីWashington ខណៈដែលលោកខិត
ខំស្វះស្វែងដើម្បីបញ្ចុះបញ្ចូលសភាតំណាងរាស្រ្តរបស់អាមេរិកឲ្យអនុម័តផ្តល់
ការលើកលែងពន្ធលើទំនិញគ្រប់ប្រភេទរបស់កម្ពុជា។

“ខ្ញុំឮសម្តីរបស់គណបក្សប្រឆាំងបាននិយាយ។ អស់លោកឃើញហើយក្នុងនាម
ខ្ញុំជារដ្ឋមន្រ្តីក្រសួងពាណិជ្ជកម្ម តំណាងរដ្ឋាភិបាលមកទីនេះ យើងមកខំរកទី
ផ្សារឲ្យផលិតផលរបស់យើង។ ហើយអ្នកប្រឆាំងធ្វើអី? ទៅខំបញ្ជាក់ប្រាប់អា-
មេរិកាំងថា អាវយើងមិនមែនរបស់កម្ពុជាទេ ជារបស់វៀតណាម។ តើវាសម
ហេតុទេ អាហ្នឹង? ខ្ញុំអរណាស់បានវិទ្យុសហរដ្ឋអាមេរិកបានផ្សាយម្តងហើយ។
ខ្ញុំឮផ្សាយតាមវិទ្យុអាមេរិកទៀតសម្តីរបស់អ្នកហ្នឹង។ធ្វើអញ្ចឹងមិនមែនចំណេញ
បក្សនយោបាយគណបក្សប្រឆាំងទេ គឺចំណេញរដ្ឋាភិបាលវិញទេ។ អ្នកឯង
និយាយហ្នឹងកំពុងបង្ខូចកម្មករទាំងអស់”។

ឧស្សាហកម្មកាត់ដេរផ្តល់ការងារធ្វើដល់កម្មករជិតបីសែននាក់ នៅក្នុងប្រទេស
កម្ពុជាដែលភាគច្រើននៃចំនួននេះគឺជាស្រ្តីមកពីជនបទនានា ហើយទីផ្សារដ៏ធំ
សម្រាប់ការនាំចេញសម្លៀកបំពាក់របស់កម្ពុជា គឺ សហរដ្ឋអាមេរិក។ ក្នុងពេល
កន្លងមកតែងតែមានការចោទប្រកាន់ថា មានការយកផលិតផលពាក់កណ្តាល
សម្រេច និង ផលិតផលសម្រេចរួចពីប្រទេសជិតខាងមកវាយផ្លាកថា ផលិត
នៅប្រទេសកម្ពុជាហើយនាំចេញទៅលក់នៅទីផ្សារបរទេស។

លោកស្រីSandra Polaski ដែលជាអនុរដ្ឋមន្រ្តីរងនៃក្រសួងការងាររបស់សហ
រដ្ឋអាមេរិកមានប្រសាសន៍ថា លោកស្រីធ្លាប់បានឮអំពីការចោទប្រកាន់ថា មាន
ការនាំចូលផលិតផលខោអាវដែលផលិតនៅប្រទេសផ្សេង រួចនាំចូលវាយផ្លាក
ក្នុងប្រទេសខ្មែរដែរ ប៉ុន្តែលោកស្រីសង្កេតឃើញកម្ពុជាមានប្រព័ន្ធត្រួតពិនិត្យ
យ៉ាងហ្មត់ចត់ដែលធានាថា ផលិតផលទាំងនោះបានផលិតនៅប្រទេសខ្មែរពិត
ប្រាកដ។

“ខ្ញុំបានឮអំពីការចោទប្រកាន់នោះម្តងម្កាលដែរ តែកម្ពុជាពិតជាមានប្រព័ន្ធគ្រប់
គ្រងយ៉ាងតឹងតែងដើម្បីពិនិត្យឲ្យបានច្បាស់ថា ផលិតផលសម្លៀកបំពាក់ទាំង
នោះពិតជាបានធ្វើនៅប្រទេសកម្ពុជា ហើយនាំចេញពីប្រទេសកម្ពុជា។ ដូច្នេះ
ខ្ញុំគិតថា វាមិនមែនជាបញ្ហាដ៏ធំដុំនោះឡើយ”។

ដូចគ្នានេះដែរ លោកចម ប្រសិទ្ធមានប្រសាសន៍បន្ថែមទៀតថា ក្រសួងពាណិជ្ជ
កម្មមានប្រព័ន្ធត្រួតពិនិត្យតាមរោងចក្រយ៉ាងមានប្រសិទ្ធិភាព ដោយមិនអាច
បន្លែបន្លំបាន ហើយលោកបានស្នើឲ្យក្រុមអ្នកតែងតែធ្លាប់រិះគន់ទាំងនោះដែល
លោកហាក់ដូចជាសំដៅលើគណបក្សប្រឆាំង ឲ្យងាកមកគិតផលប្រយោជន៍
ជាតិជាធំវិញ។

“យើងមានប្រព័ន្ធត្រួតពិនិត្យរហូតគ្រប់គ្រងរោងចក្រអស់ អត់មាននណាមក
លេងបួនសន្លឹកជាមួយយើងបានទេ ។ ហើយអ្នកដែលនិយាយរឿងបញ្ហាថា
សម្លៀកបំពាក់វៀតណាមនេះ គាត់កំពុងបង្ករឿងនៅព្រំដែនវៀតណាមហើយ
ឥឡូវគាត់មកនិយាយថា សម្លៀកបំពាក់ខ្មែរសុទ្ធតែសម្លៀកបំពាក់វៀតណាម
ទៀត បំផ្លាញជាតិចំហើយ”។

តំណាងរាស្រ្តរបស់គណបក្សជំទាស់ម្នាក់និយាយថា ប្រតិកម្មរបស់លោករដ្ឋ
មន្រ្តីក្រសួងពាណិជ្ជកម្មនៃប្រទេសកម្ពុជា គួរតែបង្ហាញការទទួលខុសត្រូវឲ្យ
បានច្រើនជាងនេះ។

លោកស៊ុន ឆៃ សមាជិកសភាពីខាងគណបក្សសម រង្ស៊ីបានបញ្ជាក់ថា ជាជាង
វាយបក រដ្ឋាភិបាលគួរតែធ្វើការសែ្វងយល់ឬស៊ើបអង្កេតឲ្យបានច្បាស់លាស់។

“ការចោទប្រកាន់ណាមួយធ្ងន់ៗបែបហ្នឹង ខ្ញុំថា ជាការខ្វះការទទួលខុសត្រូវ
ហើយយើងដឹងហើយថា ការដែលគណបក្សកាន់អំណាចតែងយកក្រុមនយោ
បាយមិននៅក្នុងជួររដ្ឋាភិបាលជាខ្មាំងសត្រូវស្លាប់រស់ហ្នឹងគឺជានយោបាយនៃ
របបផ្តាច់ការទេ”។

មេដឹកនាំសហជីពដ៏សកម្មម្នាក់ក្នុងប្រទេសកម្ពុជានិយាយថា ក្រុមអធិការកិច្ច
នៅតាមក្រសួងរបស់រដ្ឋាភិបាលមួយចំនួនបង្កើតឡើងសម្រាប់រកប្រាក់ជួយដល់
មន្រ្តីមានអំណាចជាន់ខ្ពស់របស់ក្រសួងនោះតែប៉ុណ្ណោះ។

លោកជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជាបានដាក់
ការសង្ស័យលើសមត្ថភាពរបស់ក្រុមការងាររដ្ឋាភិបាល ក្នុងការបំពេញតួនាទី
របស់គេ។

“យើងគាំទ្រ ហើយយើងមើលឃើញហើយថា មានក្រុមអធិការកិច្ចធ្វើការចុះ
អង្កេតចុះពិនិត្យមែន។ វាមានមែន បទដ្ឋានទាំងអស់ហ្នឹង ក៏ប៉ុន្តែយើងដឹង
ហើយថា កម្ពុជាយើងជាប្រទេសមួយពុករលួយ។ ហើយដូច្នេះ បើសិនជាពួក
អធិការកិច្ចរកឃើញ ក៏អធិការកិច្ចនោះមិនហ៊ានមាត់មិនហ៊ានកដែរ”។

ផលិតផលសម្លៀកបំពាក់ដែលបញ្ជាទិញពីសហរដ្ឋអាមេរិកមានក្រុមហ៊ុនធំៗ
ជាច្រើនដូចជា Nike Air, Gap, Levis’ Strause, Walt Disney និង ក្រុម
ហ៊ុនផ្សេងៗមួយចំនួនទៀត។ ហើយក្រុមអ្នកបញ្ជាទិញទាំងនោះតែងតែយក
ចិត្តទុកដាក់ខ្លាំងឲ្យមានការគោរពស្តង់ដារពលកម្មអន្តរជាតិពីតាមរោងចក្រនៅ
កម្ពុជា។

ប្រធានសមាគមរោងចក្រកាត់ដេរនៅកម្ពុជាលោក វ៉ាន់ ស៊ូអៀង មានប្រសា-
សន៍ថា ប្រសិនបើកម្ពុជាអនុញ្ញាតឲ្យផលិតផលខោអាវពីប្រទេសផ្សេងមកវៃ
ផ្លាកនៅកម្ពុជានោះមែន វាមិនមានផលប្រយោជន៍អ្វីដល់កម្ពុជានោះឡើយ
ម្យ៉ាងទៀតវាធ្វើឲ្យខូចកេរ្តិ៍ឈ្មោះដល់វិស័យផលិតកម្មរបស់កម្ពុជា។

“ចង់និយាយថា យើងបង់លុយយកឥវ៉ាន់ចូលមកធ្វើរាល់ថ្ងៃដាក់ Made In
Cambodiaហ្នឹង វាអត់ប្រយោជន៍ ពីព្រោះថ្លៃពេក។ធ្វើនៅស្រុកខ្មែរថោកជាង។
អាបង់ប្រាក់ពុករលួយហ្នឹងថ្លៃណាស់ បានថា អញ្ចឹងវាទៅអត់រួចទេ”។

ទោះបីជាយ៉ាងណាក៏ដោយក្រុមអ្នកតាក់តែងច្បាប់របស់សហរដ្ឋអាមេរិកនៅ
តែបន្តឃ្លាំមើលស្ថានការណ៍តាមរោងចក្ររបស់កម្ពុជាយ៉ាងយកចិត្តទុកដាក់
ទៅលើការកេងបន្លំកម្លាំងកម្មករ ការបន្លំគុណភាពផលិតផល និងការបង្កើត
ឲ្យមានសាខារោងចក្រកាត់ដេរនៅតាមផ្ទះ ដែលជាការគេចវេសពីការទទួល
ខុសត្រូវខាងផ្នែកច្បាប់និងលក្ខខណ្ឌការងារផ្សេង។

ពីរដ្ឋធានីវ៉ាស៊ីនតោន ខ្ញុំ តាំង សារ៉ាដា VOA សម្លេងស.រ.អា.៕

XS
SM
MD
LG