អង្គការបណ្តាប្រជាជាតិដែលគ្មានអ្នកតំណាងក្នុងអង្គការសហប្រជាជាតិនៅតែ
បន្តការងាររបស់ខ្លួនជួយដល់ការទាមទារឱ្យមានការជ្រើសរើសអ្នកតំណាងរបស់
ពលរដ្ឋខែ្មរកម្ពុជាក្រោមនៅវៀតណាមតាមលក្ខណៈប្រជាធិបតេយ្យនិងការគោរព
សិទ្ធិមនុស្ស។
លោក តាំងសារ៉ាដា មានព័ត៌មានលម្អិតអំពីរឿងនេះពីរដ្ឋធានី Washington។
ដើម្បីស្តាប់ព័ត៌មាននេះ
មេដឹកនាំសកម្មជនដើម្បីសិទ្ធិសេរីភាពខ្មែរកម្ពុជាក្រោមមានមូលដ្ឋានក្នុងសហរដ្ឋ
អាមេរិកបានដាក់ក្តីសង្ឃឹមថា អង្គការបណ្តាប្រជាជាតិដែលគ្មានអ្នកតំណាងក្នុង
អង្គការសហប្រជាជាតិ ឬ ហៅកាត់ថា UNPOនឹងបន្តជួយដល់ការទាមទារសិទ្ធិ
សេរីភាពនិងការទាមទារឱ្យមានការជ្រើសរើសអ្នកតំណាងរបស់ពលរដ្ឋខែ្មរកម្ពុជា
ក្រោមនៅវៀតណាមតាមលក្ខណៈប្រជាធិបតេយ្យ។
សហព័ន្ធខ្មែរកម្ពុជាក្រោមពិភពលោកប្រចាំក្នុងរដ្ឋ New Jersey នៃសហរដ្ឋអា-
មេរិកកំពុងតស៊ូដើម្បីទាមទារឱ្យមានសិទ្ធិសេរីភាពពេញបរិបូរណ៌ជូនពលរដ្ឋខ្មែរ
ក្រោមក្នុងប្រទេសវៀតណាមដែលត្រូវបានរាយការណ៍មកថា កំពុងទទួលរងការ
ធ្វើទុក្ខបុកម្នេញ និងការរំលោភសិទ្ធិមនុស្សយ៉ាងធ្ងន់ធ្ងរ។
លោកថាច់ ងុកថាច់ ប្រធានសហព័ន្ធខ្មែរកម្ពុជាក្រោមបានថ្លែងតាមទូរស័ព្ទកាល
ពីថ្ងៃច័ន្ទនៅក្រោយដំណើរប្រជុំរបស់លោកជាមួយសមាជិកគណៈកម្មាការប្រតិ-
បតិ្តនៃអង្គការ UNPO កាលពីពាក់កណ្តាលខែតុលានៅសាធារណរដ្ឋស្វយ័ត
Cremia ក្នុងប្រទេស Ukraine ។
“ទីមួយដែលយើងធ្វើនៅពេលបច្ចុប្បន្នគឺរឿងការគោរពសិទ្ធិមនុស្សដោយយោង
ទៅតាមច្បាប់សកលនៃអង្គការសហប្រជាជាតិ យោងទៅតាមច្បាប់នៃសិទ្ធិជន
ជាតិដើម អាហ្នឹងចំណុចទីមួយ។ ចំណុចទី២ គឺបែបលក្ខណៈការគ្រប់គ្រងខ្លួន
ដោយខ្លួនឯងដោយយើងចង់ឃើញរដ្ឋាភិបាលយួនហ្នឹង ត្រូវតែឲ្យមានខ្មែរហ្នឹង
ទទួលខុសត្រូវចំពោះបងប្អូនខ្មែរហើយដែលក្នុងពេលបច្ចុប្បន្ននេះខ្មែរដែលជា
មួយរដ្ឋាភិបាលយួនតំណាងឲ្យខ្មែរនោះគឺកើតឡើងដោយការជ្រើសរើស ដោយ
ការតែងតាំងពីរដ្ឋាភិបាលមិនមែនពីបងប្អូនខ្មែរក្រោម។ អាហ្នឹងឃើញថាជាការ
បន្លំមួយរបស់រដ្ឋាភិបាលយួនថា បែបលក្ខណៈគ្រប់គ្រងខ្លួនដោយខ្លួនឯងតែមិន
មែនរបៀបប្រជាធិបតេយ្យ”។
កិច្ចប្រជុំរបស់អង្គការUNPOនោះបានផ្តោតទៅលើសកម្មភាព និង សមិទ្ធិផល
ដែលជាកិច្ចខិតខំប្រែងរបស់អង្គការ UNPO ក្នុងឆ្នាំ២០០៩ដើម្បីជួយជ្រោមជ្រែង
ដល់សមាជិករបស់ខ្លួន ដូចជាការជួយរៀបចំការធ្វើបាតុកម្មរបស់សហព័ន្ធខ្មែរ
កម្ពុជាក្រោមនៅទីក្រុងហ្សឺណែវការចូលរួមការរំឭកខួបលើកទី៦០នៃការបាត់បង់
ទឹកដីខ្មែរកម្ពុជាក្រោម ការប្រៀបធៀបអំពីភាពខ្សោយនិងភាពខ្លាំងរបស់អង្គការ
UNPO ពីមួយឆ្នាំទៅមួយឆ្នាំ។
លោកថាច់ងុកថាច់មានប្រសាសន៍ថា កិច្ចប្រជុំនោះក៏បានកំណត់ផែនការសកម្ម
ភាពរបស់អង្គការUNPOសម្រាប់ឆ្នាំ២០១០បន្តទៀតដើម្បីឲ្យអង្គការនេះអាចជួយ
ដល់សកម្មភាពតស៊ូនានារបស់សមាជិក។
“បានពិនិត្យឡើងវិញនូវសមាជិកដែលអសកម្មដែលយើងទាក់ទងមិនបានហ្នឹង
តើត្រូវធ្វើយ៉ាងណា? ត្រូវទុកបន្តទៀតឬ ក៏ធ្វើយ៉ាងណានោះ? ហើយពិនិត្យមើល
អ្នកដែលសុំចូលជាសមាជិកថ្មី ។ ទីបីគឺពិនិត្យមើលថវិការបស់អង្គការ UNPO
ហើយសកម្មភាពទាំងអស់ហ្នឹង។ យើងត្រូវការថវិកាប៉ុន្មានហើយថវិកានោះបាន
ពីណាមកខ្លះ ហើយយើងរករបៀបណានោះ”។
សហព័ន្ធខ្មែរកម្ពុជាក្រោមជាសមាជិករបស់អង្គការ UNPOចាប់តាំងពីឆ្នាំ២០០០។
UNPO បានបង្កើតឡើងក្នុងឆ្នាំ១៩៩១ ដែលមានសមាជិកចំនួន៦៥ប្រទេសចូល
រួម ក្នុងនោះសហព័ន្ធខ្មែរកម្ពុជាក្រោមជាសមាជិកនៃគណៈកម្មការ ប្រតិបត្តិមួយ
ក្នុងចំណោមសមាជិកគណៈកម្មការប្រតិបត្តិទាំង១២ ដែលត្រូវបានជ្រើសរើស
ចំនួនបីអាណត្តិមកនោះ។ទិសដៅរបស់អង្គការនេះមានបីចំណុចធំៗគឺដើម្បីសែ្វង
រកឯករាជ្យភាព បង្កើតដែនដីស្វយ័ត និង ដើម្បីទាមទារឲ្យរដ្ឋាភិបាលគោរពសិទ្ធិ
សេរីភាពរបស់ពលរដ្ឋ។ ប្រទេសមួយចំនួនដែលជាសមាជិករបស់ UNPO បាន
ទទួលឯករាជ្យភាពកន្លងមក រួមមានប្រទេស Estonia, Georgia, Ukraine,
East Timor និងប្រទេស Lithuanie ដែលជាសមាជិក។
លោកថាច់ងុកថាច់មានប្រសាសន៍ថា វាជាកាតព្វកិច្ចមួយដែលរដ្ឋាភិបាលវៀត
ណាមត្រូវគោរពដល់សិទ្ធិសេរីភាពរបស់ជនជាតិដើម ដូចមានសេរីភាពខាង
សាសនា ការអប់រំ សារព័ត៌មាន ដូចមានចែងក្នុងអនុសញ្ញាស្តីពីសិទ្ធិពលរដ្ឋ និង
សិទិ្ធមនុស្សដែលរដ្ឋាភិបាលវៀតណាមបានចុះហត្ថលេខាជាមួយអង្គការសហ
ប្រជាជាតិ កាលពីខែធ្នូ ឆ្នាំ១៩៨២ ។
លោកបានបន្ថែមថា ផ្ទុយទៅវិញ អាជ្ញាធរវៀតណាមបានហាមឃាត់យ៉ាងខ្លាំង
មិនឲ្យពលរដ្ឋខ្មែរកម្ពុជាក្រោមមើលទូរទស្សន៍ ឬស្តាប់វិទ្យុប៉ុស្ត៍ខ្មែរទៀតផង។
លោកថាក់ ដឹក ជាមន្ត្រីនគរបាលរបស់វៀតណាមក្នុងទីក្រុងព្រៃនគរ ដែលឥឡូវ
ប្រែជាទីក្រុងហូជីមិញមានប្រសាសន៍ប្រាប់VOAតាមទូរស័ព្ទថា គេគួរចុះមកដល់
ប្រទេសវៀតណាមមើលស្ថានការណ៍ទីនោះដោយផ្ទាល់ហើយថា ការនិយាយ
ពីខាងក្រៅដូច្នោះវាជាការណ៍មិនពិត។
“អាហ្នឹងមិនពិតទេ។បើចង់ដឹងពិត អញ្ជើញមកមើលដល់ប្រទេសមក។និយាយ
អញ្ចឹងវាមិនពិតទេ”។
អង្គការសិទ្ធិមនុស្សអន្តរជាតិមួយចំនួននិយាយថា ក្រុមប្រជាជនខ្មែរក្រោមដែល
ប្រកាន់សាសនាថេរវាទ និង ក្រុមអ្នកកាន់សាសនាភាគតិច ដូចជាម៉ុងតាញ៉ាត
នៅតំបន់ខ្ពង់រាបកណ្តាល នៅតែកំពុងប្រឈមនឹងការធ្វើទុក្ខបុកម្នេញការវាយធ្វើ
បាប និងការសម្លាប់ជាដើម។ តែទោះបីជាយ៉ាងណាក៏ដោយ អ្នកនាំពាក្យស្ថាន
ទូតវៀតណាមប្រចាំនៅកម្ពុជា លោកទ្រិញ បាកឹមធ្លាប់មានប្រសាសន៍ប្រាប់VOA
សម្លេងសហរដ្ឋអាមេរិកកាលពីពេលកន្លងមកថា ការចោទប្រកាន់ទាំងនោះជា
ព័ត៌មានមិនពិត។
ខ្ញុំ តាំងសារ៉ាដា VOA Washigton៕
