ភ្ជាប់​ទៅ​គេហទំព័រ​ទាក់ទង

មន្ត្រីថៃ៖ថៃមិនបានសុំឱ្យអាស៊ានដោះ ស្រាយជម្លោះព្រំដែនកម្ពុជានិងថៃទេ

  • វិញ សុជាតា
  • VOA

ដើម្បីស្តាប់ព័ត៌មាននេះ

មន្ត្រីការទូតថៃបានបដិសេធថា ភាគីថៃមិនបានស្នើឱ្យអាស៊ានចូលពាក់ព័ន្ធនៅ
ក្នុងជម្លោះព្រំដែនរវាងកម្ពុជានិងថៃនោះទេ។ ការបដិសេធនេះបានធ្វើឡើងមួយ
ថ្ងៃក្រោយពេលដែលកម្ពុជាថ្លែងស្វាគមន៍ការបង្កើតយន្តការអាស៊ានដើម្បីដោះ
ស្រាយជម្លោះព្រំដែននៃប្រទេសទាំងពីរ។

លោក ពេជ្រ សំណាង រាយកាណ៍ពិស្តារអំពីរឿងនេះពីទីក្រុងភ្នំពេញ៖

លោក ថានី ថុងប៉ាក់ឌី (Thani Thongpakdi) អ្នកនាំពាក្យរងរបស់ក្រសួងការ
បរទេសថៃបានថ្លែងតាមរយៈកាសែតThe Nationរបស់ថៃ នៅថ្ងៃអង្គារនេះថា
រដ្ឋមន្ត្រីការបរទេសថៃ លោក Kasit Piromya ពុំដែលស្នើឱ្យមានយន្តការអា-
ស៊ានណាមួយដើម្បីដោះស្រាយជម្លោះព្រំដែនរវាងកម្ពុជានិងថៃនោះទេ។

ការថ្លែងបដិសេធរបស់ក្រសួងការបរទេសថៃនេះបានធ្វើឡើងក្រោយពេល ដែល
រដ្ឋមន្ត្រីការបរទេសកម្ពុជា លោក ហោ ណាំហុង បានសរសេរលិខិតមួយច្បាប់
កាលពីថ្ងៃច័ន្ទផ្ញើរជូនសមភាគីថៃរបស់លោក គឺ លោក Kasit Piromya ដោយ
ថ្លែងស្វាគមន៍គម្រោងបង្កើតអង្គការអព្យាក្រិតអាស៊ានមួយ ដើម្បីដោះស្រាយ
ជម្លោះរវាងកម្ពុជានិងថៃ ហើយព្រមទាំងស្នើដាក់បញ្ហាទំនាស់នៅតំបន់ប្រាសាទ
ព្រះវិហារចូលទៅក្នុងរបៀបវារៈនៃកិច្ចប្រជុំកំពូលអាស៊ានដែលនឹងប្រព្រឹត្តទៅ
នៅហួរហ៊ីនប្រទេសថៃ នាចុងខែតុលាខាងមុននេះផងដែរ។

លោកកុយ កួង អ្នកនាំពាក្យក្រសួងការបរទេសកម្ពុជាពុំបានផ្តល់អត្ថាធិប្បាយ
ណាមួយទេជុំវិញការបដិសេធរបស់ភាគីថៃ ដែលចង់ឱ្យមានការចូលពាក់ព័ន្ធ
របស់អាស៊ាននោះ ដោយលោកលើកឡើង ថា កម្ពុជារង់ចាំមើលការឆ្លើយតប
ជាផ្លូវការពីភាគីថៃសិន។

“យើងបានផ្ញើរលិខិតផ្លូវការទៅ ប៉ុន្តែឥឡូវនេះយើងគ្រាន់តែឮតាមសារព័ត៌មាន
អញ្ចឹងយើងរង់ចាំ ការឆ្លើយតបជាផ្លូវពីភាគីថៃវិញ ណា៎”។

កាលពីសប្តាហ៍មុននេះ លោក Kasit Piromya បានប្រកាសឱ្យដឹងអំពីសំណើ
បង្កើតអង្គការអព្យាក្រិតអាស៊ានមួយ ដោយលោកលើកឡើងនៅក្នុងកាសែត
Bangkok Post របស់ថៃថា យន្តការអាស៊ាននេះអាច ‘ជាផ្លូវសំរាប់ប្រទេសថៃ
និង កម្ពុជាដោះស្រាយជម្លោះព្រំដែនរវាងប្រទេសទាំងពីរ’​បាន។

មន្រ្តីស្ថានទូតថៃនៅទីក្រុងភ្នំពេញពុំអាចទាក់ទងបានទេ នៅថ្ងៃអង្គារនេះដើម្បី
ស្នើសុំការបំភ្លឺជុំវិញការបដិសេធរបស់ភាគីថៃ ដែលថា ខ្លួនមិនដែលចង់ឱ្យប្រ-
ទេសជាសមាជិកអាស៊ានជួយដោះស្រាយបញ្ហាជម្លោះព្រំដែនរវាងកម្ពុជា និង
ថៃនេះទេ។

តែទោះជាយ៉ាងនេះក្តី អ្នកនាំពាក្យរងរបស់ក្រសួងការបរទេសថៃ លោក ថានី
ថុងប៉ាក់ឌី (Thani Thongpakdi) បាននិយាយថា ការថ្លែងរបស់លោក Kasit
Piromya រដ្ឋមន្ត្រីការបរទេសថៃប្រហែលជាត្រូវបានសារព័ត៌មានដកស្រង់សម្តី
ដោយខុសបរិបទ នេះបើផ្អែកតាមកាសែត The Nation របស់ថៃ ដែលបាន
ចេញផ្សាយនៅថ្ងៃអង្គារនេះ។

កាសែត The Nation ក៏បានរាយការណ៍ផងដែរថា រដ្ឋាភិបាលថៃបានអះអាង
បញ្ជាក់ឡើងវិញនូវគោលជំហររបស់ខ្លួនដែលថា ជម្លោះព្រំដែនរវាងកម្ពុជា-ថៃ
ត្រូវតែដោះស្រាយទ្វេភាគីតាមរយៈគណៈកម្មការព្រំដែនរួមនៃប្រទេសទាំងពីរ។

ប្រទេសទាំងពីរកម្ពុជានិងថៃបានប្រកាន់យកដំណោះស្រាយចរចាទ្វេភាគី ប៉ុន្តែ
ការចរចាទ្វេភាគីនេះនៅតែមិនអាចរកដំណោះស្រាយជម្លោះព្រំដែន ដែលអូស
បន្លាយពេលអស់ជាង១ឆ្នាំមកហើយនេះនៅឡើយទេ។

ចាប់ពីខែកក្កដាឆ្នាំ២០០៨ នៅពេលដែលប្រាសាទព្រះវិហារត្រូវបានដាក់បញ្ចូល
ទៅក្នុងបញ្ជីបេតិក ភ័ណ្ឌពិភពលោករបស់អង្គការយូនណេស្កូមក កងទ័ពកម្ពុជា
និងថៃបានប៉ះទង្គិចគ្នាដោយអាវុធជាច្រើនលើកនៅតាមបណ្តោយព្រំដែន ដែល
បណ្តាលឱ្យទាហាននៃភាគីទាំងពីរយ៉ាងតិចចំនួន៧នាក់បានស្លាប់និងផ្សារមួយ
កន្លែងនៅជើងភ្នំប្រាសាទព្រះវិហារឆេះខ្ទេចខ្ទីអស់។

ពីទីក្រុងភ្នំពេញ ខ្ញុំ ពេជ្រ សំណាង VOA សម្លេងសហរដ្ឋអាមេរិក៕

XS
SM
MD
LG