នៅសាលាឥស្លាម សិស្សស្រី សិស្សប្រុសរៀនផ្សេងគ្នា

សូមចុចទីនេះ ដើម្បីអានព័ត៌មាននេះ

ខុសប្លែកពីសាលារៀនចំណេះទូទៅនានាក្នុងប្រទេសកម្ពុជា អតីតវិទ្យាល័យអ៊ុម
អាល់គូរ៉ាបានបំបែកសិស្សស្រី និង សិស្សប្រុសម៉ូស្លីមឱ្យរៀននៅកន្លែងដាច់ពី
គ្នា។ មន្ត្រីនៃសាលាឥស្លាមនោះអះអាងថា ការធ្វើបែបនេះនឹងជួយឱ្យសិស្ស
ផ្តោតទៅលើការសិក្សាបានល្អនិងជៀសផុតពីទំនាក់ទំនងស្នេហាប្រុសស្រីនៅ
ក្នុងសាលារៀន។

មុនម៉ោងចូលរៀន ថ្នាក់រៀនមួយនៅក្នុងវិហារឥស្លាមអាល់រ៉ាហ្មានី មានសភាព
អ៊ូអរដូចថ្នាក់រៀនផ្សេងៗទៀតដែរដោយសារតែសិស្សានុសិស្សនាំគ្នាជជែកគ្នា
លេងពីនេះពីនោះ។ ប៉ុន្តែអ្វីដែលចម្លែកនោះគឺថា នៅក្នុងថ្នាក់រៀនដែលស្ថិតនៅ
ក្នុងឃុំឫស្សីជ្រោយ ស្រុកមុខកំពូល ខេត្តកណ្តាល មានសុទ្ធតែសិស្សស្រីៗ។

វាពុំមែនជាការចៃដន្យទេដែលថ្នាក់រៀននេះមានតែសិស្សស្រីនោះ ដោយសារ
នេះគឺជាវិន័យរបស់អតីតវិទ្យាល័យអ៊ុម អាល់គូរ៉ា ដែលបច្ចុប្បន្ននេះបានក្លាយ
ជាមជ្ឈមណ្ឌលឥស្លាមកម្ពុជា។មជ្ឈមណ្ឌលឥស្លាមកម្ពុជា បែងចែកសិស្សប្រុស
និងសិស្សស្រីឱ្យរៀននៅកន្លែងផ្សេងពីគ្នា។

លោកពេជ្រ សូលីន នាយកមជ្ឈមណ្ឌលឥស្លាមកម្ពុជាទទួលបន្ទុកចំណេះទូទៅ
បានប្រាប់ឱ្យដឹងថា ការបំបែកសិស្សប្រុសនិងសិស្សស្រីឱ្យដាច់ពីគ្នានេះគឺដើម្បី
កុំឱ្យពួកគេមានទំនាក់ទំនងស្នេហាជាមួយគ្នា ដែលជាទង្វើខុសនឹងវិន័យសា-
សនាឥស្លាម។

“វាធម្មតាទេរឿងសិស្សប្រុសសិស្សស្រី វាតែងតែមានទំនាក់ទំនងភេទជាមួយគ្នា
ស្នេហា ម្លោះហើយ ការគ្រប់គ្រងរបស់យើងវាពិបាក។ អញ្ចឹងយើងញែកគ្នាដាច់
អញ្ចឹង វាបង្កលក្ខណៈងាយស្រួលដល់ការគ្រប់គ្រងរបស់យើង ។ វាមិនពិបាក
ឱ្យស្រីៗនៅតាមស្រីៗ ប្រុសៗនៅតាមប្រុសៗ” ។

លោកពេជ្រ សូលីនដែលមានឈ្មោះតាមសាសនាឥស្លាមថា អាពូតាឡិបម៊ូសា
នោះ ក៏បានពន្យល់ដែរថា ការបំបែកសិស្សប្រុសនិងសិស្សស្រីឱ្យដាច់ពីគ្នានេះ
ក៏នឹងធ្វើឱ្យសិស្សផ្ទង់អារម្មណ៍ទៅនឹងការសិក្សាបានល្អ ហើយក៏ជាការផ្តល់
ទំនុកចិត្តដល់ឪពុកម្តាយសិស្សដែលយកកូនមកស្នាក់នៅនិងសិក្សានៅឯមជ្ឈ
មណ្ឌលឥស្លាមកម្ពុជានេះផងដែរ។

គួរបញ្ជាក់ថា មជ្ឈមណ្ឌលឥស្លាមកម្ពុជា ឬអតីតវិទ្យាល័យអ៊ុមអាល់គូរ៉ា ដែល
បង្កើតឡើងដោយប្រទេសអារ៉ាប់ក្នុងឆ្នាំ១៩៩៨នេះមានវិន័យយ៉ាងតឹងរឹងចំពោះ
សិស្ស ដែលមកស្នាក់នៅរៀនសូត្រនៅក្នុងមជ្ឈមណ្ឌលនេះ ដូចជាការប្រា-
ស្រ័យទាក់ទងគ្នារវាងសិស្សស្រីនិងសិស្សប្រុសជាដើមនេះ។ស្ថិតក្នុងសំលៀក
បំពាក់តាមប្រពៃណីរបស់ខ្លួន ដោយពាក់អាវវែងៗនិងមានកន្សែងរុំក្បាលផង
នោះ ក្រុមសិស្សនារីម៉ូស្លីមដែលមានអាយុជាង១០ឆ្នាំបា្លយចំនួនជាង ៣០នាក់
នៅក្នុងវិហារឥស្លាមអាល់ រ៉ាហ្មានី បានប្រាប់ថា ពួកគេពេញចិត្តនឹងការរៀន
ក្នុងថ្នាក់ផ្សេងពីសិស្សប្រុសៗ ដោយពួកគេលើកឡើងថា ការរៀនបែបនេះមិន
សូវរញ៉េរញ៉ៃ។

យូ សាលី អាយុ១៥ឆ្នាំ ជាសិស្សថ្នាក់ទី៩នៃមជ្ឈមណ្ឌលឥស្លាមកម្ពុជានេះ បាន
និយាយទាំងទឹកមុខអៀនប្រៀនថា ការរៀនតែជាមួយសិស្សស្រីៗដូចគ្នានេះគឺ
ល្អជាង រៀនលាយជាមួយសិស្សប្រុស។

“សាសនាក៏អត់រៀនជាមួយប្រុសៗ ខាងខ្មែរក៏អត់រៀនជាមួយប្រុសៗដែរ មកពី
គេអត់ឱ្យរៀន ជាមួយគ្នាខ្លាចញ៉ែគ្នា”។

យូ សាលី ដែលមកពីខេត្តកំពង់ចាមគឺជាសិស្សស្រីម្នាក់ក្នុងចំណោមសិស្សស្រី
ជាង២០០នាក់ផ្សេងទៀតដែលកំពុងសិក្សានៅក្នុងវិហារឥស្លាមអាល់រ៉ាហ្មានី។
វិហារឥស្លាមអាល់រ៉ាហ្មានីដែលស្ថិតក្រៅមជ្ឈមណ្ឌលឥស្លាមកម្ពុជាឬអតីតវិទ្យា
ល័យអ៊ុម អាល់គូរ៉ា ចម្ងាយប្រមាណជា៥០ម៉ែត្រពីគ្នា។

ក្រៅពីសិស្សស្រីជាង២០០នាក់ដែលកំពុងស្នាក់នៅជាមួយអ្នកភូមិឫស្សីជ្រោយ
នេះ សិស្សម៉ូស្លីមប្រុសជាង៥០០នាក់ទៀតក៏កំពុងទទួលការបណ្តុះបណ្តាលពី
មជ្ឈមណ្ឌលឥស្លាមកម្ពុជានូវចំណេះទូទៅភាសាខ្មែរហើយនិងការអប់រំសាសនា
ឥស្លាមពីថ្នាក់ទី៧ដល់ថ្នាក់ទី១២។ សិស្សប្រុសៗទាំងនេះរៀនសូត្រ និងស្នាក់
នៅក្នុងមជ្ឈមណ្ឌលឥស្លាមកម្ពុជានេះតែម្តង។

គឹមរ៉ី សាហ្វឹត អាយុ១៨ឆ្នាំ ជាសិស្សថា្នក់ទី៩ នៅមជ្ឈមណ្ឌលនេះ បានប្រាប់ឱ្យ
ដឹងថា ខ្លួនពិតជាចង់រៀននៅក្នុងថ្នាក់ដែលមានលាយជាមួយសិស្សស្រីៗជាង។

“ចង់ តែធ្វើម៉ិច បើទំនៀមទម្លាប់គេអត់ឱ្យរៀនជាមួយគ្នាផង"។

លោកណុះ ស្លេះ អនុរដ្ឋលេខាធិការក្រសួងអប់រំយុវជន និងកីឡា បានមានប្រ-
សាសន៍ថា ការបំបែកសិស្សប្រុស និងសិស្សស្រីឱ្យរៀនដាច់ពីគ្នានេះ ពុំមានអ្វី
ខុសពីគោលការណ៍អប់រំរបស់ក្រសួងនោះទេ ហើយក៏ពុំប៉ះពាល់អ្វីដល់គុណ
ភាពអប់រំនោះដែរ។

“ចំពោះកម្មវិធីសិក្សាអត់ប៉ះពាល់អីទេ ។ តាមខ្ញុំដឹងកន្លងមក គេបែងចែកតែ
សិស្សស្រី ដាក់ម្តុំអញ្ចឹងទៅ។ ប៉ុន្តែកម្មវិធីសិក្សានៅដដែលទេ”។

តែទោះជាយ៉ាងនេះក្តី គឹមរ៉ីសាហ្វឹត សិស្សវ័យ១៨ឆ្នាំបាននិយាយថា ដោយ
សារការកម្រិតរបស់សាសនាឥស្លាម ខ្លួនត្រូវតែរង់ចាំ៣ឆ្នាំទៀតរហូតដល់រៀន
ចប់ថ្នាក់ទី១២ទើបអាចចូលរៀននៅមហាវិទ្យាល័យដែលមានប្រុសស្រីលាយ
ឡំជាមួយគ្នា៕