ភ្ជាប់​ទៅ​គេហទំព័រ​ទាក់ទង

លោកទៀ បាញ់ចូលរួមបុណ្យ ភ្ជុំបិណ្ឌនៅអាមេរិក

  • តាំង សារ៉ាដា
  • VOA

នៅក្នុងខណៈធ្វើទស្សនកិច្ចរបស់លោកមកកាន់វត្តពុទ្ធិការ៉ាមក្នុងរដ្ឋ Maryland
លោករដ្ឋមន្រ្តីក្រសួងការពារជាតិកម្ពុជា ទៀបាញ់ សម្តែងសេចក្តីរំភើបចិត្តដោយ
ឃើញពលរដ្ឋខ្មែរក្នុងសហរដ្ឋអាមេរិក នៅតែប្រកាន់ខ្ជាប់វប្បធម៌និងប្រពៃណី
បានយ៉ាងល្អ។ ការធ្វើទស្សកិច្ចរបស់លោកមកកាន់វត្តពុទ្ធិការ៉ាមនោះត្រូវចំថៃ្ង
ផ្តាច់ព្រ័ត្រនៃពិធីបុណ្យភ្ជុំបិណ្ឌ ដែលមានមនុស្សដ៏ច្រើនកុះករមកពីតាមបណ្តា
រដ្ឋនានាមួយចំនួនក្នុងសហរដ្ឋអាមេរិក។

លោករដ្ឋមន្រ្តីក្រសួងការពារជាតិប្រទេសកម្ពុជាទៀ បាញ់ បានថ្លែងថា លោក
មានការរំភើបចិត្ត ដែលឃើញពលរដ្ឋខ្មែរចំណាកស្រុកនៅតែអាចកាន់ខ្ជាប់នូវ
ប្រពៃណីនិងទំនៀមទម្លាប់បានយ៉ាងល្អ។ លោកបានថ្លែងយ៉ាងដូច្នេះ ខណៈ
ដែលលោកធ្វើទស្សនកិច្ចនៅវត្តខ្មែរពុទ្ធិការ៉ាមក្នុងរដ្ឋ Maryland កាលពីព្រឹក
ម្សិលម៉ិញនៅចំថ្ងៃបញ្ចប់នៃពិធីបុណ្យភ្ជុំបិណ្ឌ។

“កន្លែងដែលខ្មែរយើងមានការជួបជុំពីសំណាក់ខ្មែរយើងដែលរស់នៅក្នុងសហ
រដ្ឋអាមេរិក ហើយបានជួបជុំក្នុងទីអារាមមួយដែលបានរៀបចំយ៉ាងល្អប្រពៃ
នោះគឺចាត់ទុកជាលើកទីមួយហើយ ដែលឃើញជាក់ស្តែងនូវអ្វីដែលខ្មែរយើង
នៅតែគោរពនៅតែរៀបចំ និងបំពេញអ្វីដែលជាជំនឿ ដែលជាប្រពៃណី និង
សាសនារបស់យើងបានយ៉ាងល្អប្រពៃជាទីបំផុត”។

ការធ្វើទស្សនកិច្ចរបស់លោកទៀ បាញ់និងគណៈប្រតិភូយោធាខ្មែរជាន់ខ្ពស់
មកកាន់វត្តពុទ្ធិការ៉ាមក្នុងរដ្ឋ Maryland នេះ គឺ ដោយសារមានការសម្រប
សម្រួលកម្មវិធីរបស់ឯកអគ្គរាជទូតខ្មែរនៅសហរដ្ឋអាមេរិក លោកហែម ហេង
រួមនិងក្រុមមន្រ្តីការទូតខ្មែរមួយចំនួនទៀត។

លោកទៀ បាញ់ មានប្រសាសន៍ថា លោកមិនបានខកខានក្នុងការប្រារព្ធធ្វើ
ប្រពៃណីរបស់ខ្មែរនោះទេដោយសារលោកបានមកចូលរួមឆ្លងបុណ្យភ្ជុំបិណ្ឌ
ក្នុងសហរដ្ឋអាមេរិកដែលពិធីនោះត្រូវបានរៀបចំធ្វើដូចជានៅប្រទេសខ្មែរដែរ។

“ថ្ងៃនេះគឺជាថ្ងៃមួយដ៏ល្អ បានឆ្លៀតមកចូលរួមជាមួយបងប្អូនខ្មែរយើង ដែល
បានរៀបចំពិធីយ៉ាងដូច្នេះ គឺជាការកោតសរសើរជាទីបំផុត។ ដោយចាត់ទុកថា នៅស្រុកយើងក៏ជាថ្ងៃឆ្លងភ្ជុំបិណ្ឌរបស់យើងដែរ ដែលថ្ងៃនេះបានមកទាន់នៅ
ទីនេះ បានមកទាន់ឆ្លងពិធីភ្ជុំបិណ្ឌជាមួយប្រជាជនខ្មែរយើងនៅទីនេះ។ អញ្ចឹង
បានចាត់ទុកថា មិនខកប្រពៃណីប្រចាំឆ្នាំរបស់ខ្លួនដែលរៀងរាល់ឆ្នាំត្រូវតែធ្វើ។ ថ្ងៃនេះបានមកឆ្លងនៅទីនេះដូចបានឆ្លងនៅស្រុកខ្មែរដែរ”។

លោក ទៀ បាញ់ កំពុងដឹកនាំក្រុមមន្រ្តីយោធាខ្មែរជាងដប់រូបមកធ្វើទស្សនកិច្ច
ក្នុងសហរដ្ឋអាមេរិកពីថ្ងៃទី១៩ដល់ថ្ងៃទី២៣ ខែកញ្ញា។ នៅក្នុងដំណើរទស្សន
កិច្ចរបស់លោក លោកនឹងចូលជួបលោកអនុរដ្ឋមន្រ្តីក្រសួងការបរទេសសហ
រដ្ឋអាមេរិកJames B. Steinberg នៅព្រឹកថ្ងៃច័ន្ទ និងជួបជាមួយលោករដ្ឋមន្រ្តី
ការពារប្រទេសសហរដ្ឋអាមេរិក Robert Gates នៅរសៀលថ្ងៃដដែលនេះ។

ជំនួបនោះជាផ្នែកមួយក្នុងការពង្រឹងទំនាក់ទំនងរបស់សហរដ្ឋអាមេរិកជាមួយ
បណ្តាប្រទេសក្នុងតំបន់អាស៊ី ដែលរួមមានប្រទេសកម្ពុជាផងដែរនោះ។

ទស្សនកិច្ចរបស់គណៈប្រតិភូយោធាខ្មែរមកកាន់សហរដ្ឋអាមេរិកបានធ្វើឡើង
ស្របពេលជាមួយនិងការព្រួយបារម្ភរបស់សភាសហរដ្ឋអាមេរិកអំពីការចាយ
វាយជំនួយយោធារបស់សហរដ្ឋអាមេរិកដែលបានផ្តល់ដល់វិស័យយោធាកម្ពុជា
ចាប់តាំងពីឆ្នាំ២០០៦មក។ កាលពីថ្ងៃទី ១៨ខែកញ្ញាកន្លងទៅនេះ តំណាង
រាស្រ្តសហរដ្ឋអាមេរិកមួយចំនួនបានផ្ញើរលិខិតមួយជូនលោករដ្ឋមន្រ្តីការពារ
ប្រទេសសហរដ្ឋអាមេរិក Robert Gates សម្តែងការព្រួយបារម្ភអំពីលទ្ធភាព
នៃការបង្វែរជំនួយយោធារបស់អាមេរិកទៅឱ្យកងអង្គរក្សរបស់លោកនាយករដ្ឋ
មន្ត្រី ហ៊ុន សែនវិញ។

ការព្រួយបារម្ភរបស់សមាជិកសភាអាមេរិកាំងប្រហែលបានកើតឡើង ក្រោយ
ពីមានសេចក្តីរាយការណ៍របស់អង្គការសិទ្ធិមនុស្ស Human Rights Watch
ដែលចោទប្រកាន់ថា មានការរំលោភអំណាចដោយកងអង្គរក្សនេះ៕ ចប់

XS
SM
MD
LG