កម្ពុជាត្រៀមទប់ទល់បាតុករថៃ នៅប្រាសាទព្រះវិហារ

ប្រទេសកម្ពុជា បានត្រៀមកងកម្លាំងប៉ូលិសបង្ក្រាបបាតុកម្មនៅមុខប្រាសាទព្រះ
វិហារ ដើម្បីការពារបូរណភាព និងអធិបតេយ្យភាពរបស់កម្ពុជា ប្រឆាំងនឹងការ
ឆ្លងចូលទឹកដីកម្ពុជារបស់ក្រុមបាតុករថៃ។

ក្រុមមន្ត្រីក្រសួងការពារជាតិ និងក្រសួងមហាផ្ទៃ បានថ្លែងថាប្រទេសកម្ពុជានៅ
ថ្ងៃព្រហស្បតិ៍នេះ បានដាក់ពង្រាយកងកម្លាំងប៉ូលិសបង្ក្រាបបាតុកម្មច្រើនរាប់
សិបនាក់នៅតំបន់ ជម្លោះព្រំដែនក្បែរប្រាសាទព្រះវិហារ ជាកន្លែងដែលក្រុម
បាតុករអាវលឿងថៃ គ្រោងនឹងធ្វើការតវ៉ានៅថ្ងៃសៅរនេះ។

ការដាក់ពង្រាយកម្លាំងប៉ូលិសបង្ក្រាបបាតុកម្មនេះ បានធ្វើឡើង បន្ទាប់ពីក្រុមអ្នក
ស្មោះត្រង់នឹងចលនាអាវលឿងថៃ គ្រោងនឹងប្រមូលផ្តុំគ្នាប្រឆាំងនឹងរដ្ឋាភិបាល
កម្ពុជា ដោយអះអាងថា រដ្ឋាភិបាលទីក្រុងភ្នំពេញ បានបញ្ជូនក្រុមឈ្មួញនិងអ្នក
តាំងលំនៅដើម្បីគ្រប់គ្រងទឹកដីថៃនៅក្បែរប្រាសាទព្រះវិហារ ហើយគ្រោងនឹង
ឆ្លងកាត់ព្រំដែនចូលមកក្នុងទឹកដីកម្ពុជា ដើម្បីទាមទារយកតំបន់ដីជម្លោះ៤,៦
គីឡូម៉ែត្រការ៉េ ឬ តំបន់ប្រាសាទព្រះវិហាររបស់ប្រទេសកម្ពុជា។

លោកឈុំ សុជាតិ អនុរដ្ឋលេខាធិការនិងជាអ្នកនាំពាក្យក្រសួងការពារប្រទេស
កម្ពុជា បានថ្លែងប្រាប់VOAថា យើងត្រូវតែបង្ហាញនូវស្មារតីនិងឆន្ទៈរបស់យើង
ដើម្បីការពារមាតុភូមិ បូរណភាពទឹកដី និងអធិបតេយ្យភាពរបស់យើងដោយមិន
អនុញ្ញាតឱ្យក្រុមបាតុករអាវលឿងចូលមកក្នុងទឹកដីកម្ពុជាបានជាដាច់ខាត។

យើងបានប្រើកម្លាំងប៉ូលិសជំនាញបង្ក្រាបបាតុកម្មចំនួន៤០នាក់និងអ្នកជំនាញ
ប្រើឆ្កែ១០នាក់ជាមួយប្រដាប់ប្រដារបង្ក្រាបបាតុកម្ម ដូចជាខែលនិងដំបង។ក្នុង
ជំហានទី១ បើក្រុមជ្រុលនិយមអាវលឿងថៃរំលោភចូកមកក្នុង ទឹកដីកម្ពុជាតាម
ការគ្រោងទុកមែន យើងនឹងទប់ទល់មិនឱ្យក្រុមអាវលឿងថៃចូលមកក្នុងទឹកដី
របស់យើងបាន។

ក្នុងជំហានទី២ បើក្រុមអាវលឿងថៃនៅតែរំលោភចូលមកក្នុងទឹកដីកម្ពុជាថែម
ទៀត យើងនឹងប្រើប្រាស់កម្លាំងយោធាការពារព្រំដែនរបស់យើង ដើម្បីអនុវត្ត
ស្វ័យការពារខ្លួន ពីព្រោះយើងមិនអនុញ្ញាតឱ្យក្រុមអាវលឿងថៃឆ្លងចូលមកក្នុង
ទឹកដីកម្ពុជាបានទេ។ យើងដាច់ខាងមិនឱ្យក្រុមអាវលឿងថៃឆ្លងចូលមកក្នុងទឹក
ដីរបស់យើងបាន ដូចកាលពីថ្ងៃទី ១៥ ខែ សីហា ឆ្នាំ ២០០៨ ទៀតទេ។

កាសែតThe Bangkok Postបានរាយការណ៍ថា លោកឧត្តមសេនីយ៍Anupong
Paojinda អគ្គមេបញ្ជាការកងទ័ពជើងគោកថៃបានព្រួយបារម្ភថា បើក្រុមបាតុករ
ថៃត្រូវបានចាប់ខ្លួនដោយកងទ័ពកម្ពុជា ឧប្បត្តិហេតុនេះនឹងកើតមានប្រតិកម្មជា
បន្តបន្ទាប់ ដែលអាចមានផលវិបត្តិយ៉ាងទូលំទូលាយទៅលើបញ្ហាសន្តិសុខជាតិ
និងទំនាក់ទំនងទ្វេភាគី។

តំបន់ជម្លោះព្រំដែននៅក្បែរប្រាសាទព្រះវិហារ គឺជាកន្លែងវាយប្រយុទ្ធគ្នាយ៉ាង
ប្រល័យជាច្រើនលើករវាងកងទ័ពកម្ពុជា និងថៃ ចាប់តាំងពីប្រាសាទបុរាណខែ្មរ
នេះត្រូវបានផ្តល់ឋានៈជាបេតិកភ័ណ្ឌពិភពលោកដោយអង្គការ UNESCO នៅ
ក្នុងខែ កក្កដា ឆ្នាំ ២០០៨។

លោកឧត្តមសេនីយ៍ឯក ខៀវ សុភ័គ អ្នកនាំពាក្យក្រសួងមហាផ្ទៃ បានថ្លែងប្រាប់
VOA ថា "កម្លាំងប៉ូលិសបង្ក្រាបបាតុកម្មរបស់យើង បានត្រៀមខ្លួនរួចជាស្រេច
នៅតំបន់ជម្លោះព្រំដែនក្បែរប្រាសាទព្រះវិហារ ដើម្បីការពារបូរណភាពទឹកដី និង
អធិបតេយ្យភាពរបស់យើង និងដើម្បីបង្ក្រាបបាតុករថៃចូលមកក្នុងទឹកដីកម្ពុជា។

យើងនឹងអនុវត្តអ្វីតាមរូបភាពដែលច្បាប់បានអនុញ្ញាតឱ្យធ្វើ។ បើក្រុមបាតុករថៃ
កុំឱ្យចូលមកក្នុងទឹកដីកម្ពុជា វាល្អជាង ព្រោះថាបើយើងប្រើប្រាស់កម្លាំងកងទ័ព
ឬ ប៉ូលិសការពារព្រំដែនរបស់យើង ក្រែងលោវាជ្រុលជ្រួស"។

មេបញ្ជាការប៉ូលិសភូមិភាគ៣របស់ប្រទេសថៃ លោកឧត្តមសេនីយ៍ឯក Krisda
Phankongchuen ត្រូវបានរាយការណ៍ដោយកាសែតThe Bangkok Postថា
ប៉ូលិសបង្ក្រាបបាតុកម្មថៃចំនួន២០០នាក់ ត្រូវបានដាក់ពង្រាយនៅតំបន់ព្រំដែន
ក្នុងទឹកដីថៃក្បែរប្រាសាទព្រះវិហារ ដើម្បីរារាំងក្រុមបាតុករអាវលឿងថៃមិនចូល
ទៅក្នុងតំបន់ជម្លោះព្រំដែន។

លោកឈុំ សុជាតិ បានបញ្ជាក់ថា ក្រុមមេបញ្ជាការកងទ័ពថៃប្រចាំតំបន់ព្រំដែន
ក្បែរប្រាសាទព្រះវិហារ បានសន្យានៅក្នុងកិច្ចជួបជាមួយក្រុមមេបញ្ជាការកងទ័ព
កម្ពុជានៅក្នុងសប្តាហ៍នេះថា ក្រុមបាតុករថៃនឹងមិនត្រូវបានអនុញ្ញាតឱ្យចូលទៅ
ក្នុងទឹកដីកម្ពុជាទេ។

លោកនាយករដ្ឋមន្ត្រីថៃ បានបញ្ជាក់ប្រាប់សាធារណជនថៃថ្មីៗនេះថា ប្រទេស
ថៃមិនបានបាត់បង់ទឹកដីសូម្បីតែមួយចម្អាមនៅក្នុងតំបន់ជម្លោះប្រាសាទព្រះ
វិហារនោះទេ៕