កម្ពុជាព្រមានពលរដ្ឋអំពី គ្រោះថ្នាក់ឆ្លងដែនទៅថៃ

ប្រទេសកម្ពុជាព្រមានពលរដ្ឋរបស់ខ្លួនកុំឲ្យធ្វើដំណើរឆ្លងដែនទៅកាន់ប្រទេស
ជិតខាង។ សេចក្តីណែនាំនេះធ្វើឡើងបន្ទាប់ពីអ្នកស្រុកខេត្តឧត្តរមានជ័យ១រូប ត្រូវបានទាហានថៃបាញ់ឲ្យរងរបួស រួចហើយចាប់ដុតទាំងរស់ ។

ប្រទេសកម្ពុជាបានធ្វើការណែនាំមួយដល់ប្រជាពលរដ្ឋរបស់ខ្លួន កុំឲ្យធ្វើដំណើរ
ឆ្លងដែនទៅប្រទេសជិតខាងដោយខុសច្បាប់ ក្រោយពីអ្នកភូមិខេត្តឧត្តរមាន
ជ័យ១រូប ជាប់នឹងខេត្តសុរិន្ទ ប្រទេសថៃ ត្រូវបានទាហានថៃបាញ់ឲ្យរបួស រួច
ហើយបានចាប់ដុតទាំងរស់ដោយចងផ្អោបនឹងរទេះគោ។

ក្រសួងការបរទេសកម្ពុជា កាលពីថ្ងៃអង្គារម្សិលម៉ិញនេះ បានផ្ញើលិខិតកំណត់
ការទូតមួយច្បាប់ទៅស្ថានទូតថៃប្រចាំប្រទេសកម្ពុជា ដោយបានដកស្រងរបាយ
ការណ៍របស់អាជ្ញាធរខេត្តឧត្តរមានជ័យថា កាលពីថ្ងៃទី ១១ ខែកញ្ញា ទាហាន
ឈុតខ្មៅថៃនៃកងអង្គភាពលេខ២៦០៨ បានបាញ់រះមកលើអ្នកភូមិកម្ពុជាមួយ
ក្រុម ដោយបានចោទថា បានលួចទៅកាប់ឈើដោយខុសច្បាប់នៅចន្លោះ
បង្គោលឡាក់លេខ ១២ និង ១៣ ។

លិខិតរបស់ក្រសួងការបរទេសដដែលបានបញ្ជាក់ទៀតថា ការបាញ់ប្រហារនេះ
បានបណ្តាលឲ្យយុវជនកម្ពុជាចំនួន២នាក់បានទទួលរងរបួសជាទម្ងន់។ ជនរង
គ្រោះឈ្មោះម៉ៅ ខ្លឹង បានរត់រួច ចំណែកឯជនរងគ្រោះម្នាក់ទៀតឈ្មោះយន់ រិទ្ឋ
អាយុ១៦ឆ្នាំ ត្រូវបានទាហានឈុតខ្មៅថៃចាប់ខ្លួនបាននិងយកទៅចងដុតទាំង
រស់។

រាជរដ្ឋាភិបាលកម្ពុជាបានចាត់ទុកទង្វើទាំងនេះថា ជាទង្វើឃោឃៅនិងស្នើសុំឲ្យ
អាជ្ញាធរថៃដែលពាក់ព័ន្ឋ ចាត់វិធានការឲ្យបានសមស្របដើម្បីចាប់ខ្លួនអ្នកដែល
ប្រព្រឹត្តអំពើឃោរឃៅខាងលើនេះ ទៅផ្តន្ទាទោសតាមច្បាប់ ។

លោកអ៊ុច បូរិទ្ឋ រដ្ឋលេខាធិការក្រសួងការបរទេសកម្ពុជាបានបញ្ជាក់ប្រាប់សន្និ
សីទកាសែតមួយ ដែលរៀបចំឡើងនៅឯទីស្តីការក្រសួងការបរទេសនៅល្ងាច
ថ្ងៃពុធនេះថា កម្ពុជាមានការឈឺចាប់ ក្រោយពីពលរដ្ឋខ្មែរបានត្រូវទាហានថៃ
ចាប់ដុតទាំងរស់។ លោកបានបញ្ជាក់ថា ពលរដ្ឋខ្មែរនៅតាមបណ្តោយព្រំដែន
កម្ពុជា-ថៃគួរតែផ្អាកឆ្លងដែនមួយរយៈសិន ប្រយោជន៍ដើម្បីឱ្យមានសុវត្ថិភាព។

"ជាបន្តបន្ទាប់ គឺមិនដែលអាក់ខានក្នុងករណីណាមួយទេ ដែលរាជរដ្ឋាភិបាល
កម្ពុជា ដែលក្រសួងការបរទេសម្ពុជាយើងតែងតែធ្វើការតវ៉ាប្រឆាំងនិងទាមទារ
រកយុត្តិធម៌ ក៏ដូចជាការទាមទារការបកស្រាយបំភ្លឺពីភាគីថៃ ហើយជានិច្ចជា
កាលក៏យើងបានទទួលនូវការឆ្លើយតប។ យើងក៏បានបន្តសហការគ្នាដើម្បីដោះ
ស្រាយបញ្ហានេះ ព្រោះយើងសង្ឃឹមថា យើងខិតខំធ្វើយ៉ាងណាដើម្បីគឺថា
ជៀសវាងនូវអ្វីគេហៅថា ការជម្លោះក៏ដូចជាការទាស់ទែងគ្នា ដែលធ្វើឲ្យប៉ះ
ពាល់ដល់ការអភិវឌ្ឍន៍ប្រទេសទាំងសង្ខាង” ។

ស្ថានទូតថៃប្រចាំប្រទេសកម្ពុជា ពុំទាន់បានឆ្លើយតបទៅនឹងលិខិតកំណត់ការ
ទូតរបស់ប្រទេសកម្ពុជានៅឡើយទេ។ នៅពេលធ្វើទំនាក់ទំនងសុំអត្ថាធិប្បាយ
តាមទូរស័ព្ទ មន្រ្តីស្ថានទូតថៃមួយរូបបាននិយាយថា កំពុងជាប់រវល់ប្រជុំ។

ចំណែកលោករដ្ឋមន្រ្តីKasit Piromyaនិងលោកអនុរដ្ឋមន្រ្តីក្រសួងការបរទេស
ថៃ Panich Vikitsreth នៅពេលដែលទាក់ទងតាមសារអេឡិចត្រួនិចឬអ៊ីម៉ែល
ពុំទាន់បានឆ្លើយតបនៅឡើយទេនៅល្ងាចថ្ងៃពុធនេះ។ ក៏ប៉ុន្តែទោះជាយ៉ាងណា
ក៏ដោយ ក៏កាសែតបាងកកប៉ុស្តិ៍ដែលចេញផ្សាយជាភាសាអង់គ្លេស នៅថ្ងៃពុធ
នេះ បានដកស្រង់សំដីរបស់លោកស្រី Vimon Kidchob អ្នកនាំពាក្យក្រសួង
ការបរទេសថៃមកសរសេរថា ទាហានថៃពុំបានបាញ់ឬក៏បានដុតប្រជាពលរដ្ឋ
កម្ពុជាទាំងរស់ទេ ។ កាសែតដដែលនេះបានស្រង់សំដីលោកស្រីមកបន្ថែមថា
ទាហានថៃ បានបាញ់កាំភ្លើងទៅលើមេឃនៅជិតព្រំដែនខេត្តសុរិន្ទ កាលពីថ្ងៃ
សុក្រ បន្ទាប់ពីបានស្វែងរកយុវជនកម្ពុជាប្រហែល ៨នាក់ ដែលបានឆ្លងដែន
ទៅកាប់ឈើនៅប្រទេសថៃ ។

លោក អ៊ុច បូរិទ្ឋ បានបញ្ជាក់ថា ហេតុការណ៍ដុតយុវជនខ្មែរទាំងរស់នេះគឺជា
ការពិត ពីព្រោះយើងមានរូបថត មានទាំងកាកសំណល់ឆ្អឹងសាកសព និង
ចំណងដែលបានចង់ភ្ជាប់ទៅនឹងដៃជនរងគ្រោះទាំងនេះគឺជាភស្ថុតាងដែល
កម្ពុជាបានទទួល៕ ចប់