ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ព្រះរាជអាជ្ញាសាលាក្ដីខ្មែរក្រហម សុំស៊ើបអង្កេតជនសង្ស័យបន្ថែម


សហព្រះរាជអាជ្ញារបស់សាលាក្ដីខ្មែរក្រហម ទើបតែបានបញ្ជូនសំណើទៅកាន់
ការិយាល័យសហចៅក្រមស៊ើបអង្កេត ដើម្បីសុំឲ្យមានការតាមស៊ើប និង តាម
ចាប់ខ្លួនជនសង្ស័យបន្ថែមទៀត។

សហព្រះរាជអាជ្ញាស្ដីទី ខាងភាគីបរទេសនៅក្នុងសាលាក្ដីខ្មែរក្រហម លោក
William Smith បានស្នើឲ្យមានការស៊ើបអង្កេត ដើម្បីឈានទៅដល់ការចាប់
ខ្លួនជនសង្ស័យចំនួន ៥ នាក់បន្ថែមទៀត។ លោក William Smith បានធ្វើ
សេចក្ដីថ្លែងការណ៍ឲ្យដឹងជាសាធារណៈនៅថ្ងៃអង្គារនេះ។

សំណើនេះធ្វើឡើងនៅក្នុងដីកាចំនួន២ ដែលបានបញ្ជូនទៅកាន់សហចៅក្រម
ស៊ើបអង្កេតកាលពីថ្ងៃច័ន្ទម្សិលម៉ិញ។

លោកសហព្រះរាជអាជ្ញាស្ដីទីបានលើកឡើងនៅក្នុងដីការទាំងពីរ ការជាប់ពាក់
ព័ន្ធនៃអំពើមនុស្សឃាតអំពើទារុណកម្ម ការឃុំខ្លួនក្រៅច្បាប់ ការបង្ខំឲ្យធ្វើការ
ងារ និង ការធ្វើទុក្ខបុកម្មេញ រួមទាំងការជាប់ពាក់ព័ន្ធអំពើឧក្រិដ្ឋកម្មប្រឆាំង
មនុស្សជាតិ អំពើហិង្សាដែលចែងនៅក្នុងក្រមព្រហ្មទណ្ឌកម្ពុជានិងបទប្រល័យ
ពូជសាសន៍។

សូមបញ្ជាក់ថា ដីកាស្នើសុំឲ្យមានការស៊ើបអង្កេតបន្ថែមនេះ ត្រូវបានធ្វើឡើង
ដោយសហព្រះរាជអាជ្ញាលោក Robert Petit មុនពេលលោកបានលាលែងពី
ការងារ។

លោកសហព្រះរាជអាជ្ញាស្ដីទី William Smith មានប្រសាសន៍នៅក្នុងសេចក្ដី
ថ្លែងការណ៍របស់ខ្លួន ដោយ យោងទៅលើជំហររបស់លោក Robert Petit ថា
សំណុំរឿងចុងក្រោយនេះ នឹងនាំមកនូវការទទួលខុស ត្រូវកាន់តែទូលំទូលាយ
ចំពោះឧក្រិដ្ឋកម្មនានាដែលបានប្រព្រឹត្តក្នុងរបបកម្ពុជាប្រជាធិបតេយ្យ ចន្លោះ
ពីឆ្នាំ ១៩៧៥ ដល់ឆ្នាំ ១៩៧៩។

លោករាជ សម្បត្តិ ប្រធានផ្នែកកិច្ចការសាធារណៈរបស់សាលាក្ដីខ្មែរក្រហមបាន
អះអាងថា ការិយាល័យសហចៅក្រមស៊ើបអង្កេតបានទទួលដីកាស្នើសុំឲ្យស៊ើប
អង្កេតបន្ថែមនោះរួចហើយ ហើយការស៊ើបអង្កេតបន្ថែមអាចនឹងចាប់ផ្ដើមមួយ
ខែឬយូរជាងនេះ បន្ទាប់ពីទទួលបានសំណើពីសហព្រះរាជអាជ្ញា។

“ជាទូទៅការស៊ើបអង្កេតស៊ីពេលពីមួយខែ ទៅ៦ ខែ ឬក៏អាចដល់មួយឆ្នាំ។ តែ
ការស៊ើបមិនមែនមានន័យថា ចាប់ខ្លួនអ្នកណាម្នាក់ទេ "។

យោងតាមលោក ឡុង បញ្ញាវុធ មន្ដ្រីគម្រោងរបស់អង្គការគម្រោងយុត្តិធម៌នៅ
កម្ពុជា បានឲ្យដឹងថា ជនសង្ស័យ ៥ នាក់បន្ថែមដែលចង្អុលបង្ហាញដោយសហ
ព្រះរាជអជ្ញាអន្ដរជាតិអាចជាអតីតកម្មាភិបាលខ្មែរក្រហម ដែលមាននាទីជាអ្នក
ទទួលខុសត្រូវខ្ពស់បំផុត ដូចជាកាំងហ្គិចអ៊ាវ ហៅឌុច អតីតប្រធានមន្ទីរស-២១
ឬគុកទួលស្លែង។

កាលពីថ្ងៃច័ន្ទលោក នាយករដ្ឋមន្ដ្រីខ្មែរ ហ៊ុន សែន បានជំទាស់ជាថ្មីម្ដងទៀត
ចំពោះការប៉ុនប៉ងធ្វើ ការស៊ើបអង្កេតនិងចោទប្រកាន់ជនសង្ស័យដែលជាអតីត
កម្មាភិបាលជាន់ខ្ពស់ខ្មែរក្រហម។ លោក ហ៊ុន សែនធ្លាប់បានលើកពីការព្រួយ
បារម្ភពីការកកើតជាថ្មី នៃអសន្ដិសុខសង្គម និងសង្រ្គាមស៊ីវិល នៅកម្ពុជា។

លោកឡុង បញ្ញាវុធ បានសម្លឹងឃើញឧបសគ្គចំនួនពីរ សម្រាប់ការស៊ើបអង្កេត
ជនសង្ស័យបន្ថែម ក្រោយពីមានសេចក្ដីប្រកាសរបស់លោកនាយករដ្ឋមន្ដ្រីខ្មែរ។

“វាមានការជំទាស់ពីរដងអាចកើតឡើងនៅក្នុងការិយាល័យសហចៅក្រមស៊ើប
អង្កេត។ ជំទាស់ទី ១ គឺបានន័យថា ក្រោយពេលដែលខ្លួនឯងបានស៊ើបអង្កេត
បានមួយរយៈ ហើយបើសិនជាត្រូវចាប់ខ្លួន គឺអាចទាស់គ្នាម្ដងទៀត។ ជំទាស់
ទី២គឺនៅពេលដែលខ្លួនឯងចេញដីកាដំណោះស្រាយ ពីព្រោះអីកាលណាចេញ
ដីកាដំណោះស្រាយហើយ គឺត្រូវបញ្ជូនទៅកាត់ក្ដី ឬមិនបញ្ជូនទៅកាត់ក្ដី "។

រហូតមកទល់ពេលនេះមានជនសង្ស័យចំនួន ៥ នាក់ត្រូវបានចាប់ខ្លួនទាក់ទង
ទៅនឹងការសម្លាប់រង្គាលប្រជាជនខ្មែរអស់ជិត ២ លាននាក់។ ការស្នើសុំឲ្យស៊ើប
អង្កេតនិងចាប់ខ្លួនជនសង្ស័យចំនួន ៥ នាក់ បន្ថែមរបស់សហព្រះរាជអាជ្ញាបរ
ទេស ធ្លាប់ត្រូវបានជំទាស់ដោយសហព្រះរាជអាជ្ញាកម្ពុជាម្ដង នាពេលកន្លង
មក៕

XS
SM
MD
LG