កម្ពុជាដកទ័ពពីតំបន់ជម្លោះនៅក្បែរ ប្រាសាទព្រះវិហារ

ប្រទេសកម្ពុជាបានចាប់ផ្តើមដកកងទ័ពចេញពីតំបន់ជម្លោះនៅក្បែរប្រាសាទព្រះ
វិហារ ដើម្បីបញ្ជៀសការប្រឈមមុខដាក់គ្នាដោយអាវុធ។

ក្រុមមន្ត្រីយោធាជាន់ខ្ពស់កម្ពុជា បាននិយាយនៅថ្ងៃពុធនេះថា កងទ័ពកម្ពុជា
មួយចំនួនធំ និងរថពាសដែកជាច្រើនគ្រឿង បានចាប់ផ្តើមដកជាបណ្តើរៗចេញ
ពីសមរភូមិនៅក្នុងតំបន់ជម្លោះក្បែរប្រាសាទព្រះវិហារហើយនៅថ្ងៃពុធនេះ បន្ទាប់
ពីបានប្រឈមមុខដាក់គ្នាដោយអាវុធជាមួយកងទ័ពថៃអស់រយៈពេលជាង១ឆ្នាំ។

ការដកកងទ័ព និងគ្រឿងសព្វាវុធនេះបានធ្វើឡើងបន្ទាប់ពីលោកនាយករដ្ឋមន្ត្រី
ហ៊ុន សែន បានប្រកាសកាត់បន្ថយចំនួនកងទ័ពនៅតំបន់ជម្លោះព្រំដែនក្បែរ
ប្រាសាទព្រះវិហារកាលពីថ្ងៃសៅរ៍ និង និងបន្ទាប់ពីការជួបពិភាក្សារវាងមេបញ្ជា
ការកងទ័ពជាន់ខ្ពស់នៃប្រទេសទាំងពីរអំពីជម្លោះព្រំដែនកាលពីថ្ងៃច័ន្ទ។

លោកឧត្តមសេនីយ៍ឯក ជា តារា អគ្គមេបញ្ជាការរង និងប្រធានគណៈបញ្ជាការ
ឯកភាពសមរភូមិទិសភូមិភាគទី ៤ បានថ្លែងប្រាប់ VOAថា កងទ័ពកម្ពុជាមួយ
ចំនួនធំបានដកចេញពីសមរភូមិនៅក្នុងតំបន់ជម្លោះក្បែរប្រាសាទព្រះវិហារចាប់
ពីថ្ងៃពុធនេះទៅ។

"យើងចាប់ផ្តើដកកងទ័ពហើយ បើសម្តេចតេជោបានបញ្ជាហើយ។ការដកនេះគឺ
បញ្ជាក់អំពីជំហរជាវិជ្ជមានរបស់សម្តេចតេជោ ដែលចង់ឱ្យព្រំដែនមានសន្តិភាព
សុវត្ថិភាពនិងអភិវឌ្ឍន៍ដើម្បីផលប្រយោជន៍របស់ប្រជារាស្ត្រនៃប្រទេសទាំង២។
ចំនួនកងទ័ព ដែលត្រូវដកត្រឡប់មកកាន់ទីតាំងបន្ទាយដើមវិញពីសមរភូមិមុខ
នោះ មានកងពលតូចអន្តរាគមន៍លេខ១១ តំបន់ប្រតិបត្តិការសឹកខេត្តសៀមរាប
តំបន់ប្រតិបត្តិការសឹកខេត្តកំពង់ធំនិងកងឯកភាពអង្គរក្សសម្តេចអគ្គមហាសេនា
បតីតេជោ ហ៊ុន សែន"។

លោកឈុំ សុជាតិ អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បាន
ថ្លែងថា ការដកកងទ័ពមួយចំនួនធំចេញពីតំបន់ព្រំដែននេះ គឺជាសញ្ញាមួយនៃ
ការបន្ធូរបន្ថយនៃការប្រឈមមុខដាក់គ្នារវាងកងទ័ពកម្ពុជានិងថៃអស់រយៈពេល
ជាង១ ឆ្នាំ ដើម្បីឈានទៅបញ្ចប់ការប្រទូស្តរាយដោយអាវុធ។

"ក្រោយពីយើងបានពិនិត្យមើលសភាព ការណ៍ជម្លោះព្រំដែននៅតំបន់ប្រាសាទ
ព្រះវិហារក្នុងរយៈពេលជាង ១ ឆ្នាំនេះ យើងឃើញថាសភាពការណ៍សឹករហូត
មកដល់ខែសីហានេះ មានភាពធូរស្រាលច្រើន។ ដូច្នេះ នេះគឺជាសញ្ញាបញ្ជាក់
នូវភាពល្អប្រសើរនៅសមរភូមិមុខ។ វាជាសញ្ញានៃស្ថេរភាពនៅតំបន់ព្រំដែន។ វា
ស្តែងឱ្យឃើញនូវសភាពការណ៍ធូរស្រាលនៅតាមតំបន់ព្រំដែន និងកិច្ចសហ
ប្រតិបត្តិការល្អប្រសើររវាងកងទ័ពនៃប្រទេសទាំង ២"។

លោកឧត្តមសេនីយឯកជា តារា បានបញ្ចាក់ថា"យើងបានធ្វើតាមបទបញ្ជារបស់
លោកនាយករដ្ឋមន្ត្រីហ៊ុន សែនក្នុងការដកកងទ័ពនេះ។ កម្លាំងកងទ័ពដែលនៅ
ឈរជើងនៅព្រំដែន នៅតែការពារយ៉ាងរឹងមាំ ក្នុងសិទ្ធិស្វ័យការពារ ដើម្បីការពារ
ទឹកដីមិនឱ្យបាត់មួយ១មីលីម៉ែត្រនិងមិនទៅឈ្លានពានទឹកដីរបស់នរណា១មីលី
ម៉ែត្រទេ។ នេះជាបទបញ្ជារបស់តេជោរបស់យើងខ្ញុំ"។

ភាពតានតឹងផ្នែកយោធារវាងប្រទេសកម្ពុជា និង ប្រទេសថៃ បានកើតមានឡើង
បន្ទាប់ពីប្រាសាទព្រះវិហារចំណាស់ជាង៩០០ឆ្នាំរបស់ប្រទេសកម្ពុជា ត្រូវបានចុះ
បញ្ជីជាបេតិកភ័ណ្ឌពិភពលោករបស់អង្គការ UNESCOនៅថ្ងៃទី ៧ ខែ កក្កដាឆ្នាំ
២០០៨ ហើយមានការវាយប្រយុទ្ធគ្នារវាងកងទ័ពកម្ពុជា និងថៃ បានកើតឡើង
ជាច្រើនលើក និងបានសម្លាប់កងទ័ពនៃភាគីទាំងសងខាងយ៉ាងតិច ៧ នាក់៕