ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

Hello VOA សុខភាព៖ ជំងឺ​ញ័រទ្រូង​ឬ​ជំងឺ​ខ្យល់ចាប់​ (Heart Palpitations) គឺ​ជា​អាការៈ​ញ័រ​ក្នុង​ទ្រូង​ដែល​បណ្តាល​មក​ពី​ចង្វាក់​បេះដូង​ដើរ​មិន​ស្មើ​គ្នា


ទាញ​យក​ពី​តំណភ្ជាប់​ដើម

អ្នក​ជំនាញ​វេជ្ជសាស្ត្រ​គឺ​ លោក តាំង តេកហុង ​វេជ្ជបណ្ឌិត​ខ្មែរ​នៅ​ទីក្រុង Jacksonville រដ្ឋ Florida សហរដ្ឋអាមេរិក​ថ្លែង​ថា​ជំងឺ​ញ័រ​ក្នុង​ទ្រូង​មាន​ពីរ​ប្រភេទ។ ការ​ញ័រទ្រូង​ដែល​ច្រើន​តែ​កើត​មាន​ជា​ទូទៅ​ គឺ​តែងតែ​កើត​ឡើង​នៅ​ពេល​មាន​អារម្មណ៍​ខឹងសម្បារ​ ភ័យខ្លាច​ ការ​ធ្វើ​លំហាត់ប្រាណ​ ឬក៏​ទទួល​ទាន​ភេសជ្ជៈ​មាន​ជាតិ​កាហ្វេ​ ឬ​ជាតិ​អាកុល​ច្រើន​លើស​កម្រិត។ ប៉ុន្តែ​ អាការៈ​បែប​នោះ​អាច​បាត់​ទៅ​វិញ​ដោយ​ខ្លួន​ឯង។ អាការៈ​ញ័រ​ទ្រូង​មួយ​បែប​ទៀត​ ដែល​អាច​ប៉ះពាល់​ដល់​សុខភាព​ធ្ងន់ធ្ងរ​ ប្រសិន​បើ​អាការៈ​បែប​នោះ​កើត​ទៅ​លើ​អ្នក​ដែល​មាន​ជំងឺ​ទាក់ទង​នឹង​បេះដូង។ លោក​វេជ្ជបណ្ឌិត​បាន​បន្ថែម​ថា​ នៅក្នុង​បេះដូង​មនុស្ស​យើង​មាន​ចរន្ត​ខ្សែ​អគ្គិសនី​ ហើយ​ដំណើរ​ការ​របស់​ចរន្ត​អគ្គសនី​នេះ​ហើយ​ ដែល​ធ្វើ​ឲ្យ​បេះដូង​ដើរ​មិន​ស្មើ​គ្នា​ ដែល​បង្ក​ឲ្យ​កើត​មាន​អាការៈ​ញ័រ​ក្នុង​ទ្រូង។ លោក​បាន​បញ្ជាក់​បន្ថែម​ថា​ ប្រសិន​បើ​អ្នក​ជំងឺ​មាន​អាការៈ​ញ័រ​ក្នុង​ទ្រូង​ជា​ប្រចាំ ចុក​ក្នុង​ទ្រូង​ដូច​ជា​គេ​យក​ដុំ​ថ្ម​មក​សង្កត់​ពី​លើ​ ពិបាក​ដកដង្ហើម​ បែកញើស​ ចង់​ដួល​សន្លប់​ នោះ​ត្រូវ​ប្រញាប់​ទៅ​ជួប​គ្រូពេទ្យ​ដើម្បី​ពិនិត្យ​ និង​ធ្វើ​រោគវិនិច្ឆ័យ។ ទាក់ទង​នឹង​ការ​ធ្វើ​រោគវិនិច្ឆ័យ​ លោក​វេជ្ជបណ្ឌិត​បាន​បន្ថែម​ថា​ ការ​ធ្វើ​រោគវិនិច្ឆ័យ​គឺ​គេ​ត្រូវ​ធ្វើ​ដោយ​បន្ត​ខ្សែ​ភ្លើង​ដាក់​ទៅ​ម៉ាស៊ីន​មួយ​ប្រភេទ (Electrocardiogram-EKG) ដើម្បី​អាច​បង្ហាញ​ពី​ចង្វាក់​បេះដូង​ថា​តើ​វា​ដើរ​ស្មើ​ឬ​ក៏​មិន​ស្មើ។ ប៉ុន្តែ​ពេល​ខ្លះ​គេ​មិន​អាច​រក​ឃើញ​តាម​វិធី​នេះ​បាន​ទេ ដោយ​សារ​តែ​អាការៈ​នេះ​​អាច​បាត់​ទៅ​វិញ​ដោយ​ខ្លួន​ឯង។ ប៉ុន្តែ​​គេ​អាច​ធ្វើ​តាម​វិធី​នេះ​ដូច​គ្នា​បាន​ ដោយ​ដាក់​ម៉ាស៊ីន​នេះ​នៅ​ជាប់​ជាមួយ​អ្នកជំងឺ​ពី​២៤ម៉ោង ទៅ៤៨​ម៉ោង​ឬ​យូរ​ជាង​នេះ​ ដើម្បី​តាមដាន​ថា​នៅ​ចន្លោះ​ពេលណា​ដែល​បេះដូង​ដើរ​មិន​ស្មើ​គ្នា៕ (អ្នកស្រី ស៊ូ ពេជ្រចិន្តា, Hello VOA សុខភាព, វ៉ាស៊ីនតោន, ២១ ​កញ្ញា ២០១៧)

XS
SM
MD
LG