ភ្ជាប់​ទៅ​គេហទំព័រ​ទាក់ទង

ថៃ​តវ៉ា​មុខ​ស្ថាន​ទូត​ខ្មែរ​លើ​ករណី​ចាប់​ជន​ជាតិ​ថៃ​៧នាក់


ប៉ូលិស​នាំខ្លួន​​ជន​ជាតិថៃ​ឡើង​តុលាការ​ភ្នំពេញ។

ភ្នំពេញ៖ ប្រជា​ពលរដ្ឋ​ថៃ​នៅ​ក្នុង​ទីក្រុង​បាងកក​បាន​ធ្វើ​បាតុកម្ម​នៅ​ថ្ងៃ​សុក្រ​ប្រឆាំង​នឹង​ការឃុំឃាំង​ជន​ជាតិ​ថៃ​ប្រាំពីរ​នាក់​ដែល​បាន​ឆ្លង​ដែន​ចូល​ទឹកដី​កម្ពុជា​ដោយ​ខុស​ច្បាប់។ ក្រុម​អ្នក​តវ៉ាថៃ​បាន​ទាម​ទារ​ឱ្យ​រដ្ឋាភិបាល​កម្ពុជា​ដោះលែង​ជនជាតិ​ថៃ​ទាំង​នោះ​ជា​បន្ទាន់។ ប៉ុន្តែ​ប្រទេស​កម្ពុជា​បាន​ច្រាន​ចោល​ការទាមទារ​របស់​ពួកគេ។

កាសែតបាងកកប៉ុស្តិ៍​ (Bangkok Post) ​បាន​រាយការណ៍​ថា​សមាជិក​នៃ​បណ្តាញ​ចលនា​នយោបាយ​ អ្នក​ស្នេហាជាតិ​ថៃ​ច្រើន​រាប់សិប​នាក់​បាន​ប្រមូល​ផ្តុំ​គ្នា​នៅមុខ​ស្ថានទូត​កម្ពុជា​ប្រចាំ​នៅ​ទីក្រុង​បាងកក​ ដើម្បី​អំពាវនាវ​ឱ្យ​រដ្ឋាភិបាល​ទីក្រុង​ភ្នំពេញ​ដោះលែង​ជនជាតិ​ថៃប្រាំពីរ​នាក់​ដែល​កំពុង​ជាប់​ឃុំឃាំង​ នៅ​ក្នុង​ពន្ធនាគារ​ព្រៃស។

ពួក​អ្នក​តវ៉ា​ថៃ​ទាំងនេះ​ដែល​បាន​ដឹកនាំ​ដោយ​លោក​ស៊ុមប៊ូន ថោងបុរាណ (Somboon Thongburan) ​មេដឹកនាំ​បណ្តាញ​ចលនា​នយោបាយ​អ្នក​ស្នេហា​ជាតិ​ថៃ​បាន​ដុត​រូបថត​លោក​នាយក​រដ្ឋមន្ត្រី​ហ៊ុន សែន ​ហើយ​ពួកគេ​បាន​សន្យា​បន្ត​ការប្រមូលផ្តុំ​របស់​ពួកគេ​នៅមុខ​អាគារ​រដ្ឋាភិបាលរហូត​ដល់​ជនជាតិ​ថៃ​ទាំង​ប្រាំពីរ​នាក់​ត្រូវ​បាន​ដោះលែង។ ប៉ូលីស​ប្រមាណ​៥០​នាក់​ត្រូវបាន​ដាក់​ពង្រាយ​នៅ​ជុំវិញ​ស្ថាន​ទូត​នៅ​ក្នុង​អំឡុង​ពេល​ធ្វើការ​តវ៉ា។

លោក​កុយ គួង​ អនុ​រដ្ឋលេខា​ធិការ​និង​ជាអ្នក​នាំពាក្យ​ក្រសួង​ការបរទេស​កម្ពុជា​បាន​ថ្លែង​ប្រាប់វីអូអេ សំឡេង​សហរដ្ឋ​អាមេរិក​ថា​ប្រទេស​កម្ពុជា​មិន​អាច​ទទួល​យក​ការទាមទារ​របស់​បណ្តាញ​ចលនា​នយោ​បាយ​អ្នក​សេ្នហា​ជាតិ​ថៃ​នេះ​បាន​ទេ។

«ខ្ញុំបាន​ទទួល​ព័ត៌មាន​ដែល​ថា​មាន​ក្រុម​អាវលឿង​ប្រហែល​៤០នាក់​ទៅធ្វើ​បាតុកម្ម​នៅ​មុខ​ស្ថានទូត​យើង​នៅព្រឹក​ម៉ិញ​ពីម៉ោង១០​និង​៣០នាទី​ដល់​ម៉ោង១១​និង​១៥នាទី ​ពួកអ្នក​តវ៉ា​បាន​ចាក​ចេញ​ទៅ​វិញ​ទៅ។ វា​ជាទម្លាប់​របស់​ក្រុម​អាវលឿង​ចេះ​តែ​ទាមទារ​ទាំង​ទទឹង​ទិស​និង​លើក​ឡើង​ទាំង​ផ្តេស​ផ្តាស​នោះ​ ហើយ​យើង​មិន​អាច​ទទួល​យក​អ្វី​ដែល​ពួកគេ​លើកឡើង​នោះ​បាន​ទេ»។

តុលាការ​ក្រុង​ភ្នំពេញ​បាន​ចោទប្រកា​ន់សមាជិក​សភា​ថៃ​របស់​គណបក្ស​គ្រប់គ្រង​អំណាច​គឺ​លោក​ប៉ានីច វីគិតស្រេត (Panich Vikitsreth)​ និង​សកម្មជន​ចលនា​នយោបាយ​អាវ​លឿង​ថៃ​ចំនួន​ប្រាំមួយ​នាក់​កាល​ពី​ថ្ងៃ​ព្រហស្បតិ៍​ពី​បទ​ឆ្លង​ចូល​ទឹកដី​កម្ពុជា​ដោយ​ខុសច្បាប់​និង​ចូលទីលាន​យោធា​ដោយ​ទុច្ចរិត​នៅ​ក្នុង​ខេត្ត​បន្ទាយ​មានជ័យ។

លោក​ហោ ណាំហុង ​រដ្ឋមន្ត្រី​ការបរទេស​កម្ពុជា​បាន​ថ្លែងថា​ករណី​របស់​ជនជាតិ​ថៃ​ទាំងប្រាំពីរ​នាក់ នេះ​បាន​ស្ថិត​នៅ​ក្នុង​ដំណើរ​ការនីតិវិធី​របស់​តុលាការ​ហើយ​ជនជាតិ​ថៃ​ទាំងប្រាំពីរ​នាក់​នេះ​មិនអាច​ ដោះ​លែង​បាន​ទេ។

លោក កាសិត ភីរម្យ ​ (Kasit Pirumya) ​រដ្ឋមន្ត្រី​ការបរទេស​ថៃ​បាន​បញ្ជាក់​ថា​លោក​គោរព​តាម​ដំណើរការ​យុត្តិធម៌​របស់​កម្ពុជា ​និង​សំណូមពរ​ឱ្យ​ដំណើរការ​នេះ​ធ្វើឱ្យ​បាន​ឆាប់រហ័ស​បំផុត៕

XS
SM
MD
LG