ភ្ជាប់​ទៅ​គេហទំព័រ​ទាក់ទង

ក្រុមហ៊ុន​ម៉ាឡេស៊ី​​បាន​​សិទ៉្ធិ​ធ្វើ​ស្ថានីយ៍​បញ្ជូន​ថាមពល​អគ្គិសនី​ពី​​ភ្នំពេញ​កំពង់ចាម


បណ្តាញ​ខ្សែ​អគ្គិសនី​នៅ​ប្រទេស​កម្ពុជា។​

ក្រុមហ៊ុន​ម៉ាឡេស៊ី​បាន​ទទួល​សិទ៉្ធិ​លើ​ការ​សាងសង់​ស្ថានីយ៍​បញ្ជូន​ថាមពល​អគ្គិសនី​ពី​ទីក្រុង​ភ្នំពេញ​ ទៅ​ខេត្ត​កំពង់ចាម។

លោក​ ជន សក្តា ​ជូន​សេចក្តី​រាយ​ការណ៍ដូច​ត​ទៅ៖

រដ្ឋ​សភា​កម្ពុជា​បាន​យល់ព្រម​លើ​កិច្ច​ព្រមព្រៀង​ដែល​មាន​តម្លៃ​១០៧,៦​លាន​ដុល្លារ​អាមេរិក​នៅ​ថ្ងៃ​ ព្រហស្បតិ៍​នេះ​ដើម្បី​អនុញ្ញាត​ឱ្យ​ក្រុមហ៊ុន​ម៉ាឡេស៊ី​សាងសង់​ស្ថានីយ៍​បញ្ជូន​ថាមពល​អគ្គិសនី​ពី​ទីក្រុង​ភ្នំពេញ​ទៅ​កាន់​ទីរួមខេត្ត​កំពង់ចាម​ជា​ផ្នែក​មួយ​នៃ​ផែនការ​របស់​រដ្ឋា​ភិបាល​ក្នុង​ការ​ផ្តល់​អគ្គីស នី​ប្រើប្រាស់​ដល់​គ្រប់​តំបន់​នៅ​ទូទាំង​ប្រទេស​នៅ​ឆ្នាំ​២០២០។

រដ្ឋា​ភិបាល​កម្ពុជា​បាន​ចុះ​ហត្ថលេខា​លើ​កិច្ច​ព្រមព្រៀង​ជាមួយ​ក្រុមហ៊ុន​Cambodian Transmission​ Limited ​របស់​ប្រទេស​ម៉ាឡេស៊ី​ ក្នុង​ការ​កសាង​ស្ថានីយ៍បញ្ជូន​ថាមពល​អគ្គិសនី​តង់ស្យុង​២៣០​ គីឡូ​វ៉ុល​ប្រវែង​១១០​គីឡូ​ម៉ែត្រ​ពី​ទីក្រុង​ភ្នំពេញ​ទៅ​កាន់​ទីរួមខេត្ត​កំពង់ចាម។​ ក្រុមហ៊ុន​ម៉ាឡេស៊ី​នេះ​ នឹង​សាង​សង់​ខ្សែ​បញ្ជូន​ថាមពល​អគ្គិសនី ​ដែល​ត្រូវ​បាន​ប្រើប្រាស់​ដោយ​ក្រុមហ៊ុន​អគ្គិសនី​របស់​រដ្ឋ​ Electricite ​du ​Cambodge ​(EDC)។

កិច្ច​ព្រមព្រៀង​នេះ​បាន​តម្រូវ​ឱ្យ​រដ្ឋា​ភិបាល​កម្ពុជា​ផ្តល់​នូវ​ការ​ធានា​លើ​ការ​ទូទាត់​ថ្លៃ​ប្រើប្រាស់​ខ្សែ​ បញ្ជូន​អគ្គិសនី​ និង​ការ​ទូទាត់​ថ្លៃ​ទិញ​មធ្យោបាយ​គម្រោង​ ​ក្នុង​ករណី​ដែល​ក្រុមហ៊ុន​មិន​អាច​អនុវត្ត​ គម្រោង​បាន​ ដែល​បណ្តាល​មក​ពី​ព្រឹត្តិការណ៍​ប្រធាន​សក្តិ​ផ្នែក​នយោបាយ។

ក្រោម​កិច្ច​ព្រមព្រៀង​នេះ​ ក្រុមហ៊ុន​អគ្គិសនី​រដ្ឋ​EDC​នឹង​បង់​ឱ្យ​ក្រុមហ៊ុន​ម៉ាឡេស៊ី​ចំនួន​២០,៥​លាន​ ដុល្លារ​អាមេរិក​ក្នុង​១​ឆ្នាំ ​សម្រាប់​ថ្លៃ​បញ្ជូន​ថាមពល​អគ្គិសនី​ទៅ​កាន់​ខេត្ត​កំពង់ចាម​ពី​ទីក្រុង​ភ្នំពេញ​ និង​មាន​រយៈ​ពេល​សម្បទាន​២៨​ឆ្នាំ​ រួមមាន​ការ​សាងសង់​រយៈ​ពេល​៣​ឆ្នាំ​និង​ធ្វើ​អាជីវ​កម្ម​២៥​ឆ្នាំ។

លោក​គាត ឈន់​ រដ្ឋ​មន្ត្រី​ក្រសួង​សេដ្ឋកិច្ច ​និង​ហិរញ្ញ​វត្ថុ ​បាន​បញ្ជាក់​ថា​ គ្រប់​ភូមិ​ទាំងអស់​នៅ​ កម្ពុជា​និង​មាន​អគ្គិសនី​ប្រើប្រាស់​នៅ​ក្នុង​ឆ្នាំ​២០២០។

លោកជាម យៀប ​ប្រធាន​គណៈ​កម្មការ​សេដ្ឋកិច្ច​ និង​ហិរញ្ញ​វត្ថុ​នៃ​រដ្ឋសភា​បានថ្លែង​ថា​ ​កិច្ច​ព្រម ព្រៀង​នេះ​មាន​សារៈ​សំខាន់​ណាស់​សម្រាប់​ជំរុញកំណើន​សេដ្ឋ​កិច្ច ​និង​ការ​កាត់​បន្ថយ​ភាព​ក្រីក្រ​ ហើយ​រដ្ឋា​ភិបាល​នឹង​ទទួល​បាន​ចំណូល​ពន្ធ​៣,៥​លាន​ដុល្លារ​អាមេរិក​ក្នុង​១ឆ្នាំ។

"រាជ​រដ្ឋា​ភិបាល​កម្ពុជា​ខិតខំ​ទាក់ទាញ​រក​អ្នក​វិនិយោគ​ទុន​បរទេស​ឱ្យ​មក​ធ្វើការ​បណ្តាក់​ទុន​វិនិយោគ​លើ​វិស័យ​ថាមពល​អគ្គិសនី​នេះ​ឱ្យ​បាន​ច្រើន​តាម​រយៈ​ការ​លើក​ទឹកចិត្ត​ និង​ផ្តល់​ទំនុក​ចិត្ត​ ដល់​អ្នក​វិនិយោគ​ទុន ដោយ​មាន​ការ​ធានា​លើ​កិច្ច​ព្រមព្រៀង​ដែល​បាន​ធ្វើ​ឡើង​រវាង​រាជ​រដ្ឋា​ភិបាល​កម្ពុជា​នៃ​ព្រះ​រាជាណា​ចក្រ​កម្ពុជា​ ជា​មួយ​ក្រុមហ៊ុន​វិនិយោគ​ដែល​ទាមទារ​ឱ្យ​មាន​ការ​អនុម័ត​យល់ព្រម​ពី​អង្គ​នីតិប្បញ្ញត្តិ"។

លោក​ស្រី​ លី ស្រីវីណា ​តំណាង​រាស្ត្រ​គណ​បក្ស​សម រង្ស៊ី បាន​ថ្លែង​ថា យើង​គាំទ្រ​កិច្ច​ព្រមព្រៀង​ធានា​ទូទាត់​នេះ​ ដើម្បី​លើក​ទឹកចិត្ត​និង​ទាក់ទាញ​អ្នក​វិនិយោគ​ ប៉ុន្តែ​ការ​ដេញ​ថ្លៃ​មិន​មាន​តម្លា​ភាព។

"ពួក​យើង​គាំទ្រ​ឱ្យ​មាន​គម្រោង​អភិវឌ្ឍន៍នៅ​ក្នុង​វិស័យ​ថាមពល​អគ្គិសនី​នេះ​ ដើម្បី​ឱ្យ​ប្រជា​ពលរដ្ឋ​ មាន​អគ្គិសនី​ប្រើប្រាស់​ប្រកប​ដោយ​គុណភាព​និង​តម្លៃ​ថោក។​ ប៉ុន្តែ​ពួក​យើង​មិន​អាច​គាំទ្រ​ទៅ​លើ​ គម្រោង​នេះ​ទេ ​ពីព្រោះ​ក្រុមហ៊ុន​ចំណេញ​ច្រើន​ពេក"។

លោក​ស៊ុយ ​សែម ​រដ្ឋមន្ត្រី​ក្រសួង​ឧស្សាហ​កម្ម​រ៉ែ​ និង​ថាមពល​បាន​ថ្លែង​ថា​ ​ការ​ដេញ​ថ្លៃ​បាន​ធ្វើ​ឡើង​ ជាសាធារណៈ ​ហើយ​ក្រុមហ៊ុន​ចំណេញ​បាន​ប្រមាណ​១៣៦លាន​ដុល្លារ​អាមេរិក​ក្នុង​រយៈ​ពេល​២៥​ឆ្នាំ។

"វារី​អគ្គិសនី​មាន​ច្រើន​មែន​ដែល​រដ្ឋ​សភា​បាន​អនុម័ត​ កំពុង​តែ​ដំណើរ​ការ​សាង​សង់។​ តម្លៃ​អគ្គិសនី​ មិន​អាច​ថោក​បាន​ បើ​វារី​អគ្គិសនី​ទាំង​នោះ​មិន​ទាន់​បាន​ផលិត​អគ្គិសនី​ផង"។

រដ្ឋ​សភា​កម្ពុជា​ធ្លាប់​បាន​យល់ព្រម​លើ​កិច្ច​ព្រមព្រៀង​បែប​នេះ​សម្រាប់​ក្រុមហ៊ុន​សាង​សង់​វារី​អគ្គិសនី​ និង​គគ្រោង​ខ្សែ​បញ្ជូន​ថាមពល​អគ្គិសនី​មួយ​ចំនួន​មក​ពី​ប្រទេស​ចិន។

ពី​ទីក្រុង​ភ្នំពេញ​ ខ្ញុំ​ ជន សក្តា​ VOA ​សំឡេង​ស.រ.អ.។

XS
SM
MD
LG