ភ្ជាប់​ទៅ​គេហទំព័រ​ទាក់ទង

រដ្ឋាភិបាល​ធ្វើ​ជំរឿន​រក​មន្ត្រី​រាជការ​ខ្មោច


មន្ត្រី​រាជការ​ជួប​​ប្រជុំ​ជាមួយ​សង្គម​ស៊ិវិល។

មន្ត្រី​រាជ​ការ​ស៊ីវិល​ខ្មោច​រាប់​ពាន់​នាក់​ត្រូវ​បាន​រក​ឃើញ​នៅ​តាម​ក្រសួង​របស់​រដ្ឋាភិបាល​ ក្នុង​កិច្ច​ខិតខំ​ប្រឹង​ប្រែង​ធ្វើ​កំណែ​ទម្រង់​រដ្ឋបាល​សាធារណៈ។

លោក ​ជន សក្តា ​ជូន​សេចក្តី​រាយ​ការណ៍​ដូច​ត​ទៅ៖

លោក​ ង៉ោ​ ហុងលី ​អគ្គ​លេខាធិការ​ក្រុម​ប្រឹក្សា​កំណែ​ទម្រង់​រដ្ឋបាល​សាធារណៈ​របស់​ទីស្តីការ​គណៈ​រដ្ឋមន្ត្រី ​បាន​ថ្លែង​នៅ​ថ្ងៃ​សុក្រ​នេះ​ថា ​ប្រទេស​កម្ពុជា​បាន​រក​ឃើញ​មន្ត្រី​រាជការ​ស៊ីវិល​ខ្មោច​ប្រមាណ​ ២០០០​នាក់​ក្នុង​យុទ្ធនាការ​ធ្វើ​ជំរឿន​មន្ត្រី​រាជការ​ស៊ីវិល​នៅ​តាម​ក្រសួង​ចំនួន​២៦​ ក្នុង​កិច្ច​ខិតខំ​ប្រឹង​ប្រែង​ពង្រឹង​ការ​គ្រប់​គ្រង​ប្រសិទ្ធិភាព​ និង​គុណភាព​ការងារ​សាធារណៈ។

ជំរឿន​នេះ​បាន​ធ្វើ​ឡើង​ចាប់​តាំង​ពី​ខែមេសា ​ជា​លើក​ទី៣​ ​បន្ទាប់​ពី​ការ​ធ្វើ​ជំរឿន​នៅ​ក្នុង​ឆ្នាំ​ ១៩៩៥​ បាន​រក​ឃើញ​មន្ត្រី​រាជការ​ស៊ីវិល​ខ្មោច​ប្រមាណ​១៨០០០​នាក់​ និង​ប្រមាណ​៩០០០​នាក់​ នៅ​ឆ្នាំ​២០០១។

មន្ត្រី​រាជការ​ខ្មោច​មានន័យ​ថា​ មន្ត្រី​រាជការ​ស៊ីវិល​ដែល​មាន​តែ​ឈ្មោះ​ក្នុង​បញ្ជី​បើក​ប្រាក់​ខែ​ តែ​គ្មាន​មនុស្ស​មក​ធ្វើការ។

លោក​ ង៉ោ ហុងលី​ បាន​បញ្ជាក់​ថា​ ជំរឿន​មន្ត្រី​រាជការ​នេះ​សំដៅ​ពង្រឹង​ការ​គ្រប់គ្រង​មុខងារ​សាធារណៈ​ និងពង្រឹង​ប្រសិទ្ធិ​ភាព ​និង​គុណ​ភាព​នៃ​ការ​ផ្តល់​សេវា​សាធារណៈ​ ឱ្យ​កាន់​តែ​ល្អ​ឡើង​ ដល់​ប្រជា​ពលរដ្ឋ​ ដូចជា​សំបុត្រ​កំណើត​ សំបុត្រ​អាពាហ៍​ពិពាហ៍​ សំបុត្រ​មរណៈភាព​ សំបុត្រ​អនុញ្ញាត​រដ្ឋបាល​ផ្សេងៗ​ ឯកសារ​ពាក់​ព័ន្ធ​និង​យុត្តិធម៌​ ឯកសារ​ពាក់ព័ន្ធ​នឹង​ពាណិជ្ជ​កម្ម ​និង​វិនិយោគ។

"យើង​រៀបចំ​នីតិ​វិធី​កាត់​ចំនួន​បុគ្គលិក​ខ្មោច​នេះ​ចេញ​ពី​ក្រប​ខ័ណ្ឌ ​និង​បញ្ជី​បើក​ប្រាក់​ខែ។​វា​បាន​ផ្តល់​ផល​ចំណេញ​ច្រើន​ខាង​ថវិកា ​ការ​ពង្រឹង​ការ​គ្រប់គ្រង​មន្ត្រី​រាជការ​ ចិត្តសាស្ត្រ​មន្ត្រី​រាជការ​ដែល​ខិតខំ​ធ្វើការ​ និង​ការ​ពង្រឹង​ប្រសិទ្ធិ​ភាព​ការងារ​របស់​យើង"។

លោក​តំណាង​រាស្ត្រ ​យឹម សុវណ្ណ ​អ្នក​នាំពាក្យ​គណបក្ស​សម រង្ស៊ី ​បាន​ថ្លែង​ថា​ មន្ត្រី​រាជការ​ខ្មោច​នេះ​ បាន​ធ្វើ​ឱ្យ​បាត់​បង់​ថវិកា​ជាតិ​រាប់​លាន​ដុល្លារ​អាមេរិក​ក្នុង​១ឆ្នាំៗ។

"យើង​អបអរសាទរ​ចំពោះ​ការ​រក​ឃើញ​មន្ត្រី​រាជការ​ស៊ីវិល​ខ្មោច​នេះ​ ប៉ុន្តែ​ចំនួន​នេះ​នៅតែ​មាន​តិច​នៅ​ឡើយ។​ យើង​ត្រូវតែ​ខិតខំ​ប្រឹងប្រែង​ស្រាវជ្រាវ​បន្ត​ទៀត។​ បើ​តាម​ខ្ញុំ​ដឹង មិនមែន​២០០០​នាក់​ទេ​ មាន​រាប់​ម៉ឺន​នាក់​ដែល​កំពុង​តែ​ បើក​ប្រាក់​ខែ​រដ្ឋ​ ឬ​អ្នក​ដែល​ទទួល​ខុស​ត្រូវ​នៅ​តាម​ស្ថាប័ន​និមួយៗ ​បើក​ប្រាក់​ខែ​យក​ជំនួស​ និង​អនុញ្ញាត​ឱ្យ​មន្ត្រី​រាជការ​ទាំង​នោះ​ ទៅ​ធ្វើការ​នៅ​ខាង​ក្រៅ​ប្រព័ន្ធ​រដ្ឋាភិបាល "។

លោក ​ធន សារ៉ាយ ​ប្រធាន​សមាគម​សិទ្ធិ​មនុស្ស​ ADHOC​ បាន​បញ្ជាក់​ថា​ រដ្ឋាភិបាល​គួរតែ​ជំរុញ​ការងារ​ស្រាវជ្រាវ​រក​មន្ត្រី​រាជការ​ស៊ីវិល​ខ្មោច​ឱ្យ​ខ្លាំង​ក្លា​ថែមទៀត​ ដើម្បី​ជៀសវាង​ការ​បាត់បង់​ថវិកា​ជាតិ ​និង​បង្កើន​តម្លាភាព​ក្នុង​ការ​គ្រប់គ្រង​ថវិកា​ជាតិ។

"ខ្ញុំ​គិត​ថា​ ជាបឋម​ការ​ទទួល​បាន​លទ្ធផល​នេះ​ គឺ​ជា​ការ​ល្អ ​ប៉ុន្តែ​គួរតែ​មាន​បន្ត​ទៅ​ទៀត។​ ជាធម្មតា​ អ្វីៗ​មិន​ល្អ​ឥត​ខ្ចោះ​ទេ​ ប៉ុន្តែ​ការ​សំខាន់​ត្រូវ​ធ្វើ​ឱ្យ​បាន​ជា​ប្រចំា"។

លោក​ ជាម ​យៀប​ ប្រធាន​គណៈ​កម្មការ​សេដ្ឋ​កិច្ច ​និង​ហិរញ្ញ​វត្ថុ​នៃ​រដ្ឋ​សភា បាន​ថ្លែង​ថា​ លទ្ធ​ផល​ជំរឿន​មន្ត្រី​រាជ​ការ​នេះ​បាន​បង្ហាញ​ពី​ភាព​ជឿន​លឿន​ និង​ជោគជ័យ​នៃ​ការ​អនុវត្ត​នៃ​គោល​នយោ​បាយ​កំណែ​ទម្រង់​រដ្ឋបាល​សាធារណៈ​របស់​រដ្ឋាភិបាល។

"យើង​អាច​រក​ប្រភព​ចំណូល​បញ្ចូល​ថវិកា​ជាតិ​ដែល​ចេញ​ពី​ការ​ជំរឿន​នេះ។​ ឥឡូវនេះ​ យើង​បាន​រក​ឃើញ​២០០០​នាក់។​ បើ​យើង​គិត​ថា​ ម្នាក់​ទទួល​បាន​ប្រាក់​១០០​០០០​រៀល​ក្នុង​១​ខែ​ វា​មាន​ចំនួន​ច្រើន​រាប់​លាន​រៀល​សម្រាប់​ចូល​ថវិកា​ជាតិ"។

លោក ​ង៉ោ ហុងលី​ បាន​បញ្ជាក់​ថា​ យើង​នឹង​ចាប់​ផ្តើម​ធ្វើ​ជំរឿន​មន្ត្រី​រាជការ​ស៊ីវិល​នៅ​តាម​រាជ​ធានី-ខេត្ត​ទូទាំងប្រទេស​នៅ​ចុង​ខែមិថុនា ​បន្ទាប់​ពី​បញ្ចប់​ការធ្វើ​ជំរឿន​នៅ​តាម​ក្រសួង។

ពី​ទីក្រុង​ភ្នំពេញ ​ខ្ញុំ ​ជន សក្តា ​VOA ​សំឡេង​ស.រ.អ.៕

XS
SM
MD
LG