ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ទិវា​ចង​កំហឹង​ប្រឆាំង​អំពើ​ប្រល័យ​ពូជ​សាសន៍​នៅ​វាល​ពិឃាត​ជើងឯក


និស្សិត​​កម្ពុជា​កំពុង​សម្តែង​​សិល្បះ​នាទិវា​ចង​កំហឹង​​ប្រឆាំង​​អំពើ​​ប្រល័យ​ពូជ​សាសន៍។​
និស្សិត​​កម្ពុជា​កំពុង​សម្តែង​​សិល្បះ​នាទិវា​ចង​កំហឹង​​ប្រឆាំង​​អំពើ​​ប្រល័យ​ពូជ​សាសន៍។​

ជា​រៀង​រាល់​ឆ្នាំ​នៅ​ថ្ងៃ​ទី​២០​ ឧសភា​ ពលរដ្ឋ​ខ្មែរ​រាប់​រយ​នាក់​ធ្វើ​ដំណើរ​ទៅ​វាល​ពិឃាត​ជើងឯក​ នៅ​ជាយ​ក្រុង​ភំ្នពេញ។ ​នៅ​ទី​នោះ​គេ​រៀបចំពិធី​ឆាក​សម្តែង​ដើម្បី​រំឭក​ដល់​វិញ្ញាណ​ក្ខន្ធ​ជន​រង​គ្រោះ​ដោយ​សារ​ខ្មែរក្រហម។

លោក​ Robert​ Carmichael​ សូម​ជូន​ព័ត៌មាន​នេះ​ពី​ទី​ក្រុង​ភ្នំពេញ​ ​ហើយ​លោក​ពិន ស៊ីសុវណ្ណ​សូម​ជូន​សេចក្តី​ប្រែ​សម្រួល។

នៅ​ប្រទេស​កម្ពុជា ​ ថ្ងៃ​ទី២០​ ខែ​ឧសភា​គឺ​ជា​ទិវា​ចង​កំហឹង។​ វា​ជា​ថ្ងៃ​រំឭក​ដល់​ប្រជា​ពល​រដ្ឋ​ខ្មែរ​រាប់​លាន​នាក់​ ដែល​បាន​ស្លាប់​ក្នុង​របប​ប៉ុល ពត​ ដែល​កាន់​កាប់​ប្រទេស​កម្ពុជាពី​ថ្ងៃ​ទី១៧ ​ខែមេសា ​ឆ្នាំ​១៩៧៥​ដល់​ថ្ងៃ​ទី៧​ ខែមករា​ ឆ្នាំ​១៩៧៩។

មាន​ប្រជាជន​ជាង​១ពាន់​នាក់​បាន​ជួប​ជុំ​គ្នា​នៅ​ឆ្នាំ​នេះ​ នៅ​វិមានអនុស្សាវរីយ៍​វាល​ពិឃាត​ជើងឯក​ នៅ​ជាយ​ក្រុង​ភ្នំពេញ។ ​មាន​ព្រះសង្ឃ​រាប់​រយ​អង្គ​ ​ឥស្សរជន​ និង​ពលរដ្ឋ​ខ្មែរ​ចាស់ៗ​រាប់​ពាន់​នាក់​ចូល​រួម។

កម្មវិធី​សំខាន់​មួយ​ក្នុង​ពិធី​នេះ​គឺ​ការ​សម្តែង​គួរឱ្យក្រៀមក្រំ ​ដោយក្រុម​និស្សិត។​ មាន​តួអង្គ​ជាង​១០​នាក់​ស្លៀកពាក់​ខ្មៅ​សម្តែង​ជា​ទាហាន​ខ្មែរក្រហម​ និងជាង​៣០​នាក់​ទៀត​សម្តែង​ជា​ជន​រងគ្រោះ។

តួអង្គ​ជាខ្មែរ​ក្រហម​ និង​ជន​រងគ្រោះ​បាន​សម្តែង​ ដោយ​មាន​សម្រែក​បញ្ជា​ ស្នូរ​បាញ់​កាំភ្លើង​ សម្រែក​ឈឺ​ចាប់​ និងទឹក​ភ្នែក​ អំពី​ឃាត​កម្ម​នៅប្រទេស​កម្ពុជា។ ឆាក​សម្តែង​នេះ​នៅ​ចម្ងាយ​ប៉ុន្មាន​ម៉ែត្រ​ប៉ុណ្ណោះ​ពី​រណ្តៅ​សាក​សព​រួម ​នៅវាល​ពិឃាតដ៏មាន​ឈ្មោះ​សោចន៍​ ទី​ដែល​គេ​សម្លាប់​មនុស្ស​រាប់​ពាន់​នាក់។

លោក​ប៉ា សុជាតិវង្ស ​ជា ​អភិបាល​រង​រាជ​ធានី​ភ្នំពេញ។ ​លោក​និយាយ​ថា​ ថ្ងៃ២០ ​ខែ​ឧសភា​ត្រូវ​បាន​ជ្រើសរើស​ជា​ថ្ងៃ​ចង​កំហឹង ​ពីព្រោះ​វា​ជា​ថ្ងៃដែល​ខ្មែរក្រហម​អនុវត្ត​នយោបាយ​សម្លាប់​ប្រជាជនកាល​ពី​ឆ្នាំ​១៩៧៦។

«ប្រជាពល​រដ្ឋ​ខ្មែរ​គោរព​អ្នក​ដែល​ត្រូវ​គេ​សម្លាប់​ក្នុង​របប​ប៉ុល ពត។ ​ប៉ុល ​ពត​បាន​ក្បត់​ប្រទេស​កម្ពុជា​ ​ដោយ​យក​ឈាម​ប្រជា​ជន​ធ្វើ​ជា​ទុន ​ ដូច្នេះ​ពល​រដ្ឋ​ខ្មែរ​មាន​កំហឹង​ខ្លាំង​ណាស់​ជា​មួយ​របប​ប៉ុល ពត»។

ការ​សម្តែង​ដោយ​និស្សិត​នេះ​គួរឱ្យ​ព្រឺក្បាល​ ​រំជួល​ចិត្ត​និង​ជាក់​ស្តែង​ខ្លាំង​ណាស់។​ អ្នក​ទស្សនា​ជា​ច្រើន​ក្នុង​ចំណោម​នោះ​បាន​យក​ដៃ​ជូត​ទឹកភ្នែក ​អំឡុង​ពេល​ទស្សនា​ការសម្តែង​រយៈ​ពេល​១៥​នាទី​នេះ។

នៅ​ចុង​បញ្ចប់​សាច់​រឿង​នេះ​ ​មាន​តួ​សម្តែង​ជា​ទាហាន​សម្រុក​ចូល​ដោយ​មាន​កាន់​កាំភ្លើង​ និង​មាន​កាន់​ទង់ជាតិ​ខ្មែរ​ ហើយ​បាន​បណ្តេញ​ពួក​ខ្មែរក្រហម​ចេញ។

ឆាក​ចុង​ក្រោយ​នេះ​សម្តែង​យោង​ដល់​ពេល​ដែល​កង​ទ័ព​វៀតណាម​ ឈ្លាន​ពាន​ប្រទេស​កម្ពុជា​នា​ចុង​ឆ្នាំ​១៩៧៨ ​ ហើយ​ពលរដ្ឋ​កម្ពុជា​ឃើញ​ថា ​ ​វា​ជា​ពេល​ចុងបញ្ចប់​នៃ​ការ​គ្រប់គ្រង​របស់​ខ្មែរ​ក្រហម​នៅ​ប្រទេស​នេះ។

បុរស​ ដែល​បញ្ជូន​ជន​រងគ្រោះ​ជាច្រើន​មក​សម្លាប់​នៅ​វាល​ពិឃាត​ជើង​ឯកនេះ​ ​ត្រូវ​បាន​កាត់ទោស​កាល​ពី​ចុង​ឆ្នាំទៅ​ ពី​បទ​ឧក្រិដ្ឋ​ប្រឆាំង​មនុស្ស​ជាតិ​ និង​ឧក្រិដ្ឋ​សង្គ្រាម។​ ខ្មែរ​ក្រហម​ម្នាក់​នោះ​គឺ​សម​មិត្ត​ឌុច។​ គាត់​បាន​សារ​ភាព​ថា ​បាន​គ្រប់គ្រង​មន្ទីរ ​ស​ ២១​ គុក​ទួល​ស្លែង​ដែល​ជា​មជ្ឈ​មណ្ឌល​ធ្វើ​ទារុណ​កម្ម​និង​ប្រហារ​ជីវិត​ នៅ​ក្នុង​ទីក្រុង​ភ្នំពេញ។​ សាលក្រម​ក្នុង​ការ​កាត់​ទោស​រឿងក្តី​របស់​ឌុច​ទំនង​ជា​នឹង​ចេញ​នៅក្នុង​ពេល​ប៉ុន្មាន​សប្តាហ៍​ខាង​មុខ​នេះ។

បើ​ឌុច​មាន​ទោស​កំហុស​ ដូចគេ​រំពឹ​ទុក​មែន​នោះ​ នោះ​គាត់​នឹង​ជា​អតីត​កម្មាភិបាល​ខ្មែរក្រហម​ត្រូវ​កាត់​ទោស​ដំបូង​គេ​ពី​បទឧក្រិដ្ឋ​ ជា​ច្រើន​នា​សម័យ​នោះ។ ​ នេះ​ជា​ការ​កាត់​ទោស​ជា​ប្រវត្តិ​សាស្ត្រ។

គ្មាន​អ្នក​ណា​ម្នាក់​ដឹង​ច្បាស់​ថា ​ តើ​មាន​ពល​រដ្ឋ​ខ្មែរ​ប៉ុន្មាន​នាក់​ស្លាប់​អំឡុង​ពេល​ខ្មែរក្រហម​កាន់​កាប់​ប្រទេស​កម្ពុជា​ទេ​ ប៉ុន្តែ​គេ​ប៉ាន់​ស្មាន​ថា ​មាន​រវាង​ពី​១​លាន​កន្លះ​ទៅ​បី​លាន​នាក់៕

XS
SM
MD
LG