ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណ​បក្ស​កាន់​អំណាច​ធ្វើ​ពិធី​រំឭក​ទិវា​ចង​កំហឹង


នៅ​ថ្ងៃ​នេះ​ គណ​បក្ស​កំពុង​កាន់​អំណាច​បានដល់​ការ​ស្លាប់​នៃ​ជន​រងគ្រោះ​ក្នុង​សម័យ​ខ្មែរ​ក្រហម​ ដែល​គេ​ហៅ​ពី​មុន​ថា ​ជា​ទិវា​ចង​កំហឹង។​ ក៏​ប៉ុន្ដែ​គណ​បក្ស​ជំទាស់​អះ​អាង​ថា ​ការ​ប្រារព្ធ​នេះ​មិន​ចាំ​បាច់​ទេ។

លោក​ គង់ ​សុឋានរិទ្ធ ​រាយ​ការណ៍​ជូន​ពី​ទី​ក្រុង​ ភ្នំពេញ ​ដូច​ត​ទៅ៖

គណ​បក្ស​ប្រជាជន​កម្ពុជា​បាន​រំឭក​នៅ​ទូទាំង​ប្រទេស​នូវ​វិញ្ញាណ​ក្ខន្ធ​ជន​រងគ្រោះ​ដោយ​របប​ ខ្មែរ​ក្រហម​ តាម​បែប​ព្រះ​ពុទ្ធ​សាសនា​ នៅ​ថ្ងៃ​ព្រហស្បតិ៍​ទី​២០​ ឧសភា​នេះ​ ដែល​កាល​ពី​មុន ​គឺ​ជា​ថ្ងៃ​ទិវា​ ចង​កំហឹងចំពោះ​របប​កាប់​សម្លាប់​របស់​ពួក​ខ្មែរ​ក្រហម​ ដែល​អ្នក​សង្កេត​ការណ៍​លើក​ឡើង​ថា​ ការ​រំឭក​វិញ្ញាណ​ក្ខន្ធ​នេះ​គឺ​ជា​គន្លឹះ​នយោបាយ​មួយ​របស់​គណ​បក្ស​កំពុង​តែ​ក្ដោប​ក្ដាប់​អំណាច​នេះ។

ពួក​ខ្មែរ​ក្រហម ​ដែល​បាន​ឡើង​កាន់​អំណាច​ដោយ​កម្លាំង​យោធា​ ចន្លោះ​ពី​ឆ្នាំ​១៩៧៥​ដល់​ឆ្នាំ​១៩៧៩​ ហើយ​បាន​បង្ក​ឲ្យ​ប្រជាពល​រដ្ឋ​កម្ពុជា​ស្លាប់​បាត់​បង់​ជីវិត​អស់​យ៉ាង​តិច​ចំនួន​១,៧​លាន​នាក់។

លោក​ ខៀវ​ កាញារិទ្ធ ​រដ្ឋ​មន្ដ្រី​ក្រសួង​ព័ត៌មាន​ និង​ជា​អ្នក​នាំ​ពាក្យ​គណ​បក្ស​ប្រជាជន​កម្ពុជា​ លើក​ ឡើង​ថា ​ការ​រំឭក​វិញ្ញាណ​ក្ខន្ធ​ជន​រង​គ្រោះ​ដោយ​របប​ខ្មែរក្រហម​ ដែល​ធ្វើ​ឡើង​ជា​រៀង​រាល់​ឆ្នាំ​ នៅ​ ចំ​ថ្ងៃ​ទី​២០ ​ខែ​ឧសភា​នេះ​ គឺ​ជា​មធ្យោបាយ​មួយ​សម្រាប់​ទប់ស្កាត់​របប​ព្រៃផ្សៃ​ ដូច្នេះ​កើត​ឡើង​សារ​ ជា​ថ្មី​ទៀត។

“យើង​គ្រាន់​តែ​រំឭក​ធ្វើ​ម៉េច​កុំ​ឲ្យ​អតីត​កាល​ត្រឡប់​មក​វិញ។ ​ទី​មួយ​ជា​ការ​ស្វែង​រក​ការ​បង្រួប​បង្រួម​ ជាតិ​ ប៉ុន្ដែ​ទី​ពីរ​ក៏​ត្រូវ​តែ​ឲ្យ​ប្រជាជន​យើង​រំឭក​អំពី​ទំព័រ​ឈឺ​ចាប់​របស់​យើង"។

លោក​ កឹម​ សុខា ​តំណាង​រាស្ដ្រ​មណ្ឌល​កំពង់​ចាម ​និង​ជា​ប្រធាន​គណ​បក្ស​សិទ្ធិ​មនុស្ស​ គិត​ថា​ ប្រជា​ ពល​រដ្ឋ​កម្ពុជា​នៅ​ទូទាំង​ប្រទេស​ ដែល​បាន​ឆ្លង​កាត់​របប​ខ្មែរ​ក្រហម ​មាន​ការ​ឈឺ​ចាប់​ដូចៗ​គ្នា។​ ក៏​ ប៉ុន្ដែ​មធ្យោបាយ​ដ៏​ល្អ​នោះ ​គឺ​ការ​ដោះ​ស្រាយ​តាម​តុលាការ​ គឺ​សាលាក្ដី​ខ្មែរក្រហម​ដែល​កំពុង​ ដំណើរ​ការ​នេះ។

“ការ​ឈឺ​ចាប់​នេះ​គឺ​យើង​ត្រូវ​ធ្វើ​តាម​រយៈ​តុលាការ​អន្ដរ​ជាតិ។​ យើង​ធ្វើ​ម៉េច​ឲ្យ​តុលាការ​អន្ដរ​ជាតិ​នេះ​ ធ្វើ​ឲ្យ​បាន​ត្រឹម​ត្រូវ​ រក​យុត្តិធម៌​ពិត​ប្រាកដ​ជូន​ប្រជា​រាស្ដ្រ​ខ្មែរ​ទៅ។​ អាហ្នឹង​ជា​ការ​ដោះ​ស្រាយ​ ហើយ​បើ​សិន​យើង​ឃើញ​ថា ​របប​ប៉ុលពត​ហ្នឹង​ប្រព្រឹត្ត​អំពើ​រំលោភ​សិទ្ធិ​មនុស្ស​ហើយ​ យើង​អ្នក​ដឹក​នាំ​សម័យ​នេះ​ កុំ​ធ្វើ​អ្វី​ដែល​ប៉ុល ពត​ធ្វើ​ត​ទៅ​ទៀត​ទៅ"។

លោក ​អាន់ឌ្រូ ​ខេលី ​សហ​ព្រះរាជ​អាជ្ញា​សាលាក្ដី​ខ្មែរក្រហម​ មាន​ប្រសាសន៍​ថា ​ការ​ប្រារព្ធ​នេះ​មិន​ មែន​ជា​ផ្នែក​មួយ​នៃ​ការ​ស៊ើប​អង្កេត​នោះ​ទេ​ ​ក៏​ប៉ុន្ដែ​ការ​រំឭក​វិញ្ញាណ​ក្ខន្ធ​ជន​រង​គ្រោះ​នេះ​មាន​សារ​ សំខាន់​ផង​ដែរ​សម្រាប់​ការ​ចងចាំ។

ក្នុង​អំឡុង​ទស​វត្ស​ឆ្នាំ​១៩៨០​ ថ្ងៃ​ទី២០​ ខែ​ឧសភា ​គឺ​ជា​ទិវា​ចង​កំហឹង​ នឹង​ពួក​ខ្មែរក្រហម​ដែល​បាន​ ប្រព្រឹត្ត​ការ​កាប់​សម្លាប់​មក​លើ​ប្រជាពល​រដ្ឋ​កម្ពុជា​ ក៏​ប៉ុន្ដែ​ទិវា​នេះ​ត្រូវ​បាន​គណ​បក្ស​ប្រជាជន​កម្ពុជា​ ប្ដូរ​ទៅ​ជា​ការ​រំឭក​វិញ្ញាណ​ក្ខន្ធ​ជន​រងគ្រោះ​ដោយ​របប​ខ្មែរក្រហម​វិញ ​ក្រោយ​ពី​កិច្ច​ព្រមព្រៀង​ទីក្រុង​ ប៉ារីស​ ខែ​តុលា​ ឆ្នាំ​១៩៩១។

ទោះ​ជា​យ៉ាង​ណា គេ​សង្កេត​ឃើញ​ថា​ ​ ការ​រំឭក​វិញ្ញាណ​ក្ខន្ធ​ជន​រងគ្រោះ​ដោយ​របប​ខ្មែរក្រហម​របស់​ គណ​បក្ស​ប្រជាជន​កម្ពុជា​ នៅ​ឆ្នាំ​នេះ​ ត្រូវ​ដឹក​នាំ​ដោយ​សារ​នយោបាយ។​ ខណៈ​ដែល​ប្រទេស​កម្ពុជា​ គ្រោង​នឹង​រៀបចំ​ធ្វើ​ការ​បោះឆ្នោត​ជ្រើស​រើស​ក្រុម​ប្រឹក្សា​ឃុំ​ ​សង្កាត់​នៅ​ឆ្នាំ​២០១២​ និង​ធ្វើ​ការ​បោះឆ្នោត​ជ្រើស​តាំង​តំណាង​រាស្ដ្រ​នៅ​ឆ្នាំ២០១៣។

នៅ​ក្នុង​ពិធី​រំឭក​វិញ្ញាណ​ក្ខន្ធ​ជន​រងគ្រោះ​ នៅ​សារមន្ទីរ​បឹង​ជើងឯក​ជាយ​ទីក្រុង​ភ្នំពេញ​ កាល​ពី​ព្រឹក​ មិញ​ គណ​បក្ស​ប្រជាជន​ក្រុង ​បាន​ដង្ហែ​ទង់​គណ​បក្ស​ ដែល​មិន​ធ្លាប់​មាន​ការ​បង្ហាញ​ដូច្នេះ​ពី​មុន​មក​ រួម​ទាំង​ការ​ផ្សព្វ​ផ្សាយ​ពី​សារ​នយោបាយ​ដែល​លើក​តម្កើង​គុណ​សម្បត្តិ​គណបក្ស​កាន់​អំណាច។

លោក ​ខៀវ ​កាញារិទ្ធ​ មាន​ប្រសាសន៍​ថា​ ​នេះ​គឺ​ជា​ការ​រៀបចំ​របស់​តំណាង​គណ​បក្ស​ប្រជាជន​ នៅ​ តាម​ទី​កន្លែង​និមួយៗ​តែ​ប៉ុណ្ណោះ។

លោក ​ធន់ ​សារ៉ាយ ​ប្រធាន​អង្គការ​ការពារ​សិទ្ធិ​មនុស្ស ​អាដហុក ​មាន​ប្រសាសន៍​ថា ​ពិធី​រំឭក​ វិញ្ញាណ​ក្ខន្ធ​ ជន​រង​គ្រោះ​ដោយ​របប​ខ្មែរក្រហម​ របស់​គណ​បក្ស​ប្រជាជន​កម្ពុជា​ មាន​គោល​ដៅ​ចង់​ បង្ហាញ​អំពី​សារៈ​ខាន់​នៃ​គណ​បក្ស​កាន់​អំណាច​ ដែល​បាន​ផ្ដួល​រំលំ​ខ្មែរក្រហម​ផង​ និង​ដើម្បី​ទាក់​ ទាញ​ការ​គាំទ្រ​ផ្នែក​នយោបាយ​ផង។ ​ ប៉ុន្ដែ​លោក ​ធន់ សារ៉ាយ ​មាន​ប្រសាសន៍​ថា​ ​ វិធី​សាស្ដ្រ​នេះ​ មិន​សូវ​មាន​ឥទ្ធិ​ពល​ផ្នែក​នយោបាយ​នោះ​ទេ។

“ប៉ុន្ដែ​បើ​ថា ​ឲ្យ​វា​ជា​ប្រយោជន៍​នយោបាយ​ធំ​ដុំ ​ ខ្ញុំ​គិត​ថា​ ​ ដូច​ជា​មិន​សូវ​មាន​ឥទ្ធិពល​ដូច​មុន​ប៉ុន្មាន​ទេ "។

ប្រទេស​កម្ពុជា​ត្រូវ​បាន​រំដោះ​ពី​របប​ខ្មែរក្រហម​ ទាំង​ស្រុង​ នៅ​ថ្ងៃ​ទី​៧ ​ខែ​មករា ​ឆ្នាំ​១៩៧៩។​ ជ័យ​ជំនះ​នេះ​ គឺ​ជា​ឈ្នាន់​មួយ​ដែល​អនុញ្ញាត​ឲ្យ​គណ​បក្ស​ប្រជាជន​កម្ពុជា​យក​មក​ធ្វើ​ការ​ឃោសនា​ សម្រាប់​ស្វែង​រក​សំឡេង​ឆ្នោត​ក្នុង​អំឡុង​ពេល​បោះ​ឆ្នោត​ផង​ដែរ។

ពី​ទី​ក្រុង​ ភ្នំពេញ​ ខ្ញុំ ​គង់ ​សុឋានរិទ្ធ ​វីអូអេ ​សំឡេង​ សរអ៕

XS
SM
MD
LG