ភ្ជាប់​ទៅ​គេហទំព័រ​ទាក់ទង

ផ្ទះ​របស់​ពល​រដ្ឋ​លើ​ដី​មាន​ទំនាស់​ត្រូវ​ឈូល​ឆាយ


​អ្នក​​ភូមិ​ ដែល​បាត់​បង់​ដី​ធ្លី ​កំពុង​បួង​សួង​កុំ​ឱ្យ​បាត់​បង់​ដី​ស្រែ​ចម្ការ​របស់​ខ្លួន។

ក្រុម​ហ៊ុន​របស់​លោក​ឧក​ញ៉ា​លី ​យ៉ុងផាត់ ​ចាប់​ផ្ដើម​ឈូស​ឆាយ​ផ្ទះ​របស់​ប្រជា​ពល​រដ្ឋ​នៅ​លើ​ដី ​មាន​ទំនាស់​នៃ​ឃុំ​អម​លាំង​ ខេត្ត​កំពង់ស្ពឺ។​ ការ​ឈូស​ឆាយ​នេះ​ស្រប​ពេល​ក្រុម​ហ៊ុន​បាន​ដាក់​ពង្រាយ​កម្លាំង​យោធា​បន្ថែម​ទៀត​ដើម្បី​ការ​ពារ​ដី។

លោក​ ហេង​ រស្មី ​រាយ​ការណ៍​ជូន​ដូច​ត​ទៅ៖

ក្រុម​មន្រ្តី​សិទ្ធិ​មនុស្ស​បាន​និយាយ​នៅ​ថ្ងៃ​ច័ន្ទ​នេះ​ថា ​យ៉ាង​តិច​មាន​ផ្ទះ​ប្រជា​ពល​រដ្ឋ​ចំនួន​១​ខ្នង​ ត្រូវ​បាន​ក្រុម​ហ៊ុន​ភ្នំពេញ​SUGAR​របស់​លោក​ឧក​ញ៉ា​លី ​យ៉ុង​ផាត់​ សមា​ជិក​ព្រឹទ្ធ​សភា​ខាង​គណ​បក្ស​គ្រប់​គ្រង​អំណាច​ដ៏​មាន​ឥទ្ធិ​ពល​មួយ​រូប ​បាន​ឈូស​បំផ្លាញ​ខ្ទេច​ខ្ទី​អស់​នៅ​ក្នុង​រឿង​ទំនាស់​ដី​ធ្លី​ដ៏​រ៉ាំរ៉ៃ​មួយ​នៅ​ក្នុង​ឃុំ​អម​លំាង ​ខេត្ត​កំពង់​ស្អឺ។

លោក​អំ​ សំអាត​ មន្រ្តី​ផ្នែក​ស៊ើប​អង្កេត​របស់​អង្គការ​សិទ្ធិ​មនុស្ស​LICADHO​ ដែល​បាន​ចុះ​ទៅ​ដល់​កន្លែង​កើត​ហេតុ ​ក្រោយ​ពី​ក្រុម​ហ៊ុន​បាន​ឈូស​ឆាយ​ផ្ទះ​ប្រជា​ពល​រដ្ឋ​ចំនួន​១​ខ្នង​ កាល​ពី​ថ្ងៃ​សៅរ៍​នោះ​ បាន​លើក​ឡើង​ថា ​ខាង​ក្រុម​ហ៊ុន​និង​បន្ត​ឈូស​ឆាយ​ផ្ទះ​របស់​ប្រជា​ពល​រដ្ឋ​ចំនួន​២០​គ្រួសារ​បន្ថែម​ទៀ។

លោក​អំ ​សំអាត​ បាន​មាន​ប្រសាសន៍​ទៀត​ថា ​ការ​ឈូស​ឆាយ​នេះ​គឺ​ជា​ការ​ខុស​ច្បាប់​ ប្រសិន​ណា​ប្រជា​ពល​រដ្ឋ​មាន​ប្លង់​កាន់​កាប់​កម្ម​សិទ្ធិ​ត្រឹម​ត្រូវ​នោះ។

"ការ​ប្រើ​ប្រាស់​កម្លាំង​ដោយ​គ្មាន​បញ្ជា​ពី​តុលាការ​ គឺ​ជា​រឿង​ខុស​ច្បាប់​ទាំង​ស្រុង​ ហើយ​អ្នក​ ដែល​ប្រព្រឹត្ត​ត្រូវ​តែ​ទទួល​ទោស​ទៅ​តាម​ផ្លូវ​ច្បាប់"។

លោក​ស្រី​នុត ​សារី​ អាយុ​៣៥​ឆ្នាំ​ រស់​នៅ​ភូមិ​អូរ​ពន្លៅ​ ឃុំ​អម​លាំង​ ស្រុង​ថ្ពង​ ខេត្ត​កំពង់​ស្ពឺ​ ដែល​ផ្ទះ​របស់​លោក​ស្រី​ត្រូវ​បាន​ក្រុម​ហ៊ុន​ភ្នំពេញ​SUGAR​ របស់​លោក​ឧកញ៉ា​លី ​យ៉ុង​ផាត់​ បាន​ឈូស​ឆាយ​បំផ្លេច​បំផ្លាញ​នោះ​ បាន​និយាយ​ថា ​លោក​ស្រី​បាន​ទិញ​ដី​នេះ ​តាំង​ពីឆ្នាំ​២០០០​ ដោយ​មាន​ប្លង់​កាន់​កាប់​កម្ម​សិទ្ធិ​ត្រឹម​ត្រូវ​ស្រប​ច្បាប់។

លោក​ស្រី​បាន​លើក​ឡើង​ទៀត​ថា ​ការ​ឈូស​ឆាយ​នេះ​គឺ​ជា​ការ​បំពាន​សិទ្ធិ​រស់​នៅ​របស់​ប្រជា​ពល​រដ្ឋ​ទាំង​បំពាន​ច្បាប់។

"ឃោរឃៅ​ វា​ហួស ​ឃោរ​ឃៅ។​ លោក​ពូ ​ព្រោះ​អី​ចាត់​ទុក​ដូច​ថា​ គាត់​មក​បំពាន​សិទ្ធិ​លើ​កម្ម​សិទ្ធិ​ប្រជា​រាស្រ្ត​ពេក"។

ចំណែក​លោក​ឡោ ​ម៉េង​ អាយុ​៥៤​ឆ្នាំ​ អ្នក​ស្រុក​រស់​នៅ​ភូមិ​អូរ​ពន្លៅ​ ដូច​គ្នា​នោះ​ បាន​និយាយ​ថា ​ផ្ទះ​របស់​លោក​នៅ​ក្នុង​បញ្ជី​ឈូស​ឆាយ​នា​ពេល​ខាង​មុខ​នេះ​ទៀត។

លោក​បាន​មាន​ប្រសាសន៍​ថា ​លោក​និង​សុខ​ចិត្ត​ស្លាប់​ប្រសិន​ណា​បើ​ក្រុម​ហ៊ុន​នេះ​ នៅ​បន្ត​ឈូស​ឆាយ​ដល់​ផ្ទះ​របស់​លោក​នោះ។

"មាន​តែ​ស៊ូ​ងាប់​ ព្រោះ​ខ្ញុំ​វា​ងាប់​អស់​៧​លើក​ហើយ។ ជម្លោះ​លើក​ចុង​ក្រោយ​ឲ្យ​កូន​មក​ដុត​សាក​សព​នៅ​កន្លែង​ដី​ហ្នឹង​តែ​ម្តង"។

លោក​ស្រី​ឈាង​ គឹម​ស៊ុន​ អ្នក​តំណាង​ក្រុម​ហ៊ុន​ភ្នំពេញ ​SUGAR ​របស់​លោក​ឧកញ៉ា ​លី យ៉ុង ផាត់​ បាន​និយាយ​ថា​ ក្រុម​ហ៊ុន​ឈូស​ឆាយ​ផ្ទះ​របស់​ប្រជា​ពល​រដ្ឋ​ណា​ដែល​រំលោភ​បំពាន​សិទ្ធិ​កម្ម​សិទ្ធិ​របស់​ក្រុម​ហ៊ុន​តែ​ប៉ុណ្ណោះ។

"គាត់​អត់​មាន​អី​ជា​សំអាង​ អត់​មាន​ភស្តុតាង​អី​ទាំង​អស់ ​ហើយ​ម្ចាស់​គេ​ ​គេ​មក​កាន់​កម្ម​សិទ្ធិ​គេ។ ​គេ​ឈូស​ឆាយ ​ហើយ​ការ​ឈូស​ឆាយ​នេះ​គឺ​ម្ចាស់​គេ​បាន​ផ្ទេរ​មក​ឲ្យ​ក្រុម​ហ៊ុន​ខ្ញុំ។​ អញ្ចឹង​ខ្ញុំ​ត្រូវ​តែ​ធ្វើ​ទៅ​តាម​សំណូម​ពរ​របស់​ម្ចាស់​ប្លង់​រឹង"។

លោក​ស្រី ​ហាប់ ​ដាំ ​ប្រធាន​ក្រុម​ប្រឹក្សា​ឃុំ​អម​លាំង​វិញ​ បាន​និយាយ​ថា​ លោក​ស្រី​ពុំ​ទាន់​ទទួល​បាន​ដំណឹង​អំពី​ការ​ឈូស​ឆាយ​ផ្ទះ​របស់​ប្រជា​ពល​រដ្ឋ​នៅ​ឡើយ​ទេ​ ក៏​ប៉ុន្តែ​ទោះ​ជា​យ៉ាង​ណា​ក៏​ដោយ​លោក​ស្រី ​និង​ធ្វើ​ការ​ស៊ើប​អង្កេត​ទៅ​លើ​បញ្ហា​នេះ។

"ខ្ញុំ​ដូច​ជា​មិន​បាន​ឮ​ថា​ ឈូស​ប៉ះ​ពាល់​ផ្ទះ​ប្រជា​ពល​រដ្ឋ​ថា ​បើ​ដី​មក​ថ្នល់​នេះ​ មក​ជាប់​មាត់​ថ្នល់​ខ្ញុំទទួល​បាន​ព័ត៌មាន ​ព្រោះ​អី​ជាន់​ប្លង់​គ្នា​អញ្ចឹង​ឈូស​ឆាយ​លើ​ដី​ដែល​ប្លង់​ដែល​គេ​លក់​ឲ្យ​ក្រុម​ហ៊ុន​ណា៎"។

ក្រុម​ហ៊ុន​របស់​លោក​ឧកញ៉ា​ លី ​យ៉ុង​ផាត់ ​ដែល​បាន​ទទួល​ដី​សម្បទាន​សេដ្ឋ​កិច្ច​ពី​រដ្ឋា​ភិបាល​ជាង​៨០០០​ហិកតា​ សម្រាប់​ធ្វើ​ការ​ដាំ​ដើម​អំពៅ​ នៅ​ស្រុង​ថ្ពង​ ខេត្ត​កំពង់​ស្ពឺ​នោះ ​ត្រូវ​បាន​ប្រជា​ពល​រដ្ឋចោទ​ប្រកាន់​ថា ​បាន​ធ្វើ​ឲ្យ​ប៉ះ​ពាល់​ដល់​ដី​កម្ម​សិទ្ធិ​របស់​ពួក​គេ​ចំនួន​១១​ភូមិ ​និង​ជាង​៣០០​គ្រួសារ។

បន្ទាប់​ពី​មាន​ទំនាស់​ដី​ធ្លី​រវាង​ក្រុម​ហ៊ុន​ភ្នំពេញ​SUGAR​ និង​ប្រជា​ពល​រដ្ឋ​នៅ​ស្រុង​អម​លាំង​ ខេត្ត​ ​កំពង់​ស្ពឺ​មក ​យ៉ាង​តិច​ក៏​មាន​ប្រជា​ពល​រដ្ឋ​ចំនួន​២​រូប​ត្រូវ​បាន​ចាប់​ឃុំ​ឃាំង​ ហើយ​ក្រោយ​មក​ត្រូវ​បាន​ដោះ​លែង​មក​វិញ ​ហើយ​បច្ចុប្បន្ន​នេះ​ ក្រុម​ហ៊ុន​បាន​បន្ត​ដាក់​ពង្រាយ​កម្លាំង​យោធា​ជា​ច្រើន​រាប់​សិប​នាក់​ដើម្បី​ការ​ពារ​ដី ​ដែល​មាន​ទំនាស់​នេះ។

ពី​ទី​ក្រុង​ភ្នំពេញ​ ខ្ញុំ​ហេង​ រស្មី​ VOA​ សំឡេង​សហ​រដ្ឋ​អាមេរិក៕

XS
SM
MD
LG