ក្រុមមន្រ្តីខ័ណ្ឌចំការមនបាននិយាយថា លោកឡូ យុយ អភិបាលខណ្ឌចំការមន នៅតែកាន់ តួនាទីដ៏រឹងមាំជាអភិបាលខណ្ឌដដែល បើទោះបីជាមានការព្រមានពីលោកកែប ជុតិមា ថា នឹងដកហូតមុខតំណែងលោកជាអភិបាលខេត្តក៏ដោយ។
កាលពីថ្ងៃអង្គារ៍ ដើមសប្តាហ៍នេះ លោកកែប ជុតិមា អភិបាលក្រុងភ្នំពេញ បានធ្វើការព្រមាន ចំៗថា នឹងដកហូតមុខតំណែងលោកឡូ យុយ ជាអភិបាលខណ្ឌចំការមន ដោយសារតែលោកបានទទួលសំណូកពីក្លឹបកំសាន្តការ៉ាអូខេខុសច្បាប់ នៅក្នុងការឆ្មក់ចូលបង្ក្រាបមួយកាលពីពេលថ្មីៗនេះ នេះបើតាមការចុះផ្សាយនៅក្នុងកាសែតជាភាសាអង់គ្លេសមួយ ដែលមានឈ្មោះថា The Phnom Penh Post។
លោកកែប ជុតិមា អភិបាលក្រុងភ្នំពេញ និងលោកឡុ យុយ អភិបាលខណ្ឌចំការមន នៅថ្ងៃ សុក្រនេះ ពុំអាចស្នើសុំដើម្បីទំនាក់ទំនងបានទេ។ ដោយលោកទាំងពីរបានអះអាងថា កំពុងជាប់រវល់ប្រជុំ។
លោក យឹម សុវណ្ណ អ្នកតំណាងរាស្រ្ត និងជាអ្នកនាំពាក្យគណបក្សប្រឆាំង បាននិយាយចំអក ចំៗ ចំពោះលោកកែប ជុតិមាថា លោកគ្មានជំនឿថា នឹងមានការដោះដូរមុខតំណែងនេះទេ។
លោកយឹម សុវណ្ណ បានលើកឡើងទៀតថា ការលើកឡើងនេះ គ្រាន់តែជាការល្អមើលទេ ក៏ប៉ុន្តែការអនុញាតឲ្យមន្រ្តីក្រោមឱវាទរបស់ខ្លួនប្រព្រឹត្តអំពើពុករលួយ នៅតែមានស្ទើរតែគ្រប់ស្ថាប័ននៅទូទាំងប្រទេស ដោយពុំមានចាត់វិធានការ ដាក់ទោសទណ្ឌទៅតាមផ្លូវច្បាប់ទេ។
"ខ្ញុំចាំមើលថា បើសិនឃើញថា ប្រព្រឹត្តបទល្មើសប៉ុណ្ណឹងហើយ ខុសប៉ុណ្ណឹងហើយមិនមានការដោះដូរទៀត អាហ្នឹងវាជារឿងមួយជាវប្បធម៌អាក្រក់បំផុត។ ហើយខ្ញុំជូនពរថា ធ្វើម៉េចឲ្យវា មានការដោះដូរពិតប្រាកដទៅ ដើម្បីឲ្យវាមានការប្រែប្រួល បើមិនដូច្នោះទេ គឺវាជាគម្រូអាក្រក់សម្រាប់មន្រ្តី ដែលប្រព្រឹត្តបទល្មើសក្រោយៗទៀត"។
ចំណែកលោក រ៉ុង ឈុន ប្រធានក្រុមឃ្លាំមើលកម្ពុជា និងជាប្រធានសមាគមន៍គ្រូបង្រៀន ឯករាជ្យកម្ពុជា បានបញ្ជាក់ថា លោកអត់មានជំនឿទៅលើការព្រមាននេះទេ ហើយការព្រមាននេះ គ្រាន់តែជាការល្អមើលមួយតែប៉ុណ្ណោះ ពុំមានប្រសិទ្ធិភាពអ្វីទេ។
"គ្រាន់តែជាការលម្អដល់សាធារណជន ហើយឲ្យសាធារណជនកោតសរសើរថា ខ្លួនមានទឹក ចិត្តចង់ធ្វើការកែលម្អ ប៉ុន្តែតាមការណ៍ពិតទៅគ្មានចង់ឲ្យកែលម្អគ្មានអីទេ ហើយយើងគិតថា អារឿងនេះ វាមិនមែនជារឿងថ្មីទេ ហើយគ្រាន់តែចេះតែស្រែកៗឲ្យល្អមើល"។
ប៉ុន្មានខែ ដើមឆ្នាំ២០១០នេះ កងរាជអាវុធហត្ថលើផ្ទៃប្រទេសរបស់ប្រទេសកម្ពុជា បានចាប់ ផ្តើមចុះបង្រ្កាបទីតាំងលេងល្បែងខុសច្បាប់ កន្លែងជួញដូរថ្នាំញៀនស្រវឹង និង កន្លែងជួញដូរផ្លូវភេទ ជាដើម។
លោកវីរៈសេនីយ៍ឯកខេន សុវណ្ណ មេបញ្ជាការរង និងជាប្រធានមន្ទីរស្រាវជ្រាវយុត្តិធម៌នៃកង រាជអាវុធហត្ថក្រុងភ្នំពេញ បាននិយាយថា ចាប់តាំងពីបើកយុទ្ធនាការបង្រ្កាប កាលពីដើមខែ មិនាមន្លងទៅនេះ យើងបានឃាត់ខ្លួនមនុស្សចំនួន២៧នាក់ និងបានឃុំខ្លួននៅក្នុងពន្ធនាគារព្រៃសចំនួន២០នាក់ និង៧នាក់ផ្សេងទៀតកំពុងស៊ើបសួរនៅក្នុងតុលាការនៅឡើយ។
លោកខេន សុវណ្ណ បានបញ្ជាក់ថា យើងនឹងបន្តយុទ្ធនាការបង្រ្កាបនេះតទៅទៀត។
"ធ្វើបន្ត ធ្វើម៉េច២០១០ធ្វើតែម្តង។ ឥឡូវហ្នឹង ខ្ញុំកំពុងតែចុះប្រើបណ្តាញភ្នាក់ងារខ្ញុំ កម្លាំងខ្ញុំធ្វើ ស្លៀកពាក់ជាស៊ីវិលទៅគ្រប់ទីតាំងអស់ហើយ ទាំង៨ខណ្ឌ ៧៦សង្កាត់"។
លោកនាយករដ្ឋមន្រ្តីហ៊ុន សែនបានយកឆ្នាំ២០១០ ជាឆ្នាំនៃយុទ្ធនាការបង្រ្កាបការជួញដូរ មនុស្ស បនល្បែងស៊ីសង និងការជួញដូរថ្នាំញៀនគ្រប់ប្រភេទ។