ភ្ជាប់​ទៅ​គេហទំព័រ​ទាក់ទង

បច្ចេក​ទេស​ដាំ​ការ៉ុត​ឱ្យ​មាន​មើម​ល្អ


បន្លែ​ស្រស់ៗដែល​រួម​មានការ៉ុត​ ​សុទ្ធ​តែ​​ល្អ​សម្រាប់​​សុខភាព។

អ្នក​ស្រី​នុច​ សារីតា​ ប្រែ​សម្រួល​សេចក្តី​រាយ​ការណ៍​ពិសេស​អំពី​កសិកម្មនេះ៖

ថ្ងៃ​នេះ​យើង​ខ្ញុំ​នឹងណែ​នាំ​លោក​អ្នក​អំពី​របៀប​ដាំ​មើម​ការ៉ុត។​ មើម​ការ៉ុត​ងាយ​ស្រួលនឹង​ដាំ​ដុះ​និង​ងាយ​នឹង​ប្រមូល​ផល​។​ ការ៉ុត​មាន​រស​ជាតិ​ឆ្ងាញ់​ ហើយ​មើម​ការ៉ុត​មាន​ជាតិ ​Carotene ច្រើន​ ដែល​រាង​កាយ​មនុស្ស​យើង​ចម្រាញ់​ទៅ​ជា​ Vitamine A ។​ Carotene​គឺ​ជា​សារ​ជាតិ​ពណ៌​លឿង​ទុំ​ក្នុង​បន្លែ​មាន​ដូច​ជា​ការ៉ុត​ ល្ពៅ​ ដំឡូង​ពណ៌​លឿង​ ម្ទេស​ ក្រហម​ជាដើម​ ដែល​មាន​ប្រយោជន៍​ជួយ​ឲ្យ​ភ្លឺ​ភ្នែក​ និង​កាត់​បន្ថយ​គ្រោះ​ថ្នាក់​មហា​រីក​សួត។

នៅ​ពេល​មនុស្ស​គិត​ពី​មើម​ការ៉ុត ​ គេ​តែង​មាន​អារម្មណ៍​នឹក​ទៅ​ដល់​រូប​ភាព​បន្លែ​ដែលមាន​រាង​វែង​ ស្តើង​និង​ពណ៌​លឿង​ទុំ។​ ក៏​ប៉ុន្តែ​មើម​ការ៉ុត​មាន​ខ្នាត​និង​សណ្ឋាន​ខុសៗ​គ្នា ហើយ​មិន​មែន​គ្រប់​មើម​ការ៉ុត​ទាំង​អស់​មាន​ពណ៌​លឿង​ទុំទេ។

ឧទាហរណ៍ ​មើម​ការ៉ុត​នៃ​ទី​ផ្សារ​ក្រុង​ប៉ារីស​មាន​ទំហំ​ខ្លួន​ប្រមាណ​៥​សង់​ទីម៉ែត្រ។​ ពួក​មើម​ការ៉ុត​ឈ្មោះ ​Imperator ​មាន​រាង​ស្តើង​និង​មាន​ប្រវែង​ប្រមាណ​២៥​សង់​ទីម៉ែត្រ។​ ចំណែក​មើម​ការ៉ុត​ពណ៌​ស​របស់ ​Belgique​ វិញ ​មាន​ពណ៌​ស​ដូច​ឈ្មោះ​ដែល​ហៅ។

ដើម្បី​លទ្ធ​ផល​ល្អ​ មើម​ការ៉ុត​គួរ​ដាំ​ក្នុង​ដី​ខ្សាច់​ដែល​មិន​បៀម​ទឹក​យូរ។​ ដី​ដែល​ដាំ​នោះ​ក៏​មិន​ត្រូវ​មាន​ដុំ​ថ្ម​ដែរ។

ដើម្បី​រៀប​ចំ​សួន​ដាំ​មើម​ការ៉ុត​ លោក​អ្នក​ត្រូវ​ជីក​គាស់​ដី​និង​ត្រឡប់​ដី​ឲ្យ​ធូរ។​ បន្ទាប់​មក​ ច្របល់​ដី​ជា​មួយ​នឹង​កម្ទេច​ឈើ​ឬ​ជីរ​ធម្មជាតិ​ធ្វើ​ពី​លាមក​សត្វ។

ធាតុ​អាកាស​ ស្ថាន​ភាព​និង​អាយុ​ដី​នឹង​មាន​ឥទ្ធិ​ពល​ដល់​រស​ជាតិ​មើម​ការ៉ុត។​ ក្រុម​អ្នក​ជំនាញ​ការ​និយាយ​ថា ​ថ្ងៃ​ក្តៅ​ យប់​ត្រជាក់​ និង​សីតុណ្ហ​ភាព​ដី​មធ្យម​ ជា​ស្ថាន​ភាព​ ប្រសើរ​បំផុត​សម្រាប់​ការ​ដាំ​មើម​ការ៉ុត​ឲ្យ​មាន​រស​ជាតិ​ឆ្ងាញ់។

មើម​ការ៉ុត​ត្រូវ​ការ​ពេល​ដើម្បី​ធ្វើ​ឲ្យ​លូត​លាស់​រស​ជាតិ​ស្កររ​ពេញ​លេញ។​ ជាតិ​ស្ករ​នេះ​ផ្តល់​រស់​ជាតិ​មើម​ការ៉ុត​ឲ្យ​ផ្អែម​ឆ្ងាញ់។​ បើ​ប្រមូល​ផល​ឆាប់​ពេក​ មើម​ការ៉ុត​នឹង​មិន​មាន​ ជាតិ​ស្ករ​គ្រប់​គ្រាន់​ទេ។​ ក៏​ប៉ុន្តែ​មើម​ការ៉ុត​អស់​រស​ជាតិ​ផ្អែម​ ប្រសិន​បើ​ទុក​វា​យូរ​ពេក​ ក្រដក​ចេញ​ពី​ដី។

វិធី​ប្រសើរ​បំផុត​ដើម្បី​ស្មាន​ថា​ មើម​ការ៉ុត​ដល់​ពេល​ដក​ហើយ​ឬ​នៅ​នោះ​គឺ​គេ​មើល​ ពណ៌​របស់​វា ជា​ធម្មតា​ បើ​មើម​ការ៉ុត​មាន​ពណ៌​កាន់​តែ​ភ្លឺ​ថ្លា​ ការ៉ុត​នោះ​កាន់​តែ​ឆ្ងាញ់។

មនុស្ស​ជា​ច្រើន​មិន​ដឹង​ថា​ មើម​ការ៉ុត​អាច​ដាំ​ដុះ​បាន​នៅ​ក្នុង​ខែ​នៃ​រដូវ​រងារ​ទេ។​ ប្រសិន​បើ​សិសិរ​រដូវ​មិន​ត្រជាក់​គ្រប់​គ្រាន់​រហូត​ដល់​កក​ដី​ទេ​នោះ​ នោះ​លោក​អ្នក​អាច​ដាំ​ និង​ប្រមូល​ផល​មើម​ការ៉ុត​តាម​វិធី​ដូច​គ្នា​នឹង​នៅ​ក្នុងរដូវ​ក្តៅ​ដែរ។

ប្រសិន​បើ​ដី​ត្រជាក់​នៅ​ក្នុង​តំបន់​លោក​អ្នក​ជា​ការ​ងាយ​ស្រួល​ លោក​អ្នក​គ្រប​ ចម្ការ​ការ៉ុត​ដោយ​ស្លឹក​ឈើ ​ឬ​ចំបើង​ឲ្យ​បាន​ស្រទាប់​ក្រាស់។ ធ្វើ​ដូច​នេះ​អាច​ការ​ពារ​ដី​កុំឲ្យ​កក​បាន។​ លោក​អ្នក​អាច​ដក​យក​គម្រប​ស្លឹក​ឈើ​ ឬ​ចំបើង​ចេញ​បាន​ ហើយ​ប្រមូល​ ភោគ​ផល​ខណៈ​ដែល​ជា​ការ​ចាំ​បាច់​ត្រូវ​ប្រមូល។

មើម​ការ៉ុត​ជា​បន្លែ​ដ៏​មាន​ប្រជា​ប្រីយ៍​បំផុត​មួយ​របស់​ពិភព​លោក។​ ការ៉ុត​អាច​ចម្អិន​ និង​ធ្វើ​ម្ហូប​បាន​ច្រើន​មុខ ឬ​ បើ​បាន​លាង​ឲ្យ​ស្អាត មើម​ការ៉ុត​នេះ​អាច​ទទួល​បាន​ភ្លាមៗ​ពេល​ទើប​ដក​ចេញ​ពី​ដី៕

XS
SM
MD
LG