ភ្ជាប់​ទៅ​គេហទំព័រ​ទាក់ទង

ប្រាក់​ចំណូល​ជាតិ​នៅ​តាម​ច្រក​ព្រំ​ដែន​បាត់​បង់​នៅ​ក្នុង​អំពើ​ពុក​រលួយ


វត្ត​នៅ​ប៉ៃលិន​ តាម​ផ្លូវ​ទៅ​ព្រំដែន​ជាមួយ​ថៃ។​

ប្រាក់​ចំណូល​ជាតិ​នៅ​តាម​ច្រក​ព្រំដែន​អន្តរ​ជាតិ​ជាប់​ជា​មួយ​ប្រទេស​ថៃ​ ឡាវ​ និង​វៀតណាម​ នៅ​តែ​មាន​ការ​បាត់​បង់​នៅ​ក្នុង​អំពើ​ពុក​រលួយ។

តំណាង​រាស្ត្រ​គណ​បក្ស​គ្រប់​គ្រង​អំណាច​លោក​ ជាម​ យៀប ​បាន​សរ​សេរ​បណ្តឹង​តវ៉ា​ ជូន​ លោក​នាយក​រដ្ឋ​មន្ត្រី​ ហ៊ុន​ សែន​ អំពី​ចំនួន​មន្ត្រី​បំពេញ​ការ​ងារ​ចម្រុះ​ច្រើន​ជ្រុល​ពេក​ នៅ​តាម​ ច្រក​ព្រំដែន​អន្តរ​ជាតិ​ដែល​អាច​ធ្វើ​ឱ្យ​បាត់​បង់​ប្រាក់​ចំណូល​ជាតិ​ទៅ​ក្នុង​អំពើ​ពុក​រលួយ។

ការ​កត់​សម្គាល់​នេះ​បាន​ធ្វើ​ឡើង​ បន្ទាប់​ពី​លោក​បាន​ចុះ​ទៅ​ត្រួត​ពិនិត្យ​នៅ​តាម​ច្រក​ព្រំដែន​ អន្តរ​ជាតិ​មួយ​ចំនួន​ ដូច​ជា​ច្រក​ព្រំដែន​អន្តរ​ជាតិ​ប៉ោយ​ប៉ែត​ កំពង់​ផែ​អន្តរ​ជាតិ​ខេត្ត​ព្រះ​សីហនុ​ ច្រក​ព្រំដែន​អន្តរ​ជាតិ​នៅ​អូរ​ស្វាយ​ខេត្ត​ស្ទឹង​ត្រែង​ និង​ច្រក​ព្រំដែន​អន្តរ​ជាតិ​ស្មាច់​ខេត្ត​កំពង់​ ចាម​ កាល​ពី​ពេល​ថ្មីៗ​នេះ។

លោក​ជាម​ យៀប​ បាន​បញ្ជាក់​នៅ​ក្នុង​បទ​សម្ភាសន៍​ជា​មួយ ​VOA​ នៅ​ក្នុង​ការិយា​ល័យ​របស់​ លោក​កាល​ពី​ថ្ងៃ​ព្រហស្បតិ៍​ថា​ ច្រក​ព្រំដែន​អន្តរ​ជាតិ​និមួយៗ​ មាន​បែប​បទ​រដ្ឋ​បាល​ច្រើន​ និង​ មាន​ក្រុម​អាជ្ញា​ធរ​ចម្រុះ​បម្រើ​ការ​ច្រើន​ជាង​១០០០នាក់​ ពី​មន្ត្រី​ប៉ូលិស​ យោធា​ គយ​ កាំកុង ត្រូល​ និង​អាជ្ញាធរ​មូល​ដ្ឋាន។

លោក​ ជាម​ យៀប ​បាន​បន្ថែម​ថា ​ការ​ប្រមូល​ផ្តុំ​ថវិកា​ពី​ប្រភព​ចំណូល​ជាតិ​ តែង​តែ​របេះ​ទៅ​ តាម​ការ​រពឹស​ដៃ​របស់​បុគ្គល​មួយ​ចំនួន​តូច ​ដែល​កំពុង​តែ​អនុវត្ត​ការ​ងារ​នៅ​តាម​ច្រក​ព្រំដែន​ អន្តរ​ជាតិ​ទាំង​នោះ។

"ច្រក​ប៉ោយ​ប៉ែត​ មាន​យោធា​ការ​ពារ​ព្រំដែន​ យោធា​ការ​ពារ​មាតុ​ភូមិ ​ប៉ូលិស​អន្តោ​ប្រវេសន៍​ ប៉ូលិស​សេដ្ឋ​កិច្ច​ ប៉ូលិស​ចរាចរណ៍​ និង​ប៉ូលិស​តំណាង​ឱ្យ​អគ្គ​ស្នង​ការ​ ខេត្ត​ ស្រុក​ និង​ឃុំ ​ព្រម​ទាំង​សមត្ថ​កិច្ច​ជា​ច្រើន​ផ្សេងៗ​ទៀត​ សរុប​ជាង​១០០០​នាក់។ ​មន្ត្រី​ជាង​១០០០​នាក់​រពឹស​ ដៃ​ម្នាក់​តែ​៥​បាត​ ឬ​១០០០០​រៀល ​ឬ​៥០០០រៀល​ ដើម្បី​បរិភោគ។​ វា​ក៏​អស់​ច្រើន​ដែរ»។

លោក​ស៊ុម​ ចាន់​គា ​មន្ត្រី​សម្រប​សម្រួល​នៃ​សមាគម​សិទ្ធិ​មនុស្ស​ Adhoc​ បាន​ថ្លែង​ថា "យើង​ឱ្យ​ឈ្មោះ​សកម្ម​ភាព​របស់​ក្រុម​មន្ត្រី​ថា​ យក្ស​ចុះ​ស៊ី​កំពឹស​ ឬ ​ត្រី​ក្អាត។​ យើង​ឃើញ​ថា​ ត្រី ក្អាត​តូច​តាច​ប្រៀប​បាន​នឹង​អ្នក​អូសរ​ទេស​ដែល​មាន​តម្លៃ​១០០០​រៀល ​ឬ ​២០០០​រៀល​ មិន​ត្រូវ​បាន​លើក​លែង​ឱ្យ​ដែរ"។

លោក​ស៊ុម ​ចាន់គា​ បាន​ថ្លែងថា​ ក្រុម​មន្ត្រី​ចម្រុះ​ មក​ពី​ស្ថាប័ន​យោធា​ ប៉ូលិស ​ភ្នាក់​ងារ​គយ​ ភ្នាក់​ងារ​កាំកុងត្រូល​ និង​មន្ត្រី​មូល​ដ្ឋាន​ បាន​អង្គុយ​ប្រចាំ​ទារ​ប្រាក់​ពី​ពួក​អ្នក​ដឹក​ទំនិញ​ឆ្លង​កាត់​ព្រំដែន​ពី​ប្រទេស​ថៃ​ចូល​មក​កម្ពុជា​ និង​ពី​កម្ពុជា​ចូល​ទៅ​ថៃ។

លោក​ចៅ​ វាសនា​ អ្នក​ជំនួញ​ម្នាក់ ​បាន​បញ្ជាក់​ថា​ លោក​បាន​ទិញ​ត្រី​ខ​កំប៉ុង​ ទឹក​ម្ទេស​ ទឹក​ស៊ី ​អ៊ីវ​ ទឹក​ក្រូច​ ថង់​ប្លាស្ទិក​ ទឹក​ក្រូច​ និង​ទឹក​បរិសុទ្ធ​ ពី​ប្រទេស​ថៃ​ យក​មក​លក់​នៅ​ក្នុង​ប្រទេស​ កម្ពុជា​ ដោយ​ត្រូវ​ចំណាយ​ប្រាក់​ក្រៅ​ផ្លូវ​ការ​១០០០០​រៀល ​ស្មើ​នឹង​២,៥ដុល្លារ​អាមេរិក​ក្នុង​១​លើក​ទៅ​ឱ្យ​ក្រុម​អាជ្ញា​ធរ​ជា​ច្រើន​នៅ​ច្រក​ព្រំដែន​អន្តរ​ជាតិ​នេះ។

លោក​អាន​ វណ្ណៈ​ អភិ​បាល​រង​ក្រុង​ប៉ោយ​ប៉ែត​ បាន​ថ្លែង​ថា ​ចំនួន​មន្ត្រី​ធ្វើ​ការ​នៅ​ច្រក​ព្រំដែន​ អន្តរ​ជាតិ ​មន្ត្រី​យោធា​ការ​ពារ​ព្រំ​ដែន​ និង​មន្ត្រី​ច្រក​ឆ្លង​កាត់​តូច​នៅ​តាម​ព្រំដែន​ជា​ច្រើន​ទៀត​ អាច​មាន​ចំនួន​ជាង​១០០០​នាក់។

លោក​ជាម​ យៀប​បាន​ស្នើ​សុំ​ទៅ​លោក​នាយក​រដ្ឋ​មន្ត្រី​ហ៊ុន​ សែន​ និង​លោក​រដ្ឋ​មន្ត្រី​ក្រសួង​ ពាក់​ព័ន្ធ​ទាំង​អស់​ឱ្យ​កាត់​បន្ថយ​ចំនួន​មន្ត្រី​នៅ​តាម​ច្រក​ព្រំដែន​អន្តរ​ជាតិ ​ឱ្យ​មក​នៅ​ត្រឹម​ចំនួន​ ពាក់​កណ្តាល ​ដើម្បី​ជៀស​វាង​ការ​បាត់​បង់​ចំណូល​នៅ​តាម​ច្រក​ព្រំដែន​អន្តរ​ជាតិ​ទាំង​នេះ៕

XS
SM
MD
LG