ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សាលាក្ដី​ខ្មែរ​ក្រហម​មិនដោះ​លែងអតីត​មេ​ដឹកនាំ​ខ្មែរ​ក្រហម​នៅ​ក្រៅ​ឃុំ​ទេ


សាលាក្ដី​ខ្មែរ​ក្រហម​បាន​បដិសេធ​ការ​ស្នើ​សុំ​ឲ្យ​ដោះ​លែង​អតីត​មេ​ដឹកនាំ​ខ្មែរ​ក្រហម​សំខាន់ៗ​ ចំនួន​បី​នាក់​ជា​បណ្ដោះ​អាសន្ន​ ដោយ​សំអាង​ថា​ លើ​មូល​ហេតុ​ចាំ​បាច់​សម្រាប់​ការ​កាត់​ទោស។

អតីត​មេ​ដឹក​នាំ​កំពូលៗ​ខែ្មរ​ក្រហម​ដែល​កំពង់​រង់​ចាំ​ការ​កាត់​ទោស ​គឺ​អៀង​ សារី​ ខៀវ​ សំផន​ និង​អៀង​ ធីរិទ្ធ​មិន​អាច​ស្ថិត​នៅ​ក្រៅ​មន្ទីរ​ឃុំ​ឃាំង​ជា​បណ្ដោះ​អាសន្ន​ទេ។

អង្គ​បុរេ​ជំនុំ​ជម្រះ​របស់​សាលាក្ដី​ខ្មែរ​ក្រហម​បាន​សម្រេច​យ៉ាង​ដូច្នេះ​នៅ​ថ្ងៃ​សុក្រ​នេះ​ បន្ទាប់​ពី​បាន​បើក​សវនា​ការ​ជា​បន្ដ​បន្ទាប់​កាល​ពី​ចុង​ឆ្នាំ​២០០៩​ និង​ដើម​ឆ្នាំ​ ២០១០​នេះ​លើ​បណ្ដឹង​ឧទ្ធរណ៍​ប្រឆាំង​ទៅ​នឹង​សេចក្ដី​សម្រេច​បន្ដ​ការ​ឃុំ​ខ្លួន​ជន​ជាប់​ចោទ​សង្ស័យ​ ដែល​មាន​វ័យ​ចំណាស់​ទាំង​បី​នាក់​នេះ​ ពី​សំណាក់​សហ​ចៅ​ក្រម​ស៊ើប​អង្កេត។

លោក​ចៅ​ក្រម​ប្រាក់ ​គឹមសាន​ ប្រធាន​អង្គ​បុរេ​ជំនុំ​ជម្រះ​ បាន​ប្រកាស​សាល​ដីកា​សម្រាប់​ជន​ជាប់​ចោទ​ទាំង​បី​ ម្ដង​មួយៗ ​ដាច់​ដោយ​ឡែកពី​គ្នា។

“អង្គ​បុរេ​ជំនុំ​ជម្រះ​សម្រេច​ជា​ឯក​ឆន្ទ​តម្កល់​ដីកា​សម្រេច​ពន្យារ​ថេរ​វេលា​នៃ​ការ​ឃុំ​ខ្លួន​របស់​សហ​ចៅ​ក្រម​ស៊ើប​អង្កេត ​បដិសេធ​បណ្ដឹង​ឧទ្ធរណ៍​នេះ​ចោល​ជា​អសាបង់។​ សាល​ដីកា​នេះ​បិទ​ផ្លូវ​តវ៉ា"។

សូម​បញ្ជាក់​ថា ​សាលាក្ដី​ខ្មែរ​ក្រហម​អាច​ធ្វើ​ការ​ពន្យារ​ពេល​ការ​ឃុំ​ខ្លួន​ជន​សង្ស័យ​មួយ​ឆ្នាំ​ម្ដងៗ​ត្រឹម​តែ​បី​ឆ្នាំ​តែ​ប៉ុណ្ណោះ​ ហើយ​នេះ​គឺ​ជា​ការ​ពន្យារ​ពេល​ការ​ឃុំ​ខ្លួន​បណ្ដោះ​អាសន្ន​ ជន​ជាប់​ចោទ​ទាំង​បី​ជា​ចុង​ក្រោយ​ ខណៈ​ដែល​ការ​ឃុំ​ខ្លួន​បណ្ដោះ​អាសន្ន​នេះ​ត្រូវ​ដល់​ទី​បញ្ចប់​នៅ​ចុង​ឆ្នាំ​២០១០​នេះ។

នៅ​ក្នុង​សាល​ដីកា​នេះ​ អង្គ​បុរេ​ជំនុំ​ជម្រះ​បាន​យល់​ឃើញ​ថា​ វិធាន​ការណ៍​នៃ​ការ​បន្ដ​ថេរ​វេលា​នៃ​ការ​ឃុំ​ខ្លួន​បណ្ដោះ​អាសន្ន​នៅ​តែ​ជា​វិធាន​ការណ៍​ចាំ​បាច់​ដើម្បី​រារាំង​ជន​ត្រូវ​ចោទ​មិន​ឲ្យ​ដាក់​ ការ​កៀប​សង្កត់​ ទៅ​លើ​សក្សី ​ឬ​បំផ្លាញ​ភស្ដុតាង។​ លើស​ពី​នេះ​ទៀត​គឺ​ ដើម្បី​ធានា​ឲ្យ​មាន​វត្តមាន​របស់​ជន​ជាប់​ចោទ​ក្នុង​ការ​កាត់​ទោស ​ដើម្បី​ការ​ពារ​សុវត្ថិ​ភាព​ជន​ត្រូវ​ចោទ​ និង​រក្សា​ សណ្ដាប់​ធ្នាប់​សាធារណៈ។​ ម្យ៉ាង​វិញ​ទៀត ​អង្គ​បុរេ​ជំនុំ​ជម្រះ​បាន​រក​ឃើញ​ថា ​ជន​ជាប់​ចោទ​ទាំង​បី​បាន​ប្រព្រឹត្ត​ឧក្រិដ្ឋ​កម្ម​ធ្ងន់​ធ្ងរ។

លោក ​អាង ​ឧត្តម​ សហ​មេធាវី​ការ​ពារ​ក្ដី​របស់​អៀង​ សារី​ ចាត់​ទុក​ថា ​នេះ​គឺ​ជា​អំណះ​អំណាង​ ដដែលៗ​របស់​អង្គ​បុរេ​ជំនុំ​ជម្រះ។

“រឿង​ដដែល។ ​គាត់​អត់មាន​ពិចារណា​មើល​ស្ថាន​ភាព​របស់​ជន​ត្រូវ​ចោទ​ផង។​ សាក​ល្បង​សិន​ទៅ​ ពេល​ខ្ញុំ​ស្នើ។​ បើ​មាន​បញ្ហា​យក​វិញ​ទៅ ​បាន​ទេ​តើ"។

លោក​ផាត់​ ពៅស៊ាង ​សហ​មេធាវី​ការ​ពារ​ក្ដី​ឲ្យ​លោក​ស្រី ​អៀង​ ធីរិទ្ធ​ មាន​ប្រសាសន៍​ថា​ ការ​សម្រេច​របស់​អង្គ​បុរេ​ជំនុំ​ជម្រះ​មិន​ត្រឹម​ត្រូវ​ទេ ​ត្បិត​កូន​ក្ដី​របស់​លោក​ មាន​វ័យ​កាន់​តែ​ចាស់​ជរា​ទៅ​ហើយ​ ពុំ​មាន​លទ្ធ​ភាព​បំផ្លាញ​ភស្តុតាង​ឬ​បង្ក​អសន្ដិ​សុខ​សង្គម​ឡើយ។

សូម​បញ្ជាក់​ថា​ អៀង​ សារី​ អាយុ​៨៤​ឆ្នាំ​ អតីត​រដ្ឋ​មន្រ្តី​ការ​បរទេស ​ពាក់​អាវ​ពណ៌​ទឹក​ប៊ិច​ដៃ​វែង​ និង​ពាក់​វ៉ែនតា​ស បាន​សើច​ញញឹម​មុន​នឹង​ចូល​ក្នុង​បន្ទប់​ប្រកាស​សាល​ដីកា​កាល​ពី​ព្រឹក​មិញ​ មុន​នឹង​ប្រែ​ទឹក​មុខ​ទៅ​ជា​សភាព​ដូច​ធម្មតា​វិញ។ ​ប្រពន្ធ​របស់​គាត់ ​អៀង ​ធីរិទ្ធ​ អាយុ​៧៨​ឆ្នាំ​ អតីត​រដ្ឋ​មន្ដ្រី​ក្រសួង​សង្គម​កិច្ច​បាន​បង្ហាញ​មុខ​ក្នុង​ការ​ប្រកាស​សាល​ដីកា​របស់​ខ្លួន​ដែរ​ វៀរ​លែង​តែ​ខៀវ​ សំផន ​ដែល​អវត្ត​មាន​ដោយ​សារ​តែ​ពុំ​មាន​សហ​មេធាវី​ចូល​រួម។

អតីត​មេ​ដឹក​នាំ​ខ្មែរ​ក្រហម​ទាំង​បី​នាក់ ​ត្រូវ​ចោទ​ប្រកាន់​ចំពោះ​អំពើ​ឃោរ​ឃៅ​ ដែល​បាន​បង្ក​ឲ្យ​ប្រជា​ពល​រដ្ឋ​កម្ពុជា​ជិត​២​លាន​នាក់​ស្លាប់​បាត់​បង់​ជីវិត។​ ហើយ​ការ​កាត់​ទោស​ពួក​គេ​ ក្នុង​សំណុំ​រឿង​លេខ​០០២​ ដែល​រួម​មាន​នួន ​ជា ​អតីត​ប្រធាន​សភា​ខ្មែរ​ក្រហម​និង​អាច​មាន​ឌុច​ អតីត​ប្រធាន​គុក​ទួល​ស្លែង​ផង​ដែរ​ ត្រូវ​គេ​រំពឹង​ថា ​អាច​នឹង​ប្រព្រឹត្ត​ទៅ​នៅ​ក្នុង​រវាង​ចុង​ឆ្នាំ​២០១០​ នេះ ឬ​នៅ​ដើម​ឆ្នាំ​ក្រោយ៕

XS
SM
MD
LG