ភ្ជាប់​ទៅ​គេហទំព័រ​ទាក់ទង

ប្រធាន​រដ្ឋ​បាល​ព្រៃ​ឈើ​ថ្មី​មិន​សូវ​មាន​គេ​ស្គាល់


លោក​ឆេង​ គឹម​ស៊ុន ​បន្ទាប់​ពី​បាន​តែង​តាំង​ជា​ប្រធាន​រដ្ឋ​បាល​ព្រៃ​ឈើថ្មី​អស់​រយៈ​ពេល​ជាង​ពីរ​សប្តាហ៍​ បាន​ធ្វើ​ឲ្យ​តួនាទី​របស់​លោក​ស្ថិត​នៅ​ក្នុង​ភាព​ស្រពិច​ស្រពិល​ និង​មិន​ធ្លាប់​ស្គាល់​ប្រវត្តិ​របស់​លោក​ពី​មជ្ឈដ្ឋាន​ទូទៅ​នៅ​ឡើយ ​បើ​ទោះ​បី​ជា​លោក​មាន​បទ​ពិសោធន៍​ខាង​ផ្នែក​រុក្ខ​កម្ម​ជា​ច្រើន​ឆ្នាំ​ក៏​ដោយ។

វា​ហាក់​បី​ដូច​ជា​ចម្លែក​បន្តិច​សម្រាប់​មជ្ឈ​ដ្ឋាន​របស់​ប្រជា​ពល​រដ្ឋ​ និង​មន្រ្តី​អង្គការ​សង្គម​ស៊ីវិល​ មួយ​ចំនួន​ ចំពោះ​ការ​តែង​តាំង​លោក​ឆេង​ គឹម​ស៊ុន ​ជា​ប្រធាន​រដ្ឋបាល​ព្រៃ​ឈើ​ថ្មី​ ស្រប​ពេល​ដែល​រដ្ឋ​ បាល​កម្ពុជា​ បាន​ចាប់​ផ្តើម​បង្រ្កាប​បទ​ល្មើស​ព្រៃ​ឈើ​នៅ​ទូទាំង​ប្រទេស។

លោក​ឆេង​ គឹម​ស៊ុន ​ត្រូវ​បាន​ជំនួស​តូនាទី​នេះ​ បន្ទាប់​ពី​លោក​ទី សុគន្ធ​ ត្រូវ​បាន​ផ្លាស់​ប្តូរ​ទៅ​ ជា​អនុ​រដ្ឋ​លេខា​ធិការ​ក្រសួង​កសិកម្ម​វិញ ​ដោយ​សារ​តែ​លោក​បរាជ័យ​ក្នុង​ការ​បង្រ្កាប​បទ​ល្មើស​ព្រៃ​ឈើ។

អស់​រយៈ​ពេល​ជាង​២​សប្តាហ៍​ បន្ទាប់​ពី​លោក​ឆេង​ គឹម​ស៊ុន ​បាន​ចូល​កាន់​មុខ​តំណែង​ជា​ ប្រធាន​រដ្ឋ​បាល​ព្រៃ​ឈើ​ថ្មី​ជំនួស​លោក​ទី ​សុគន្ធ​ ប្រជា​ពល​រដ្ឋ ​នៅ​ស្រុក​ឱរាល់​ ខេត្ត​កំពង់​ស្ពឺ ​និង​មន្រ្តី​ អង្គការ​សង្គម​ស៊ីវិល​មួយ​ចំនួន ​នៅ​តែ​មិន​ទាន់​ស្គាល់​ប្រវត្តិ​ ហើយ​នៅ​តែ​ដាក់​មន្ទិល​សង្ស័យ​ថា ​មន្រ្តី​ រដ្ឋ​បាល​ព្រៃ​ឈើ​ថ្មី​នេះ​ អាច​នឹង​ធ្វើ​ការ​កំណែ​ទម្រង់​វិស័យ​ព្រៃ​ឈើ​បាន​ដែរ ​ឬ​យ៉ាង​ណា។

សម្រាប់​លោក​ឆេង​ គឹម​ស៊ុន ​អាយុ​ប្រហែល​ជាង​៤០​ឆ្នាំ​ ជា​ប្រតិភូ​រដ្ឋា​ភិបាល​ទទួល​បន្ទុក​រដ្ឋ​ បាល​ព្រៃ​ឈើ ​បាន​បដិសេធ​ពុំ​ផ្តល់​អត្ថា​ធិប្បាយ​ណា​មួយ​ចំពោះ VOA ​សំឡេង​សហ​រដ្ឋ​អាមេរិក​ទេ។​ដោយ​លោក​បាន​និយាយ​ថា ​ លោក​ទើប​ចូល​កាន់​តួនាទី​ថ្មី​ របស់​លោក​តែ​ប៉ុណ្ណោះ។

«នៅ​ពេល​ដែល​ខ្ញុំ​ក្តាប់​ការ​ងារ​បាន​ ខ្ញុំ​មាន​ព័ត៌មាន​នៅ​ក្នុង​ដៃ​ក្តាប់​បាន​ហើយ ​ខ្ញុំ​នឹង​ផ្តល់​បទ​ សម្ភាសន៍​ជា​មួយ​ខាង​លោក​ មិន​បាច់​ពិបាក​ថា ​ខ្ញុំ​មិន​ទទួល​មិន​អី​ទេ​ បាទ។ ក៏​ប៉ុន្តែ​ឥឡូវ​ ពេល​នេះ​ខ្ញុំ​ សូម​ទោស ​ដោយ​សារ​តែ​ខ្ញុំ​ទើប​ចូល​មក​កាន់​ការ​ងារ​ថ្មី។ អញ្ចឹង​ការ​ងារ​អ្វីៗ​ ខ្ញុំ​អត់​ទាន់​បាន​ក្តាប់​បាន​ណែន​ បាន​ជុំ​នៅ​ឡើយ​ទេ។​ អញ្ចឹង​ខ្ញុំ​ព្យាយាម​ អញ្ចឹង​ហើយ​ខ្ញុំ​អត់​ទាន់​មាន​ព័ត៌មាន​អី​ត្រូវ​ជម្រាប​ជូន​លោក​ទេ»។

លោក​ឆេង​ គឹម​ស៊ុន ​បាន​បពា្ច​ប់​បរិញ្ញា​ប័ត្រ​ផ្នែក​រុក្ខ​កម្ម​ជំនាន់​ទី​១ ​នៅ​ក្នុង​អំឡុង​ឆ្នាំ​១៩៨៩ ​នៅ​ សាកល​វិទ្យា​ល័យ​កសិកម្ម​ចម្ការ​ដូង។​ លោក​ធា្លប់​ជា​អតីត​ប្រធាន​ការិយា​ល័យ​កិច្ច​ការ​ព្រៃ​ឈើ​នៅ​ទូ ទាំង​ប្រទេស។

ក្រោយ​មក​លោក​ឆេង​ គឹម​ស៊ុន ​ត្រូវ​បាន​តែង​តាំង​ជា​អនុ​ប្រធាន​រដ្ឋ​បាល​ព្រៃ​ឈើ​ដែល​ទទួល​បន្ទុក​ការ​ ងារ​ច្បាប់ ​និង​គ្រប់​គ្រង​វិស័យ​ព្រៃ​ឈើ ​រហូត​ដល់​លោក​បច្ចុប្បន្ន​នេះ​ ត្រូវ​បាន​តែង​តាំង​ជា​ប្រធាន​រដ្ឋ​ បាល​ព្រៃ​ឈើ​ថ្មី​ជំនួស​លោក​ទី ​សុគន្ធ។

សម្រាប់​ប្រជា​ពល​រដ្ឋ​ នៅ​ស្រុក​ឱរាល់​ ខេត្ត​កំពង់​ស្ពឺ ​រហូត​ដល់​មន្រ្តី​រដ្ឋ​បាល​ព្រៃ​ឈើ​ស្រុក​ឱរាល់​ នៅ​តែ​មិន​ទាន់​ស្គាល់​លោក​ឆេង​ គឹម​ស៊ុន​ឲ្យ​បាន​ច្បាស់​លាស់​នៅ​ឡើយ។

លោក​អ៊ឹម​ ភី​ ប្រធាន​ភូមិ​ព្រៃ​មាន​ ឃុំ​រស្មី​សាមគ្គី​ ស្រុក​ឱរាល់ ​នៅ​ពេល​ដែល​ផ្តល់​បទ​សម្ភាសន៍​ជា​មួយ VOA​ លោក​បាន​ក្រវី​ក្បាល​បន្តិច​ រួច​ពោល​ថា​ លោក​មិន​ដែល​ឮ​ឈ្មោះ​ និង​មិន​ដែល​ស្គាល់​លោក​ ឆេង​ គឹម​ស៊ុន​ទេ។​ ដោយ​សារ​តែ​លោក​រវល់​ក្នុង​ការ​ងារ​គ្រប់​គ្រង​ប្រជា​ជន​នៅ​ក្នុង​ភូមិ។

ចំណែក​ឯ​លោក​ជូ ​គក់ ​ប្រជា​ពល​រដ្ឋ​មួយ​រូប​ដែល​កំពុង​អង្គុយ​លក់​ដូរ​របស់​របរ​បន្តិច​បន្តួច​នៅមុខ​ផ្ទះ​ លោក​បាន​និយាយ​ថា​ លោក​អត់​បាន​តាម​ដាន​ព័ត៌មាន​អំពី​ការ​ដោះ​ដូរ​មុខ​តំណែង​រដ្ឋ​បាល​ ព្រៃ​ឈើ​ថ្មី​នេះ​ដែរ។

លោក​ជូ ​គក់ ​បាន​និយាយ​ថា ​លោក​មិន​ដែល​ស្គាល់​លោក​ឆេង​ គឹម​ស៊ុន ​ពី​មុន​មកទេ។

«អ្ហូ​ ខ្ញុំ​អត់​ស្គាល់​ផង។​ ខ្ញុំ​អត់​សូវ​ទំនាក់​ទំនង់​គាត់​ផង»។

លោក​ឆេង​ គឹម​ស៊ុន​ បន្ទាប់​ពី​បាន​បញ្ចប់​បរិញ្ញា​ប័ត្រ​ផ្នែក​រុក្ខ​កម្ម​ លោក​បាន​បន្ត​សិក្សា​អនុ​បណ្ឌិត​ នៅ​សាកល​វិទ្យា​ល័យ​គ្រប់​គ្រង​ ដោយ​លោក​បាន​ទទួល​បរិញ្ញា​ប័ត្រ​ជាន់​ខ្ពស់​ផ្នែក​ពាណិជ្ជ​កម្ម។

បន្ទាប់​ពី​បាន​បញ្ចប់​ការ​សិក្សា​ផ្នែក​អនុ​បណ្ឌិត​នៅ​ក្នុង​ស្រុក​ លោក​ឆេង ​គឹម​ស៊ុន​បាន​បន្ត​ការ​ សិក្សា​ផ្នែក​បណ្ឌិត​នៅ​សាកល​វិទ្យា​ល័យ​មួយ​របស់​ប្រទេស​ម៉ាឡេស៊ី​ផ្នែក​រុក្ខ​កម្ម។ ការ​សិក្សា​នេះ​ធ្វើ​ឡើង​ តាម​រយៈប្រព័ន្ធ​អ៊ីធឺណិត​ពី​ចម្ងាយ​ ដែល​ភាសា​អង់គ្លេស​ហៅ​ថា ​ការ​សិក្សា​តាម​រយៈ Online។

សម្រាប់​លោក​ចាន់ ​សូវ៉េត​ មន្រ្តី​ផ្នែក​ស៊ើប​អង្កេត​របស់​អង្គ​ការ​លីកាដូ​វិញ ​បាន​និយាយ​ថា ​លោក​ឆេង​ គឹម​ស៊ុន​មាន​បទ​ពិសោធន៍​ច្រើន​ខាង​កិច្ច​ការ​ព្រៃ​ឈើ ​ដែល​ធ្វើ​ឲ្យ​លោក​មាន​លទ្ធ​ភាព​គ្រប់​ គ្រាន់​ក្នុង​ការ​ទទួល​យក​កិច្ច​ការ​នេះ។

«តំណែង​ថ្មី​នេះ​ធ្វើ​ឲ្យ​លោក​ឆេង​ គឹម​ស៊ុន ​អាច​នឹង​មាន​លទ្ធ​ភាព​គ្រប់​គ្រាន់​ ព្រោះ​ថា ​លោក​ បាន​ទទួល​ការ​ទុក​ចិត្ត។​ យ៉ាង​ដូច្នេះ​លោក​អាច​ធ្វើ​ការ​កែ​ទម្រង់ ​និង​ធ្វើ​យ៉ាង​ម៉េច​ ដើម្បី​ធ្វើ​ឲ្យ​ព្រៃ​ឈើ​ នៅ​ស្រុក​យើង​មាន​លក្ខណៈ​ប្រសើរ​ ហើយ​ប្រើ​ប្រាស់​ទៅ​ចំ​ទិស​ដៅ​បាទ»។

ក្រោយ​ពី​មាន​ការ​ផ្លាស់​ប្តូរ​មុខ​តំណែង​រដ្ឋ​បាល​ព្រៃ​ឈើ​មក យ៉ាង​តិច​មាន​សំណុំ​រឿង​បទ​ល្មើស​ព្រៃ​ ឈើ​ចំនួន​២០៧​ករណី ​កាល​ពី​ថ្ងៃ​ទី​២១​ខែ​មេសា​កន្លង​ទៅ​នេះ​ ត្រូវ​បាន​បញ្ជូន​ទៅ​តុលាការ​ និង​រឹប​អូស​ឈើ​ខុស​ច្បាប់​ចំនួន​៥២០០​ម៉ែត្រ​គូប​ រថ​យន្ត​២០​គ្រឿង​ និង​បាន​ឃាត់​ខ្លួន​មនុស្ស​ចំនួន​១១​នាក់៕

XS
SM
MD
LG