បន្ទាប់ពីបានដោះលែងចេញពីពន្ធនាគារចាងហ្វាងកាសែតខ្មែរម្ចាស់ស្រុកបាននិយាយថាកាសែតរបស់លោកបើកឱ្យតំណើរការឡើងវិញនៅសបា្តហ៍ក្រោយនេះ។ ក៏ប៉ុនែ្តការបោះពុម្ពលើកក្រោយនេះលោកមានការប្រយ័ត្នប្រយែងជាងមុនដើម្បីចៀសវាងប្តឹងពីបទបរិហាររកេរ្តិ៍។
លោកហង្ស ចក្រា ចាងហ្វាងកាសែតខ្មែរម្ចាស់ស្រុកបានបញ្ជាក់ប្រាប់ VOA សំឡេងសហរដ្ឋអាមេរិកនៅថ្ងៃព្រហស្បតិ៍នេះថា នៅសបា្តហ៍ក្រោយនេះលោកនឹងរៀបចំបោះពុម្ពផ្សាយកាសែតរបស់លោកឡើងវិញបន្ទាប់ពីលោកត្រូវបានដោះលែងចេញពីពន្ធនាគារ។ក៏ប៉ុន្តែលោកបានបញ្ជាក់ថា ការចេញផ្សាយលើកក្រោយនេះលោកមានការប្រយ័ត្នប្រយែងជាងមុនដើម្បីជាងវាងបណ្តឹងពីបទបរិហាររកេរ្តិ៍។
«ពីព្រោះខ្ញុំមិនចង់ឱ្យវាងាប់នៅពាក់កណ្តាលទីដូច្នេះទេ។មួយទៀតដោយសារខ្មែរម្ចាស់ស្រុកមានឈ្មោះទៅហើយ ហើយខ្ញុំក៏ជាប់គុកដោយសារកាសែតខ្មែរម្ចាស់ស្រុកហ្នឹងដែរ ដូច្នេះខ្ញុំមិនចង់ឱ្យវាបញ្ចប់ទៅជារបៀបអហោសកម្មទេ។ខ្ញុំត្រូវធ្វើវាឱ្យមានជីវិតឡើងវិញដើម្បីជាប្រយោជន៍ដល់សង្គមជាតិទាំងមូល»។
កាលពីដើមខែមេសានេះកាសែតខ្មែរម្ចាស់ស្រុកដែលលម្អៀងទៅរកគណៈបក្សប្រឆាំងបានផ្អាកការបោះពុម្ពផ្សាយមួយរយៈដោយសារវិបត្តិហិរញ្ញវត្ថុ នេះបើតាមការបញ្ជាក់ពីបុគ្គលិកកាសែតខ្មែរម្ចាស់ស្រុក។
លោក ហង្ស ចក្រាបានបញ្ជាក់ថា នៅដើមសបា្តហ៍ក្រោយនេះលោកនឹងកោះប្រជុំបុគ្កលិករបស់លោកដើម្បីរិះរកវិធីសម្រាប់ធ្វើការបោះពុម្ពផ្សាយឡើងវិញ។
លោកបានមានប្រសាសន៍ថា ជំហរកាសែតរបស់លោកនៅតែបន្តរិះគន់ដ៏ដែលដើម្បីបម្រើផលប្រយោជន៍ដល់សង្គមជាតិ។
«ជំហររបស់ខ្ញុំពុំមាននរណាអាចបត់បែនបានទេ។ ខ្ញុំនៅតែរក្សាជំហរដើមរបស់ខ្ញុំ។ក៏ប៉ុន្តែអ្វីដែលខ្ញុំចង់បញ្ជាក់នោះគឺ ថា ការសរសេរលើកក្រោយនេះគឺសុទ្ធតែមានប្រភពច្បាស់លាស់មិនមែនប្រភពមិនច្បាស់លាស់ទេ»។
លោកទិត សុធា ទីប្រឹក្សារដ្ឋាភិបាលនិងជាអ្នកនាំពាក្យប្រតិកម្មរហ័សរបស់ទីស្ដីការគណៈរដ្ឋមន្ត្រីបានបញ្ជាក់ថា អ្នកសារព័ត៌មានគួរតែគោរពវិជា្ជជីវៈសារព័ត៌មានឱ្យបានត្រឹមត្រូវដើម្បីចៀសវាងការប្តឹងផ្ដល់ទៅតុលាការ។
លោកបានមានប្រសាសន៍ថា ការសរសេរព័ត៌មាននេះមានសារៈសំខាន់ខ្លាំងណាស់ដើម្បីជួយអភិវឌ្ឍប្រទេសឱ្យមានការរីកចម្រើន។
«ប្រសិនបើគាត់មានការផ្លាស់ប្តូរឥរិយាបទដោយគោរពទៅតាមវិជ្ជាជីវៈត្រឹមត្រូវនោះជារឿងមួយល្អណាស់សម្រាប់ការចូលរួមចំណែកក្នុងការអភិវឌ្ឍប្រទេសជាតិ»។
កាលពីថ្ងៃអង្គារដើមសបា្តហ៍នេះ លោកហង្ស ចក្រាចាងហ្វាងកាសែតខ្មែរម្ចាស់ស្រុកត្រូវបានដោះលែងចេញពីពន្ធនាគារព្រៃសជាមួយនិងអ្នកទោស៤៩នាក់ផ្សេងទៀតបន្ទាប់ពីទទួលបានលិខិតព្រះរាជទានលើកលែងទោសពីព្រះមហាក្សត្រ។
លោកហង្ស ចក្រាត្រូវបានតុលាការក្រុងភ្នំពេញកាលពីខែមិថុនាឆ្នាំ២០០៩បានកាត់ទោសឱ្យជាប់ ពន្ធនាគាររយៈពេលមួយឆ្នាំក្រោមបទចោទប្រកាន់បរិហារកេរ្តិ៍បន្ទាប់ពីកាសែតរបស់លោកបានបោះពុម្ពផ្សាយដោយរិះគន់ថា មន្ត្រីដែលនៅជុំវិញលោកឧបនាយករដ្ឋមន្ត្រី សុខ អានជាប់ពាក់ព័ន្ធនឹងអំពើពុករលួយ៕
