ភ្ជាប់​ទៅ​គេហទំព័រ​ទាក់ទង

ធនាគារ​អភិវឌ្ឍន៍​អាស៊ី៖​សេដ្ឋ​កិច្ច​កម្ពុជា​នឹង​មាន​កំណើន​នៅ​ឆ្នាំ​២០១០​និង​២០១១


ធនាគារ​អភិ​វឌ្ឍន៍​អាស៊ី ​ADB​ នៅ​ថ្ងៃ​អង្គារ​នេះ​ បាន​ព្យាករណ៍​ថា​ សេដ្ឋ​កិច្ច​របស់​ប្រទេស​កម្ពុជា​ អាច​មាន​កំណើន​4,5%​នៅ​ឆ្នាំ​២០១០​នេះ​ និង​បន្ត​កើន​ឡើង​រហូត​ដល់​ ៦%​នៅ​ឆ្នំា​២០១១​ បន្ទាប់​ពី​សេដ្ឋ​កិច្ច​របស់​ប្រទេស​នេះ​បាន​ជួប​ឱនភាព​២%​កាល​ពី​ឆ្នាំ​មុន​ដោយ​សារ​តែ​ឥទ្ធិ​ពល​នៃ​វិបត្តិ​សេដ្ឋ​កិច្ច​ពិភព​លោក។

លោក​ Eric Sidgwick​ អ្នក​សេដ្ឋ​កិច្ច​ជាន់​ខ្ពស់​នៃ​ធនាគារ​អភិវឌ្ឍន៍​អាស៊ី​ ADB​ បាន​និយាយ​ក្នុង​សន្និ​សីទ​កាសែត​នៅ​ទី​ក្រុង​ភ្នំពេញ​ថា​ ការ​ងើប​ឡើង​វិញ​នៃ​សេដ្ឋ​កិច្ច​របស់​កម្ពុជា​នៅ​ឆ្នាំ​នេះ​គឺ​ដោយ​សារ​តែ​ភាព​ល្អ​ប្រសើរ​នៃ​វិស័យ​សំណង់​ កសិកម្ម​ ទេស​ចរណ៍​ និង​វិស័យ​កាត់​ដេរ។​ ជាក់​ស្តែង​ ការ​នាំ​ចេញ​ផលិត​ផល​កាត់​ដេរ​របស់​កម្ពុជា​ មាន​សញ្ញា​កើន​ឡើង​វិញ​ នៅ​ពេល​ដែល​ទី​ផ្សារ​លក់​រាយ​របស់​សហ​រដ្ឋ​អាមេរិក​បាន​កើន​ឡើង​ 5,5%​នៅ​៣​ខែ​ដើម​ឆ្នាំ​នេះ។​ ក្នុង​ពេល​ដូច​គ្នា​ ចំនួន​ភ្ញៀវ​ទេសចរណ៍​បាន​កើន​ឡើង​១០%។

«វិស័យ​កាត់​ដេរ​ ទេសចរណ៍​ និង​សំណង់​ សុទ្ធ​តែ​ត្រឡប់​ទៅ​រក​ភាព​ប្រសើរ​ឡើង​វិញ​នៅ​ត្រី​មាស​ទី​១​នៃ​ឆ្នាំ​នេះ​ ហើយ​ប្រសិន​បើ​មាន​ការ​អភិវឌ្ឍ​ធ្វើ​ឲ្យ​ប្រសើរ​ឡើង​នូវ​ប្រព័ន្ធ​ស្រោច​ស្រព​ ការ​ប្រើ​ប្រាស់​ពូជ ​និង​ជីរ​នោះ​ គេ​នឹង​អាច​សង្ឃឹម​ថា​ ផលិត​ផល​កសិកម្ម​នៅ​ឆ្នំា​នេះ​នឹង​មាន​កំណើន​កើន​ឡើង​ជាង​ឆ្នាំ​មុន។​ ដូច្នេះ​ លទ្ធ​ផល​ដែល​រំពឹង​ទុក​សម្រាប់​ឆ្នាំ​នេះ​ហាក់​ដូច​ជា​ល្អ»។

លោក​ រស់​ ស៊ីលវ៉ា​ អគ្គ​លេខា​ធិការ​រង​នៃ​ក្រសួង​សេដ្ឋ​កិច្ច​ និង​ហិរញ្ញ​វត្ថុ​ បាន​គំាទ្រ​ការ​ព្យាករណ៍​របស់​ធនាគារ​អភិវឌ្ឍន៍​អាស៊ី។​ លោក​លើក​ឡើង​ថា​ រដ្ឋា​ភិបាល​កម្ពុជា​បាន​ប៉ាន់​ប្រមាណ​ថា​ សេដ្ឋ​កិច្ច​របស់​កម្ពុជា​ក្នុង​ឆ្នាំ​២០១០​ និង​២០១១​ អាច​មាន​កំណើន​ចន្លោះ​ពី​៤%​ទៅ​៦% ​ដោយ​ផ្អែក​លើ​ការ​វិវត្តន៍​ជា​វិជ្ជ​មាន​របស់​សេដ្ឋ​កិច្ច​ពិភព​លោក។

សូម​បញ្ជាក់​ថា​ វិបត្តិ​សេដ្ឋ​កិច្ច​ដែល​ផ្ទុះ​ឡើង​ចាប់​តំាង​ពី​ពាក់​កណ្តាល​ឆ្នាំ​២០០៨​មក​ បាន​ វាយ​បំបាក់​វិស័យ​ទ្រ​ទ្រង់សេដ្ឋ​កិច្ច​៣​ដ៏​សំខាន់​របស់​កម្ពុជា។​ កាល​ពី​ឆ្នំា​២០០៩​ ទឹក​ប្រាក់​នំា​ចេញ​សម្លៀក​បំពាក់​ទៅ​សហ​រដ្ឋ​អាមេរិក​ ដែល​ជា​ទី​ផ្សារ​ធំ​បំផុត​របស់​កម្ពុជា​ បាន​ធ្លាក់​ចុះ​ជាង​២០%។​ វិស័យ​សំណង់​បាន​ដាំ​ក្បាល​ចុះ​អវិជ្ជ​មាន​ប្រហែល​១០%​ ខណៈ​ដែល​ការ​ចំណាយ​របស់​អ្នក​ទេសចរណ៍​ក៏​បាន​ធ្លាក់​ចុះ​ផង​ដែរ។

លោក​ Eric​ Sidgwick​បាន​និយាយ​ថា​ ប៉ុន្តែ​នៅ​ពេល​ដែល​ស្ថាន​ភាព​សេដ្ឋ​កិច្ច​ពិភព​លោក​ចាប់​ផ្តើម​ប្រសើរ​ឡើង​នោះ​ ប្រទេស​កម្ពុជា​នឹង​ប្រឈម​នឹង​ការ​ប្រកួត​ប្រជែង​កាន់​តែ​ច្រើន​ឡើង​ក្នុង​ការ​ជំរុញ​ពាណិជ្ជ​កម្ម​ និង​ទាក់​ទាញ​អ្នក​វិនិ​យោគ​ ដើម្បី​រក្សា​និរន្តរ​ភាព​សេដ្ឋ​កិច្ច​របស់​ខ្លួន។​ ប្រការ​នេះ​ទាម​ទារ​ឲ្យ​រដ្ឋា​ភិបាល​កម្ពុជា​ ធ្វើ​សមាហរណ​កម្ម​សេដ្ឋ​កិច្ច​ក្នុង​តំបន់​ ជា​ពិសេស​ការ​រក​មធ្យោ​បាយ​ទាញ​យក​ផល​ចំណេញ​ពី​កំណើន​សេដ្ឋ​កិច្ច​ក្នុង​ទ្វីប​អាស៊ី ​ការ​បង្កើន​លក្ខណៈ​ប្រកួត​ប្រជែង​ ការ​ជំរុញ​ការ​អភិវឌ្ឍ​វិស័យ​ឯក​ជន​ និង​ការ​ផ្តោត​ការ​ពង្រីក​វិសាល​ភាព​សេដ្ឋ​កិច្ច​ ដូច​ជា​ ការ​ស្វែង​រក​ទី​ផ្សារ​នាំ​ចេញ​បង្កើន​ផលិត​ផល​សម្រាប់​នាំ​ចេញ​និង​អភិវឌ្ឍ​តំបន់​ទេសចរណ៍​ផ្សេងៗ​ជា​ដើម។

លោក​ Eric​ Sidgwick​ បន្ត​ថា ​ដើម្បី​ពង្រឹង​កិច្ច​ការ​ទំាង​នេះ​រដ្ឋា​ភិបាល​កម្ពុជា​ត្រូវ​តែ​អនុវត្ត​ឲ្យ​បាន​នូវ​ផែន​ការ​យុទ្ធ​សាស្ត្រ​ ដែល​មាន​ស្រាប់​ និង​បង្កើន​កិច្ច​សហ​ប្រតិ​បត្តិ​ការ​ក្នុង​ចំណោម​ក្រសួង​ពាក់​ព័ន្ធ។

លោក​ រស់ ​ស៊ីលវ៉ា​ អះ​អាង​ថា ​រដ្ឋា​ភិបាល​ កំពុង​តែ​បន្ត​ធ្វើ​ការ​ទំាង​អស់​នេះ​ហើយ៕

អត្ថបទ​ទាក់ទង

XS
SM
MD
LG