មន្ត្រីប៉ូលិសជាន់ខ្ពស់បានថ្លែងនៅថ្ងៃច័ន្ទនេះថា គ្រោះថ្នាក់ចរាចរណ៍សរុបចំនួន២៦៨លើក បាន កើតឡើងនៅក្នុងពិធីបុណ្យចូលឆ្នាំថ្មីប្រពៃណីខ្មែរដែលក្នុងនោះមានមនុស្សប្រមាណ៥០នាក់ បានស្លាប់ និងមនុស្ស៥៣០ នាក់ផ្សេងទៀតត្រូវរងរបួស។
លោកឧត្តមសេនីយ៍ត្រីហ៊ឹម យ៉ាន ប្រធាននាយកដ្ឋាននគរបាលសណ្តាប់ធ្នាប់នៃក្រសួងមហាផ្ទៃបានបញ្ជាក់ថា «គ្រោះថ្នាក់ចរាចរណ៍នៅក្នុងពិធីបុណ្យចូលឆ្នាំថ្មីប្រពៃណីខ្មែរចាប់ពីថ្ងៃទី១៣ដល់១៧ខែមេសា បានកើនឡើង១៤លើកលើសឆ្នាំ ២០០៩ ដែលមាន២៥៤លើក»។
លោកឧត្តមសេនីយ៍បានបន្ថែមថា ជនរងគ្រោះសរុប៥៧៩នាក់ ក្នុងនោះស្លាប់ចំនួន៤៩នាក់ រងរបួសធ្ងន់២៩៦នាក់ និងរបួសស្រាល២៣៤នាក់។
មនុស្សស្លាប់ចំនួន៤៩នាក់នៅក្នុងឆ្នាំ២០១០ ប្រៀបធៀបទៅនឹងឆ្នាំ២០០៩ ដែលមានមនុស្សស្លាប់ចំនួន៥២នាក់ គឺស្ទើរតែគ្មានការថយចុះ។
លោកឧត្តមសេនីយ៍ត្រីហ៊ឹម យ៉ានបានថ្លែងថា ម៉ូតូចំនួន៣២២គ្រឿង រថយន្តតូច៥៤គ្រឿង និងរថយន្តធំ៣គ្រឿង បានខូចខាត។
លោកឧត្តមសេនីយ៍ត្រីបានបន្ថែមថា គ្រោះថ្នាក់ចរាចរណ៍ភាគច្រើនបានកើតនៅតំបន់ជនបទ ហើយជនរងគ្រោះភាគច្រើនមិនទាន់យល់ច្បាប់នៅឡើយ ជាពិសេសខេត្តបាត់ដំបងមាន៣០លើក សម្លាប់មនុស្ស១១នាក់ខេត្តកំពង់ចាមមានជាង២០លើកនិងខេត្តកណ្តាលមានជាង២០លើក។
លោកឧត្តមសេនីយ៍ត្រីហ៊ឹម យ៉ាន បានបញ្ជាក់ថា គ្រោះថ្នាក់ចរាចរណ៍នេះ បានបណ្តាលមកពីការបើកបរលើសល្បឿន៣៦% ការបើកបរប្រហែស២៥% និងការបើកបរក្នុងពេលស្រវឹង១៤%។
នៅក្នុងឆ្នាំ២០០៩ គ្រោះថ្នាក់ចរាចរណ៍នៅក្នុងប្រទេសកម្ពុជាបានធ្វើឱ្យជនរងគ្រោះចំនួន២១.៥១៩នាក់ ដែលក្នុងនោះមានអ្នកស្លាប់ចំនួន១.៧១៧នាក់ និងរងរបួសធ្ងន់ចំនួន៧.០២២នាក់។
តាមការសិក្សាដោយអង្គការជនពិការបែលហ្សិក HANDICAP International បានបង្ហាញឱ្យឃើញថា ប្រទេសកម្ពុជាមានការខាតបង់ទឹកប្រាក់រហូតដល់ទៅ២៤៨លានដុល្លារអាមេរិក ដែលបណ្តាលមកពីគ្រោះថ្នាក់ចរាចរណ៍នៅក្នុងឆ្នាំ២០០៩៕
