ប្រទេសកម្ពុជាបានប្រារព្ធពិធីបុណ្យចូលឆ្នាំថ្មីប្រពៃណីខ្មែរ ដោយលេងល្បែងប្រជាប្រិយ៍ដ៏សប្បាយរីករាយ បន្ទាប់ពីបានឆ្លងកាត់ឧបសគ្គ និងការហត់នឿយក្នុងកិច្ចការពេញមួយឆ្នាំមកនោះ។
ប្រជាពលរដ្ឋខ្មែរជាង១៤លាននាក់ នៅថ្ងៃពុធនេះ បានចាប់ផ្តើមប្រារព្ធពិធីបុណ្យចូលឆ្នាំថ្មីប្រពៃណីខ្មែរយ៉ាងសែនសប្បាយរីករាយ ដោយមានការជួបជុំសមាជិកគ្រួសារ ការយកចង្ហាន់ទៅប្រគេនព្រះសង្ឃព្រះពុទ្ធសាសនានៅតាមទីវត្តអារាម និងការលេងកំសាន្តល្បែងប្រជាប្រិយ៍ផ្សេងៗនៅក្នុងបរិវេណវត្តអារាមនៅទូទាំងប្រទេស។
ចាប់តាំងពីចុងសករាជ ប្រជាពលរដ្ឋខ្មែរបានកំណត់យកច័ន្ទគតិជាផ្លូវការសម្រាប់ប្រារព្ធពិធីបុណ្យចូលឆ្នាំខ្មែរនៅក្នុងខែចែត្រដែលជាពេលវេលាទំនេរពីការងារកសិកម្មរបស់ពួកគេ។ ជាធម្មតា យោងតាមច័ន្ទគតិ បុណ្យចូលឆ្នាំខ្មែរចាប់ផ្តើមនៅថ្ងៃទី១៣ ខែមេសា និងពេលខ្លះចាប់ផ្តើមនៅថ្ងៃទី១៤ ខែមេសា។ ឱកាសប្រកបដោយនក្ខត្តឫក្សដ៏ប្រសើរនៃពិធីបុណ្យចូលឆ្នាំខ្មែរមានរយៈពេល៣ ថ្ងៃ គឺថ្ងៃទី១ គឺជាថ្ងៃមហាសង្ក្រាន្ត ថ្ងៃទី២ គឺជាថ្ងៃវរៈវ័នបតៈ និងថ្ងៃទី៣ គឺជាថ្ងៃឡើងស័ក។ បុណ្យចូលឆ្នាំខ្មែរនៅក្នុងឆ្នាំ២០១០នេះ គឺជាឆ្នាំខាល ឬឆ្នាំខ្លា បានចាប់ផ្តើមនៅថ្ងៃទី១៤ ខែមេសា។
ផ្លូវនានានៅក្នុងទីក្រុងភ្នំពេញមានភាពស្ងប់ស្ងាត់ខុសពីធម្មតា ដោយសារប្រជាពលរដ្ឋខ្មែរក្រុមគ្រួសារ និងកម្មករនៅក្នុងទីក្រុងភ្នំពេញបានធ្វើដំណើរទៅកាន់តំបន់ជនបទ ឬស្រុកកំណើតរបស់ពួកគេ ដើម្បីជួបជុំក្រុមគ្រួសារ មាតាបិតា បងប្អូន និងញ្ញាតិសន្តាននៅក្នុងឱកាសដ៏នក្ខឫក្សនេះ។
ក្រុមអាជ្ញាធររួមមានប៉ូលិសចរាចរណ៍ និងកងកម្លាំងប្រដាប់អាវុធត្រូវបានដាក់ពង្រាយនៅតាមដងផ្លូវសាធារណៈ នៅតាមទីវត្តអារាម កន្លែងលេងកំសាន្តល្បែងប្រជាប្រិយ៍ និងរមណីយដ្ឋានផ្សេងៗ ដើម្បីធានាថា គ្មានការរំខានយារយីណាមួយកើតឡើងនៅក្នុងពិធីបុណ្យចូលឆ្នាំខ្មែរនេះទេ ដូចចោរលួច ចោរឆក់ ចោរប្លន់ គ្រោះថ្នាក់ចរាចរណ៍ អគ្គីភ័យ និងភាពគ្មានសណ្តាប់ធ្នាប់សង្គមផ្សេងៗទៀត។
លោកឧត្តមសេនីយ៍ត្រី ទូច ណារ៉ុថ ស្នងការប៉ូលិសក្រុងភ្នំពេញ បានថ្លែងកាលពីថ្ងៃច័ន្ទថា កងកម្លាំងប៉ូលិសច្រើនរាប់ពាន់នាក់ ត្រូវបានដាក់ពង្រាយដោយមានក្រុមដើរល្បាត និងក្រុមប្រចាំការនៅតាមកន្លែងលេងកំសាន្តល្បែងប្រជាប្រិយ៍ ដើម្បីកុំឱ្យក្មេងទំនើងបង្កការអុកឡុកផ្សេងៗនៅក្នុងពិធីកំសាន្តសប្បាយរបស់ប្រជាពលរដ្ឋ។
លោកឧត្តមសេនីយ៍ត្រី សត ណាឌី ស្នងការប៉ូលិសខេត្តសៀមរាប បានថ្លែងកាលពីថ្ងៃច័ន្ទថា យើងបានដាក់ពង្រាយកងកម្លាំងចំហរ និងកម្លាំងសម្ងាត់ប្រហែល១.០០០នាក់ ដើម្បីការពារសុវត្ថិភាពរបស់ប្រជាពលរដ្ឋនៅក្នុងឱកាសចូលឆ្នាំថ្មីប្រពៃណីខ្មែរនេះ។
ប្រជាពលរដ្ឋខ្មែរបានស្លៀកពាក់សម្លៀកបំពាក់ប្រពៃណី និងបាននាំយកចំណីអាហារទៅប្រគេនព្រះសង្ឃនៅតាមវត្តអារាមព្រះពុទ្ធសាសនានានា ដើម្បីឧទ្ធិសកុសលផលបុណ្យជូនដល់ជីដូនជីតា មាតាបិតា និងញាតិកាទាំង៧សន្តាន ដែលបានទទួលមរណភាព។
នៅក្នុងពេលជាមួយគ្នានេះ ការលេងកំសាន្តល្បែងប្រជាប្រិយ៍ផ្សេងៗជាច្រើនត្រូវបានរៀបចំសម្តែងនៅតាមទីវត្តអារាមទូទាំងប្រទេស ដូចជាការសម្តែងតន្ត្រី កំប្លែង ការរាំរែក សិល្បៈប្រពៃណី និងល្បែងប្រជាប្រិយ៍ផ្សេងៗ ជាពិសេសល្បែងបោះអង្គុញ ល្បែងចោលឈូង ល្បែងទាញព្រ័ត្រ ល្បែងលាក់កន្សែង និងល្បែងដណ្តើមស្លឹកឈើជាដើម។
លោកព្រឹទ្ធាចារ្យ មៀច ប៉ុណ្ណ ទីប្រឹក្សាអមវិទ្យាស្ថានពុទ្ធសាសនបណ្ឌិត្យ ទទួលបន្ទុកកិច្ចការក្រុមជំនុំទំនៀមទម្លាប់ខ្មែរថា «ល្បែងប្រជាប្រិយ៍ទាំងនេះបានធ្វើឱ្យកម្លោះក្រមុំសម្តែងនូវសមត្ថភាព ភាពជិតស្និទ្ធ និងភាពឈ្លាសវ៉ៃ»។
«អត្ថន័យនៃល្បែងប្រជាប្រិយ៍នេះគឺជាបុណ្យសប្បាយ។ ដូច្នេះ ការដែលបុព្វបុរសរបស់យើងបង្កើតល្បែងផ្សេងៗនេះ គឺសុទ្ធតែជាល្បែងដែលបម្រើឱ្យការសប្បាយ»។
ពិធីបុណ្យចូលឆ្នាំខ្មែរត្រូវបានប្រារព្ធជារៀងរាល់ឆ្នាំនៅពាក់កណ្តាលខែមេសា ស្របតាមមហាសង្ក្រាន្តដែលជាទម្រង់នៃហោរាសាស្ត្រខ្មែរដោយមានសត្វ១២ ហើយឆ្នាំនេះ គឺជាឆ្នាំខាល ឬ ឆ្នាំខ្លាដែលបានចាប់ផ្តើមនៅថ្ងៃពុធនៅវេលាម៉ោង៧និង៣៦នាទី ព្រឹក ម៉ោងនៅក្នុងប្រទេសកម្ពុជា។
ពិធីបុណ្យចូលឆ្នាំខ្មែរនេះបានលើកទឹកចិត្តដល់ប្រជាពលរដ្ឋខ្មែរគ្រប់រូបឱ្យសប្បាយរីករាយសម្រាប់ឆ្នាំខាងមុខទៀត និងបំភ្លេចចោលនូវអំពើអពមង្គលទាំងឡាយដែលបានកើតឡើងកាលពីឆ្នាំកន្លងទៅ។
ការប្រារព្ធពិធីបុណ្យចូលឆ្នាំខ្មែរនេះមិនមែនត្រឹមតែធ្វើឡើងនៅក្នុងប្រទេសកម្ពុជាប៉ុណ្ណោះទេ ប៉ុន្តែថែមទាំងបានប្រារព្ធដោយប្រជាពលរដ្ឋខ្មែរនៅក្នុងសហរដ្ឋអាមេរិក ប្រទេសបារាំង ប្រទេសអូស្ត្រាលី ប្រទេសកាណាដា និងប្រទេសអឺរ៉ុបមួយចំនួនទៀត៕