វីរុសជំងឺកូវីដ១៩ បំប្លែងថ្មីដែលតា (Delta) ដែលងាយនឹងឆ្លងខ្លាំងបំផុត កំពុងតែរាតត្បាតយ៉ាងលឿននៅតំបន់អាស៊ីអាគ្នេយ៍ ស្របពេលដែលមានការព្រួយបារម្ភកើនឡើងទាក់ទិននឹងប្រសិទ្ធភាពរបស់វ៉ាក់សាំងកូវីដ១៩ ដែលផលិតដោយក្រុមហ៊ុន Sinovac Biotech របស់ប្រទេសចិន ដែលត្រូវបានប្រើនៅតាមបណ្តាប្រទេសមួយចំនួននៅក្នុងតំបន់នេះ។
ចម្ងល់ពាក់ព័ន្ធនឹងប្រសិទ្ធភាពរបស់វ៉ាក់សាំងចិននេះបានជំរុញរដ្ឋាភិបាលនៅប្រទេសមួយចំនួនដែលក្នុងនោះរួមមានទាំងប្រទេសថៃផងដែរ ឲ្យពិចារណាចាក់វ៉ាក់សាំងកូវីដ១៩ បន្ថែមដល់អ្នកដែលបានចាក់វ៉ាក់សាំងកូវីដ១៩ របស់ក្រុមហ៊ុន Sinovac រួចហើយ ប៉ុន្តែលើកនេះគឺប្រើវ៉ាក់សាំងដែលផលិតដោយក្រុមហ៊ុនផ្សេងដូចជាក្រុមហ៊ុន AstraZeneca ជាដើម។
វ៉ាក់សាំងកូវីដ១៩ របស់ក្រុមហ៊ុន Sinovac គឺជាវ៉ាក់សាំងមួយក្នុងចំណោមវ៉ាក់សាំងចំនួន ៧ ដែលអង្គការសុខភាពពិភពលោក (WHO) បានអនុញ្ញាតឲ្យប្រើក្នុងគ្រាបន្ទាន់។ ការសិក្សាស្រាវជ្រាវនានាអំពីអត្រាប្រសិទ្ធភាពនៃវ៉ាក់សាំងទាំងនេះនៅកំពុងបន្តធ្វើ ប៉ុន្តែវ៉ាក់សាំងរបស់ក្រុមហ៊ុន Sinovac នេះ ហាក់ដូចជាមានប្រសិទ្ធភាពប្រឆាំងនឹងជំងឺកូវីដ១៩ តិចជាងវ៉ាក់សាំងផ្សេងទៀត។
នៅក្នុងប្រទេសឥណ្ឌូណេស៊ី ភាគច្រើននៃវ៉ាក់សាំងដែលត្រូវបានចាក់ជូនពលរដ្ឋកន្លងមក គឺជាវ៉ាក់សាំងរបស់ក្រុមហ៊ុន Sinovac ដែលមានចំនួនស្មើនឹងជិត ៩០%។
ក្ដីបារម្ភផ្សេងៗអំពីវ៉ាក់សាំងរបស់ក្រុមហ៊ុន Sinovac នេះ បានធ្វើឲ្យប្រជាពលរដ្ឋឥណ្ឌូណេស៊ីមួយចំនួនមានការស្ទាក់ស្ទើរនៅក្នុងការចាក់វ៉ាក់សាំងនេះ។ ពលរដ្ឋមួយភាគបីនៅក្នុងទីក្រុងហ្សាការតាបាននិយាយថា ពួកគេនៅមិនទាន់សម្រេចចិត្តថាតើនឹងត្រូវចាក់វ៉ាក់សាំងនេះឬក៏យ៉ាងណានោះឡើយ។ នេះបើយោងតាមការស្ទង់មតិមួយកាលពីពេលថ្មីៗនេះ។
នាង Ismayanti អាយុ ២៥ ឆ្នាំ មកពីទីក្រុងហ្សាការតា បានប្រាប់ VOA ថា នាងចង់ចាក់វ៉ាក់សាំងកូវីដ១៩ ប៉ុន្តែមិនមែនវ៉ាក់សាំងរបស់ក្រុមហ៊ុន Sinovac នោះទេ។
នាង Ismayanti បានថ្លែងដូច្នេះថា៖ «ខ្ញុំមានមន្ទិលសង្ស័យតាំងពីដំបូងម្ល៉េះ ដោយសារតែ [អង្គការសុខភាពពិភពលោក (WHO)] មិនបានគាំទ្រឬទទួលស្គាល់ភ្លាមៗថា វ៉ាក់សាំងរបស់ក្រុមហ៊ុន Sinovac នេះ មានប្រសិទ្ធភាព។ ខ្ញុំនៅតែមិនចង់ចាក់វ៉ាក់សាំងនេះ។ លើសពីនេះទៀត មានគ្រូពេទ្យជាច្រើនបានស្លាប់ដោយសារជំងឺកូវីដ១៩ ទោះបីជាពួកគេបានចាក់វ៉ាក់សាំងរបស់ក្រុមហ៊ុន Sinovac នេះ ពេញលេញរួចហើយក៏ដោយ»។
សមាគមវេជ្ជសាស្រ្តឥណ្ឌូណេស៊ីបានបញ្ជាក់កាលពីខែមុនថា យ៉ាងហោចណាស់មានវេជ្ជបណ្ឌិត ១០ នាក់ ដែលបានចាក់វ៉ាក់សាំងពេញលេញបានចំនួនពីរដូសរួចហើយ បានស្លាប់។
លោក Wahyu Jaya អាយុ ៣០ ឆ្នាំ ដែលជាបុគ្គលធ្វើការម្នាក់នៅទីក្រុងហ្សាការតា បានប្រាប់ VOAថា៖ «ប្រសិនបើវ៉ាក់សាំងនោះមិនសូវមានប្រសិទ្ធភាព ហេតុអ្វីបានជាខ្ញុំត្រូវចាក់វាចូលក្នុងខ្លួនខ្ញុំ? ហើយដោយសារតែខ្ញុំធ្លាប់មានរោគសញ្ញាជំងឺកូវីដ១៩ ហើយការធ្វើតេស្តចេញមកវិជ្ជមាន ខ្ញុំចង់ឲ្យច្បាស់លើរឿងនេះ។ ខ្ញុំត្រៀមខ្លួនចាក់វ៉ាក់សាំង ប៉ុន្តែប្រសិនបើទៅរួច មិនមែនចាក់វ៉ាក់សាំងរបស់ក្រុមហ៊ុន Sinovac នោះទេ»។
ឥណ្ឌូណេស៊ីគឺជាប្រទេសដែលមានប្រជាជនច្រើនជាងគេបង្អស់ទី ៤ នៅលើពិភពលោក ដោយមានប្រជាជនជាង ២៧៥ លាននាក់។ ប្រទេសនេះមានករណីឆ្លងជំងឺកូវីដ១៩ ជាង ២.៦៧០.០០០ ករណី និងករណីស្លាប់ដោយសារជំងឺនេះយ៉ាងតិច ៦៩.២១០ ករណី ហើយប្រទេសនេះបានចាក់វ៉ាក់សាំងកូវីដ១៩ ដល់ពលរដ្ឋរបស់ខ្លួនបានជាង ៥២ លាននាក់រួចហើយ។ នេះបើយោងតាមមជ្ឈមណ្ឌលព័ត៌មានវីរុសជំងឺកូវីដ១៩ របស់សាកលវិទ្យាល័យ Johns Hopkins។
«មិនមែនជាពេលដែលត្រូវរើសតាមចិត្តនោះទេ»
នាង Septi Diah អាយុ ២៨ ឆ្នាំ ដែលជាបុគ្គលិកធ្វើការម្នាក់នៅទីក្រុងហ្សាការតា ដែលបានចាក់វ៉ាក់សាំងកូវីដ១៩ រួចហើយ បាននិយាយថា នាងមិនមានមន្ទិលសង្ស័យចំពោះប្រសិទ្ធភាពរបស់វ៉ាក់សាំងក្រុមហ៊ុន Sinovac នោះទេ។
នាង Septi បញ្ជាក់ដូច្នេះថា៖ «ចាប់តាំងពីពេលដំបូងនៃការរាតត្បាតជំងឺកូវីដ១៩ មក ខ្ញុំពិតជាចង់ចាក់វ៉ាក់សាំង ហើយមិនខ្វល់ថាក្រុមហ៊ុនណាជាអ្នកផលិតវ៉ាក់សាំងនោះឡើយ... ពីព្រោះយើងស្ថិតនៅក្នុងស្ថានភាពមិនធម្មតាមួយ។ ដូច្នេះ តាមគំនិតខ្ញុំ ឥឡូវនេះមិនមែនជាពេលដែលត្រូវរើសតាមចិត្តរបស់ខ្លួននោះឡើយ»។
លោក Ray Indra អាយុ ៣៤ ឆ្នាំ ដែលជាម្ចាស់អាជីវកម្មខ្នាតតូចមួយកន្លែងនៅក្នុងទីក្រុងហ្សាការតា ក៏បានយល់ស្របចំពោះគំនិតនេះផងដែរ។
លោក Ray និយាយដូច្នេះថា៖ «ជាធម្មតា ខ្ញុំមិនមានបញ្ហាជាមួយនឹងវ៉ាក់សាំងណាមួយនោះទេ ពីព្រោះពីមុនមក ប្រពន្ធខ្ញុំបានចាក់វ៉ាក់សាំងរបស់ក្រុមហ៊ុន AstraZeneca ហើយមានប្រតិកម្មប៉ះពាល់បន្ទាប់បន្សំមួយចំនួន។ បន្ទាប់មក ខ្ញុំបានចាក់វ៉ាក់សាំងរបស់ក្រុមហ៊ុន Sinovac តែមួយដូសប៉ុណ្ណោះ។ ...ទោះបីជាមានមិត្តភក្តិខ្លះបានចាក់វ៉ាក់សាំងរបស់ក្រុមហ៊ុន Sinovac បានពីរដូសហើយក៏ដោយ ក៏ពួកគេនៅតែឆ្លងជំងឺកូវីដ១៩ ដដែល ប៉ុន្តែរោគសញ្ញារបស់ពួកគេមិនដូចអ្នកដែលមិនបានចាក់វ៉ាក់សាំងនោះឡើយ»។
មុនពេលមានការកើនឡើងកាលពីពេលថ្មីៗនេះនូវករណីឆ្លងជំងឺកូវីដ១៩ នៅក្នុងប្រទេសឥណ្ឌូណេស៊ី ការសិក្សាស្រាវជ្រាវមួយក្នុងចំណោមបុគ្គលិកសុខាភិបាលនៅឥណ្ឌូណេស៊ីកាលពីខែឧសភា បានបង្ហាញថា វ៉ាក់សាំងរបស់ក្រុមហ៊ុន Sinovac អាចកាត់បន្ថយហានិភ័យនៃការចេញរោគសញ្ញាជំងឺកូវីដ១៩ បានចំនួន ៩៤% និងមានប្រសិទ្ធភាពចំនួន ៩៦% នៅក្នុងការកាត់បន្ថយហានិភ័យនៃការដែលត្រូវសម្រាកព្យាបាលនៅមន្ទីរពេទ្យ។
ក្រុមហ៊ុន Sinovac និងក្រុមហ៊ុន Sinopharm ដែលជាក្រុមហ៊ុនផលិតវ៉ាក់សាំងកូវីដ១៩ មានមូលដ្ឋាននៅប្រទេសចិនដូចគ្នា បានបញ្ជាក់ថា ពួកគេកំពុងសិក្សាអំពីប្រសិទ្ធភាពរបស់វ៉ាក់សាំងរបស់ពួកគេនៅក្នុងការទប់ទល់នឹងវីរុសជំងឺកូវីដ១៩ បំប្លែងថ្មីដែលតា (Delta) ប៉ុន្តែមិនទាន់ចេញផ្សាយនូវទិន្នន័យណាមួយនៅឡើយទេ។ នេះបើយោងតាមសេចក្ដីរាយការណ៍របស់សារព័ត៌មាន The Wall Street Journal។
ជារួម មានទិន្នន័យតិចតួចប៉ុណ្ណោះដែលបានមកពីការសិក្សាស្រាវជ្រាវហ្មត់ចត់លើវ៉ាក់សាំងរបស់ក្រុមហ៊ុន Sinovac នេះ។ ព័ត៌មានដែលមាននោះបានបង្ហាញថា វ៉ាក់សាំងនេះមានប្រសិទ្ធភាពទាប ជាងវ៉ាក់សាំងកូវីដ១៩ ដទៃទៀត ទោះបីជាវាអាចផ្តល់ឲ្យអ្នកដែលបានចាក់វ៉ាក់សាំងនេះនូវការការពារបានច្រើនគួរសមក៏ដោយ។
កាលពីខែមិថុនា រដ្ឋាភិបាលអ៊ុយរូហ្កាយបានចេញផ្សាយទិន្នន័យដែលបង្ហាញថា វ៉ាក់សាំងរបស់ក្រុមហ៊ុន Sinovac បានកាត់បន្ថយអត្រាការឆ្លងជំងឺកូវីដ១៩ បាន ៦១% ការតម្រូវឲ្យស្នាក់នៅព្យាបាលក្នុងមន្ទីរពេទ្យបាន ៩២% និងការស្លាប់បាន ៩៥%។
ព្រឹត្តបត្តិសិក្សាផ្នែកវេជ្ជសាស្រ្ត The New England Journal of Medicine បានផ្សព្វផ្សាយការសិក្សាស្រាវជ្រាវមួយកាលពីដើមខែកក្កដា ដែលបានប្រើប្រាស់លទ្ធផលពីយុទ្ធនាការចាក់វ៉ាក់សាំងទ្រង់ទ្រាយធំ ដែលបានចាប់ផ្តើមកាលពីខែកុម្ភៈនៅប្រទេសស៊ីលី។
លទ្ធផលនៃការសិក្សាស្រាវជ្រាវនេះបានបង្ហាញថា វ៉ាក់សាំងរបស់ក្រុមហ៊ុន Sinovac បានកាត់បន្ថយអត្រាការឆ្លងជំងឺកូវីដ១៩ បាន ៦៥,៩% មានប្រសិទ្ធភាពកាត់បន្ថយការតម្រូវឲ្យស្នាក់នៅព្យាបាលក្នុងមន្ទីរពេទ្យបាន ៨៧,៥% និងមានប្រសិទ្ធភាពបង្ការការស្លាប់បាន ៨៦,៣%។
នៅក្នុងការប្រៀបធៀប អង្គការសុខភាពពិភពលោក (WHO) បានបញ្ជាក់ថា វ៉ាក់សាំងកូវីដ១៩ របស់ក្រុមហ៊ុន Pfizer មានប្រសិទ្ធភាព ៩៥% ក្នុងការការពារអ្នកឆ្លងជំងឺកូវីដ១៩ មិនឲ្យចេញរោគសញ្ញា ហើយវ៉ាក់សាំងរបស់ក្រុមហ៊ុន Moderna មានប្រសិទ្ធភាព ៩៤% ក្នុងការការពារដូចគ្នានេះដែរ។
ទីភ្នាក់ងារសុខភាពសាធារណៈអង់គ្លេស (Public Health England) បានលើកឡើងកាលពីខែមុនថា ការវិភាគរបស់ខ្លួនលើប្រសិទ្ធភាពរបស់វ៉ាក់សាំងកូវីដ១៩ នៅក្នុងការទប់ទល់នឹងវីរុសជំងឺកូវីដ១៩ បំប្លែងថ្មីដែលតា (Delta) បានបង្ហាញថា វ៉ាក់សាំងរបស់ក្រុមហ៊ុន Pfizer មានប្រសិទ្ធភាព ៩៦% នៅក្នុងការពារមិនឲ្យមានករណីឈឺធ្ងន់ធ្ងរដែលតម្រូវឲ្យសម្រាកព្យាបាលនៅមន្ទីរពេទ្យ បើប្រៀបជាមួយនឹងវ៉ាក់សាំងរបស់ក្រុមហ៊ុន AstraZeneca ដែលមានប្រសិទ្ធភាពចំនួន ៩២%។
នៅក្នុងប្រទេសកម្ពុជា ចំនួនដូសវ៉ាក់សាំងកូវីដ១៩ របស់ក្រុមហ៊ុន Sinovac តំណាងឲ្យមួយភាគតូចប៉ុណ្ណោះនៃកិច្ចប្រឹងប្រែងចាក់វ៉ាក់សាំង បើប្រៀបទៅនឹងប្រទេសឥណ្ឌូណេស៊ី ប៉ុន្តែវានៅតែជាផ្នែកដ៏សំខាន់មួយនៃយុទ្ធនាការចាក់វ៉ាក់សាំងដែលយ៉ាងហោចណាស់ក៏មានពលរដ្ឋប្រមាណ ៥ លាននាក់ដែរ ដែលបានចាក់វ៉ាក់សាំងនេះបានមួយដូសរួចហើយ។
រដ្ឋលេខាធិការក្រសួងសុខាភិបាលកម្ពុជាអ្នកស្រី ឱ វណ្ណឌីន បានថ្លែងប្រាប់ VOA ថា វ៉ាក់សាំងកូវីដ១៩ ដែលត្រូវបានប្រើប្រាស់នៅក្នុងយុទ្ធនាការចាក់វ៉ាក់សាំងទ្រង់ទ្រាយធំនៅកម្ពុជារួមមាន វ៉ាក់សាំងរបស់ក្រុមហ៊ុន Sinovac វ៉ាក់សាំងរបស់ក្រុមហ៊ុន Sinopharm និងវ៉ាក់សាំងរបស់ក្រុមហ៊ុន AstraZeneca។
អ្នកស្រីបានបញ្ជាក់ថា វ៉ាក់សាំងទាំងនេះមានប្រសិទ្ធភាពនៅក្នុងការការពារមិនឲ្យមានករណីឈឺធ្ងន់ធ្ងរ និងករណីស្លាប់។ ប៉ុន្តែ អ្នកស្រីបានបន្ថែមថា អ្នកដែលចាក់វ៉ាក់សាំងបានពេញលេញហើយគឺនៅតែត្រូវគោរពតាមវិធានការបង្ការជំងឺកូវីដ១៩ ដដែល ដូចជា ការពាក់ម៉ាស និងការរក្សាគម្លាតជាដើម។
លោក ជា ផេងហួរ អាយុ ២១ ឆ្នាំ ដែលជានិស្សិតឆ្នាំទី ៣ ផ្នែកវិស្វកម្មសំណង់ស៊ីវិលនៅសាកលវិទ្យាល័យន័រតុន ក្នុងទីក្រុងភ្នំពេញ បាននិយាយថា លោកបានចាក់វ៉ាក់សាំងរបស់ក្រុមហ៊ុន Sinovac បានចំនួនពីរដូសរួចមកហើយកាលពីដើមខែមិថុនា បើទោះបីជាលោកមិនដឹងច្បាស់អំពីកម្រិតប្រសិទ្ធភាពនៃវ៉ាក់សាំងនេះក៏ដោយ។
លោកបានបញ្ជាក់ដូច្នេះថា៖ «អត់រំពឹងអាហ្នឹង [វ៉ាក់សាំង] ខ្លាំងពេកដែរ។ ទាល់យើងប្រយ័ត្នខ្លួនឯងដែរ។ បើយើងដើរពាសវាលពាសកាលអញ្ចឹង វ៉ាក់សាំងជួយម៉េចឈ្នះ»។
វ៉ាក់សាំងរបស់ក្រុមហ៊ុន Sinovac បានក្លាយជាផ្នែកដ៏ធំមួយនៃកិច្ចប្រឹងប្រែងចាក់វ៉ាក់សាំងបង្ការជំងឺកូវីដ១៩ នៅប្រទេសហ្វីលីពីន និងថៃ ប៉ុន្តែប្រទេសទាំងពីរក៏បានពឹងផ្អែកមួយភាគធំផងដែរលើវ៉ាក់សាំងរបស់ក្រុមហ៊ុនផ្សេងទៀតដូចជាក្រុមហ៊ុន Pfizer និងក្រុមហ៊ុន AstraZeneca ជាដើម៕
Indra Yoga Sun Narin Aun Chhengpor Steve Baragona និង Luke Hunt រាយការណ៍បន្ថែម ហើយព័ត៌មានមួយចំនួននៅក្នុងសេចក្ដីរាយការណ៍នេះ ត្រូវបានដកស្រង់ពីទីភ្នាក់ងារព័ត៌មាន Associated Press និង Reuters។