កាលពីយប់ថ្ងៃអាទិត្យទី២៨ ខែវិច្ឆិកា ឆ្នាំ២០១០ ត្រូវនឹងព្រឹក ថ្ងៃច័ន្ទ ទី២៩ ខែវិច្ឆិកា (ម៉ោងនៅប្រទេសកម្ពុជា) ពុទ្ធបរិស័ទចំណុះជើងវត្តពុទ្ធិការ៉ាម ក្នុងរដ្ឋ Maryland សហរដ្ឋអាមេរិក បានរៀបចំពិធីបុណ្យរៃអង្គាសប្រាក់។ ខាងក្រោមនេះគឺជាសំណួរចម្លើយរវាងនាងលី ម៉ូរីវ៉ាន់ និងលោកអ៊ឹម សុធារិទ្ធ ចូលរួមក្នុងពិធីនោះ ដែលមានខ្លឹមសារដូចតទៅ៖
សំណួរ៖ ខ្ញុំឮថា ប្រជាពលរដ្ឋខ្មែរអាមេរិកនៅជុំវិញរដ្ឋធានីវ៉ាស៊ីនតោនរៀបចំពិធីមួយនៅវត្តពុទ្ធិការ៉ាម រដ្ឋ Maryland។ តើពិធីនោះធ្វើក្នុងគោលបំណងអ្វី?
ចម្លើយ៖ បាទ កាលពីយប់ថ្ងៃអាទិត្យទី២៨ ខែវិច្ឆិកា ឆ្នាំ២០១០ ពុទ្ធបរិស័ទចំណុះជើងវត្តពុទ្ធិការ៉ាម ក្នុងរដ្ឋ Maryland សហរដ្ឋអាមេរិក បានជួបជុំគ្នារៀបចំប្រារព្ធពិធីខួបគម្រប់៧ថ្ងៃ ឧទ្ទិសមគ្គផលជូនដល់អ្នកទទួលមរណភាពចំនួន៣៥១នាក់ នៅក្នុងឧបទ្ទវហេតុនៅស្ពានពេជ្ររដ្ឋធានីភ្នំពេញ។ ពិធីនោះក៏ជាឱកាសមួយសម្រាប់រៃអង្គាសប្រាក់បន្ថែមសម្រាប់ជួយជនរងគ្រោះទាំងនោះផងដែរ។
សំណួរ៖ តើលោករៀបរាប់ត្រួសៗអំពីកម្មវិធីបុណ្យនោះផងបានទេ?
ចម្លើយ៖ បាទ កម្មវិធីបុណ្យនោះបានចាប់ផ្តើមឡើងចាប់ពីម៉ោង៦យប់ នៅពេលដែលលោកហែម ហេង ឯកអគ្គរាជទូតនៃព្រះរាជាណាចក្រកម្ពុជាប្រចាំសហរដ្ឋអាមេរិក មន្រ្តីស្ថានទូត និងពុទ្ធបរិស័ទមកពីរដ្ឋ Maryland, Virginia និងក្រុង Washington DC ចំនួនសរុបជិត១០០នាក់ ដែលប្រកបដោយទឹកមុខក្រៀមក្រំស្រងូតស្រងាត់ អញ្ជើញដល់។ ពិធីបុណ្យចាប់ផ្តើមដោយមានការបូជាទៀនធូប ស្មឹងស្មាធិ៍១នាទី បន្ទាប់មកមាននមស្ការព្រះរតនត្រ័យ សមាទានសីល មានសូត្រសុន្ទរកថា វិយោគកថា បង្សុកូល និងជយន្តោ ពហូទេវាឆ្លង។
សំណួរ៖ ឮថាមានការប្រមូលបច្ច័យដែរ។ តើប្រមូលបានប៉ុន្មានដែរ?
ចម្លើយ៖ បាទ ពិធីបុណ្យនោះរៃអង្គាសប្រាក់បាន២.២០៥ដុល្លារ ហើយបូកសរុបប្រាក់ដែលបានផ្ញើទៅកម្ពុជាហើយនោះ មានសរុបចំនួន៤.៩០០ដុល្លារ។
សំណួរ៖ ក្រៅពីពិធីបុណ្យនេះ តើនៅសហរដ្ឋអាមេរិកមានការរៀបចំពិធីបុណ្យអ្វីផ្សេងទៀតទេ?
ចម្លើយ៖ កាលពីល្ងាចថ្ងៃពុធ ត្រូវនឹងព្រឹកថ្ងៃព្រហស្បតិ៍ម៉ោងនៅកម្ពុជា នៅឯស្ថានទូតព្រះរាជាណាចក្រកម្ពុជា មានរៀបចំពិធីកាន់ទុក្ខ និងរៃអង្គាសប្រាក់ផងដែរ។ ហើយលោកហែម ហេង ឯកអគ្គរដ្ឋទូតនៃព្រះរាជាណាចក្រកម្ពុជា ប្រចាំសហរដ្ឋអាមេរិក បានប្រាប់វីអូអេសំឡេងសហរដ្ឋអាមេរិកនៅឯវត្តពុទ្ធិការ៉ាមថា នៅកន្លែងផ្សេងៗ ដូចជានៅក្រុង Seattle ក្រុងLowell ក្រុង Philadelphia ក្រុងឡងប៊ិច និងរដ្ឋផ្សេងៗទៀតនៅក្នុងសហរដ្ឋអារិក ក៏មានប្រារព្ធពិធីស្រដៀងគ្នានេះដែរ។
លីម៉ូរីវ៉ាន់៖ សូមអរគុណ លោកអ៊ឹម សុធារិទ្ធ
អ៊ឹម សុធារិទ្ធ៖ បាទ សូមអរគុណនាង លី ម៉ូរីវ៉ាន់៕