អតីតប្រធានាធិបតីសហរដ្ឋអាមេរិក លោក Donald Trump បានត្រឡប់ទៅធ្វើយុទ្ធនា ការឃោសនាបោះឆ្នោតវិញកាលពីថ្ងៃអង្គារជាលើកដំបូងចាប់តាំងពីអ្វីដែលទំនងជាការប៉ុនប៉ងធ្វើឃាតលោកជាលើកទី២កាលពីថ្ងៃអាទិត្យកន្លងទៅ ខណៈក្រុមអ្នកស៊ើបអង្កេតខិតខំស្វែងយល់បន្ថែមទៀតអំពីជនសង្ស័យដែលកំពុងជាប់ឃុំ។
ក្រៅពីការរៀបចំពិធីវេទិកាមហាជន Town Hall លោក Trump ថ្លែងប្រាប់ទូរទស្សន៍ Fox News ថាក្រុមកងការពារសម្ងាត់ Secret Service របស់លោកនឹងត្រូវបន្ថែមបុគ្គលិក។
កាសែត The New York Times បានរាយការណ៍កាលពីថ្ងៃអង្គារថាលោក Ronald Rowe ប្រធានស្តីទីនៃកងការពារសម្ងាត់បានជួបលោកTrumpកាលពីថ្ងៃចន្ទហើយប្រាប់លោកថាគេចាំបាច់ត្រូវមានការរៀបចំរចនាសម្ព័ន្ធសន្តិសុខថ្មីបន្ថែមទៀតដើម្បីអាចឱ្យលោកTrump អាចបន្តលេងវាយកូនគោលបាន។
ជនសង្ស័យ លោក Ryan Wesley Routh ដែលត្រូវបានចាប់ខ្លួនក្រោយពីរត់គេចខ្លួនពីទីលានវាយកូនគោលរបស់របស់លោកTrump នៅក្រុង West Palm Beach រដ្ឋ Florida បានបង្ហាញខ្លួនដំបូងនៅតុលាការកាលពីថ្ងៃចន្ទ ហើយត្រូវបានចោទពីបទកាន់កាប់អាវុធក្នុងនាមជាឧក្រិដ្ឋជន និងបទកាន់កាប់អាវុធដែលលេខសម្គាល់ត្រូវបានលុបចោល។
ក្រុមមន្ត្រីនិយាយថា ទិន្នន័យពីទូរសព្ទដៃលោក Routh បង្ហាញថា លោកបានរង់ចាំដល់ទៅ១២ម៉ោងនៅទីតាំងវាយកូនគោល ដោយបានលាក់ខ្លួននៅក្នុងគុម្ពោតនៅខាងក្រៅទីលាននោះ៕