បេក្ខជនប្រធានាធិបតីសហរដ្ឋអាមេរិកទាំងពីរ គឺលោក Donald Trump និងលោកស្រី Hillary Clinton បានធ្វើការដេញដោលតទល់គ្នាលើកទីបី ដែលជាការតទល់គ្នាលើកចុងក្រោយ កាលពីយប់ថ្ងៃពុធម្សិលមិញ នៅក្នុងទីក្រុង Las Vegas រដ្ឋ Nevada។
បេក្ខជនទាំងពីរបានធ្វើការដេញដោលគ្នាអំពីប្រធានបទជាច្រើន ដែលមានដូចជា បញ្ហាអន្តោប្រវេសន៍ បញ្ហាសិទ្ធិពលរដ្ឋអាមេរិកាំងក្នុងការទទួលបានផលប្រយោជន៍សង្គម បញ្ហាបំណុលរយៈពេលវែងរបស់សហរដ្ឋអាមេរិក បញ្ហាការតែងតាំងចៅក្រមតុលាការកំពូល បញ្ហាសេដ្ឋកិច្ច បញ្ហាគោលនយោបាយការបរទេស និងបញ្ហាភាពសក្ដិសមរបស់បេក្ខជននីមួយៗក្នុងការធ្វើជាប្រធានាធិបតីសហរដ្ឋអាមេរិក។
ពាក់ព័ន្ធនឹងបញ្ហាអន្តោប្រវេសន៍ លោក Trump បានចោទប្រកាន់លោកស្រី Clinton ថា ចង់លើកលែងទោសដល់ជនអន្តោប្រវេសន៍ខុសច្បាប់ទាំងអស់។ រីឯលោកស្រី Clinton វិញថា គម្រោងរបស់លោក Trump ក្នុងការបញ្ជូនជនអន្តោប្រវេសន៍ខុសច្បាប់រាប់លាននាក់ចេញពីសហរដ្ឋអាមេរិកគឺជាការបំបែកបំបាក់ក្រុមគ្រួសាររបស់ពួកគេ។
ចំពោះបញ្ហាសេដ្ឋកិច្ច លោកស្រី Clinton ថា លោកស្រីនឹងបង្កើតការងារថ្មីចំនួន ១០ លានការងារ បន្ថែមទៀត ដោយឲ្យពួកអ្នកមាន និងក្រុមហ៊ុនអាជីវកម្មផ្សេងៗបង់ពន្ធទៅតាមអ្វីដែលជាចំណែកកំណត់ដោយរដ្ឋសម្រាប់ពួកគេ។ ចំណែកឯលោក Trump វិញ បានសន្យាថា ប្រសិនបើលោកជាប្រធានាធិបតី នោះសេដ្ឋកិច្ចប្រទេសនឹងកើនឡើងរហូតដល់ ៥ ឬ ៦ ភាគរយ។ លោក Trump ថា លោកនឹងបង្កើតម៉ាស៊ីនសេដ្ឋកិច្ចមួយដែលមិនដែលឃើញនៅប៉ុន្មានទសវត្សរ៍កន្លងមកនេះ ប៉ុន្តែលោកមិនបានបញ្ជាក់លម្អិតអំពីថាតើលោកគ្រោងនឹងបង្កើតម៉ាស៊ីនសេដ្ឋកិច្ចនោះរបៀបណានោះទេ។
ចំណែកឯបញ្ហាគោលនយោបាយការបរទេសវិញ លោកស្រី Clinton ថា លោកស្រីនឹងមិនដាក់កងទ័ពសហរដ្ឋអាមេរិកនៅលើទឹកដីអ៊ីរ៉ាក់នោះទេ បន្ទាប់ពីពួកជ្រុលនិយមក្រុមរដ្ឋឥស្លាមចាញ់សង្គ្រាមនៅក្នុងទីក្រុង Mosul ប្រទេសអ៊ីរ៉ាក់ ហើយលោកស្រីបន្ថែមថា លោកស្រីនឹងជំរុញឲ្យមានតំបន់គ្មានការហោះហើរ និងកន្លែងសុវត្ថិភាពនៅក្នុងប្រទេសស៊ីរីដើម្បីការពារជនស៊ីវិល។ ប៉ុន្តែ លោក Trump ថា ទីក្រុង Mosul ធ្លាក់ក្នុងដៃពួកជ្រុលនិយមក្រុមរដ្ឋឥស្លាម គឺដោយសារតែរដ្ឋបាលរបស់លោក បារ៉ាក់ អូបាម៉ា។ លោក Trump បានបន្ថែមថា ប្រធានាធិបតីស៊ីរី Bashar al-Assad គឺម៉ឺងម៉ាត់ជាង និងឆ្លាតជាងលោកអូបាម៉ាខ្លាំងណាស់។
នៅក្នុងការបញ្ចប់ការថ្លែងរបស់ខ្លួន លោកស្រី Clinton បានប្រាប់អ្នកបោះឆ្នោតថា សហរដ្ឋអាមេរិកត្រូវការ ពលរដ្ឋអាមេរិកាំងទាំងអស់ មិនថាមកពីគណបក្សប្រជាធិបតេយ្យ ឬគណបក្សសាធារណរដ្ឋនោះទេ ដើម្បីជួយសហរដ្ឋអាមេរិកឲ្យរីកចម្រើនសម្រាប់ពលរដ្ឋអាមេរិកាំងទូទៅ។
រីឯលោក Trump វិញ លោកបានបញ្ជាក់ឡើងវិញអំពីពាក្យស្លោកនៃយុទ្ធនាការឃោសនាបោះឆ្នោតរបស់លោក ដែលលោកសន្យាថា នឹងធ្វើឲ្យសហរដ្ឋអាមេរិកខ្លាំងអស្ចារ្យម្ដងទៀត៕